Daily Murli for Saturday 20 March 2021

20-03-2021 praatahmurli om shanti "baapdaada"' madhuban

“meethe bachche - tumhaara dhandha hai manushyon ko sujaag karna, raasta bataana, jitna tum dehi-abhimaani bankar baap ka parichay sunaayenge utna kalyaan hoga''

prashn:- gareeb bachche apni kis visheshta ke aadhaar par saahookaaron se aage jaate hain?

uttar:- gareebon mein daan punya ki bahut shraddha rehti hai। gareeb bhakti bhi lagan se karte hain। saakshaatkaar bhi gareebon ko hota hai। saahookaaron ko apne dhan ka nasha rehta। paap jaasti hote isliye gareeb bachche unse aage chale jaate hain।

geet:- om namo shivaae…

om shanti। tum maat-pita ham baalak tere... yeh to zaroor parampita paramatma ki mahima gaai hui hai। yeh to clear mahima hai kyonki woh rachayita hai। laukik maa-baap bhi bachche ke rachayita hain। paarlaukik baap ko bhi rachta kaha jaata hai। bandhu, sahaayak..... bahut mahima gaate hain। laukik baap ki itni mahima nahin hai। parampita paramatma ki mahima hi alag hai। bachche bhi mahima karte hain gyaan ka saagar hai, knowledgeful hai। unmein saara gyaan hai। knowledge koi shareer nirvaah ki padhaai ka nahin hai। unko gyaan ka saagar knowledgeful kaha jaata hai। to zaroor unke paas gyaan hai parantu kaun sa gyaan? yeh srishti chakra kaise phirta hai, uska gyaan hai। to vahi gyaan saagar patit-paavan hai। krishna ko kabhi patit-paavan va gyaan ka saagar nahin kehte। unki mahima bilkul nyaari hai। donon hain bhaarat ke nivaasi। shivbaaba ki bhi bhaarat mein mahima hai। shiv jayanti bhi yahaan manaate hain। krishna ki jayanti bhi manaate hain। geeta ki bhi jayanti manaate hain। 3 jayanti mukhya hain। ab prashn uthta hai ki pahle jayanti kiski hui hogi? shiv ki ya krishna ki? manushya to bilkul hi baap ko bhoole hue hain। krishna ki jayanti bade dhoomdhaam se, pyaar se manaate hain। shiv jayanti ka itna kisko pata nahin hai, na gaayan hai। shiv ne kya aakar kiya? unki biography ka kisko pata nahin hai। krishna ki to bahut baaten likh di hain। gopiyon ko bhagaaya, yeh kiya। krishna ke charitron ki khaas ek magazine bhi nikalti hai। shiv ke charitra aadi kuchh hain nahin। krishna ki jayanti kab hui phir geeta ki jayanti kab hui? krishna jab bada ho tab to gyaan sunaave। krishna ke bachpan ko to dikhaate hain, tokri mein daalkar paar le gaye। badepan ka dikhaate hain, rath par khada hai। chakra chalaate hain। 16-17 varsha ka hoga। baaki chitra chhotepan ke dikhaaye hain। ab geeta kab sunaai। usi samay to nahin sunaai hogi। jab likhte hain phalaani ko bhagaaya, yeh kiya। us samay to gyaan shobhe bhi nahin। gyaan to jab bujurga ho tab sunaaye। geeta bhi kuchh samay baad sunaai hogi। ab shiv ne kya kiya, kuchh pata nahin। agyaan neend mein soye pade hain। baap kehte hain meri biography ka koi ko pata nahin hai। mainne kya kiya? mujhe hi patit-paavan kehte hain। main aata hoon to saath mein geeta hai। main saadhaaran boodhe anubhvi tan mein aata hoon। shiv jayanti tum bhaarat mein hi manaate ho। krishna jayanti, geeta jayanti yeh 3 mukhya hain। raam ki jayanti to baad mein hoti hai। is samay jo kuchh hota hai woh baad mein manaaya jaata hai। satayug treta mein jayanti aadi hoti nahin। sooryavanshi se chandravanshi varsa lete hain aur kiski mahima hai nahin। sirf raajaaon ka coronation manaate honge। birth de to aajkal sab manaate hain। woh to common baat hui। krishna ne janma liya bada hokar raajdhaani chalaai, usmein mahima ki to baat hi nahin। satayug treta mein sukh ka raajya chala aaya hai। woh raajya kab, kaise sthaapan hua! yeh tum bachchon ki buddhi mein hai। baap kehte hain bachchon main kalpa-kalpa, kalpa ke sangamayug par aata hoon। kaliyug ka ant hai patit duniya। satayug aadi paavan duniya। main baap bhi hoon। tum bachchon ko varsa bhi doonga। kalpa pahle bhi tumko varsa diya tha isliye tum manaate aaye ho। parantu naam bhool jaane se krishna ka naam daal diya hai। bade te bada shiv hai na। pahle to jab unki jayanti ho tab phir saakaar manushya ki ho। aatmaayen to sab vaastav mein oopar se utarti hain। mera bhi avatran hai। krishna ne maata ke garbha se janma liya, paalna li। sabko punarjanma mein aana hi hai। shivbaaba punarjanma nahin lete hain। aate to hain na। to yeh sab baap baith samjhaate hain। brahma, vishnu, shankar ki trimoorti dikhaate hain na। brahma dvaara sthaapna, kyonki shiv ko to apna shareer hai nahin। khud baith bataate hain main inke boodhe tan mein aata hoon। yeh apne janmon ko nahin jaante hain। inke bahut janmon ke ant ka yeh janma hai। to pahle-pahle samjhaana pade। shiv jayanti badi ya shreekrishna jayanti badi? agar krishna ne geeta sunaai to geeta jayanti to shreekrishna ke bahut varshon ke baad ho sake, jabki krishna bada ho। yeh sab samajhne ki baaten hain na। lekin vaastav mein shiv jayanti ke baad hui phat se geeta jayanti। yeh bhi points buddhi mein rakhni hain। point to dher hain। bigar note kiye yaad rah na saken। baba itna najdeek hai, unka rath hai, woh bhi kehte hain sab points samay par yaad aa jaayen, mushkil hai। baba ne samjhaaya hai sabko do baap ka raaz samjhaao। shivbaaba ki jayanti manaate hain, zaroor aata hoga। jaise Christ, buddha aadi aakar apna dharma sthaapan karte hain। woh bhi aatma aakar pravesh kar dharma sthaapan karti hai। woh hai heavenly god father, srishti ke rachayita। to zaroor nai srishti rachenge। puraani thode hi rachenge। nai srishti ko svarga kaha jaata hai, abhi hai narka। baba kehte hain main kalpa-kalpa ke sangam par aakar tum bachchon ko raajayog ka gyaan deta hoon। yeh hai bhaarat ka praacheen yog। kisne sikhaaya? shivbaaba ka naam to gum kar diya hai। ek to kehte geeta ka bhagwan shreekrishna aur vishnu aadi ke naam de dete hain। shivbaaba ne raajayog sikhaaya tha। kisko pata nahin hai। shiv jayanti niraakaar ki jayanti hi dikhaate hain। woh kaise aaya, kya aakar kiya? woh to sarva ka sadgati daata, liberator, guide hai। abhi sarva aatmaon ko guide chaahiye paramatma। woh bhi aatma hai। jaise manushyon ka guide bhi manushya hota hai, vaise aatmaon ka guide bhi aatma chaahiye। woh to supreme aatma hi kahenge। manushya to sab punarjanma le patit bante hain। phir paavan banaae vaapis kaun le jaaye? baap kehte hain main hi aakar paavan hone ki yukti bataata hoon। tum mujhe yaad karo। krishna to kah na sake ki deh ka sambandh chhodo। woh to 84 janma lete hain। sab sambandhon mein aate hain। baap ko apna shareer nahin hai। tumko yeh roohaani yaatra baap sikhlaate hain। yeh hai roohaani baap ki roohaani bachchon prati roohaani knowledge। krishna koi ka roohaani baap thode hi hain। sabka roohaani baap main hoon। main hi guide ban sakta hoon। liberator, guide, blissful, peaceful, ever pure sab mere liye kehte hain। abhi tum aatmaon ko knowledge de rahe hain। baap kehte hain main is shareer dvaara tumko de raha hoon। tum bhi shareer dvaara knowledge le rahe ho। woh hai god father। unka roop bhi bataaya hai। jaise aatma bindi hai, vaise paramatma bhi bindi hai। yeh kudrat hai na। vaastav mein badi kudrat to yeh hai। itne chhote star mein 84 janmon ka part hai। yeh hai kudrat। baap ka bhi drama mein part hai। bhakti maarga mein bhi tumhaari service karte hain। tumhaari aatma mein 84 janmon ka part avinaashi hai, isko kaha jaata hai kudrat, iska varnan kaise karen। itni chhoti si aatma hai। yeh baaten sunkar wonder khaate hain। aatma hai bhi star muaaphik। 84 janma accurate bhogti hai। sukh bhi woh accurate bhogegi। yeh hai kudrat। baap bhi hai aatma, param aatma। unmein saari knowledge bhari hui hai, jo bachchon ko samjhaate hain। yeh hain nai baaten, naye manushya sunkar kahenge inka gyaan to koi shaastra aadi mein bhi nahin hai। phir bhi jinhonne kalpa pahle suna hai, varsa liya hai vahi vriddhi ko paate rehte hain। time lagta hai। praja dher banti hai। woh to sahaj hai। raaja banne mein mehnat hai। manushya jo bahut dhan daan karte hain to raajaai ghar mein janma lete hain। gareeb bhi apni himmat anusaar jo kuchh daan karte honge to woh bhi raaja bante hain। jo poore bhagat hote hain woh daan punya bhi karte hain। saahookaaron se paap jaasti hote honge। gareebon mein shraddha bahut rehti hai। woh bahut pyaar se thoda bhi daan karte hain to bahut milta hai। gareeb bhakti bhi bahut karte hain। darshan do nahin to ham gala kaat dete hain। saahookaar aise nahin karenge। saakshaatkaar bhi gareebon ko hote hain। vahi daan punya karte hain, raajaayen bhi woh bante hain। paise vaalon ko ahankaar rehta hai। yahaan bhi gareebon ko 21 janma ka sukh milta hai। gareeb jaasti hain। saahookaar pichhaadi mein aayenge। to bhaarat jo itna oonch tha so phir itna gareeb kaise hua, tum samajhte ho। earthquake aadi mein sab mahal aadi chale jaayenge to gareeb ho jaayega। raavan raajya hone se haahaakaar ho jaata hai to phir aisi cheezen rah na saken। har cheez ki aayu to hoti hai na। vahaan jaise manushyon ki aayu badi hoti hai vaise makaan ki bhi aayu badi hoti hai। sone ke, marble ke bade-bade makaan bante jaayenge। sone ke to aur hi majboot honge। naatak mein bhi dikhaate hain na - ladaai hoti hai, makaan toot phoot jaate hain। phir ban jaate hain। unhon ki banaavat aisi hoti hai। yeh jo svarga ke mahal aadi banaayenge, aise to nahin dikhaayenge mistri log kaise makaan banaate hain। haan samajhte hain vahi makaan honge। aage chal tumko saakshaatkaar hoga। aisa vivek kehta hai। in baaton se bachchon ka tailuk nahin hai। bachchon ko to padhaai padhni hai। svarga ka maalik banna hai। svarga aur narka anek baar paas hua hai। abhi donon paas hue hain। abhi hai sangam। satayug mein yeh knowledge nahin hogi। is samay tum bachchon ko poori knowledge hai। lakshmi-naaraayan ko yeh raajya kisne diya tha। abhi tum bachchon ko maaloom hai। inhonne yeh varsa kisse paaya। yahaan padhaai padhkar svarga ke maalik bante hain। phir vahaan jaakar mahal aadi banaate hain। surgeon bhi bade-bade hospital banaate hai na।

baap tum bachchon ko din pratidin achhi-achhi points suna rahe hain। tumhaara dhandha hi hai - manushyon ko sujaag karna, raasta bataana। jaise baap kitna pyaar se baith samjhaate hain। deh-abhimaan ki darkaar nahin। baap ko kabhi deh-abhimaan nahin ho sakta। tumko mehnat saari dehi-abhimaani hone mein lagti hai। jo dehi-abhimaani ban baap ka baith parichay dete hain, goya bahuton ka kalyaan karte hain। pahle deh-abhimaan aane se phir aur vikaar aate hain। ladna, jhagadna, navaabi se chalna, deh-abhimaan hai। bhal apna raajayog hai, to bhi bahut saadhaaran rehna hai। thodi cheez mein ahankaar aa jaata hai। ghadi fashionable dekhi to dil hogi yeh pahnen। khyaal chalta rahega। isko bhi deh-abhimaan kaha jaata hai। achhi oonchi cheez hogi to sambhaalna padega। gum hogi to khyaal hoga। ant samay kuchh bhi yaad aaya to pad bhrashta ho jaayega। yeh deh-abhimaan ki aadten hain। phir service badle disservice bhi zaroor karenge। raavan ne tumko deh-abhimaani banaaya hai। dekhte ho baba kitna saadhaaran chalte hain। har ek ki service dekhi jaati hai। mahaarthi bachchon ko apna show karna hai। mahaarthiyon ko hi likha jaata hai tum phalaani jagah jaakar bhaashan karo। ek do ko bulaate hain। lekin bachchon mein deh-abhimaan bahut rehta hai। bhaashan mein bhal achhe hain parantu aapas mein roohaani sneh nahin hai। deh-abhimaan loon paani bana deta hai। koi baat mein jhat bigad padna yeh bhi nahin hona chaahiye isliye baba kehte hain koi ko bhi poochhna hai to baba se aakar poochhe। koi kahe baba aapko kitne bachche hain? kahoonga bachche to anginat hain parantu koi kapoot, koi sapoot achhe-achhe hain। aise baap ka to pharmaanbardaar, vaphaadaar banna chaahiye na। achha !

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan mein aakar kisi bhi prakaar ka fashion nahin karna hai। jaasti shauk nahin rakhne hain। bahut-bahut saadhaaran hokar chalna hai।

2) aapas mein bahut-bahut roohaani sneh se chalna hai, kabhi bhi loonpaani nahin hona hai। baba ka sapoot bachcha banna hai। ahankaar mein kabhi nahin aana hai।

vardaan:- samarpanta dvaara buddhi ko svachchha banaane vaale sarva khajaanon se sampanna bhav

gyaan ka, shreshtha samay ka khajaana jama karna va sthool khajaane ko ek se laakh guna banaana arthaat jama karna... in sab khajaanon mein sampanna banne ka aadhaar hai svachchha buddhi aur sachchi dil। lekin buddhi svachchha tab banti hai jab buddhi dvaara baap ko jaankar, use baap ke aage samarpan kar do। shoodra buddhi ko samarpan karna arthaat dena hi divya buddhi lena hai।

slogan:- “ek baap doosra na koi'' is vidhi dvaara sada vriddhi ko praapta karte raho।