Daily Murli for Friday 7 January 2022

07-01-2022 praatahmurli om shanti "baapdaada"' madhuban

“meethe bachche - sarvashaktimaan baap ki yaad se aatma par chadhi hui vikaaron ki junk ko utaarne ka purooshaartha karo''

prashn:- baap se buddhiyog tootne ka mukhya kaaran va jodne ka sahaj purushaartha kya hai?

uttar:- buddhiyog tootta hai deh-abhimaan mein aane se, baap ke pharmaan ko bhoolne se, gandi drishti rakhne se isliye baba kehte bachche jitna ho sake aagyaakaari bano। dehi-abhimaani banne ka poora-poora purooshaartha karo। avinaashi surgeon ki yaad se aatma ko shuddh banaao।

geet:- aane vaale kal ki tum…

om shanti। shiv bhagvaanuvaach। bachchon ne geet suna। bachche samajhte hain hamaare saamne baba baitha hai, jisko patit-paavan kaha jaata hai। parampita paramatma ko zaroor patit-paavan kahenge। brahma, vishnu, shankar ko patit-paavan nahin kahenge। woh to gyaan ka saagar hai। bachche jaante hain ham aatmaaen parampita paramatma se gyaan sunti hain। tum ab aatma-abhimaani bane ho। duniya mein sab deh-abhimaani hain। aatma-abhimaani shreshthaachaari bante hain। unko paramatma hi baith aatma-abhimaani banaate hain। baap samjhaate hain aatma hi paap aatma, punya aatma banti hai। paap jeev va punya jeev nahin kaha jaata hai। aatma mein hi sanskaar rehte hain। shareer to ghadi-ghadi vinaash ho jaata hai। tum bachche jaante ho shivbaaba ko avinaashi surgeon bhi kehte hain। aatma bhi avinaashi, baap bhi avinaashi hai। aatma to kabhi vinaash nahin hoti hai। baaki haan aatma ke oopar shaitaani ki kat (junk) chadhti hai। gande te gandi number one kat chadhti hai kaam vikaar ki, phir krodh ki kat। aatmaon ko baap baith samjhaate hain to ye pakka nishchay hona chaahiye ki parampita paramatma is saadhaaran brahma tan mein pravesh karte hain। woh hua is rath ka rathi। ghode gaadi ka rath nahin hai। parampita paramatma bachchon ko samjhaate hain ki he aatma tumhaare oopar 5 vikaaron ki kat chadhi hui hai। 5 vikaaron ko raavan kaha jaata hai। raavan ki kat chadhne ke kaaran hi tum sab vikaari aur duhkhi ban gaye ho। ab main tumhaari kat utaarta hoon। is kat ko utaarne vaala surgeon main ek hi hoon। manushya aatma ka doosra koi surgeon ho nahin sakta। manushya kabhi aatma ki kat ko utaar nahin sakte। is kat ko utaarne ke liye sarvashaktimaan paramatma ki aavashyakta hai। woh kehte hain he jeev ki aatmaayen, he mere bachche, mujhe yaad karenge to tumhaari aatma ki kat utarti rahegi। yaad nahin karenge to kat utregi nahin। dhaarna nahin hogi to oonch pad bhi nahin paayenge। kat chadhe hue ko patit kaha jaata hai। jab aatma patit banti hai to unko shareer bhi patit milta hai। satopradhaan aatma hai to unko shareer bhi satopradhaan milta hai। kat chadhti hai dheere-dheere jaise aate mein namak, phir dvaapar mein bahut kat chadhti hai। aatma ki kalaayen dheere-dheere kamti hoti hain। 16 se 14 kala hone mein 1250 varsha lag jaate hain। tumko yeh smriti rahni chaahiye ki ham bi.ke., raam ke bachche hain। woh sab hain raavan ke bachche kyonki vish se paida hote hain। satayug mein vish hota hi nahin। is samay bhal koi kitni bhi aasheervaad dene vaala ho parantu unke oopar bhi zaroor koi aasheervaad dene vaala hai। jaise pope ke liye kehte hain ki woh blessing dete hain parantu unko bhi us parampita paramatma ki blessing chaahiye, jo oonche te ooncha hai। tumko blessing tab milti hai jab tum shreemat par chalte ho। jo aagyaakaari hi nahin unke oopar aasheervaad kaise hogi, baba kehte hain dehi-abhimaani bano। deh ka abhimaan hai to goya pharmaan nahin maante hain aur pad bhashta ho jaata hai। ab baap aaye hain, tum bhaarat ko shreshthaachaari banaane ki service karte ho, tumko teen pair prithvi bhi mushkil milti hai। ab main tumhaare liye saare srishti ko hi naya bana deta hoon। pradarshani mein tum badon-badon ko bhi samjha sakte ho ki ham is oonch service par hain। bhaarat ko shreshthaachaari bana rahe hain, kaise? woh aakar samjho। ham tumko batla sakte hain। pradarshani dikhlaakar samjhaana chaahiye ki shreemat hai hi ek paramatma ki, jo sadaiv ekras pavitra hai, vahi abhokta, asochta, gyaan ka saagar hai। vahi svarga ki sthaapna karte hain। unki shreemat par ham bhaarat ki service kar rahe hain। gaayan bhi hai na - paandavon ko 3 pair prithvi ke nahin milte the। samjhaane ki badi vishaal buddhi chaahiye। so tab hoga jab yog poora hoga। deh-abhimaan ki kat bhi tab hi utar sakti hai। baba raay dete hain ki phalaane-phalaane ko samjhaao ki ham sabne pratigya ki hui hai। hamaare paas to photo bhi hain। yeh photo sab head office aur dehli tatha centres par bhi hone chaahiye। ismen bhi badi vishaal buddhi chaahiye। photo ki 3-4 copy honi chaahiye। parantu maaya kis samay kisi bhi bachche par jeet pa leti hai phir aashcharyavat parampita paramatma ka bananti, vishwa ka raajya levanti, phir bhi bhaaganti ho jaate hain।

ab behad ka baap kehte hain main saari srishti ko badalta hoon phir tumko first class srishti banaakar doonga। jahaan baith tum raajya karna aur sabka vinaash ho jaayega। bachchon ko dehi-abhimaani zaroor banna hai। pavitra banne ka to sabko hak hai, jabki baap aaya hai kehte hain mere saath yog lagaao, gyaan amrit piyo to tum shreshthaachaari ban jaayenge। sannyaasi bhi vikaaron se ghrina karte hain, pavitra rehna to achha hai na। devtaaen bhi pavitra the। patit se paavan baap hi aakar banaate hain। vahaan sab nirvikaari rehte hain। woh hai hi viceless duniya। bhaarat viceless tha tab sone ki chidiya thi। aisa kisne banaaya? zaroor baap ne banaaya hoga। aatma hi apvitra, rogi bani hai। ab aatmaon ka surgeon to paramatma hai। manushya to ho na sake। baap kehte hain main khud patit-paavan hoon। mujhe sab yaad karte hain। pavitra rehna to achha hai na। saadhu-santa aadi sab mujhe hi yaad karte aaye hain। janma-janmaantar yaad karte hain ki patit-paavan aao। to bhagwan ek hai; aise nahin ki bhagat hi bhagwan hain। bhagwan ko bhi jaante nahin। kalpa pahle bhi mainne samjhaaya tha। bhagvaanuvaach - main tumko raajayog sikhaata hoon। brahma tan mein aata hoon, jo poojya tha ab pujaari bana hai। paavan raaja the ab patit rank bane hain। tum nishchay karte ho ki ham prajaapita brahma ke bachche bi.ke. hain। parampita paramatma ne brahma dvaara brahman rache। braahmanon ko hi daan diya jaata hai। kiska daan deta hoon? saare vishwa ka। jo shoodra se brahman ban meri service karte hain, jinhon ko sammukh baith samjhaate hain - tumhaari kabhi gandi drishti nahin honi chaahiye। pradarshani mein badi himmat chaahiye, samjhaane ki। patit-paavan ek baap hi hai। tum unko yaad karte ho, yeh gyaan saagar se nikli hui gyaan gangaayen hain inko shiv shaktiyaan kaha jaata hai। shivbaaba se yog lagaane se shakti milti hai। 5 vikaaron ki junk nikalti hai। chumbak sui ko tab kheenchata hai jab pavitra (saaph) ho। tum aatmaon par maaya ki kat chadhi hui hai। ab mere saath yog lagaane se hi kat utregi। ab yeh raavan raajya hai, sabki tamopradhaan buddhi hai। tab paramatma ne kaha hai main aakar ajaamil jaise paapi, ganikaaon, saadhuon aadi ka bhi uddhaar karta hoon। sabko shreshthaachaari banaane vaala ek hi baap hai। patit-paavan baap hi aakar in maataaon dvaara bhaarat ko paavan banaate hain isliye maataayen pukaarti hain ki patit hone se bachaao। purush pavitra rahne nahin dete hain। tumko government ko kehna chaahiye ki ismen hamko madad karo parantu stri bhi pakki masta chaahiye। aise na ho phir pati ko, bachchon ko yaad karti rahe phir aur hi adhogti ho jaae। baap sab baaten samjhaate rehte hain। kaise yukti racho। abhi tum bachchon ke sukh ke din aane vaale hain। main tumko golden aged duniya banaakar deta hoon jisko svarga kaha jaata hai। ab shreemat kehti hai mujh baap se yog lagaao to tumhaari kat utre। nahin to itna pad pa nahin sakenge। na dhaarna hogi। koi bhi vikarma nahin karna chaahiye। deh-abhimaan aane se buddhiyog toot padta hai। yeh brahma bhi us baap ko yaad karta hai। parampita paramatma is brahma tan mein baith inko kehte hain he brahma ki aatma, he raadhe ki aatma mujhe yaad karo to tumhaari kat utre। yaad tab pade jab apne ko aatma samjhen aur shreemat par poora chale। lobh bhi kam nahin hai। koi achhi cheez dekhi to dil hoti hai khaane ki, isko lobh kaha jaata hai।

baba kehte hain maaya choohe misal phoonk bhi deti hai, kaatti bhi hai। shaastron mein bhi aisi bahut kalpit kahaaniyaan likhi hain। sannyaasi phir kehte yeh chitra tumhaari kalpana hain। baba har baat bachchon ko samjhaate rehte hain। aise mat samjho ki ham kuchh bhi karte hain to baba ko pata nahin padta hai। baba jaante hain is duniya mein kitna ganda hai। ablaaon par atyaachaar to hone hi hain। apne ko yukti se bachaana hai। nahin to pad bhrashta ho jaayega। samjha jaata hai drama anusaar yeh sab kuchh hona hi hai। ham to samjhaate rehte hain, phir bhi nahin samajhte to koi daas daasi bante hain to koi praja bante hain। drama ki bhaavi bani hui hai। kar kya sakte hain! gareeb, saahookaar praja sab banne zaroor hain। baba aate bhi bhaarat mein hain, yeh hai naapaak sthaan। baba aakar saari duniya ko paak sthaan banaate hain। bhaarat ko hi saara makkhan milta hai। kahaani kitni sahaj hai parantu gyaan yog mein rahne ki badi himmat chaahiye। shreemat par nahin chalte hain to pad bhrashta ho jaate hain। baba direction dete hain to aise-aise samjhaao। samjhaane vaala bada sayaana chaahiye। baap par kitna lav rehta hai। kitna pyaar se bachche likhte hain ki ham shivbaaba ke rath ke liye sweater bhejte hain। shivbaaba hamaara behad ka baap hai। hamko svarga ka maalik banaate hain। buddhi mein woh baba yaad aata hai। shivbaaba ke rath ko ham toli bhejte hain। shivbaaba ke rath ko ham shrringaarte hain। jaise husain ke ghode ko shrringaarte hain। yeh sachcha-sachcha ghoda hai। patit-paavan baba hi paavan banaane vaala hai। yeh bhi apna shrangaar kar rahe hain। baba ko bhi yaad karte hain aur apne pad ko bhi yaad karte hain। yeh donon pakke hain - gyaan-gyaaneshvari phir raaj-raajeshvari banti hai to zaroor unke bachche bhi banne chaahiye। barobar maalik bante hain nambarvaar purushaartha anusaar। raajayog se raaj-raajeshvari bante hain phir jitna jo service kare, baba yuktiyaan to sab batla rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki aasheervaad lene ke liye aagyaakaari banna hai। dehi-abhimaani banne ka pharmaan paalan karna hai।

2) maaya choohi hai, isse apni sambhaal karni hai। lobh nahin karna hai। shreemat par poora-poora chalte rehna hai।

vardaan:- light ban gyaan yog ki shaktiyon ko prayog mein laane vaale prayogi aatma bhav

gyaani-yogi aatma to bane ho abhi gyaan, yog ki shakti ko prayog mein laane vaale prayogi aatma bano। jaise science ke saadhnon ka prayog light dvaara hota hai। aise silence ki shakti ka aadhaar bhi light hai। avinaashi parmaatma light, aatmik light aur saath-saath practical sthiti bhi light। to jab koi prayog karna chaahte ho to check karo light hain ya nahin? agar sthiti aur swaroop double light hai to prayog ki saphalta sahaj hogi।

slogan:- jeevanmukta avastha ka anubhav karne ke liye vikalpa aur vikarmo se mukta bano।

lavleen sthiti ka anubhav karo

tyaagi aur tapasvi aatmaayen sada baap ki lagan mein magan rehti hain। ve prem ke saagar, gyaan, aananda, sukh, shanti ke saagar mein samaai hui rehti hain। aise samaane vaale bachche hi sachche tapasvi hain। unse har baat ka tyaag svatah ho jaata hai।