Daily Murli for Saturday 8 January 2022

08-01-2022 praatahmurli om shanti "baapdaada"' madhuban

“meethe bachche - gyaan ratnon ko dhaaran kar roohaani hospital, university kholte jaao, jisse sabko health wealth mile''

prashn:- baap ka kaun sa kartavya koi bhi manushya aatma nahin kar sakti hai?

uttar:- aatma ko gyaan ka injection lagaakar use sada ke liye nirogi banaana, yeh kartavya koi bhi manushya nahin kar sakte। jo aatma ko nirlep maante, woh gyaan ka injection kaise lagaayenge। yeh kartavya ek avinaashi surgeon ka hi hai jo aisi gyaan-yog ki davaai dete hain jisse aadhaakalpa ke liye aatma aur shareer donon hi healthy-wealthy ban jaate hain।

geet:- yeh vakta ja raha hai…

om shanti। yeh kisne kaha ki baaki thoda samay hai? bahut gai ab thodi ki bhi thodi rahi। ab tum is puraani duniya mein baithe ho। yahaan to duhkh hi duhkh hai। sukh ka naam-nishaan nahin hai। sukh hai hi sukhdhaam mein। kaliyug ko kehte hain duhkhadhaam। ab baba kehte hain jabki main aaya hoon, tumko sukhdhaam le chalne ke liye to phir kyon rooke hue ho? duhkhadhaam se kyon dil lagi hui hai? duhkhadhaam ke bhaatiyon se athva is puraane shareer se kyon dil lagi hai? ham aaye hain tumko sukhdhaam mein le chalne ke liye। sannyaasi kehte hain is duniya ka sukh to kaag vishta samaan hai isliye unka sannyaas karte hain। tum bachchon ko ab sukhdhaam ka saakshaatkaar hua hai। yeh padhaai hai hi sukhdhaam ke liye aur is padhaai mein koi bhi takleeph nahin hai। baap ko yaad karna hai। is yaad se bhi tum nirogi banenge। tumhaari kaaya kalpa vriksha samaan badi hogi। yeh jo manushya srishti ka jhaad hai, unki aayu 5 hajaar varsha hai। usmein aadhaakalpa sukh, aadhaakalpa duhkh hai। duhkh to aadhaakalpa tumne dekha, baap kehte hain pavitra duniya mein chalna hai to pavitra bano। shreemat kehti hai yeh vish ki len-den chhod do। gyaan aur yog ki dhaarna karo। jitna gyaan ratna dhaaran karenge utna nirogi banenge।

baap ne samjhaaya hai yeh roohaani hospital bhi hai to university bhi hai। parampita paramatma aakar roohaani hospital aur university sthaapan karte hain। hospital to duniya mein bahut hain lekin aisi hospital aur university donon ikatthi kahin nahin hoti। yahaan yeh wonder hai, hospital aur university, health aur wealth ikatthi milti hain। phir kyon nahin is khajaane ko lene ke liye khade ho jaate ho। aajkal karte achaanak hi vinaash aa jaayega। baap shreshtha te shreshtha mat dete hain। tum government ko bhi samjhaao is samay behad ka baap aisi hospital aur university kholte hain jo sabko health wealth donon mile। government bhi hospital, university kholti hai। unko samjhaao is jismaani hospital kholne se kya hoga। yeh to aadhaakalpa se chalti aai hain aur mareej bhi bante hi aaye hain। yeh hai phir roohaani hospital aur university, isse manushya 21 janmon ke liye ever healthy wealthy ban sakte hain। to education minister, health minister ko bhi samjhaao ki behad ke baap ne yeh combined hospital aur university donon kholi hain। aapko bhi raay dete hain aise kholo to manushyon ka kalyaan ho jaae। baaki yeh beemaariyaan aadi to jab se raavan raajya shuru hua hai tab se shuru hui hain। aage to vaidya ki davaaeeyaan thi। ab to angreji davaaeeyaan bahut nikli hain। yeh hai avinaashi surgeon, jo avinaashi davaai dete hain। tab gaaya jaata hai gyaan anjan satguru diya, gyaan injection roohaani baap hi lagaate hain aatmaon ko। aur koi aatma ko injection lagaane vaala ho nahin sakta। woh to kah dete hain aatma nirlep hai। to tum samjhaao us hospital aur university mein to laakhon roopaya kharcha lag jaata hai। yahaan to kharche ki koi baat nahin। 3 pair prithvi chaahiye। jo koi bhi aaye to unko samjhaaya jaae। baap ko yaad karo to ever healthy banenge aur chakra ko jaanne se chakravarti raaja banenge। dhanvaan hoga to badi hospital, university kholenge। gareeb chhoti kholenge। government kitne kholti hai। aajkal to tent aadi lagaakar bhi padhaate hain aur 2-3 session rakhte hain kyonki jagah nahin hai। paise nahin hain। ismen kharche ki koi baat nahin। koi bhi jagah mile। koi aujaar aadi to rakhne nahin hain। badi simple baat hai। purush bhi kholte hain, maataayen bhi kholti hain। baap kehte hain tum hi kholo, tum hi sambhaalo। jo karega so paayega, bahuton ka kalyaan hoga। behad ka baap shreemat dete hain - shreshtha banne ke liye। bahut hain jo sunte hain parantu karte nahin hai kyonki takdeer mein nahin hain। health, wealth milti hai baap se। baba baikuntha ki baadshaahi dene aaye hain। heere javaahron ke mahal milenge। bhaarat mein hi lakshmi-naaraayan ka raajya tha। zaroor unhon ko baap ne varsa diya hoga। abhi to kaliyug mein duhkh hi duhkh hai phir satayug ki sthaapna mujhe hi karni hai। manushya koi hospital aadi kholte hain to udghaatan karte hain। baap kehte hain mai svarga ka udghaatan karta hoon। ab tum shreemat par svarga ke laayak bano। kalpa-kalpa tum laayak bante ho yeh nai baat nahin hai। dekha jaata hai gareeb bahut aate hain। baba bhi kehte hain main gareeb nivaaz hoon। saahookaaron ke paas dhan bahut hai, isliye woh samajhte hain ham svarga mein baithe hain। bhaarat gareeb hai unmein bhi jo adhik gareeb hain, unhon ko hi baap uthaate hain। saahookaar to neend mein soye pade hain। kitna gyaan aur yog baba sikhlaate hain, teesra netra bhi baba hi dete hain jisse tum saare chakra ko jaan jaate ho। baaki sab ghor andhiyaare mein hain। drama ke aadi-madhya-ant ka kisko bhi pata nahin hai। patit-paavan baap ko hi bhool gaye hain। shiv paramatma ke liye kah dete hain - thikkar bhittar mein hai।

tum jaante ho abhi sabki kayaamat ka samay hai। aag mein jal mar khatma honge। phir sabko vaapis le jaaoonga saath mein। main panda ban aaya hoon। tum paandav sena ho na। woh jismaani yaatra par le jaate hain, woh janma-janmaantar karte aaye hain। yeh hai roohaani teertha, ismen chalna phirna nahin padta hai। baap kehte hain sirf mujhe yaad karo। raat ko bhi jaagkar mujhe yaad karo। mere saath buddhi ka yog lagaao। neend ko jeetne vaale bano to tum najdeek aate jaayenge। woh hain kukh vanshaavli brahman। tum ho brahma mukh vanshaavli braahman। abhi tum roohaani yaatra mein tatpar ho, tumhein pavitra rehna hai। woh brahman log khud hi apvitra hain to auron ko pavitra bana na saken। tumko to pavitra rehna hai। roodra gyaan yagya mein pavitra brahman hi rehte hain। woh brahman log bhal mandiron mein rehte hain। naam brahman hai to devtaaon ki moorti ko haath laga sakte hain aur unko snaan aadi bhi karaate hain parantu hain woh patit, baaki aur jo manushya mandir mein jaate hain woh agar naam ke brahman nahin hain to unko haath lagaane nahin dete hain। braahmanon ka maan bahut hai। parantu hain patit vikaari। koi-koi brahmachaari honge। baap aakar samjhaate hain - sachche-sachche brahman braahmaniyaan woh hain jo 21 kul ka uddhaar karen। kanya agar uddhaar karti hogi to unke maa baap bhi honge। yeh maa baap sikhlaate hain tum 21 peedhi svarga ka maalik ban sakti ho। bachche jaante hain baap hai gupta। shivbaaba brahma dvaara hamko sab raaj samjhaate hain। yeh daada to dhandha aadi karta tha। ab bahut janmon ke ant ke janma ke bhi ant mein aakar shivbaaba ne pravesh kiya hai। aur in dvaara hi gyaan sunaate hain। yeh hai rath। shivbaaba hai rathi। ab niraakaar paramatma samjhaate hain, yeh rath bahut janmon ka patit hai। pahle-pahle yahi paavan ban jaate hain। najdeek mein hain। yeh aise nahin kehte ki main bhagwan hoon। yeh kehte mera yeh bahut janmon ke ant ke ant ka janma hai। vaanaprastha avastha hai, patit hai। baba ne ismen pravesh kiya hai। ab baap kehte hain tum apne janmon ko nahin jaante ho। main tumko bataata hoon। yeh bhi buddhi mein aata hai patit-paavan parampita paramatma hi hai। woh baap bhi hai, teacher bhi hai, guru bhi hai। saare drama ke aadi-madhya-ant ka raaz samjhaate hain। tum jaante ho baba hamko saath le jaayenge। is baap teacher guru ki raay lene se tum oonch pad paayenge। kitna achhi reeti samjhaate hain। koi to dhaarna kar shreemat par chalkar oonch pad paate hain। jo shreemat nahin maante hain, woh oonch pad nahin paate hain। baba kehte hain sukhdhaam aur shantidham ko yaad kar is duhkhadhaam ko bhoolte jaao। apne ko ashareeri samjho। ab ham vaapis ja rahe hain। baba lene aaye hain। har ek ko apna-apna part repeat karna hai। har ek ki aatma avinaashi paartadhaari hai। duniya mein kab pralay hoti nahin। yeh duhkhadhaam hai, phir jaayenge shantidham aur sukhdhaam mein। yeh buddhi mein svadarshan chakra chalaate raho aur pavitra raho to beda paar ho jaayega। tum kaal par vijay pa rahe ho, vahaan tumhaari akaale mrityu nahin hoti hai। jaise sarpa puraani khaal chhod nai lete hain vaise tum bhi khaal badal nai le lenge। aisi avastha yahaan banaani hai। bas ham yeh shareer chhod sweet hom mein jaayenge। hamko kaal kha nahin sakta। sarpa ka misaal vaastav mein sannyaasi de nahin sakte। bhramri ka misaal bhi pravritti maarga vaalon ka hai। kehte hain second mein jeevanmukti de sakte hain janak misal। yeh bhi kaapi karte hain। jeevanmukti mein donon hi chaahiye। woh sannyaasi jeevanmukti kaise de sakte hain। ab baap kehte hain chalo vaapis, mujhe yaad karo to vikarma vinaash honge। nahin to bahut saza khaayenge aur pad bhi bhrashta hoga। ant mein koi ki yaad aai to phir punarjanma to lena hi hai। yeh hai yog se health aur gyaan se wealth, second mein jeevanmukti isko kaha jaata hai। phir itne paise barbaad karne, bhatakne aadi ki kya darkaar hai isliye health minister, education minister ko samjhaao tum yeh hospital, university kholo to tumko bahut phaayda hoga। jo karega so paayega। saahookaaron ka kaam hai saahookaaron ka uddhaar karna। gareeb hi varsa lete hain। baaki jo karodapti hain unke liye kaha hua hai - kiski dabi rahegi dhool mein... pichhaadi mein aag lagegi sab khatma ho jaayega। to kyon na vinaash ke pahle kuchh kar lo to kuchh pad bhi milega। marna to hai hi। drama ka ant bhi hona hai। baba kitna achhi reeti samjhaate hain। nadiyaan to chakra lagaati rehti hain। baaki brahm putra to yeh brahma hi thahra। mama hai sarasvati। baaki hain gyaan gangaayen। paani ki gangaayen paavan kaise banaayengi। woh koi mela nahin। yeh hai sachcha mela jabki jeev aatmaayen paramatma se milti hain। tab kehte hain aatma paramatma alag rahe bahukaal... ab jeev aatma ka mela paramatma se hai। paramatma ne bhi jeev ka loan liya hai। nahin to padhaaye kaise isliye unko shiv bhagwan kaha jaata hai, jo ismen pravesh kar gyaan dete hain। sarasvati ko kaha jaata hai goddess oph knowledge। brahma ko bhi knowledge hogi। unko knowledge dene vaala kaun? gyaan ka saagar। tumhaare paas yeh knowledge nambarvaar purooshaartha anusaar hai। to yeh knowledge dhaaran kar shreemat par chalna hai। saara madaar pavitrata par hai। is par hi ablaaon par atyaachaar hote hain। dropdi ne pukaara hai। sahan karte-karte 21 janmon ke liye nagan hone se bach jaati hain। geeta mein bhi hai main saadhuon ka bhi uddhaar karta hoon। parantu saadhu log yeh akshar sunaate nahin hain।

tum jaante ho is samay saari duniya rishvat khor ban gai hai isliye in sabka vinaash hona hi hai, jinko varsa lena hoga vahi lenge। baba ko kai bachchiyaan kehti hain ham gareeb ghar mein hoti to kitna achha hota। saahookaar log to baahar nikalne nahin dete hain। baba ham kanyaayen hoti to kitna achha hota। maataaon ko seedhi utarni padti hai। baba kehte hain varsa le lo। manushya ko marne mein deri nahin lagti hai। aaphten aadi bahut hoti hain। aap sirf apne ko aatma samajh mujh baap ko yaad karo। 84 janma poore hue ab vaapis ghar chalna hai ki yahaan hi gote khaane hain? manamnaabhav, madhyaaji bhav। raavan ke varse ko bhoolo। raavan shraap dete hain। baap kehte hain bachche banenge to varsa paayenge। shreemat par nahin chalenge to varsa kaise paayenge। yeh roohaani hospital kholte jaao। jameen padi rehti hai। kiraaye par den to bhi achha hai, bahut phaayda hai। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke sameep aane ke liye roohaani yaatra par rehna hai। raat ko jaagkar bhi yeh buddhi ki yaatra zaroor karni hai।

2) sachche-sachche brahman ban 21 kul ka uddhaar karna hai। svadarshan chakradhaari banna hai। kaal par vijay paane ke liye is puraani khaal se mamatva nikaal dena hai।

vardaan:- roohaaniyat dvaara vritti, drishti, bol aur karma ko royal banaane vaale brahma baap samaan bhav

brahma baap ke bol, chaal, chehre aur chalan mein jo royalty dekhi - usmein follow karo। jaise brahma baap ne kabhi chhoti-chhoti baaton mein apni buddhi va samay nahin diya। unke mukh se kabhi saadhaaran bol nahin nikle, har bol yuktiyukta arthaat vyartha bhaav se pare avyakt bhaav aur bhaavna vaale rahe। unki vritti har aatma prati sada shubh bhaavna, shubh kaamna vaali rahi, drishti se sabko pharishte roop mein dekha। karma se sada sukh diya aur sukh liya। aise follow karo tab kahenge brahma baap samaan।

slogan:- mehnat ke bajaae muhabbat ke jhoole mein jhoolna hi shreshtha bhaagyavaan ki nishaani hai।

lavleen sthiti ka anubhav karo

jaise laukik reeti se koi kiske sneh mein lavleen hota hai to chehre se, naynon se, vaani se anubhav hota hai ki yeh lavleen hai, aashik hai। aise aapke andar baap ka sneh emerge ho to aapke bol auron ko bhi sneh mein ghaayal kar denge।