Daily Murli for Saturday 20 July 2019

20-07-2019 praatahmurli om shanti "baapdaada"' madhuban

“meethe bachche - kalangeedhar banne ke liye apni avastha achal-adol banaao, jitna tum par kalank lagte hain, utna tum kalangeedhar bante hoˮ

prashn:- baap ki aagya kya hai? kis mukhya aagya par chalne vaale bachche dil takhtansheen bante hain?

uttar:- baap ki aagya hai - meethe bachche, tumhein koi se bhi khit-khit nahin karni hai। shanti mein rehna hai। agar koi ko tumhaari baat achhi nahin lagti to tum chup raho। ek-do ko tang nahin karo। baapdaada ke diltakhtansheen tab ban sakte jab andar koi bhi bhoot na rahe, mukh se kabhi koi kaduve bol na niklen, meetha bolna jeevan ki dhaarna ho jaae।

om shanti। bhagvaanuvaach, aatma-abhimaani bhav - pahle-pahle zaroor kehna pade। yeh hai bachchon ke liye saavdhaani। baap kehte hain ki ham bachche-bachche kehte hain to aatmaon ko hi dekhta hoon, shareer to puraani jutti hai। yeh satopradhaan ban nahin sakta। satopradhaan shareer to satayug mein hi milega। abhi tumhaari aatma satopradhaan ban rahi hai। shareer to vahi puraana hai। abhi tumko apni aatma ko sudhaarna hai। pavitra banna hai। satayug mein shareer bhi pavitra milega। aatma ko shuddh karne ke liye ek baap ko yaad karna hota hai। baap bhi aatma ko dekhte hain। sirf dekhne se aatma shuddh nahin banegi। woh to jitna baap ko yaad karenge utna shuddh hote jaayenge। yeh to tumhaara kaam hai। baap ko yaad karte-karte satopradhaan banna hai। baap to aaya hi hai raasta bataane। yeh shareer to ant tak puraana hi rahega। yeh to sirf karmendriyaan hain, jisse aatma ka connection hai। aatma gul-gul ban jaati hai phir kartavya bhi achhe karti hai। vahaan panchhi jaanvar bhi achhe-achhe rehte hain। yahaan chidiya manushyon ko dekh bhaagti hai, vahaan to aise achhe-achhe panchhi tumhaare aage-peechhe ghoomte phirte rahenge woh bhi kaaydesir। aise nahin ghar ke andar ghus aayenge, gand karke jaayenge। nahin, bahut kaayde ki duniya hoti hai। aage chal tumko sab saakshaatkaar hote rahenge। abhi margin to bahut padi hai। svarga ki mahima to aparmaapaar hai। baap ki mahima bhi aparmaapaar hai, to baap ke property ki mahima bhi aparmaapaar hai। bachchon ko kitna nasha chadhna chaahiye। baap kehte hain main un aatmaon ko yaad karta hoon, jo service karte hain woh automatically yaad aate hain। aatma mein man-buddhi hai na। samajhte hain ki ham first number ki service karte ya second number ki karte hain। yeh sab nambarvaar samajhte hain। koi to museum banaate hain, president, governor aadi ke paas jaate hain। zaroor achhi reeti samjhaate honge। sabmen apna-apna gun hai। koi mein achhe gun hote hain to kaha jaata hai yeh kitna gunvaan hai। jo serviceable honge woh sadaiv meetha bolenge। kaduva kabhi bol nahin sakenge। jo kaduva bolne vaale hain unmein bhoot hai। deh-abhimaan hai number one, phir unke peechhe aur bhoot pravesh karte hain।

manushya bad-chalan bhi bahut chalte hain। baap kehte hain in bichaaron ka dosh nahin hai। tumko mehnat aisi karni hai jaise kalpa pahle ki hai, apne ko aatma samajh baap ko yaad karo phir aahiste-aahiste saare vishwa ki dor tumhaare haathon mein aane vaali hai। drama ka chakra hai, time bhi theek bataate hain। baaki bahut kam samay bacha hai। vo log aajaadi dete hain to do tukda kar dete hain, aapas mein ladte rahen। nahin to unhon ka baarood aadi kaun lega। yeh bhi unhon ka vyaapaar hai na। drama anusaar yeh bhi unhon ki chaalaaki hai। yahaan bhi tukde-tukde kar diya hai। woh kehte yeh tukda hamko mile, poora bantavaara nahin kiya gaya hai, is taraph paani jaasti jaata hai, kheti bahut hoti hai, is taraph paani kam hai। aapas mein lad padte hain, phir civil war ho padti hai। jhagde to bahut hote hain। tum jab baap ke bachche bane ho to tum bhi gaali khaate ho। baba ne samjhaaya tha - abhi tum kalangeedhar bante ho। jaise baba gaali khaate hain, tum bhi gaali khaate ho। yeh to jaante ho ki in bichaaron ko pata nahin hai ki yeh vishwa ke maalik bante hain। 84 janmon ki baat to bahut sahaj hai। aapehi poojya, aapehi pujaari bhi tum bante ho। koi ki buddhi mein dhaarna nahin hoti hai, yeh bhi drama mein unka aisa part hai। kar kya sakte hain। kitna bhi maatha maaro parantu oopar chadh nahin sakte hain। tadbeer to karaai jaati hai lekin unki takdeer mein nahin hai। raajdhaani sthaapan hoti hai, unmein sab chaahiye। aisa samajhkar shant mein rehna chaahiye। koi se bhi khitpit ki baat nahin। pyaar se samjhaana padta hai - aise na karo। yeh aatma sunti hai, isse aur hi pad kam ho jaayega। koi-koi ko achhi baat samjhaao to bhi ashaanta ho padte hain, to chhod dena chaahiye। khud bhi aisa hoga to ek-do ko tang karta rahega। yeh pichhaadi tak rahega। maaya bhi din-pratidin kadi hoti jaati hai। mahaarthiyon se maaya bhi mahaarthi hokar ladti hai। maaya ke toophaan aate hain phir practice ho jaati hai baap ko yaad karne ki, ekdam jaise achal-adol rehte hain। samajhte hain maaya hairaan karegi। darna nahin hai। kalangeedhar banne vaalon par kalank lagte hain, ismen naaraaz nahin hona chaahiye। akhbaar vaale kuchh bhi khilaaph daalte hain kyonki pavitrata ki baat hai। ablaaon par atyaachaar honge। akaasur-bakaasur naam bhi hai। striyon ka naam bhi pootna, soopankha hai।

ab bachche pahle-pahle mahima bhi baap ki sunaate hain। behad ka baap kehte hain tum aatma ho। yeh knowledge ek baap ke sivaae koi de nahin sakta। rachta aur rachna ka gyaan, yeh hai padhaai, jisse tum svadarshan chakradhaari ban chakravarti raaja bante ho। alankaar bhi tumhaare hain parantu tum brahman purooshaarthi ho isliye yeh alankaar vishnu ko de diya hai। yeh sab baaten - aatma kya hai, paramatma kya hai, koi bhi bata nahin sakte। aatma kahaan se aai, nikal kaise jaati, kabhi kehte hain aankhon se nikli, kabhi kehte hain bhrakuti se nikli, kabhi kehte hain maathe se nikal gai। yeh to koi jaan nahin sakta। abhi tum jaante ho - aatma shareer aise chhodegi, baithe-baithe baap ki yaad mein deh ka tyaag kar denge। baap ke paas to khushi se jaana hai। puraana shareer khushi se chhodna hai। jaise sarpa ka misaal hai। jaanavron mein bhi jo akla hai, woh manushyon mein nahin hai। woh sanyaasi aadi to sirf drishtaant dete hain। baap kehte hain tumko aisa banna hai jaise bhramri keede ko transfer kar deti hai, tumko bhi manushya roopi keede ko transfer kar dena hai। sirf drishtaanta nahin dena hai lekin practical karna hai। ab tum bachchon ko vaapis ghar jaana hai। tum baap se varsa pa rahe ho to andar mein khushi honi chaahiye। woh to varse ko jaante hi nahin। shanti to sabko milti hai, sab shantidham mein jaate hain। sivaae baap ke koi bhi sarva ki sadgati nahin karte। yeh bhi samjhaana hota hai, tumhaara nivritti maarga hai, tum to brahm mein leen hone ka purooshaartha karte ho। baap to pravritti maarga banaate hain। tum satayug mein aa nahin sakte ho। tum yeh gyaan kisko samjha nahin sakenge। yeh bahut guhya baat hai। pahle to koi ko alaph-be hi padhaana padta hai। bolo tumko do baap hain - had ka aur behad ka। had ke baap ke paas janma lete ho vikaar se। kitne apaar duhkh milte hain। satayug mein to apaar sukh hain। vahaan to janma hi makkhan misal hota hai। koi duhkh ki baat nahin। naam hi hai svarga। behad ke baap se behad ki baadshaahi ka varsa milta hai। pahle hai sukh, peechhe hai duhkh। pahle duhkh phir sukh kehna wrong hai। pahle nai duniya sthaapan hoti hai, puraani thode hi sthaapan hoti hai। puraana makaan kabhi koi banaate hain kya। nai duniya mein to raavan ho na sake। yeh bhi baap samjhaate hain to buddhi mein yuktiyaan hon। behad ka baap behad ka sukh dete hain। kaise dete hain aao to samjhaayen। kahne ki bhi yukti chaahiye। duhkhadhaam ke duhkhon ka bhi tum saakshaatkaar karaao। kitne athaah duhkh hain, aprampaar hain। naam hi hai duhkhadhaam। inko sukhdhaam koi kah nahin sakta। sukhdhaam mein shreekrishna rehte hain। krishna ke mandir ko bhi sukhdhaam kehte hain। woh sukhdhaam ka maalik tha, jiski mandiron mein abhi pooja hoti hai। abhi yeh baba lakshmi-naaraayan ke mandir mein jaayenge to kahenge oho! yeh to ham bante hain। inki pooja thode hi karenge। number one bante hain to phir second third ki pooja kyon karen। ham to sooryavanshi bante hain। manushyon ko thode hi pata hai। woh to sabko bhagwan kehte rehte hain। andhakaar kitna hai। tum kitna achhi reeti samjhaate ho। time lagta hai। jo kalpa pahle laga tha, jaldi kuchh bhi kar nahin sakte। heere jaisa janma tumhaara yeh abhi ka hai। devtaaon ka bhi heere jaisa janma nahin kahenge। woh koi eeshvareey parivaar mein thode hi hain। yeh hai tumhaara eeshvareey parivaar। woh hai daivi parivaar। kitni nai-nai baaten hain। geeta mein to aate mein namak misal hai। kitni bhool kar di hai - krishna ka naam daalkar। bolo, tum devtaaon ko to devta kehte ho phir krishna ko bhagwan kyon kehte ho। vishnu kaun hai? yeh bhi tum samajhte ho। manushya to bigar gyaan ke aise hi pooja karte rehte hain। praacheen bhi devi-devta hain jo svarga mein hokar gaye hain। sato, rajo, tamo mein sabko aana hai। is samay sab tamopradhaan hain। bachchon ko points to bahut samjhaate hain। badge par bhi tum achha samjha sakte ho। baap aur padhaane vaale teacher ko yaad karna pade। parantu maaya ki bhi kitni kashmaksha chalti hai। bahut achhi-achhi points nikalti rehti hain। agar sunenge nahin to suna kaise sakenge। aksar karke baahar mein bade mahaarthi idhar-udhar jaate hain to murli miss kar dete hain, phir padhte nahin। pet bhara hua hai। baap kehte hain kitni guhya-guhya baaten tumko sunaata hoon, jo sunkar dhaaran karna hai। dhaarna nahin hogi to kachche rah jaayenge। bahut bachche bhi vichaar saagar manthan kar achhi-achhi points sunaate hain। baba dekhte hain, sunte hain jaisi-jaisi avastha aisi-aisi points nikaal sakte hain। jo kabhi isne nahin sunaai hai woh serviceable bachche nikaalte hain। service par hi lage rehte hain। magazine mein bhi achhi points daalte hain।

to tum bachche vishwa ka maalik bante ho। baap kitna oonch banaate hain, geet mein bhi hai na saare vishwa ki baagdor tumhaare haath mein hogi। koi chheen na sake। yeh lakshmi-naaraayan vishwa ke maalik the na। unhon ko padhaane vaala zaroor baap hi hoga। yeh bhi tum samjha sakte ho। unhonne raajya pad paaya kaise? mandir ke pujaari ko pata nahin। tumko to athaah khushi honi chaahiye। yeh bhi tum samjha sakte ho eeshvar sarvavyaapi nahin। is samay to 5 bhoot sarvavyaapi hain। ek-ek mein yeh vikaar hain। maaya ke 5 bhoot hain। maaya sarvavyaapi hai। tum phir eeshvar sarvavyaapi kah dete ho। yeh to bhool hai na। eeshvar sarvavyaapi ho kaise sakta। woh to behad ka varsa dete hain। kaanton ko phool banaate hain। samjhaane ki practice bhi bachchon ko karni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jab koi ashaanti phailaate hain ya tang karte hain to tumhein shant rehna hai। agar samjhaani milte hue bhi koi apna sudhaar nahin kar sakte to kahenge inki takdeer kyonki raajdhaani sthaapan ho rahi hai।

2) vichaar saagar manthan kar gyaan ki nai-nai points nikaal service karni hai। baap murli mein roz jo guhya baaten sunaate hain, woh kabhi miss nahin karni hai।

vardaan:- samay pramaan har shakti ka anubhav practical swaroop mein karne vaale master sarvashaktimaan bhav

master ka arth hai ki jis shakti ka jis samay aahvaan karo vo shakti usi samay practical swaroop mein anubhav ho। order kiya aur haajir। aise nahin ki order karo sahanshakti ko aur aaye saamna karne ki shakti, to usko master nahin kahenge। to trial karo ki jis samay jo shakti aavashyak hai us samay vahi shakti kaarya mein aati hai? ek second ka bhi pharka pada to jeet ke bajaae haar ho jaayegi।

slogan:- buddhi mein jitna eeshvareey nasha ho, karma mein utni hi namrata ho।