Daily Murli for Saturday 11 July 2020

11-07-2020 praatahmurli om shanti "baapdaada"' madhuban

“meethe bachche - sada ek hi phikra mein raho ki humein achhi reeti padhkar apne ko raajtilak dena hai, padhaai se hi raajaai milti hai''

prashn:- bachchon ko kis hullaas mein rehna hai? dilshikasta nahin hona hai kyon?

uttar:- sada yahi hullaas rahe ki humein in lakshmi-naaraayan jaisa banna hai, iska purushaartha karna hai। dilshikasta kabhi nahin hona hai kyonki yeh padhaai bahut sahaj hai, ghar mein rehte bhi padh sakte ho, iski koi fees nahin hai, lekin himmat zaroor chaahiye।

geet:- tumheen ho maata pita tumheen ho…

om shanti। bachchon ne apne baap ki mahima suni। mahima ek ki hi hai aur koi ki mahima gaai nahin ja sakti। jabki brahma-vishnu-shankar ki bhi koi mahima nahin hai। brahma dvaara sthaapna karaate hain, shankar dvaara vinaash karaate hain, vishnu dvaara paalna karaate hain। lakshmi-naaraayan ko aisa laayak bhi shivbaaba hi banaate hain, unki hi mahima hai, unke sivaae phir kiski mahima gaai jaae। inko aisa banaane vaala teacher na ho to yeh bhi aise na banen। phir mahima hai sooryavanshi gharaane ki, jo raajya karte hain। baap sangam par na aayen to inhon ko raajaai bhi mil na sake। aur to kiski mahima hai nahin। foreigners aadi koi ki bhi mahima karne ki darkaar nahin। mahima hai hi sirf ek ki, doosra na koi। oonch te oonch shivbaaba hi hai। unse hi oonch pad milta hai to unko achhi tarah se yaad karna chaahiye na। apne ko raaja banaane ke liye aapehi padhna hai। jaise bairistari padhte hain to apne ko padhaai se barrister banaate hain na। tum bachche jaante ho shivbaaba hamko padhaate hain। jo achhi reeti padhega, vahi oonch pad paayega। nahin padhne vaale pad pa na saken। padhne liye shreemat milti hai। mool baat hai paavan banne ki, jiske liye yeh padhaai hai। tum jaante ho is samay sab tamopradhaan patit hain। achhe va bure manushya to hote hi hain। pavitra rahne vaale ko achha kaha jaata hai। achha padhkar bada aadmi banta hai to mahima hoti hai parantu hain to sab patit। patit hi patit ki mahima karte hain। satayug mein hain paavan। vahaan koi kiski mahima nahin karte। yahaan pavitra sannyaasi bhi hain, apvitra grihasthi bhi hain, to pavitra ki mahima gaai jaati hai। vahaan to yatha raaja-raani tatha praja hote hain। aur koi dharma nahin jiske liye pavitra, apvitra kahen। yahaan to koi grihasthiyon ki bhi mahima gaate rehte। unke liye jaise vahi khuda, allaah hai। parantu allaah ko to patit-paavan, liberator, guide kaha jaata hai। woh phir sab kaise ho sakte! duniya mein kitna ghor andhiyaara hai। abhi tum bachche samajhte ho to bachchon ko yeh ona rehna chaahiye - hamko padhkar apne ko raaja banaana hai। jo achhi reeti purooshaartha karenge vahi raajtilak paayenge। bachchon ko hullaas mein rehna chaahiye - ham bhi in lakshmi-naaraayan jaise banen। ismen moonjhane ki darkaar nahin। purooshaartha karna chaahiye। dilshikasta nahin hona chaahiye। yeh padhaai aisi hai, khatiya par soye hue bhi padh sakte ho। vilaayat mein rehte bhi padh sakte ho। ghar mein rehte bhi padh sakte ho। itni sahaj padhaai hai। mehnat kar apne paapon ko kaatna hai aur doosron ko bhi samjhaana hai। doosre dharma vaalon ko bhi tum samjha sakte ho। koi ko bhi yeh bataana hai - tum aatma ho। aatma ka svadharma ek hi hai, inmen koi pharka nahin pad sakta hai। shareer se hi anek dharma hote hain। aatma to ek hi hai। sab ek hi baap ke bachche hain। aatmaon ko baba ne adopt kiya hai isliye brahma mukh vanshaavli gaaye jaate hain।

koi ko bhi samjha sakte ho - aatma ka baap kaun hai? form jo tum bharaate ho usmein bada arth hai। baap to zaroor hai na, jisko yaad bhi karte hain, aatma apne baap ko yaad karti hai। aajkal to bhaarat mein koi ko bhi father kah dete hain। mayor ko bhi father kahenge। parantu aatma ka baap kaun hai, use jaante nahin hain। gaate bhi hain tum maat-pita... parantu woh kaun hai, kaise hai, kuchh bhi pata nahin। bhaarat mein hi tum maat-pita kah bulaate hain। baap hi yahaan aakar mukh vanshaavli rachte hain। bhaarat ko hi mother country kaha jaata hai kyonki yahaan hi shivbaaba maat-pita ke roop mein part bajaate hain। yahaan hi bhagwan ko maat-pita ke roop mein yaad karte hain। videshon mein sirf god father kah bulaate hain, parantu maata bhi chaahiye na jisse bachchon ko adopt kare। puroosh bhi stri ko adopt karte hain phir unse bachche paida hote hain। rachna rachi jaati hai। yahaan bhi ismen parampita paramatma baap pravesh kar adopt karte hain। bachche paida hote hain isliye inko maat-pita kaha jaata hai। woh hai aatmaon ka baap phir yahaan aakar utpatti karte hain। yahaan tum bachche bante ho to father aur mother kaha jaata hai। woh to hai sweet hom, jahaan sab aatmaayen rehti hain। vahaan bhi baap ke bigar koi le ja na sake। koi bhi mile to bolo tum sweet hom jaana chaahte ho? phir paavan zaroor banna pade। abhi tum patit ho, yeh hai hi iron aged tamopradhaan duniya। abhi tumko jaana hai vaapis ghar। iron aged aatmaayen to vaapis ghar ja na saken। aatmaayen sweet hom mein pavitra hi rehti hain to ab baap samjhaate hain, baap ki yaad se hi vikarma vinaash honge। koi bhi dehdhaari ko yaad na karo। baap ko jitna yaad karenge utna paavan banenge aur phir oonch pad paayenge nambarvaar। lakshmi-naaraayan ke chitra par koi ko bhi samjhaana sahaj hai। bhaarat mein inka raajya tha। yeh jab raajya karte the to vishwa mein shanti thi। vishwa mein shanti baap hi kar sakte hain aur koi ki taakat nahin। abhi baap hamko raajayog sikhla rahe hain, nai duniya ke liye raajaaon ka raaja kaise ban sakte hain woh batlaate hain। baap hi knowledgeful hai। parantu unmein kaun-si knowledge hai, yeh koi nahin jaante hain। srishti ke aadi-madhya-ant ki history-geography behad ka baap hi sunaate hain। manushya to kabhi kahenge sarvavyaapi hai ya kehte sabke andar ko jaanne vaala hai। phir apne ko to kah na saken। yeh sab baaten baap baith samjhaate hain। achhi reeti dhaaran kar aur harshit hona hai। in lakshmi-naaraayan ka chitra sadaiv harshitmukh vaala hi banaate hain। school mein oonch darja padhne vaale kitna harshit honge। doosre bhi samjhenge yeh to bahut bada imtahaan paas karte hain। yeh to bahut oonchi padhaai hai। fee aadi ki koi baat nahin sirf himmat ki baat hai। apne ko aatma samajh baap ko yaad karna hain, jismen hi maaya vighna daalti hai। baap kehte hain pavitra bano। baap se pratigya kar phir kaala munh kar dete hain, bahut jabardasta maaya hai, fail ho jaate hain to phir unka naam nahin gaaya ja sakta hai। phalaane-phalaane shuru se lekar bahut achhe chal rahe hain। mahima gaai jaati hai। baap kehte hain apne liye aapehi purushaartha kar raajdhaani praapta karni hai। padhaai se oonch pad paana hai। yeh hai hi raajayog। praja yog nahin hai। parantu praja bhi to banenge na। shakla aur service se maaloom pad jaata hai ki yeh kya banne laayak hain। ghar mein student ki chaal-chalan se samajh jaate hain, yeh first number mein, yeh third number mein aayenge। yahaan bhi aise hain। jab pichhaadi mein imtahaan poora hoga tab tumko sab saakshaatkaar honge। saakshaatkaar hone mein koi deri nahin lagti hai phir lajja aayegi, ham naapaas ho gaye। naapaas hone vaale ko pyaar kaun karenge?

manushya bioscope dekhne mein khushi ka anubhav karte hain lekin baap kehte hain number one ganda banaane vaala hai bioscope। usmein jaane vaale bahut karke fail ho gir padte hain। koi-koi female bhi aisi hain jo bioscope mein jaane bigar neend na aaye। bioscope dekhne vaale apvitra banne ka purooshaartha zaroor karenge। yahaan jo kuchh ho raha hai, jismen manushya khushi samajhte hain woh sab duhkh ke liye hai। yeh hai vinaashi khushiyaan। avinaashi khushi, avinaashi baap se hi milti hai। tum samajhte ho baba hamko in lakshmi-naaraayan jaisa banaate hain। vaise aage to 21 janma ke liye likhte the। abhi baba likhte hain 50-60 janma kyonki dvaapar mein bhi pahle to bahut dhanvaan sukhi rehte ho na। bhal patit bante ho to bhi dhan bahut rehta hai। yeh to bilkul jab tamopradhaan bante hain tab duhkh shuru hota hai। pahle to sukhi rehte ho। jab bahut duhkhi hote ho tab baap aate hain। maha ajaamil jaise paapiyon ka bhi uddhaar karte hain। baap kehte hain main sabko le jaaoonga muktidhaam। phir satayug ki raajaai bhi tumko deta hoon। sabka kalyaan to hota hai na। sabko apne thikaane par pahuncha dete hain - shanti mein va sukh mein। satayug mein sabko sukh rehta hai। shantidham mein bhi sukhi rehte hain। kehte hain vishwa mein shanti ho। bolo, in lakshmi-naaraayan ka jab raajya tha to vishwa mein shanti thi na। duhkh ki baat ho nahin sakti। na duhkh, na ashaanti। yahaan to ghar-ghar mein ashaanti hai। desh-desh mein ashaanti hai। saare vishwa mein hi ashaanti hai। kitne tukde-tukde ho pade hain। kitni phrekshan hai। 100 mile par bhaasha alag। ab kehte hain bhaarat ki praacheen bhaasha sanskrit hai। ab aadi sanaatan dharma ka hi kisko pata nahin hai to phir kaise kehte ki yeh praacheen bhaasha hai। tum bata sakte ho aadi sanaatan devi-devta dharma kab tha? tumhaare mein bhi nambarvaar hain। koi to dullhead bhi hote hain। dekhne mein bhi aata hai yeh jaise pattharbuddhi hain। agyaan kaal mein bhi kehte hain na - he bhagwan inki buddhi ka taala kholo।

baap tum sab bachchon ko gyaan ki roshni dete hain usse taala khulta jaata hai। phir bhi koi-koi ki buddhi khulti nahin। kehte hain baba aap buddhivaanon ki buddhi ho। hamaare pati ki buddhi ka taala kholo। baap kehte hain isliye main thode hi aaya hoon, jo ek-ek ki buddhi ka taala baith kholoon। phir to sabki buddhi khul jaae, sab mahaaraaja-mahaaraani ban jaayen। ham kaise sabka taala kholenge। unko satayug mein aana hi nahin hoga to ham taala kaise kholenge! drama anusaar samay par hi unki buddhi khulegi। mai kaise kholoonga! drama ke oopar bhi hai na। sab full paas thode hi hote hain। school mein bhi nambarvaar hote hain। yeh bhi padhaai hai। praja bhi banna hai। sabka taala khul jaae to praja kahaan se aayegi। yeh to kaayda nahin। tum bachchon ko purooshaartha karna hai। har ek ke purooshaartha se jaana jaata hai, jo achhi reeti padhte hain, unko jahaan-tahaan bulaaya jaata hai। baba jaante hain kaun-kaun achhi reeti service kar rahe hain। bachchon ko achhi reeti padhna hai। achhi reeti padhenge to ghar le jaaoonga phir svarga mein bhej doonga। nahin to sazaayen bahut kadi hain। pad bhi bhrashta ho jaayega। student ko teacher ka show nikaalna chaahiye। golden ej mein paarasbuddhi the, abhi hai iron ej to yahaan golden ej buddhi ho kaise sakti। vishwa mein shanti thi jabki ek raajya, ek hi dharma tha। akhbaar mein bhi tum daal sakte ho bhaarat mein jab inka raajya tha to vishwa mein shanti thi। aakhreen samjhenge zaroor। tum bachchon ka naam baala hona hai। us padhaai mein kitne kitaab aadi padhte hain। yahaan to kuchh nahin। padhaai bilkul sahaj hai। baaki yaad mein achhe-achhe mahaarthi bhi fail hain। yaad ka jauhar nahin hoga to gyaan talvaar chalegi nahin। bahut yaad karen tab jauhar aaye। bhal bandhan mein bhi hain phir bhi yaad karte rehte to bahut phaayda hai। kabhi baba ko dekha bhi nahin hai, yaad mein hi praan chhod dete hain to bhi bahut achha pad pa sakte hain, kyonki yaad bahut karte hain। baap ki yaad mein pyaar ke aansu bahaate hain, woh aansu moti ban jaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne liye svayan hi purooshaartha kar oonch pad paana hai। padhaai se svayan ko raaj tilak dena hai। gyaan ko achhi reeti dhaaran kar sada harshit rehna hai।

2) gyaan talvaar mein yaad ka jauhar bharna hai। yaad se hi bandhan kaatne hain। kabhi bhi gande bioscope dekh apne sankalpon ko apvitra nahin banaana hai।

vardaan:- sada ekaanta aur simran mein vyasta rahne vaale behad ke vaanaprasthi bhav

vartamaan samay ke pramaan aap sab vaanaprastha avastha ke sameep ho। vaanaprasthi kabhi gudiyon ka khel nahin karte hain। ve sada ekaanta aur simran mein rehte hain। aap sab behad ke vaanaprasthi sada ek ke ant mein arthaat nirantar ekaanta mein raho saath-saath ek ka simran karte hue smriti swaroop bano। sabhi bachchon prati baapdaada ki yahi shubh aash hai ki ab baap aur bachche samaan ho jaaen। sada yaad mein samaaye rahen। samaan banna hi samaana hai - yahi vaanaprastha sthiti ki nishaani hai।

slogan:- aap himmat ka ek kadam badhaao to baap madad ke hajaar kadam badhaayenge।