Daily Murli for Saturday 24 October 2020

24-10-2020 praatahmurli om shanti "baapdaada"' madhuban

“meethe bachche - tum ho sachche-sachche parvaane jo abhi shama par phida hote ho, is phida hone ka hi yaadgaar yeh deepaavli hai''

prashn:- baba ne apne bachchon ko kaun-sa samaachaar sunaaya hai?

uttar:- baba ne sunaaya - tum aatmaayen nirvaandhaam se kaise aati ho aur main kaise aata hoon। main kaun hoon, kya karta hoon, kaise raamraajya sthaapan karta hoon, kaise tum bachchon ko raavan par vijay pahnaata hoon। abhi tum bachche in sab baaton ko jaante ho। tumhaari jyoti jagi hui hain।

geet:- tumheen ho maata pita…

om shanti। meethe-meethe roohaani bachchon ne geet suna। aatmaon ne in jismaani karmendriyon se geet suna। geet mein pahle to theek tha। pichhaadi ko phir bhakti ke akshar the। tumhaare charnon ki dhool hain। ab bachche charnon ki dhool thodhi hote hain। yeh wrong hai। baap bachchon ko right akshar samjhaate hain। baap aate bhi vahaan se hain jahaan se bachche aate hain, woh hai nivaarnadhaam। bachchon ko sabke aane ka samaachaar to sunaaya। apna bhi sunaaya ki main kaise aata hoon, aakarke kya karta hoon। raamraajya sthaapan karne arth raavan par vijay pah-naate hain। bachche jaante hain - raamraajya aur raavanraajya is prithvi par hi kahenge। abhi tum vishwa ke maalik bante ho। dharti, aasmaan, soorya aadi sab tumhaare haath aa jaate hain। to kahenge raavanraajya saare vishwa par aur raamraajya bhi saare vishwa par hai। raavanraajya mein kitne karod hain, raamraajya mein thode hote hain phir dheere-dheere vriddhi ko paate hain। raavanraajya mein vriddhi bahut hoti hai kyonki manushya vikaari ban jaate hain। raamraajya mein hain nirvikaari। manushyon ki hi kahaani hai। to raam bhi behad ka maalik, raavan bhi behad ka maalik hai। abhi kitne anek dharma hain। gaaya hua hai anek dharmon ka vinaash। baba ne jhaad par bhi samjhaaya hai।

ab dashahra manaate hain, raavan ko jalaate hain। yeh hai had ka jalaana। tumhaari to hai behad ki baat। raavan ko bhi sirf bhaaratvaasi hi jalaate hain, videsh mein bhi jahaan-jahaan bhaaratvaasi jaasti honge vahaan bhi jalaayenge। woh hai had ka dashahra। dikhaate hain lanka mein raavan raajya karte the, seeta ko churaakar lanka mein le gaya। yeh ho gai had ki baaten। ab baap kehte hain saare vishwa par raavan ka raajya hai। raamraajya ab nahin hai। raamraajya arthaat eeshvar ka sthaapan kiya hua। satayug ko kaha jaata hai raamraajya। maala simarte hain, raghupti raaghav raajaaraam kehte hain lekin raajaaraam ko nahin simarte hain, jo saare vishwa ki seva karte hain, unki maala simarte hain।

bhaaratvaasi dashahre ke baad phir deepaavli manaate hain। deepaavli kyon manaate hain? kyonki devtaaon ki taaj-poshi hoti hai। coronation par battiyaan aadi bahut jalaate hain। ek to taajposhi doosra phir kaha jaata hai - ghar-ghar mein deepmaala। har ek aatma ki jyot jag jaati hai। abhi sab aatmaon ki jyoti ujhaai hui hai। iron aged hai yaani andhiyaara hai। andhiyaara maana bhakti maarga। bhakti karte-karte jyot kam ho jaati hai। baaki woh deepmaala to artificial hai। aise nahin ki coronation hota hai to aatishbaaji jalaate hain। deepmaala par lakshmi ko bulaate hain। pooja karte hain। yeh utsav hain bhakti maarga ke। jo bhi raaja takhta par baithte hain to unka coronation de dhoomdhaam se manaaya jaata hai। yeh sab hain had ke। abhi to behad ka vinaash, sachcha-sachcha dashahra hona hai। baap aaye hain sabki jyot jagaane। manushya samajhte hain hamaari jyot badi jyot se mil jaayegi। brahm samaajiyon ke mandir mein sadaiv jyot jagti hai। samajhte hain jaise parvaane jyoti par pheri pahan phida hote hain vaise hamaari bhi aatma ab badi jyoti mein mil jaayegi। is par drishtaanta banaaya hai। abhi tum ho aadhaakalpa ke aashik। tum aakar ek maashook par phida hue ho, jalne ki to baat nahin। jaise woh aashik-maashook hote hain to woh ek-do ke aashik ban jaate hain। yahaan woh ek hi maashook hai, baaki sab hain aashik। aashik us maashook ko bhaktimaarga mein yaad karte rehte hain। maashook aap aao to ham tumhaare par bali chadhen। tumhaare sivaae ham kisko bhi yaad nahin karenge। yeh tumhaara jismaani lav nahin hai। un aashik-maashook ka jismaani lav hota hai। bas ek-do ko dekhte rehte hain, dekhne se hi jaise tripta ho jaate hain। yahaan to ek maashook baaki sab hain aashik। sab baap ko yaad karte hain। bhal koi nature aadi ko bhi maante hain। phir bhi O god, he bhagwan mukh se zaroor nikalta hai। sab unko bulaate hain, hamaare duhkh door karo। bhaktimaarga mein to bahut aashik-maashook hote hain, koi kiska aashik, koi kiska aashik। hanoomaan ke kitne aashik honge? sab apne-apne maashook ke chitra banaakar phir aapas mein milkar baith unki pooja karte hain। pooja kar phir maashook ko dubo dete hain। arth kuchh bhi nahin nikalta। yahaan woh baat nahin। yeh tumhaara maashook ever gora hai, kabhi saanvara banta nahin। baap musaaphir aakar sabko gora banaate hain। tum bhi musaaphir ho na। doordesh se aakar yahaan part bajaate ho। tumhaare mein bhi nambarvaar purooshaartha anusaar samajhte hain। abhi tum trikaaldarshi ban gaye ho। rachta aur rachna ke aadi-madhya-ant ko jaante ho to tum ho gaye trikaaldarshi brahmaakumaar-kumaariyaan। jaise jagadguru aadi ka bhi title milta hai na। tumko yeh title milta hai। tumko sabse achha title milta hai svadarshan chakradhaari। tum brahman hi svadarshan chakradhaari ho ya shivbaaba bhi hai? (shiv-baba bhi hain) haan, kyonki svadarshan chakradhaari aatma hoti hai na - shareer ke saath। baap bhi ismen aakar samjhaate hain। shivbaaba svadarshan chakradhaari na ho to tumko kaise banaaye। woh sabse supreme oonch te oonch aatma hai। deh ko thode hi kaha jaata। woh supreme baap hi aakar tumko supreme banaate hain। svadarshan chakradhaari aatmaon ke sivaae koi ban na sake। kaun si aatmaayen? jo brahman dharma mein hain। jab shoodra dharma mein the, to nahin jaante the। ab baap dvaara tumne jaana hai। kitni achhi-achhi baaten hain। tum hi sunte ho aur khush hote ho। baahar vaale yeh sunen to aashcharya khaayen, oho! yeh to bahut oonch gyaan hai। achha tum bhi aisa svadarshan chakradhaari bano to phir chakravarti raaja vishwa ka maalik ban jaayenge। yahaan se baahar gaye khalaas। maaya itni bahaadur hai, yahaan ki yahaan rahi। jaise garbha mein bachcha anzaam (vaayda) kar nikalta hai phir bhi vahaan ki vahaan rah jaati hai। tum pradarshani aadi mein samjhaate ho, bahut achha-achha karte hain। knowledge bahut achhi hai, main aisa purooshaartha karoonga, yeh karunga.....। bas baahar nikla, vahaan ki vahaan rahi। parantu phir bhi kuchh na kuchh asar rehta hai। aise nahin ki woh phir aayenge nahin। jhaad ki vriddhi hoti jaayegi। jhaad vriddhi ko paayega to phir sabko kheechenge। abhi to yeh hai raurav narka। garood puraan mein bhi aisi-aisi rochak baaten likhi hain, jo manushyon ko sunaate hain taaki kuchh dar rahe। unse hi nikla hai ki manushya sarpa bichchhu aadi bante hain। baap kehte hain main tumko vishay vaitarni nadi se nikaal ksheersaagar mein bhej deta hoon। asul tum shantidham ke nivaasi the। phir sukhdhaam mein part bajaane aaye। abhi phir ham jaate hain shantidham aur sukhdhaam। yeh dhaam to yaad karenge na। gaate bhi hain tum maat-pita...... woh sukh ghanere to hote hi hain satayug mein। abhi hai sangam। yahaan pichhaadi mein traahi-traahi karenge kyonki ati duhkh hota hai। phir satayug mein ati sukh hoga। ati sukh aur ati duhkh ka yeh khel bana hua hai। vishnu avtaar bhi dikhaate hain। lakshmi-naaraayan ka joda jaise oopar se aate hain। ab oopar se shareerdhaari koi aate thode hi hain। oopar se aati to har ek aatma hai। parantu eeshvar ka avatran bahut vichitra hai, vahi aakar bhaarat ko svarga banaate hain। unka tyohaar shivjayanti manaate hain। agar maaloom hota ki parampita paramatma shiv hi mukti-jeevan-mukti ka varsa dete hain to phir saare vishwa mein god father ka tyohaar manaate। behad ke baap ka yaadgaar manaayen tab jab samjhen ki shivbaaba hi liberator, guide hai। unka janma hi bhaarat mein hota hai। shiv jayanti bhi bhaarat mein manaate hain। parantu poori pahchaan nahin to holiday bhi nahin karte hain। jo baap sarva ki sadgati karne vaala, unki janma bhoomi jahaan alaukik kartavya aakar karte hain, unka janma din aur teertha yaatra to bahut manaani chaahiye। tumhaara yaadgaar mandir bhi yahaan hi hai। parantu kisko pata nahin hai ki shivbaaba hi aakar liberator, guide banta hai। kehte sab hain ki sab duhkhon se chhudaakar sukhdhaam mein le chalo parantu samajhte nahin। bhaarat bahut oonch te oonch khanda hai। bhaarat ki mahima aparmaapaar gaai hui hai। vahaan hi shivbaaba ka janma hota hai, unko koi maante nahin। stamp nahin banaate। auron ki to bahut banaate rehte hain। ab kaise samjhaaya jaae jo inke mahatva ka sabko pata pade। vilaayat mein bhi sannyaasi aadi jaakar bhaarat ka praacheen yog sikhlaate hain, jab tum yeh raajayog bataayenge to tumhaara bahut naam hoga। bolo, raajayog kisne sikhaaya tha, yeh kisko pata nahin hai। krishna ne bhi hathayog to sikhaaya nahin। yeh hathayog hai sannyaasiyon ka। jo bahut achhe padhe-likhe hain jo apne ko philosopher kahlaate hain, woh in baaton ko samajh aur sudhar jaaen, kahen hamne bhi shaastra padhe hain, parantu ab jo baap sunaate hain woh right hai। baaki sab hai wrong। to yeh bhi samjhen ki barobar bade se bada teertha sthaan yeh hai, jahaan baap aate hain। tum bachche jaante ho isko kaha jaata hai - dharma bhoomi। yahaan jitne dharmaatma rehte hain utne aur kahaan nahin। tum kitna daan-punya karte ho। baap ko jaankar, tan-man-dhan sab is seva mein laga dete ho। baap hi sabko liberate karte hain। sabko duhkh se chhudaate hain। aur dharma sthaapak koi duhkh se nahin chhudaate hain। woh to aate hi hain unke pichhaadi। nambarvaar sab part bajaane aate hain। part bajaate-bajaate tamopradhaan ban jaate hain। phir baap aakar satopradhaan banaate hain। to yeh bhaarat kitna bada teertha hai। bhaarat sabse number one oonch bhoomi hai। baap kehte hain meri yeh janma bhoomi hai। main aakar sabki sadgati karta hoon। bhaarat ko heaven bana deta hoon।

tum bachche jaante ho baap svarga ka maalik banaane aaye hain। aise baap ko bahut pyaar se yaad karo। tumko dekh aur bhi aise karma karenge। isko hi kaha jaata hai - alaukik divya karma। aise mat samjho koi nahin jaanenge। aise niklenge jo tumhaare yeh chitra bhi le jaayenge। achhe-achhe chitra banen to steamer bharaakar le jaayenge। steamer jahaan-jahaan khada rehta hai vahaan yeh chitra laga denge। tumhaari bahut service honi hai। bahut udaarchit hundi bharne vaale saanvalshaah bhi niklenge jo aise kaam karne lag padte hain। taaki sabko maaloom pade ki yeh kaun hai jo is puraani duniya ko badal aur nai duniya sthaapan karte hain। tumhaari bhi pahle tuchchha buddhi thi, abhi tum kitne svachchha buddhi bane ho। jaante ho ham is gyaan aur yogbal se vishwa ko heaven banaate hain। baaki sab muktidhaam mein chale jaayenge। tumhein bhi authority banna hai। behad ke baap ke bachche ho na। shakti milti hai yaad se। baap ko world almighty authority kaha jaata hai। sabhi vedon shaastron ka saar bataate hain। to bachchon ko kitna umang rehna chaahiye service ka। mukh se gyaan ratnon ke sivaae aur kuchh na nikle। tum har ek roop-basanta ho। tum dekhte ho saari duniya sabja (hari-bhari) ban jaati hai। sab kuchh naya, vahaan duhkh ka naam nahin। paanch tatva bhi tumhaari service mein haazir rehte hain। abhi woh dis-service karte hain kyonki manushya laayak nahin hain। baap abhi laayak banaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roop-basanta ban mukh se sadaiv gyaan ratna hi nikaalne hain। service ke umang mein rehna hai। yaad mein rehna aur sabko baap ki yaad dilaana - yahi divya alaukik kaarya karna hai।

2) sachcha-sachcha aashik ban ek maashook par phida hona hai arthaat bali chadhna hai, tabhi sachchi deepaavli hogi।

vardaan:- grihastha vyavhaar aur eeshvareey vyavhaar donon ki samaanta dvaara sada halke aur saphal bhav

sabhi bachchon ko shareer nirvaah aur aatma nirvaah ki double seva mili hui hai। lekin donon hi sevaaon mein samay ka, shaktiyon ka samaan attention chaahiye। yadi shreemat ka kaanta theek hai to donon side samaan honge। lekin grihastha shabd bolte hi grihasthi ban jaate ho to bahaane baaji shuru ho jaati hai isliye grihasthi nahin trustee hain, is smriti se grihastha vyavhaar aur eeshvareey vyavhaar donon mein samaanta rakho to sada halke aur saphal rahenge।

slogan:- first division mein aane ke liye karmendriy jeet, maayaajeet bano।