Daily Murli for Saturday 18 January 2020

18-01-2020 praatahmurli om shanti "baapdaada"' madhuban

“meethe bachche tumhaari chalan bahut royal honi chaahiye, tum devta ban rahe ho to lakshya aur lakshan, kathni aur karni samaan banaao''

geet:- tumhein paake hamne jahaan pa liya hai…

om shanti। meethe-meethe roohaani bachchon ne geet suna। abhi to thode bachche hain phir anekaanek bachche ho jaayenge। prajaapita brahma ko jaanna to sabhi ko hai na। sabhi dharma vaale maanenge। baba ne samjhaaya hai woh laukik baap bhi had ke brahma hain। unhon ka surname se sijra banta hai। yeh phir hai behad ka। naam hi hai prajaapita brahma। woh had ke brahma praja rachte hain, limited। koi do chaar rachenge, koi nahin bhi rachte। inke liye to yeh kah nahin sakenge ki santaan nahin hain। inki santaan to saari duniya hai। behad ke baapdaada donon ka meethe-meethe bachchon mein bahut roohaani lav hai। bachchon ko kitna lav se padhaate hain aur kya se kya banaate hain! to bachchon ko kitna khushi ka paara chadha rehna chaahiye। khushi ka paara tab chadhega jab baap ko nirantar yaad karte rahenge। baap kalpa-kalpa bahut pyaar se bachchon ko paavan banaane ki seva karte hain। 5 tatvon sahit sabko paavan banaate hain। kaudi se heere jaisa banaate hain। kitni badi behad ki seva hai। baap bachchon ko bahut pyaar se shiksha bhi dete rehte hain kyonki bachchon ko sudhaarna baap va teacher ka hi kaam hai। baap ki shreemat se hi tum shreshtha bante ho। yeh bhi bachchon ko chart mein dekhna chaahiye ki ham shreemat par chalte hain va apni manmat par? shreemat se hi tum accurate banenge। jitni baap se preet buddhi hogi utni gupta khushi se bharpoor rahenge। apni dil se poochhna hai hamko itni kaapaari khushi hai? avyabhichaari yaad hai? koi tamanna to nahin hai? ek baap ki yaad hai? svadarshan chakra phirta rahe tab praan tan se niklen। ek shivbaaba doosra na koi। yahi antim mantra hai।

baap roohaani bachchon se poochhte hain meethe bachche, jab baapdaada ko saamne dekhte ho to buddhi mein aata hai ki hamaara baba, baap bhi hai, shikshak bhi hai, satguru bhi hai। baap hamko is puraani duniya se le jaate hain nai duniya mein। yeh puraani duniya to ab khalaas hui ki hui। yeh to ab koi kaam ki nahin hai। baap kalpa-kalpa nai duniya banaate hain। ham kalpa-kalpa nar se naaraayan bante hain। bachchon ko yeh simran kar kitna hullaas mein rehna chaahiye। bachche, time bahut thoda hai। aaj kya hai kal kya hoga। aaj aur kal ka khel hai isliye bachchon ko gaphlat nahin karni hai। tum bachchon ki chalan badi royal honi chaahiye। apne aapko dekhna hai devtaaon misal hamaari chalan hai? devtaai dimaag rehta hai? jo lakshya hai woh ban bhi rahe hain ya sirf kathni hi hai? jo knowledge mili hai usmein masta rehna chaahiye। jitna antarmukh ho in baaton par vichaar karte rahenge to bahut khushi rahegi। yeh bhi tum bachche jaante ho ki is duniya se us duniya mein jaane ka baaki thoda samay hai। jab us duniya ko chhod diya phir pichhaadi mein kyon dekhen! buddhiyog us taraph kyon jaata? yeh bhi buddhi se kaam lena hai। jab paar nikal gaye phir buddhi kyon jaati? beeti hui baaton ka chintan mat karo। is puraani duniya ki koi bhi aash na rahe। ab to ek hi shreshtha aash rakhni hai - ham to chale sukhdhaam। kahaan bhi thaharna nahin hai। dekhna nahin hai। aage badhte jaana hai। ek taraph hi dekhte raho tab hi achal-adol sthir avastha rahegi। samay bahut naazuk hota jaata hai, is puraani duniya ki haalten bigadti hi jaati hain। tumhaara isse koi connection nahin। tumhaara connection hai nai duniya se, jo ab sthaapan ho rahi hai। baap ne samjhaaya hai, abhi 84 ka chakra poora hua। ab yeh duniya khatma honi hi hai, iski bahut serious haalat hai। is samay sabse adhik gussa prakriti ko aata hai isliye sab khalaas kar deti hai। abhi tum jaante ho yeh prakriti apna gussa jor se dikhaayegi - saari puraani duniya ko dubo degi। floods honge। aag lagegi। manushya bhookhon marenge। earthquake mein makaan aadi sab gir padenge। yeh sab haalten saari duniya ke liye aani hain। anek prakaar se maut hogi। gas ke aise-aise bombs chhodenge - jiski baans (badbu) se hi manushya mar jaaen। yeh sab drama plan bana hua hai। ismen dosh kisi ka bhi nahin hai। vinaash to hone ka hi hai isliye tumhein is puraani duniya se buddhi ka yog hata dena hai। ab tum kahenge vaah satguru... jisne hamko yeh raasta bataaya hai। hamaara sachcha-sachcha guru baba ek hi hai। jiska naam bhakti mein bhi chala aata hai। jiski hi vaah-vaah gaai jaati hai। tum bachche kahenge - vaah satguru vaah! vaah takdeer vaah! vaah drama vaah! baap ke gyaan se hamko sadgati mil rahi hai।

tum bachche nimitta bane ho vishwa mein shanti sthaapan karne ke। to sabko yeh khushkhabri sunaao ki ab naya bhaarat, nai duniya jismen lakshmi-naaraayan ka raajya tha woh phir se sthaapan ho raha hai। yeh duhkhadhaam badal sukhdhaam banna hai। andar mein khushi rahni chaahiye ki ham sukhdhaam ke maalik ban rahe hain। vahaan aise koi nahin poochhega ki tum raazi-khushi ho? tabiyat theek hai? yeh is duniya mein poochha jaata hai kyonki yeh hai hi duhkh ki duniya। tum bachchon se bhi yeh koi poochh nahin sakta। tum kahenge ham eeshvar ke bachche, tum hamse kya khush khairaaphat poochhte ho! ham to sadaiv raazi khushi hain। svarga se bhi yahaan jaasti khushi hai kyonki svarga sthaapan karne vaala baap mila to sab kuchh mila। parvaah thi paar brahm mein rahne vaale baap ki woh mil gaya, baaki kiski parvaah! yeh sadaiv nasha rehna chaahiye। bahut royal, meetha banna hai। apni takdeer ko oonch banaane ka abhi hi samay hai। padmaapadmapti banne ka mukhya saadhan hai - kadam-kadam par khabardaari se chalna। antarmukhi banna। yeh sadaiv dhyaan rahe - “jaisa karma ham karenge hamko dekh aur karenge।'' deh ahankaar aadi vikaaron ka beej to aadhaakalpa se boya hua hai। saare duniya mein yeh beej hai। ab usko merge karna hai। deh-abhimaan ka beej nahin bona hai। abhi dehi-abhimaani ka beej bona hai। tumhaari ab hai vaanaprastha avastha। most beloved baap mila hai unko hi yaad karna hai। baap ke badle deh ko va dehdhaariyon ko yaad karna - yeh bhi bhool hai। tumhein aatma-abhimaani banne ki, sheetal banne ki bahut mehnat karni hai।

meethe bachche, is apni life se tumhein kabhi bhi tang nahin hona chaahiye। yeh jeevan amoolya gaai hui hai, inki sambhaal bhi karni hai। saath-saath kamaai bhi karni hai। yahaan jitne din rahenge, baap ko yaad kar athaah kamaai jama karte rahenge। hisaab-kitaab chuktu hota rahega isliye kabhi bhi tang nahin hona hai। bachche kehte hain baba। satayug kab aayega? baba kehte bachche pahle tum karmaateet avastha to banaao। jitna samay mile purushaartha karo karmaateet banne ka। bachchon mein nashtomoha banne ki bhi badi himmat chaahiye। behad ke baap se poora varsa lena hai to nashtomoha banna pade। apni avastha ko bahut oonch banaana hai। baap ke bane ho to baap ki hi alaukik seva mein lag jaana hai। svabhaav bahut meetha chaahiye। manushya ko svabhaav hi bahut tang karta hai। gyaan ka jo teesra netra mila hai, usse apni jaanch karte raho। jo bhi defect ho unko nikaal pure daaimanda banna hai। thoda bhi defect hoga to value kam ho jaayegi isliye mehnat kar apne ko valuable heera banaana hai।

tum bachchon se baap ab nai duniya ke sambandh ka purushaartha karaate hain। meethe bachche, ab behad ke baap aur behad sukh ke varse se sambandh rakho। ek hi behad ka baap hai jo bandhan se chhudaakar tumhein alaukik sambandh mein le jaate hain। sadaiv yeh smriti rahe ki ham eeshvareey sambandh ke hain। yeh eeshvareey sambandh hi sada sukhdaai hai। achha!

meethe-meethe sikeeldhe, ati snehi bachchon ko maat-pita baapdaada ka dil va jaan, sik va prem se yaadapyaar aur good morning। roohaani baap ki roohaani bachchon ko namaste।

avyakt baapdaada ke madhur mahaavaakya (revise)

saphalta-moorta banne ke liye mukhya do hi visheshtaayen chaahiye - ek purity, doosri unity। agar purity ki kami hai to unity mein bhi kami hai। purity sirf brahmacharya vrat ko nahin kaha jaata, sankalp, svabhaav, sanskaar mein bhi purity। maanon ek-doosre ke prati eershya ya ghrina ka sankalp hai to purity nahin, impurity kahenge। purity ki paribhaasha mein sarva vikaaron ka ansh-maatra tak na hona hai। sankalp mein bhi kisi prakaar ki impurity na ho। aap bachche nimitta bane hue ho - bahut oonche kaarya ko sampanna karne ke liye। nimitta to mahaarthi roop se bane hue ho na? agar list nikaalte hain to list mein bhi to serviceable tatha service ke nimitta banen brahma vatsa hi mahaarthi ki list mein gine jaate hain। mahaarthi ki visheshta kahaan tak aayi hai? so to har-ek svayan jaane। mahaarthi jo list mein gina jaata hai vo aage chalkar mahaarthi hoga athva vartamaan ki list mein mahaarthi hai। to in donon baaton ke oopar attention chaahiye।

unity arthaat sanskaar-svabhaav ke milan ki unity। koi ka sanskaar aur svabhaav na bhi mile to bhi koshish karke milaao, yeh hai unity। sirf sangathan ko unity nahin kahenge। serviceable nimitta bani aatmaayen in do baaton ke sivaay behad ki service ke nimitta nahin ban sakti hain। had ke ho sakte hain, behad ki service ke liye ye donon baaten chaahiyen। sunaaya tha na - raas mein taal milaane par hi vaah-vaah hoti hai। to yahaan bhi taal milaana arthaat raas milaana hai। itni aatmaayen jo knowledge varnan karti hain to sabke mukh se yeh nikalta hai ki ye ek hi baat kehte hain, in sabka ek hi topic hai, ek hi shabd hai, yeh sab kehte hai na? isi prakaar sabke svabhaav aur sanskaar ek-do mein milen tab kahenge raas milaana। iska bhi plan banaao।

koi bhi kamzori ko mitaane ke liye vishesh mahaakaali swaroop shaktiyon ka sangathan chaahiye jo apne yog-agni ke prabhaav se kamjor vaataavran ko parivartan karen। abhi to drama anusaar har-ek chalan roopi darpan mein antim result spashta hone vaali hai। aage chal kar mahaarthi bachche apne knowledge ki shakti dvaara har-ek ke chehre se unhon ki karma-kahaani ko spashta dekh sakenge। jaise malechchha bhojan ki badbu samajh mein aa jaati hai, vaise malechchha sankalp roopi aahaar sveekaar karne vaali aatmaon ke vibration se buddhi mein spashta touching hogi, iska yantra hai buddhi ki line clear। jiska yeh yantra powerful hoga woh sahaj jaan sakenge।

shaktiyon va devtaaon ke jad chitron mein bhi yeh visheshta hai, jo koi bhi paap-aatma apna paap unhon ke aage jaakar chhipa nahin sakti। aap hi yeh varnan karte rehte hain ki ham aise hain। to jad yaadgaar mein bhi ab antakaal tak yeh visheshta dikhaai deti hai। chaitanya roop mein shaktiyon ki yeh visheshta prasiddha hui hai tab to yaadgaar mein bhi hai। yeh hai master jaani jaananhaar ki stage arthaat knowledgeful ki stage। yeh stage bhi practical mein anubhav hogi, hoti ja rahi hai aur hogi bhi। aisa sangathan banaaya hai? banna to hai hi। aise shama-swaroop sangathan chaahiye, jinhon ke har kadam se baap ki pratyakshata ho। achha।

vardaan:- seva karte hue yaad ke anubhvon ki race karne vaale sada lavleen aatma bhav

yaad mein rehte ho lekin yaad dvaara jo praaptiyaan hoti hain, us praapti ki anubhooti ko aage badhaate jaao, iske liye abhi vishesh samay aur attention do jisse maaloom pade ki yeh anubhvon ke saagar mein khoi hui lavleen aatma hai। jaise pavitrata, shanti ke vaataavran ki bhaasna aati hai vaise shreshtha yogi, lagan mein magan rahne vaale hain - yeh anubhav ho। knowledge ka prabhaav hai lekin yog ke siddhi swaroop ka prabhaav ho। seva karte hue yaad ke anubhvon mein doobe hue raho, yaad ki yaatra ke anubhvon ki race karo।

slogan:- siddhi ko sveekaar kar lena arthaat bhavishya praalabdha ko yahaan hi samaapta kar dena।

avyakt sthiti ka anubhav karne ke liye vishesh homework

jaise brahma baap ne nishchay ke aadhaar par, ruhaani nashe ke aadhaar par, nishchit bhaavi ke gyaata ban second mein sab saphal kar diya। apne liye kuchh nahin rakha। to sneh ki nishaani hai sab kuchh saphal karo। saphal karne ka arth hai shreshtha taraph lagaana।