Daily Murli for Sunday 27 June 2021

27-06-21 praatahmurli om shanti ''avyakt-baapdaada'' revise 26-01-88 madhuban

sangamayug par number one poojya banne ki alaukik vidhi

aaj anaadi baap aur aadi baap anaadi saaligraam bachchon ko aur aadi brahman bachchon ko double roop se dekh rahe hain। saaligraam roop mein bhi parampoojya ho aur brahman so devta swaroop bhi gaayan aur poojan yogya ho। donon - aadi aur anaadi baap donon hi roop se poojya aatmaon ko dekh harshit ho rahe hain। anaadi baap ne aadi pita sahit arthaat brahma baap aur brahman bachchon ko apne se bhi jyaada double roop mein poojya banaaya hai। anaadi baap ki pooja sirf ek niraakaar roop mein hoti hai lekin brahma sahit brahman bachchon ki pooja niraakaar, saakaar - donon roop se hoti hai। to baap bachchon ko apne se bhi jyaada double roop se mahaan maante hain।

aap baapdaada bachchon ki visheshtaaon ko dekh rahe the। har ek bachche ki visheshta apni-apni hai। koi baap ki aur sarva brahman aatmaon ki visheshtaaon ko jaan svayan mein sarva visheshtaayen dhaaran kar shreshtha arthaat vishesh aatma ban gaye hain aur koi visheshtaao ko jaan aur dekhkar khush hote hain lekin apne mein sarva visheshtaayen dhaaran karne ki himmat nahin hai aur koi har aatma mein ya brahman parivaar mein visheshta hote hue bhi visheshta ke mahatva se nahin dekhte, ek do ko saadhaaran roop se dekhte hain। visheshta dekhne va jaanne ka abhyaas nahin hai va gun-graahak buddhi arthaat gun grahan karne ki buddhi na hone ke kaaran visheshta arthaat gun ko jaan nahin sakte। har ek brahman aatma mein koi na koi visheshta avashya bhari hui hai। chaahe 16hajaar ka last daana bhi ho lekin usmein bhi koi na koi visheshta hai, isliye hi baap ki nazar us aatma ke oopar padti hai। bhagwan ki nazar pad jaae va bhagwan apna banaave to zaroor visheshta samaai hui hai! isliye hi woh aatma braahmanon ki list mein aai hai lekin sada har ek ki visheshta ko dekhne aur jaanne mein nambarvaar ban jaate hain। baapdaada jaante hain ki kaise bhi, bhal gyaan ki dhaarna va seva mein, yaad mein kamjor hain lekin baap ko jaanne, baap ke banne ki vishaalbuddhi, baap ko dekhne ki divya nazar - yeh visheshta to hai। jo aajkal ke naameegraami vidvaan bhi nahin jaan sakte, pahchaan sakte lekin un aatmaon ne jaan liya! koton mein kaai, koi mein bhi koi - is list mein to aa gaye na isliye koton mein se vishesh aatma to ho gaye na। vishesh kyon banen? kyonki oonche te oonch baap ke ban gaye।

sabhi aatmaon mein brahman aatmaayen vishesh hain। sirf koi apni visheshta ko kaarya mein lagaate hain, isliye woh visheshta vriddhi ko praapta hoti rehti hai aur doosron ko bhi woh dikhaai deti hai, aur koi mein visheshta roopi beej to hai lekin kaarya mein laana - yeh hai beej ko dharni mein daalna। jab tak beej ko dharni mein nahin daalen to vriksha nahin paida hota, vistaar ko praapta nahin kar paate hain। aur kai bachche visheshta ke beej ko vistaar mein bhi laate arthaat vriksha ke roop mein vriddhi ko bhi praapta karte, phal ko bhi praapta karte lekin jab phal aata hai to phal ke peechhe chidiyaaen, panchhi bhi aate hain khaane ke liye। to jab phal tak pahunchte hain to is roop mein maaya aati hai ki main vishesh hoon, meri yeh visheshta hai। yeh nahin samajhte ki baap dvaara praapta hui visheshta hai। visheshta bharne vaala baap hai। jab brahman bane to visheshta aai। brahman jeevan ki den hai, baap ki den hai isliye phal ke baad arthaat seva mein saphalta ke baad yeh attention rakhna bhi zaroori hai। nahin to, maaya roopi chidiya, panchhi phal ko jootha kar dete ya neeche gira dete hain। jaise khandit moorti ki pooja nahin hoti, maana jaata hai ki yeh moorti hai lekin pooji nahin jaati। aise jo brahman aatmaayen seva ka phal arthaat seva mein saphalta praapta kar lete hain lekin main-pan ki chidiya ne phal ko khandit kar diya, isliye sirf maana jaayega ki seva bahut achhi karte hain, mahaarthi hai, serviceable hain lekin sangamayug par bhi sarva brahman parivaar ke dil mein sneh ke paatra va poojya nahin ban sakte hain।

sangamayug mein dil ka sneh, dil ka regard - yahi poojya banna hai। phal ko main-pan mein laane vaale aisa poojya nahin ban sakte। ek hai dil se kisko ooncha maanna, to oonche ko poojya kaha jaata hai। jaise aajkal ki duniya mein bhi baap ooncha hone kaaran bachche “poojya pitaaji'' kahkar bulaate hain ya likhte hain, aise dil se ooncha maanna arthaat dil se regard dena। doosra hota hai baahar ki maryaada pramaan regard dena hi padta hai। to “dil se dena'' aur “dena hi padta'' ismen kitna antar hai! poojya banna arthaat dil se sarva maanen। majority hone chaahiye, pahle bhi sunaaya ki 5 percent to rah hi jaata hai lekin majority dil se maanen - yeh hai sangamayug par poojya banna। poojya banne ka sanskaar bhi abhi se hi bharna hai। lekin bhakti maarga ke poojya banne mein aur ab ke poojya banne mein antar hai। abhi aapke shareeron ki pooja nahin ho sakti kyonki antim puraana shareer hai, tamoguni tatvon ka bana hua shareer hai। abhi phoolon ke haar nahin padenge। bhakti-maarga mein to devtaaon ke oopar chadhaate hain na। poojya ki nishaani hai - dhoop jalaana, haar pahnaana, aarti karna, keertan karna, tilak lagaana। sangamayug par yeh sthool vidhi nahin hai। lekin sangamayug mein sada dil se un poojya aatmaon ke prati sachche sneh ki aarti utaarte rehte hain। aatmaon dvaara sada koi na koi praapti ka keertan karte rehte hain, sada un aatmaon ke prati shubh bhaavna ki dhoop va deepak jagaate rehte hain। sada aisi aatmaon ko dekh svayan bhi jaise woh aatmaayen baap ke oopar balihaar gai hai, vaise anya aatmaon mein bhi baap ke oopar balihaar jaane ka umang aata hai। to baap ke oopar balihaar jaane ka haar sada un aatmaon ko svatah hi praapta hota hai। aisi aatmaayen sada smriti-swaroop ke tilakdhaari hoti hai। is alaukik vidhi se is samay ke poojya aatmaayen banti hain।

bhakti-maarga ke poojya banne se shreshtha pooja ab ki hai। jaise bhakti-maarga ki poojya aatmaon ke do ghadi ke samparka se arthaat sirf moorti ke saamne jaane se do ghadi ke liye bhi shanti, shakti, khushi ka anubhav hota hai। aise sangamayugi poojya aatmaon dvaara ab bhi do ghadi-ek ghadi bhi drishti milne se bhi khushi, shanti va umang-utsaah ki shakti anubhav hoti hai। aisi poojya aatmaayen arthaat number one vishesh aatmaayen hain। second aur third to suna diya, uska vistaar kya karenge। hain to sab vishesh aatmaon ki list mein lekin one, tu, three - nambarvaar hain। lakshya sabhi ka number one ka hota hai। to aise poojya bano। jaise brahma baap ke gunon ke geet gaate ho na। yeh sab visheshtaayen poojya banne ki va number one vishesh aatma banne ki baaten brahma baap mein dekhi, suni na। to jaise brahma saakaar aatma number one sangamayugi poojya so bhavishya mein number one poojya bante। lakshmi-naaraayan number one poojya hain na। aise, aap sabhi bhi aise ban sakte hain।

jaise baap ke saath-saath brahma baap ki kamaal gaate hain, aise aap sabhi bhi sada aisa sankalp, bol aur karma karo jo sada hi kamaal ka ho! jab kamaal hogi to dhamaal nahin hogi। kamaal nahin karte to dhamaal karte ho - chaahe sankalpon ki dhamaal karo, chaahe vaani se karo। sankalpon mein bhi vyartha toofaan chalta to yeh dhamaal hai na। dhamaal nahin lekin kamaal karni hai kyonki aadi pita brahma ke brahman bachche sada hi poojya gaaye jaate hain। abhi last janma mein bhi dekho to sabhi se ooncha varna kaun sa gaaya jaata hai? brahman varna kehte hain na। ooncha naam aur oonche shreshtha kaam ke liye bhi brahman ko hi bulaate hain, kiske kalyaan ke liye bhi braahmanon ko hi bulaate hain। to last janma tak bhi brahman aatmaon ka ooncha naam, ooncha kaam prasiddha hai। parampara se chal raha hai। sirf naam se bhi kaam chala rahe hain। kaam aapka hai lekin naam vaalon ka bhi kaam chal raha hai। isse dekho ki sachche brahman aatmaon ki kitni mahima hai aur kitne mahaan hain! “brahman'' naam bhi avinaashi ho gaya hai। avinaashi praapti vaali jeevan ho gai hai। brahman jeevan ki visheshta hai - mehnat kam, praapti jyaada kyonki muhabbat ke aage mehnat nahin hai। ab last janma mein bhi brahman mehnat nahin karte, aaraam se khaate rehte hain। agar “naam'' ka bhi kaam karte hain to bhookhe nahin rah sakte hain। to is samay ke brahman jeevan ki visheshtaaon ki ab tak nishaaniyaan dekh rahe ho। itni shreshtha vishesh aatma ho! samjha?

vartamaan samay poojya to bhavishya ke poojya। isko hi vishesh aatmaayen number one kehte hain। to check karo। brahma baap ki kahaani suna rahe hain na। abhi aur bhi rahi hui hai। yeh brahma baap ki visheshta sada saamne rakho। aur kisi baaton mein nahin jaao, lekin visheshtaaon ko dekho aur varnan karo। har ek ko visheshta ka mahatva sunaakar vishesh banaao। doosron ko banaana arthaat svayan vishesh banna। samjha? achha!

chaaron or ke sarva number one vishesh aatmaon ko, sarva brahman jeevan vaale vishesh aatmaon ko, sada brahma baap ko saamne rakh samaan banne vaale bachchon ko anaadi baap, aadi baap ka donon roop se sarva saaligraamon aur saakaari brahman aatmaon ko sneh bhari yaadapyaar aur namaste।

party ke saath mulaakaat

1. sada baap ka haath aur saath hai, aisa bhaagyavaan samajhte ho? jahaan baap ka haath aur saath hai, vahaan sada hi maujon ki jeevan hoti hai। moonjhane vaale nahin honge, mauj mein rahenge। koi bhi paristhiti apne taraph aakarshit nahin karegi, sada baap ki taraph aakarshit honge। sabse bada aur sabse badhiya baap hai, to baap ke sivaae aur koi cheez ya vyakti aakarshit nahin kar sakta। jo baap ke haath aur saath mein palne vaale hain, unka man aur kahin ja nahi sakta। to aise sabhi ho ya maaya ki paalna mein chale jaate ho? woh raasta banda hai na। to sada baap ke saath ki mauj mein raho। baap mila sab kuchh mila, koi apraapti nahin। kitna bhi koi haath, saath chhudaaye lekin chhodne vaale nahin। aur chhodkar jaayenge bhi kahaan? isse bada aur koi bhaagya ho nahin sakta! kumaariyaan to hain hi sada bhaagyavaan। double bhaagya hai। ek - kumaari jeevan ka bhaagya, doosra - baap ka banne ka bhaagya। kumaari jeevan pooji jaati hai। jab kumaari jeevan khatma hoti hai to sabke aage jhukna padta। grihasthi jeevan hai hi bakri samaan jeevan, kumaari jeevan hai poojya jeevan। agar koi ek baar bhi gira to girne se haddi toot jaati hai na। phir kitna bhi plaastar karo, theek karo lekin haddi kamjor ho jaati hai। to samajhdaar bano। taste karke phir samajhdaar nahin banna।

2. sada apne ko kalpa-kalpa ki vijayi aatmaayen anubhav karte ho? anek baar vijayi banne ka part bajaaya hai aur ab bhi baja rahe hain। vijayi aatmaayen sada auron ko bhi vijayi banaati hain। jo anek baar kiya jaata hai woh sada hi sahaj hota hai, mehnat nahin lagti hai। anek baar ki vijayi aatma hain - is smriti se koi bhi paristhiti ko paar karna khel lagta hai। khushi anubhav hoti hai? vijayi aatmaon ko vijay adhikaar anubhav hoti hai। adhikaar mehnat se nahin milta, svatah hi milta hai। to sada vijay ki khushi se, adhikaar se aage badhte auron ko bhi aage badhaate chalo। laukik parivaar mein rehte laukik ko alaukik mein parivartan karo kyonki alaukik sambandh sukh dene vaala hai। laukik sambandh se alpakaal ka sukh milta hai, sada ka nahin। to sada sukhi ban gaye। duhkhiyon ki duniya se sukh ke sansaar mein aa gaye - aisa anubhav karte ho? pahle raavan ke bachche the to duhkhadaai the, abhi sukhdaata ke bachche sukh-swaroop ho gaye। first number yeh alaukik braahmanon ka parivaar hai, devtaayen bhi second number ho gaye। to yeh alau-kik jeevan pyaari lagti hai na।

3. sada apne ko padmaapadma bhaagyavaan anu-bhav karte ho? saare kalpa mein aisa shreshtha bhaagya praapta ho nahin sakta kyonki bhavishya svarga mein bhi is samay ke purushaartha ki praalabdha ke roop mein raajyabhaagya praapta karte ho। bhavishya bhi vartamaan bhaagya ke hisaab se milta hai। mahatva is samay ke bhaagya ka hai। beej is samay daalte ho aur phal anek janma praapta hota hai। to mahatva to beej ka gina jaata hai na। is samay bhaagya banaana ya bhaagya praapta hona - yeh beej bona hai। to is attention se sada purushaartha mein teevragti se aage badhte chalo aur sada is samay ke padmaapadma bhaagya ki smriti emerge roop mein rahe, karma karte hue yaad rahe karma mein apna shreshtha bhaagya bhoole nahin। smriti-swaroop raho। isko kehte hain padmaapadma bhaagyavaan। isi smriti ke vardaan ko sada saath rakhna to sahaj hi aage badhte rahenge, mehnat se chhoot jaayenge। achha!

prashn:- laukik sambandh mein buddhi yathaartha phainsala deti rahe - uski vidhi kya hai?

uttar:- kabhi bhi laukik baaton ko sochkar phainsala nahin karna hai। alaukik shaktishaali sthiti mein rahkar phainsala karo। koi bhi pichhli baaten smriti mein rakhne se buddhi us taraph chali jaati hai, phir pichhle sanskaar bhi pragat hote hain, isliye mushkil hota hai। bilkul hi laukik vritti bhool aatma samajh phir phaisla karo to yathaartha phaisla hoga। ise hi kehte hain vikarmaajeet ka takhta। alaukik aatmik sthiti hi vikarmaajeet sthiti ka takhta hai, is takhta par baithkar phaisla karo to yathaartha hoga। achha!

vardaan:- saathi aur saaksheepan ki smriti dvaara sab bandhanon se mukta hone vaale sarva shakti sampanna bhav

sarva shaktiyon se sampanna ban adheenta se pare hone ke liye do shabd sada yaad rahen - ek saakshi doosra-saathi। isse bandhanmukta avastha jaldi ban jaayegi। sarvashaktivaan baap ka saath hai to sarva shaktiyaan svatah praapta ho jaati hain aur saakshi bankar chalne se koi bhi bandhan mein phansenge nahin। nimitta maatra is shareer mein rahkar kartavya kiya aur saakshi ho gaye - iska vishesh abhyaas badhaao।

slogan:- ashuddha aur shuddh donon ki yuddha hai to brahman ke bajaae kshatriy ho।