Daily Murli for Saturday 27 November 2021

27-11-2021 praatahmurli om shanti "baapdaada"' madhuban

“meethe bachche - gyaan dhan ka daan karne ke liye vichaar saagar manthan karo, daan ka shauk rakho to manthan chalta rahe''

prashn:- gyaan maarga mein sada apne ko tandaroosta rakhne ka saadhan kya hai?

uttar:- sada apne aapko tandaroosta rakhne ke liye baba dvaara jo bhi gyaan ghaas (murli) milti hai, use khaakar phir ugaarna chaahiye arthaat manthan karna chaahiye। jin bachchon ko manthan karne ki arthaat hazam karne ki aadat hai, woh beemaar nahin pad sakte। sada tandaroosta woh hai jismen vikaaron ki beemaari nahin।

geet:- tu pyaar ka saagar hai…

om shanti। bachchon ne geet suna। manushya jo bhi geet aadi banaate hain, shaastra aadi sunaate hain, samajhte kuchh bhi nahin hain। jo kuchh padhte aaye hain usse koi ka kalyaan nahin hua hai aur hi akalyaan hota aaya hai। sarva ka kalyaankaari ek hi eeshvar hai। tum samajhte ho hamaara kalyaan karne vaala aaya hua hai। kalyaan ka raasta bata rahe hain। khaas tum bhaaratvaasiyon ka, aam saari duniya ka kalyaan karne vaala ek baap hi hai। satayug mein sabka kalyaan tha, tum sab sukhdhaam mein the aur baaki sab shantidham mein the। yeh bachchon ki buddhi mein hai parantu point khisak jaati hain, poori dhaarna nahin karte hain। agar ek point par vichaar saagar manthan karte rahen to aisa na ho। jaanavron mein jitna akla hai, aajkal ke manushyon mein utna bhi akla nahin। jaanvar (gau) ghaas khaate hain to ugaarte rehte hain। tumko bhi bhojan milta hai। parantu tum phir saara din ugaarte nahin ho। woh to saara din ugaarte hi rehte hain। yeh tumko milta hai gyaan ghaas। yog aur gyaan। is par din bhar vichaar saagar manthan karte rehna chaahiye। jinko service ka shauk nahin, woh vichaar saagar manthan karke kya karenge। shauk nahin to karenge bhi nahin। koi-koi ko gyaan dhan dene ka shauk rehta hai। gaooshaala mein manushya jaakar gaooon ko ghaas aadi dete hain। woh bhi punya samajhte hain। baap tumko yeh gyaan ghaas khilaate hain। is par vichaar saagar manthan karte rahenge to khushi mein rahenge aur service ka shauk bhi hoga। koi lota bhar lete hain athva boond lete hain, woh bhi svarga mein chale jaayenge। svarga ke dvaar to khulne hi hain। yoon to gyaan saagar ko hap karna hai। koi to saara hap karte hain, koi to boond lete hain phir bhi svarga mein to jaayenge। baaki jitna-jitna dhaarna karenge utna oonch pad paayenge। baaki svarga mein ek boond se bhi chale jaayenge। manushya marte hain to unko ganga ki ek boond dete hain। koi-koi ghar mein sadaiv ganga jal hi peete hain। kitna peete honge। ganga to bahti rehti hai। unko to koi hap kar na sake। tumhaare liye to gaaya hua hai - saagar ko hap kar liya। jo gyaan saagar ke najdeek aa jaate hain, jaasti service karte hain vahi vijay maala mein piroye jaate hain। jitna-jitna jo hap karte hain aur doosron ka kalyaan karte hain woh pad bhi paate hain, jitna dhaarna karenge utna khushi bhi hogi। dhanvaan ko khushi hoti hai na। jinke paas bahut athaah dhan hota hai, daan karte hain, college, dharmashaala, mandir aadi banvaate hain to unhein itni khushi bhi rehti hai। yahaan to tumko milte hain avinaashi gyaan ratna। 21 janmon ke liye avinaashi khajaana। jo achhi reeti dhaaran kar phir daan bhi karte hain, unhein achha pad milta hai। koi-koi bachche likhte hain - baba hamko dil hoti hai naukri chhod is roohaani service mein lag jaayen। projector, pradarshani lekar phirte rahen। ek boond bhi koi ko milegi to kalyaan ho jaayega। service ka bahut shauk hai। baaki har ek ki avastha ko baba jaante hain। service ke saath phir gun bhi chaahiye। na krodh hona chaahiye, na koi ulta-sulta khyaal aana chaahiye। vikaaron ki koi bhi beemaari na ho। tandarusti achhi chaahiye। jinmen vikaar kam hain, baba kahenge yeh tandarusta hain। baba mahima karenge na। gaaya hua bhi hai - kaun-kaun achhe mahaarthi hain। unhonne phir asur aur devtaaon ki ladaai dikhaai hai। devtaaon ki jeet hui। ab hamaari ladaai hai 5 vikaaron roopi asuron se। aur koi kisam ke manushya asur nahin hote hain, jinmen aasuri svabhaav hai, unko hi asur kaha jaata hai। number one aasuri svabhaav hai kaam ka, isliye sannyaasi bhi ise chhod bhaagte hain। in aasuri avgunon ko chhodne mein mehnat lagti hai। rehna bhi grihastha mein hai parantu aasuri svabhaav chhodna hai। pavitra banne se mukti jeevanmukti milti hai। kitni bhaari praapti hai। woh to gharbaar chhod bhaag jaate hain, praapti kuchh hai nahin। in chitron mein kitni achhi-achhi baaten samajhne ki hain। ve log to sirf chitron ka show karte hain। sirf chitra dekhne ke liye kitne jaate hain। phaayda kuchh bhi nahin। yahaan in chitron mein kitna gyaan hai, isse phaayda bahut hota hai। ismen art aadi ki koi baat nahin। na koi banaane vaale ki hoshiyaari aadi hai। unhon ke to naam chitra par likhe huye hote hain। artist ko bhi inaam milta hai। kai itna samajhte hain haan baap ko to zaroor yaad karna chaahiye। itna kaha to bhi praja bani। praja to athaah banni hai। main to hoon gyaan ka saagar। ek boond bhi kisko milne se svarga mein aa hi jaayenge।

tum samajhte ho pradarshani, mele se bahuton ka kalyaan hota hai। eeshvar kalyaankaari hai na। tumhaara bhi kalyaan ho raha hai। parantu ismen phir apna vichaar saagar manthan karta rahe। smriti mein laata rahe to bahut phaayda hoga। ulti-sulti baaten to ek kaan se sun doosre kaan se nikaal deni chaahiye। baap kehte hain main tumko bahut achhi baaten sunaata hoon। number one mukhya baat ek hi hai - koi ko bhi baap ka parichay do। bas ek baap ko yaad karo, vahi sab kuchh hai। bhakti maarga mein bahut aise hote hain। bolo, aap to yeh bahut achha karte ho। anguli se ishaara karte hain। sab kuchh paramatma karaate hain। woh sabka kalyaankaari oopar mein rehte hain। rehti to tum aatmaayen bhi vahaan hi ho। yeh saari gyaan ki baaten tum abhi samajhte ho।

baap kehte hain bachche, abhi tumhaara yeh kapda (shareer) sad gaya hai। satayug treta mein kitna achha vastra tha। ab sada hua vastra kahaan tak pahnenge। parantu yeh koi bhi samajhte nahin hain। baap aakar jab samjhaaye tab samjhen। abhi tum bachche samajhte ho - gyaan dene vaala hai hi ek baap। woh hai saagar। jo saagar hap kar lete hain - vahi vijay maala ke daane ban jaate hain। vo sadaiv service par hi tatpar rehte hain। baba aaye hi hain bachchon ko paavan banaane, paavan bankar phir vaapas jaana hai। jahaan se aaye hain phir vahaan hi jaayenge nambarvaar। aage peechhe nahin ja sakte hain। naatak mein actors ka act time par hota hai na। ismen bhi jo actors hain woh nambarvaar apne-apne samay par aate jaayenge। yeh behad ka naatak bana hua hai। brahm mein ham aatmaayen bindi rehti hain। vahaan aur kuchh kya hoga। kahaan ek aatma bindi, kahaan itna bada shareer। aatma kitni thodi jagah legi। brahm mahtatva kitna bada hai। jaise polaar ka end nahin, vaise brahm mah-tatva ki bhi end nahin hoti hai। kitni koshish karte hain ant paane ki, parantu pa nahin sakte, kitna maatha maarte rehte hain। parantu koi cheez hi nahin jisko pakde ya paar jaayen। science ka ghamanda kitna hai। kuchh bhi phaayda nahin। suna hai na - aakaash hi aakaash, paataal hi paataal। samajhte hain moon mein duniya hogi। woh bhi drama mein unhon ka part hai। phaayda kuchh nahin। baap to aakar hamko vishwa ka maalik banaate hain। kitna phaayda hai। baaki moon mein jaao, chhu mantra se bhabhoot aadi nikaalo... isse phaayda kya। ab to ham behad ke baap se behad ka varsa lete hain। kalpa-kalpa lete aaye hain। world ki history-geography repeat hoti hai। yeh chakra phirta rehta hai। duniya mein pahle sirf bhaarat hi tha। bhaaratvaasi hi vishwa ke maalik the। vahaan devtaaon ko koi khanda ka maaloom nahin rehta। yeh to baad mein vriddhi ko paate hain। naye-naye dharma sthaapak aakar apna-apna dharma sthaapan karte hain। baaki woh koi sadgati to nahin karte hain, sirf dharma sthaapan karte hain। unka kya gaayan hoga! muktidhaam se aate hain part bajaane। manushya kehte hain moksha mein baithe rahen। is aavaagman ke chakra mein aaye hi kyon! parantu ismen to aana hi hai। punarjanma lena hi hai, phir vaapis jaana hai। yeh bana-banaaya drama ka chakra hai। laakhon varsha ka drama to koi hota hi nahin। yeh to natural anaadi drama hai, isko kaha jaata hai eeshvareey kudrat। rachta aur rachna ki jo kudrat hai - usko jaanna hota hai। aisa koi manushya nahin jo baithkar purushaartha kare - srishti chakra ko jaanne ka। yeh srishti ka chakra kaise phirta hai, yeh khyaal karna aayega hi nahin। sabse puraane se puraana chitra hai shivling ka। khuda aaya hua hai phir uska yaadgaar banaate hain। pahle jab shiv ki pooja shuru hoti hai to heere ka ling banaate hain। phir jab bhakti rajo tamo ho jaati hai to patthar ka bhi banaate hain। shivbaaba to heeron ka nahin hai। woh to ek bindi hai, pooja ke liye bada banaate hain। samajhte hain ham heere ka shivling banaayen। somnaath ke itne bade mandir mein ek bindi rakhen to samajh mein bhi na aaye। baap samjhaate hain - bhakti maarga mein kya-kya hota hai। science vaale invenshan karte rehte hain। achhi-achhi cheezen nikaalte rehte hain। vinaash ke liye bhi nikaalte rehte hain। aage bijli thode hi thi। mitti ka deepak jalaate the।

baap samjhaate hain meethe-meethe bachche thode mein raazi mat ho jaao। achhi reeti dhaaran kar saagar ko hap karo। jo achhi service karenge to pad bhi achha paayenge। saara din khushi ka paara chadha rehna chaahiye। yeh to chhi-chhi duniya hai। ab yahaan se jaayenge। puraani duniya to khatma honi hi hai। taiyaariyaan ho rahi hain। baaki thode din hain, ismen bhi kitni service karni hai। saare bhaarat mein to kya vilaayat mein bhi sab taraph chakra lagaana hai। akhbaaron dvaara vilaayat ke kone-kone tak bhi pata lag jaana hai। is seedhi aadi se jhat samajh jaayenge। baap aata hi hai bachchon ko phir se svargavaasi banaane। barobar lakshmi-naaraayan bhaarat mein hi raajya karke gaye hain। mahima to bahut karte hain ki bhaarat praacheen desh hai। bahut mahima karte hain bhaarat aisa tha, bhaarat mein aisi pavitra deviyaan thi। tum jaante ho ham baap se 21 janmon ki praalabdha paate hain। baap bilkul simple padhaate hain। dikhaate hain dropdi ke paanv dabaaye, woh bhi kuchh hai nahin। yeh to baba kehte hain bachche bhakti maarga mein dhakke khaakar thak gaye hain। ab ham tumhaari thak door karte hain, tum dhakke kha-kha kar patit ban pade ho। baap kehte hain - main tumhaari thak door kar raha hoon। phir kabhi duhkh nahin dekhenge। jara bhi duhkh ka naam nahin hoga। baaki purushaartha kar oonch pad paana hai। achha pad paayenge to kahenge na - isne past janma mein achhe karma kiye hain। gaayan to hota hai na। parantu koi jaante nahin hain ki inhonne kab purushaartha kar yeh pad paaya! abhi baap tumko aise karma sikhlaate hain। tumko bhi kehte hain achhe karma kar oonch pad paao। yahaan manushya ke karma vikarma hote hain। vahaan to hai hi svarga। karma akarma hote hain। vahaan yeh gyaan rehta nahin hai। baap kehte hain - karmo ki gati main jaanta hoon। is samay jo achha karma karenge woh phal bhi achha paayenge। yeh karmakshetra hai। koi bahut achhe karma karte hain। koi hain jinhen service ki hi taat lagi rehti hai। poochhte hain baba hamaare mein koi khaami hai kya? nahin, service to jitni kar sakenge utni karenge। service vriddhi ko paati rahegi। service karne vaale bhi nikalte jaayenge। dil mein aathat hai - baaki thode roz hain। ab aisa purushaartha karen jo vahaan bhi oonch pad paayen। baba yeh gyaan ghaas khilaate hain, kehte hain ugaarte raho to dhaarna pakki ho jaae। khushi ka paara bhi chadhe। bahut service karni hai, bahuton ko paigaam dena hai। tum paigambar ke bachche paigambar ho। ek din bade akhbaaron mein bhi tumhaare chitra padenge। vilaayat tak to akhbaaren jaati hain na। chitron se samajh jaayenge, yeh knowledge to god father ki hai। baaki mehnat hai manmanaabhav hone ki। woh bhaaratvaasi hi mehnat karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo achhi-achhi baaten sunaate hain, un par vichaar saagar manthan kar bahuton ka kalyaankaari banna hai। ulti-sulti baaten ek kaan se sun doosre se nikaal deni hain।

2) koi bhi aasuri svabhaav hai to use chhodna hai। baap jo gyaan ghaas khilaate hain, use ugaarte rehna hai।

vardaan:- sada apne pavitra swaroop mein sthit rah gun roopi moti chugne vaale holeehans bhav

aap holi hason ka swaroop hai pavitra aur kartavya hai sadaiv gunon roopi moti chugna। avgun roopi kankad kabhi bhi buddhi mein sveekaar na ho। lekin is kartavya ko paalan karne ke liye sadaiv ek aagya yaad rahe ki na bura sochna hai, na bura sunna hai, na bura dekhna hai, na bura bolna hai.... jo is aagya ko sada smriti mein rakhte hain woh sada saagar ke kinaare par rehte hain। hanson ka thikaana hai hi saagar।

slogan:- chalte-phirte pharishta swaroop mein rehna - yahi brahma baap ki dil-pasanda gift hai।