Daily Murli for Monday 24 January 2022

24-01-2022 praatahmurli om shanti "baapdaada"' madhuban

“meethe bachche - 21 janmon ke liye sada sukhi banne ke liye is thode samay mein dehi-abhimaani banne ki aadat daalo''

prashn:- daivi raajdhaani sthaapan karne ke liye har ek ko kaun sa shauk hona chaahiye?

uttar:- service ka। gyaan ratnon ka daan kaise karen, yeh shauk rakho। tumhaari yeh mission hai - patiton ko paavan banaane ki isliye bachchon ko raajaai ki vriddhi karne ke liye khoob service karni hai। jahaan bhi mele aadi lagte hain, log snaan karne jaate hain vahaan parche chhapaakar baantane hain। dhindhora pitvaana hai।

geet:- tumhein paakar hamne jahaan pa liya hai…

om shanti। niraakaar shivbaaba baithkar bachchon ko samjhaate hain ki bachche dehi-abhimaani bhav। apne ko aatma samjho aur baap ko yaad karo। ham aatma hain, hamko baap padhaate hain। baba ne samjhaaya hai - sanskaar sab aatma mein hi rehte hain। jab maaya raavan ka raajya hota hai athva bhakti maarga shuru hota hai to deh-abhimaani ban jaate hain। phir jab bhakti maarga ka ant hota hai to baap aakar bachchon ko kehte hain - abhi dehi-abhimaani bano। tumne jo jap tap daan punya aadi kiye hain, unse kuchh bhi phaayda nahin mila। 5 vikaar tumhaare mein pravesh hone se tum deh-abhimaani ban pade ho। raavan hi tumko deh-abhimaani banaate hain। vaastav mein asul tum dehi-abhimaani the phir se abhi yeh practice karaai jaati hai ki apne ko aatma samjho। yeh puraana shareer hamko chhod naya jaakar lena hai। satayug mein yeh 5 vikaar hote nahin hain। devi-devta, jinko shreshtha paavan kaha jaata hai woh sadaiv aatma-abhimaani hone ke kaaran 21 janma sada sukhi rehte hain। phir jab raavanraajya hota hai to tum badalkar deh-abhimaani ban jaate ho। inko soul-conscious aur unko body conscious kaha jaata hai। niraakaari duniya mein to body conscious aur soul conscious ka prashn hi nahin uthta hai, woh to hai hi silence world। yeh sanskaar is sangamayug par hi hote hain। tumko deh-abhimaani se dehi-abhimaani banaaya jaata hai। satayug mein tum dehi-abhimaani hone kaaran duhkh nahin uthaate ho kyonki knowledge hai ki ham aatma hain। yahaan to sab apne ko deh samajhte hain। baap aakar samjhaate hain bachche abhi dehi-abhimaani bano to vikarma vinaash honge। phir tum vikarmaajeet ban jaate ho। shareer bhi hai, raajya bhi karte ho to aatma-abhimaani ho। yeh jo tumko shiksha milti hai, isse tum aatma-abhimaani ban jaate ho। sadaiv sukhi rehte ho। soul conscious hone se hi tumhaare vikarma vinaash hote hain isliye baba samjhaate hain mujhe yaad karte raho to vikarma vinaash honge। woh ganga snaan jaakar karte hain, parantu woh koi patit-paavni to hai nahin। na yog agni hai jisse vikarma bhasma hon। aise-aise mauke par tum bachchon ko service karne ka chance milta hai। jaisa samay vaisi service। kitne dher manushya snaan karne jaate honge। kumbha ke mele par sab jagah snaan karte hain। koi saagar par, koi nadi mein bhi jaate hain। to sabko baantane ke liye kitne parche chhapaane pade। khoob baantane chaahiye। point hi sirf yeh ho - bahnon-bhaaiyon vichaar karo patit-paavan, gyaan saagar aur unse nikli hui gyaan nadiyon dvaara tum paavan ban sakte ho va is paani ke saagar aur nadiyon se tum paavan ban sakte ho? is paheli ko hal kiya to second mein tum jeevanmukti pa sakte ho। raajya bhaagya ka varsa bhi pa sakte ho। aise-aise parche har ek centre chhapa le। nadiyaan to sab jagah hain। nadiyaan nikalti hain bahut door se। nadiyaan to jahaan tahaan bahut hain। phir kyon kehte ki isi hi nadi mein snaan karne se paavan honge। khaas ek jagah par itna kharcha kar takleeph karke kyon jaate hain! aise to nahin ek din snaan karne se paavan ho jaayenge। snaan to janma-janmaantar karte hain। satayug mein bhi snaan karte hain। vahaan to hain hi paavan। yahaan to thandi mein kitni takleeph lekar jaate hain snaan karne। to unhon ko samjhaana hai, andhon ki laathi banna hai। sujaag karna hai। patit-paavan aakar paavan banaate hain। to duhkhiyon ko raasta bataana chaahiye। yeh chhote-chhote parche sab bhaashaaon mein chhape hue hone chaahiye। laakh do laakh chhapaane chaahiye। jinhon ki buddhi mein gyaan ka nasha chadha hua hai, unhon ki buddhi kaam karegi। yeh chitra 2-3 laakh sabhi bhaashaaon mein hone chahie। jagah-jagah par service karni hai। ek hi point mukhya hai, aakar samjho ki second mein mukti-jeevanmukti kaise milti hai। mukhya centres ki address daal do, phir padhe va na padhe। tum bachchon ko trimoorti ke chitra par samjhaana chaahiye ki brahma dvaara sthaapna zaroor honi hai। din-pratidin manushya samajhte jaayenge ki barobar vinaash to saamne khada hai। yeh jhagde aadi badhte hi jaayenge। milkiyat ke oopar bhi kitna jhanjhat chalta hai। phir nahin to maaraamaari bhi kar lete hain। vinaash to saamne hai hi hai। jo achhi reeti geeta bhaagvat aadi padhe honge woh samjhenge barobar yeh to pahle bhi hua tha। to tum bachchon ko achhi reeti samjhaana chaahiye ki kya paani mein snaan karne se manushya patit se paavan banenge va yog agni se paavan banenge। bhagvaanuvaach - mujhe yaad karne se hi tumhaare vikarma vinaash honge। jahaan-jahaan bhi tumhaare centres hain to vishesh mauke par aise parche nikaalne chaahiye। mele bhi bahut lagte hain, jismen dher manushya jaate hain। parantu samjhenge koi mushkil hi। parche baantane ke liye bhi bahut chaahiye, jo phir samjha saken। aisi jagah khada rehna chaahiye। yeh hain gyaan ratna। service ka bahut shauk rakhna chaahiye। ham apni daivi baadshaahi sthaapan karte hain na। yeh hai hi manushya ko devta athva patit ko paavan banaane ki mission। yeh bhi tum likh sakte ho ki baap ne samjhaaya hai manamnaabhav। patit-paavan behad ke baap ko yaad karo to vikarma vinaash ho jaayenge। yaatra ki point bhi tum bachchon ko baar-baar samjhaai jaati hai। baap ko baar-baar yaad karo। simar simar sukh paao, kalah klesh mite sab tan ke arthaat tum ever healthy ban jaayenge। baap ne mantra diya hai ki mujhe simro arthaat yaad karo, aise nahin ki shiv-shiv baith simro। shiv ke bhagat aise shiv-shiv kah maala japte hain। vaastav mein hai roodra maala। shiv aur saaligraam। oopar mein hai shiv। baaki hain chhote-chhote daane arthaat aatmaaen। aatma itni chhoti bindi hai। kaale daanon ki bhi maala hoti hai। to shiv ki maala bhi bani hui hai। aatma ko apne baap ko yaad karna hai। baaki mukh se shiv, shiv bolna nahin hai। shiv-shiv kahne se phir buddhiyog maala taraph chala jaata hai। arth to koi samajhte nahin hain। shiv-shiv japne se vikarma thode hi vinaash honge। maala pherne vaalon ke paas yeh gyaan nahin hai ki vikarma tab vinaash hote hain jab sangam par direct shivbaaba aakar mantra dete hain ki maamekam yaad karo। baaki to koi kitna bhi baith shiv-shiv kahe, vikarma vinaash nahin honge। kaashi mein bhi jaakar rehte hain। to shiv kaashi, shiv kaashi kehte rehte hain। kehte hain kaashi mein shiv ka prabhaav hai। shiv ke mandir to bahut aaleeshaan bane hue hain। yeh sab hai bhakti maarga ki saamagri।

tum samjha sakte ho ki behad ka baap kehte hain - mere saath yog lagaane se hi tum paavan banenge। bachchon ko service ka shauk hona chaahiye। baap kehte hain mujhe patiton ko paavan banaana hai। tum bachche bhi paavan banaane ki service karo। parche le jaakar samjhaao। bolo, inko achhi reeti padho। maut to saamne khada hai। yeh duhkhadhaam hai। ab gyaan snaan ek hi baar karne se second mein jeevanmukti milti hai। phir nadiyon mein snaan karne, bhatakne ki kya darkaar hai। hamko second mein jeevanmukti milti hai tab dhindhora pitvaate hain। nahin to koi thode hi aise parche chhapva sakte hain। bachchon ko service ka bahut shauk hona chaahiye। paheliyaan bhi jo banvaai hain woh service ke liye hain। bahut hain jinko service ka shauk nahin hai। dhyaan mein hi nahin aata hai ki kaise service karen, ismen badi achhi chamatkaari buddhi chaahiye, jinke pairon mein deh-abhimaan ki kadiyaan (janjeeren) padi hain to dehi-abhimaani ban nahin sakte hain। samjha jaata hai, yeh kya jaakar pad paayenge। taras padta hai। sab centres mein dekha jaata hai - kaun-kaun purushaartha mein teekhe ja rahe hain। koi to ak ke phool bhi hain, koi gulaab ke phool bhi hain। ham phalaane phool hain। ham baba ki service nahin karte to samajhna chaahiye ham ak ke phool jaakar banenge। baap to bahut achhi reeti samjha rahe hain। tum heere jaisa banne ka purushaartha kar rahe ho। koi to sachcha heera hai, koi kaale jhunjhaar bhi hain। har ek ko apna khyaal karna chaahiye। hamko heere jaisa banna hai। apne se poochhna hai ham heere jaisa bane hain! achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan ki kadiyaan (janjeer) kaat dehi-abhimaani banna hai। soul conscious rahne ka sanskaar daalna hai।

2) service ka bahut shauk rakhna hai। baap samaan patit se paavan banaane ki seva karni hai। sachcha heera banna hai।

vardaan:- karma karte hue nyaari aur pyaari avastha mein rah, halke pan ki anubhooti karne vaale karmaateet bhav

karmaateet arthaat nyaara aur pyaara। karma kiya aur karne ke baad aisa anubhav ho jaise kuchh kiya hi nahin, karaane vaale ne kara liya। aisi sthiti ka anubhav karne se sada halkaapan rahega। karma karte tan ka bhi halkaapan, man ki sthiti mein bhi halkaapan, jitna hi kaarya badhta jaae utna halkaapan bhi badhta jaae। karma apni taraph aakarshit na kare, maalik hokar karmendriyon se karma karaana aur sankalp mein bhi halke-pan ka anu-bhav karna - yahi karmaateet banna hai।

slogan:- sarva praaptiyon se sada sampanna raho to sada harshit, sada sukhi aur khushanseeb ban jaayenge।

maateshvari ji ke anmol mahaavaakya - “kismat banaane vaala paramatma, kismat bigaadne vaala khud manushya hai''

ab yeh to ham jaante hain ki manushya aatma ki kismat banaane vaala kaun hai? aur kismat bigaadne vaala kaun hai? ham aise nahin kahenge ki kismat banaane vaala, bigaadne vaala vahi paramatma hai। baaki yeh zaroor hai ki kismat ko banaane vaala paramatma hai aur kismat ko bigaadne vaala khud manushya hai। ab yeh kismat bane kaise? aur phir gire kaise? is par samjhaaya jaata hai। manushya jab apne ko jaante hain aur pavitra bante hain to phir se vo bigdi hui takdeer ko bana lete hain। ab jab ham bigdi hui takdeer kehte hain to isse saabit hai koi samay apni takdeer bani hui thi, jo phir bigad gai hai। ab vahi phir bigdi takdeer ko paramatma khud aakar banaate hain। ab koi kahe paramatma khud to niraakaar hai vo takdeer ko kaise banaayega? is par samjhaaya jaata hai, niraakaar paramatma kaise apne saakaar brahma tan dvaara, avinaashi knowledge dvaara hamaari bigdi hui takdeer ko banaate hain। ab yeh knowledge dena paramatma ka kaam hai, baaki manushya aatmaayen ek do ki takdeer ko nahin jaga sakti hain। takdeer ko jagaane vaala ek hi paramatma hai tabhi to unhon ka yaadgaar mandir kaayam hai। achha।

lavleen sthiti ka anubhav karo

jis samay jis sambandh ki aavashyakta ho, usi sambandh se bhagwan ko apna bana lo। dil se kaho mera baba, aur baba kahe mere bachche, isi sneh ke saagar mein sama jaao। yeh sneh chhatrachhaaya ka kaam karta hai, iske andar maaya aa nahin sakti।