Daily Murli for Friday 21 August 2020

21-08-2020 praatahmurli om shanti "baapdaada"' madhuban

“meethe bachche - gyaan ko buddhi mein dhaaran kar aapas mein milkar class chalaao, apna aur auron ka kalyaan kar sachchi kamaai karte raho''

prashn:- tum bachchon mein kaun-sa ahankaar kabhi nahin aana chaahiye?

uttar:- kai bachchon mein ahankaar aata hai ki yeh chhoti-chhoti baalkiyaan humein kya samjhaayengi। badi behen chali gai to roothkar class mein aana band kar denge। yeh hain maaya ke vighna। baba kehte - bachche, tum sunaane vaali teacher ke naam-roop ko na dekh, baap ki yaad mein rah murli suno। ahankaar mein mat aao।

om shanti। baap baith bachchon ko samjhaate hain। ab baap jab kaha jaata hai to itne bachchon ka ek jismaani baap to ho nahin sakta। yeh hai roohaani baap। unke dher bachche hain, bachchon ke liye yeh tape murli aadi saamagri hai। bachche jaante hain abhi ham sangamayug par baithe hain purooshottam banne ke liye। yeh bhi khushi ki baat hai। baap hi purooshottam banaate hain। yeh lakshmi-naaraayan purooshottam hain na। is srishti mein hi uttam puroosh, madhyam aur kanishta hote hain। aadi mein hain uttam, beech mein hain madhyam, ant mein hain kanishta। har cheez pahle nai uttam phir madhyam phir kanishta arthaat puraani banti hai। duniya ka bhi aise hai। to jin-jin baaton par manushyon ko sanshay aata hai, us par tumko samjhaana hai। bahut karke brahma ke liye hi kehte hain ki inko kyon bithaaya hai? to unko jhaad ke chitra par le aana chaahiye। dekho neeche bhi tapasya kar rahe hain aur oopar mein ekdam ant mein bahut janmon ke ant ke janma mein khade hain। baap kehte hain main inmen pravesh karta hoon। yeh baaten samjhaane vaala bada aklamand chaahiye। ek bhi beakla nikalta hai, to sabhi bi.ke. ka naam badnaam ho jaata hai। poora samjhaana aata nahin hai। bhal complete paas to ant mein hi hote hain, is samay 16 kala sampoorn koi ban na sake lekin samjhaane mein nambarvaar zaroor hote hain। parampita paramatma se preet nahin hai to vipreet buddhi thahre na। is par tum samjha sakte ho jo preet buddhi hain woh vijayanti aur jo vipreet buddhi hain woh vinshanti ho jaate hain। is par bhi kai manushya bigadte hain, phir koi na koi ilzaam laga dete hain। jhagda-phasaad machaane mein deri nahin karte hain। koi kar hi kya sakte hain। kabhi chitron ko aag lagaane mein bhi deri nahin karenge। baba raay bhi dete hain - chitron ko insure kara do। bachchon ki avastha ko bhi baap jaante hain, criminal aai par bhi baba roz samjhaate rehte hain। likhte hain - baba, aapne jo criminal aai par samjhaaya hai yeh bilkul theek kaha hai। yeh duniya tamopradhaan hai na। din-pratidin tamopradhaan bante jaate hain। vo to samajhte hain kaliyug abhi regdi pahan raha hai (ghutnon ke bal chal raha hai) agyaan neend mein bilkul soye hue hain। kabhi-kabhi kehte bhi hain yeh mahaabhaarat ladaai ka samay hai to zaroor bhagwan koi roop mein hoga। roop to bataate nahin। unko zaroor kismen pravesh hona hai। bhaagyashaali rath gaaya jaata hai। rath to aatma ka apna hoga na। usmein aakar pravesh karenge। unko kaha jaata hai bhaagyashaali rath। baaki woh janma nahin lete hain। inke hi baaju mein baith gyaan dete hain। kitna achhi reeti samjhaaya jaata hai। trimoorti chitra bhi hai। trimoorti to brahma-vishnu-shankar ko kahenge। zaroor yeh kuchh karke gaye hain। jo phir raaston par, makaan par bhi trimoorti naam rakha hai। jaise is road ko subhaash maarga naam diya hai। subhaash ki history to sab jaante hain। unhon ke peechhe baith history likhte hain। phir unko banaakar bada kar dete hain। kitni bhi badaai baith likhen। jaise gurunaanak ka pustak kitna bada banaaya hai। itna usne to likha nahin hai। gyaan ke badle bhakti ki baaten baith likhi hain। yeh chitra aadi to banaaye jaate hain samjhaane ke liye। yeh to jaante hain in aankhon se jo kuchh dikhaai padta hai yeh sab bhasma ho jaana hai। baaki aatma to yahaan rah na sake। zaroor ghar chali jaayegi। aisi-aisi baaten koi sabki buddhi mein baithti thode hi hai। agar dhaarna hoti hai to class kyon nahin chalaate। 7-8 varsha mein aisa koi taiyaar nahin hota jo class chala sake। bahut jagah aise chalaate bhi hain। phir bhi samajhte hain maataaon ka martaba oonch hai। chitra to bahut hain phir murli dhaaran kar us par thoda samjhaate hain। yeh to koi bhi kar sakte hain। bahut sahaj hai। phir pata nahin kyon braahmani ki maangani karte hain। braahmani kahaan gai to bas roothkar baith jaate hain। class mein nahin aate, aapas mein khitpit ho jaati hai। murli to koi bhi baith suna sakte hain na। kahenge phursat nahin। yeh to apna bhi kalyaan karna hai to auron ka bhi kalyaan karna hai। bahut bhaari kamaai hai। sachchi kamaai karaani hai jo manushyon ka heere jaisa jeevan ban jaaye। svarga mein sab jaayenge na। vahaan sadaiv sukhi rehte hain। aise nahin, praja ki aayu kam hoti hai। nahin, praja ki bhi aayu badi hoti hai। woh hai hi amar lok। baaki pad kam-jaasti hote hain। to koi bhi topic par class karaana chaahiye। aise kyon kehte hain achhi braahmani chaahiye। aapas mein class chala sakte hain। radi nahin maarni chaahiye। koi-koi ko ahankaar aa jaata hai - yeh chhoti-chhoti baalkiyaan kya samjhaayengi? maaya ke vighna bhi bahut aate hain। buddhi mein nahin baithta।

baba to roz samjhaate rehte hain, shivbaaba to topic par nahin samjhaayenge na। woh to saagar hai। uchhlen maarte rahenge। kabhi bachchon ko samjhaate, kabhi baahar vaalon ke liye samjhaate। murli to sabko milti hai। akshar nahin jaante hain to seekhna chaahiye na - apni unnati ke liye purooshaartha karna chaahiye। apna bhi aur doosron ka bhi kalyaan karna hai। yeh baap (brahma baba) bhi suna sakte hain na, parantu bachchon ka buddhiyog shivbaaba taraph rahe isliye kehte hain hamesha samjho shivbaaba sunaate hain। shivbaaba ko hi yaad karo। shivbaaba paramdham se aaye hain, murli suna rahe hain। yeh brahma to paramdham se nahin aakar sunaate hain। samjho shivbaaba is tan mein aakar hamko murli suna rahe hain। yeh buddhi mein yaad hona chaahiye। yathaartha reeti yeh buddhi mein rahe to bhi yaad ki yaatra rahegi na। parantu yahaan baithe bhi bahuton ka buddhiyog idhar-udhar chala jaata hai। yahaan tum yaatra par achhi reeti rah sakte ho। nahin to gaanv yaad aayega। gharbaar yaad aayega। buddhi mein yeh yaad rehta hai - shivbaaba hamko ismen baith padhaate hain। ham shivbaaba ki yaad mein murli sun rahe the phir buddhiyog kahaan bhaag gaya। aise bahuton ka buddhiyog chala jaata hai। yahaan tum yaatra par achhi reeti rah sakte ho। samajhte ho shivbaaba paramdham se aaye hain। baahar gaanvadon aadi mein rahne se yeh khyaal nahin rehta hai। koi-koi samajhte hain shivbaaba ki murli in kaanon se sun rahe hain phir sunaane vaale ka naam-roop yaad na rahe। yeh gyaan saara andar ka hai। andar mein khyaal rahe shivbaaba ki murli ham sunte hain। aise nahin, phalaani behen suna rahi hai। shivbaaba ki murli sun rahe hain। yeh bhi yaad mein rahne ki yuktiyaan hain। aise nahin ki jitna samay ham murli sunte hain, yaad mein hain। nahin, baba kehte hain - bahuton ki buddhi kahaan-kahaan baahar mein chali jaati hai। kheteebaadi aadi yaad aati rahegi। buddhi yog kahaan baahar bhatakna nahin chaahiye। shivbaaba ko yaad karne mein koi takleeph thode hi hai। parantu maaya yaad karne nahin deti hai। saara samay shivbaaba ki yaad rah nahin sakti, aur-aur khyaalaat aa jaate hain। nambarvaar purooshaartha anusaar hai na। jo bahut nazdeek vaale honge unki buddhi mein achhi reeti baithega। sab thode hi 8 ki maala mein aa sakenge। gyaan, yog, daiveegun yeh sab apne mein dekhna hai। hamaare mein koi avgun to nahin hai? maaya ke vash koi vikarma to nahin hota hai? koi-koi bahut laalchi ban jaate hain। laalach ka bhi bhoot hota hai। to maaya ki praveshta aisi hoti hai jo bhookh-bhookh karte rehte hain - khaaoon-khaaoon pet mein balaaoon… koi mein khaane ki bahut aasakti hoti hai। khaana bhi kaayde anusaar hona chaahiye। dher bachche hain। ab bahut bachche banne vaale hain। kitne brahman-braahmaniyaan banenge। bachchon ko bhi kehta hoon - tum brahman ban baitho। maataaon ko aage rakha jaata hai। shiv shakti bhaarat maataaon ki jay।

baap kehte hain apne ko aatma samjho aur baap ko yaad karo। svadarshan chakra phiraate raho। svadarshan chakradhaari tum brahman ho। yeh baaten naya koi aaye to samajh na sake। tum ho sarvottam brahma mukh vanshaavli brahman kul bhooshan, svadarshan chakradhaari। naya koi sune to kahenge svadarshan chakra to vishnu ko hai। yeh phir in sabko kehte rehte hain, maanenge nahin isliye naye-naye ko sabha mein allow nahin karte। samajh nahin sakenge। koi-koi phir bigad padte hain - kya ham besmajh hain jo aane nahin diya jaata hai kyonki aur-aur satsangon mein to aise koi bhi jaate rehte hain। vahaan to shaastron ki hi baaten sunaate rehte hain। woh sunna har ek ka hak hai। yahaan to sambhaal rakhni padti hai। yeh eeshvareey gyaan buddhi mein nahin baithta to bigad padte hain। chitron ki bhi sambhaal rakhni padti hai। is aasuri duniya mein apni daivi raajdhaani sthaapan karni hai। jaise Christ aaya apna dharma sthaapan karne। yeh baap daivi raajdhaani sthaapan karte hain। ismen hinsa ki koi baat nahin hai। tum na kaam kataari ki aur na sthool hinsa kar sakte ho। gaate bhi hain moot paleeti kapad dhoe। manushya to bilkul ghor andhiyaare mein hain। baap aakar ghor andhiyaare se ghor sojhra karte hain। phir bhi koi-koi baba kahkar phir munh mod dete hain। padhaai chhod dete hain। bhagwan vishwa ka maalik banaane ke liye padhaate hain, aisi padhaai ko chhod de to unko kaha jaata hai mahaamoorkha। kitna jabardasta khazaana milta hai। aise baap ko thode hi kabhi chhodna chaahiye। ek geet bhi hai - aap pyaar karo ya thukraao, ham aapka dar kabhi nahin chhodenge। baap aaye hi hain - behad ki baadshaahi dene। chhodne ki to baat hi nahin। haan, lakshan achhe dhaaran karne hain। striyaan bhi report likhti hain - yeh hamko bahut tang karte hain। aajkal log bahut-bahut kharaab hain। badi sambhaal rakhni chaahiye। bhaaiyon ko bahnon ki sambhaal rakhni hai। ham aatmaon ko koi bhi haalat mein baap se varsa zaroor lena hai। baap ko chhodne se varsa khalaas ho jaata hai। nishchaybuddhi vijayanti, sanshaybuddhi vinshanti। phir pad bahut kam ho jaata hai। gyaan ek hi gyaan saagar baap de sakte hain। baaki sab hai bhakti। bhal koi kitna bhi apne ko gyaani samjhen parantu baap kehte hain sabke paas shaastron aur bhakti ka gyaan hai। sachcha gyaan kisko kaha jaata hai, yeh bhi manushya nahin jaante hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dhyaan rakhna hai ki murli sunte samay buddhiyog baahar bhatakta to nahin hai? sada smriti rahe ki ham shivbaaba ke mahaavaakya sun rahe hain। yeh bhi yaad ki yaatra hai।

2) apne aapko dekhna hai ki hamaare mein gyaan-yog aur daivi gun hain? laalach ka bhoot to nahin hai? maaya ke vash koi vikarma to nahin hota hai?

vardaan:- divya buddhi ki lift dvaara teenon lokon ka sair karne vaale sahajyogi bhav

sangamayug par sabhi bachchon ko divya buddhi ki lift milti hai। is wonderful lift dvaara teenon lokon mein jahaan chaaho vahaan pahunch sakte ho। sirf smriti ka switch on karo to second mein pahuch jaayenge aur jitna samay jis lok ka anubhav karna chaaho utna samay vahaan sthit rah sakte ho। is lift ko use karne ke liye amritvele careful ban smriti ke switch ko yathaartha reeti se set karo। authority hokar is lift ko kaarya mein lagaao to sahajyogi ban jaayenge। mehnat samaapta ho jaayegi।

slogan:- man ko sada mauz mein rakhna - yahi jeevan jeene ka kala hai।