Daily Murli for Thursday 27 January 2022

27-01-2022 praatahmurli om shanti "baapdaada"' madhuban

“meethe bachche - tumhaare sukh ke din ab aa rahe hain, lok laaz, kaliyugi kul ki maryaadaayen chhod ab tum kamaai karo, baap se poora varsa lo''

prashn:- ant mati so gati kis purushaartha se hogi?

uttar:- baba kehte bachche, tumne ab tak jo kuchh padha hai use bhool sirf ek baat yaad karo - chup raho। apne ko aatma samajh baap ki yaad mein rahne ka purushaartha karo, baap bachchon ko koi takleeph nahin dete lekin darabdar hone se bachaate hain। gareeb bachche jo shaadi aadi ke liye karja lete hain, baba usse bhi chhuda dete hain। baba kehte hain bachche, tum pavitra bano to ant mati so gati ho jaayegi।

geet:- dheeraj dhar manua…

om shanti। yeh geet hai bhakti maarga ka। woh inka arth samajhte nahin hain। sirf bachche hi jaante hain। ab barobar hamaare sukh ke din aa rahe hain jiske liye ham purushaartha kar rahe hain। jitna purushaartha karenge utna sukh milna hai। shreemat par jholi bharte hain। bhakti maarga ko kaha jaata hai brahma ki raat। unhon ko yeh pata nahin hai ki patit-paavan baap kab aayenge। ab tum bachche jaante ho ki kaliyug ke ant aur satayug ke aadi ko hi sangamayug kaha jaata hai, ab tum unhon ko kumbhakran ki neend se jagaate ho। manushya yaad karte hain, ek patit-paavan, gyaan saagar baap ko। us saagar ko to yaad nahin karte jisse yeh paani ki nadiyaan nikalti hain। vahaan to nadiyon ka sangam hai, saagar aur nadiyon ka nahin hai। khoobi hai to saagar aur nadiyon ke mele mein। saagar to zaroor chaahiye na। satayug ki sthaapna karne vaala hi sachcha baap sachchi kahaani nar se naaraayan banne ki sunaate hain। yaad bhi unko hi karte hain ki he patit-paavan aao। to jab paramatma aaye tab hi kaha jaae aatmaon aur paramatma ka mela sangam ka। yeh hai sachcha-sachcha mela। tum likh sakte ho yeh aatma aur paramatma ka ek hi purushottam sangamayug par mela lagta hai, jisse patit srishti badal paavan zaroor banti hai। woh hai paavan duniya, yeh hai patit duniya। yeh hai sachcha mela, jabki patit-paavan baap aakar patit aatmaon ko paavan banaae saath le jaate hain। paramatma aur aatmaon ka mela lagta hai - patit duniya ko paavan banaane ke liye। to iska cartoon bhi banaana chaahiye। baba yeh sab advance mein samjhaate hain। triveni par aksar karke shivraatri par hi jaate hain। to yeh sab samjhaane ka bhi nasha chadhna chaahiye। jo achha samjhaane vaala hoga woh yukti se samjhaayega। nahin to bit-bit karta rahega। kumbha ka mela sachcha aur jhootha siddha karna chaahiye। yeh hai sangam jabki patit duniya paavan duniya banti hai। to sachcha-sachcha mela yeh hai। woh kumbhakran ki agyaan neend mein soye hue hain। paramatma ke liye sarvavyaapi kah dete hain। woh to patit-paavan hai, unko to aana hai paavan banaane। tum jaante ho yeh ek hi purushottam sangamayug hai, jismen chadhti kala hoti hai। satayug ke baad phir neeche girna hi hai। jo samay beeta woh kahenge poora hua। puraana hote-hote bilkul hi puraane ban jaayenge। tumhaari svaastika bhi aisi banaai hui hai। satopradhaan, sato rajo tamo..... tum jaante ho ham abhi baap se sada sukh ka varsa paane ka purushaartha karte hain। baba purushaartha bhi bahut sahaj karaate hain। koi takleeph nahin aur hi darabdar hone se bachaate hain। shaadi aadi mein kitna kharcha hota hai। gareebon ko to karja lekar bhi shaadi karaani padti hai। baba in karje aadi se bhi chhudaate hain। narka mein girne se bhi bachaate hain, to kharche aadi se bhi bachaate hain isliye yahaan gareeb bahut aate hain। kitni achhi-achhi kanyaayen aati thi, achaanak kaam ka toofaan aaya, sagaai ki, shaadi kar li। shaadi karke phir pachhtaati hain - yeh badi bhool ho gai। time lagta hai na। to baap kitni bachaane ki koshish karte hain। saahookaar to aa na saken। woh na khud varsa paate, na rachna ko sachchi kamaai karne dete। gareebon mein bhi bahut gandi rasam-rivaaj hai। lok-laaj, kul maryaada maar daalti hai। koi bachche bachchiyaan theek nahin padhte hain to dozak mein chale jaate hain। baap dozak se nikaalne aaye hain। koi nahin nikalte hain। jaanvar to nahin jo naak mein rassi daal bachaayen। samjhaate rehte hain। baap bachchon ka rachayita hone kaaran samjhaate hain bachche tum sachchi kamaai karo, bachchon ko bhi karaao। to bhi kitni khitpit hoti hai। stri aaye to pati na aaye, pati aaye to bachcha na aaye - iseelie khitpit hoti hai। samjhaate to bahut achhi reeti hai। mool baat hai pavitrata ki।

bachche likhte hain baba krodh aa gaya। to samjhaaya jaata hai tum bachchon par krodh kyon karte ho! krishna ke liye dikhaate hain - jashoda haath baandh ukhri se baandh deti thi। parantu aisi baat hai nahin। vahaan to maryaada purooshottam bade ramneek bachche hote hain। yahaan bhi koi-koi bachche bade achhe hote hain। baat karne ki bahut phajeelat rehti hai। yahaan to dher bachche hain। koi-koi to shreemat par chalte hi nahin hain, kaayde par chalte nahin। kaayde bhi to hain na। military mein kaam karne vaale poochhte hain - vahaan khaana padta hai baba kya karen? baba kehte hain koshish karo - shuddh cheej khaane ki। laachaari haalat mein drishti dekar khaao aur kya karenge। double roti to mil sakti hai। shahad, makkhan, aalu le sakte ho। jis cheez ki aadat pad gai to phir chalta rahega। har baat mein poochhna pade। baba to bahut sahaj kar dete hain। sabse achha hai pavitra banna। koi-koi bachche aise hote hain jo ghar ko hi uda dete hain। baap ki milkiyat ko udaae naam badnaam kar dete hain। tum bachchon ki buddhi mein ab hai ki hamaare sukh ke din aa rahe hain to kyon na ham purushaartha kar oonche te ooncha pad paayen। purushaartha se hi martaba milega। mama baba takhtansheen hote hain। gyaan-gyaaneshvari so phir raaj-raajeshvari banenge। tumko bhi eeshvar gyaan dete hain। to tum bhi yeh gyaan uthaae phir aap samaan banaayenge to raaj-raajeshvari banenge। maa baap ko follow karna chaahiye। ismen andhashraddha ki koi baat nahin। sannyaasiyon ke followers bante hain, parantu follow to karte nahin। jinko sannyaas dharma mein jaana hai woh ghar mein thahrenge nahin। unse sannyaasi banne ka purushaartha zaroor hoga। drama anusaar hi bhakti maarga shuru hua hai। sato rajo tamo mein to sabko aana hai। sabse pahle shreekrishna ko dekho, unko bhi 84 janma lene hain zaroor। ab antim janma mein honge tab to phir shuru mein aayenge। lakshmi-naaraayan number one so phir last mein hain phir number one mein aayenge। unhon ko jagat naath kisne banaaya? kab varsa mila? tum bachche jaante ho sangam par unko yeh varsa mila hai। saari raajdhaani sthaapan honi hai। braahmanon ne 84 janma liye hain, jo abhi part baja rahe hain। yeh badi samajhne ki baaten hain। parantu koi kya dhaarna karte, koi kya ... ismen hai purushaartha ki baat। baap prajaapita brahma ke mukh dvaara sammukh kehte hain - main aaya hoon mujhe yaad karo to yog se tumhaare vikarma vinaash honge। aatma kehti hai haan baba main in kaanon se sunta hoon। shareer bigar aap raajayog kaise sikhlaayenge। shiv jayanti bhi hai zaroor। main aata hoon parantu koi ko pata nahin padta hai।

baba samjhaate hain mai kalpa-kalpa brahma ke tan mein hi aata hoon, jisne 84 janma liye hain, ismen badli ho na sake। yeh raaj-raajeshvar tha phir ab gyaan-gyaaneshvar ban phir raaj-raajeshvar banna hai। yeh bana banaaya drama hai। gaaya bhi jaata hai - brahma-vishnu-shankar। prajaapita to brahma ko hi kahenge। vishnu va shankar ko to nahin kahenge। praja maana manushya। kehte hain manushya ko hi devta banaata hoon। rachna koi nai nahin karte hain। baba poochhte hain bachche, abhi svarga mein chalenge? vaari jaayenge? main aaya hoon - ab mujhe yaad karo। jitna ho sake dehdhaariyon ki yaad kam karte jaao। haan, tum karmayogi ho, din mein bhal sab kuchh karo parantu saath-saath aisi yaad mein raho, jo ant mein bhi meri yaad rahe। nahin to jinke saath lagan hogi vahaan janma lena padega। grihastha vyavhaar mein rehte baap ko yaad karne mein mehnat lagti hai। baap kehte hain raat ko jaago। tumhaari tabiyat kharaab nahin hogi। yog se to aur hi bal milega। svadarshan chakradhaari ban chakra phiraao। he neend ko jeetne vaale laadle bachche, jiska rath liya hai - unko kehte hain।

tum jaante ho raaj-raajeshvar bhi yeh bante hain to neend ko jeetna hai। din mein to service karni hai। baaki kamaai raat ko hi karni hai। bhakta log subah savere uthte hain। guru log unko kehte hain maala pherni hai। dhandhe mein to nahin pher sakenge। koi-koi andar pocket mein maala pherte hain। to savere uth yaad karna chaahiye। vichaar saagar manthan karna chaahiye। yaad se hi vikarma vinaash hoge। ever healthy banna hai to ever yaad karna hai tab ant mati so gati ho jaayegi। bahut bhaari pad mil jaayega, ismen dhakke khaane ki baat nahin। chup rehna hai aur padhna hai। baaki jo kuchh padha hai, use bhool jaana hai। bachche apne ko aatma samajh baap ko yaad karna hai। aatma hi shareer dvaara kaam karaati hai। karnakraavanhaar aatma hai। parampita paramatma bhi aakar in dvaara kaam karte hain। aatma bhi karti aur karaati hai। yeh sab points achhi reeti dhaaran karen tab laayak banen। jo samajhkar phir doosron ko samjhaate hain - baba unhein laayak samajhte hain। svarga mein oonch pad paane ke woh laayak hain। jo samjhaate hi nahin, unko na laayak samjhenge - oonch pad paane ka। baap to kehte hain laayak bano, raaja-raani banne ke liye। unko hi sapoot bachcha kahenge। yeh samajhne ki baaten hain aur kuchh karna nahin hai। sab baaton se baba chhuda dete hain, sirf ek baat yaad karni hai। ant kaal jo stri simre...

jo serviceable bachche honge woh baba ki murli se jhat cartoon banaayenge। vichaar saagar manthan karenge। bachchon ko service karni hai। baap ki aasheervaad, serviceable bachchon par rehti hai। aasheervaad bhi nambarvaar hoti hai। yeh behad ka baap sabhi ke prati kehte hain - follow mother-father। yeh to shivbaaba se knowledge lete hain। brahma oonch pad paate hain tum kyon nahi? ab follow karenge to kalpa-kalpaantar oonch pad paayenge। abhi fail hue to kalpa kalpaantar fail honge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki aasheervaad lene ke liye serviceable banna hai। aap samaan banaane ki seva karni hai। abhi gyaan-gyaaneshvari ban phir raaj-raajeshvari banna hai।

2) ek baap ki yaad mein rahne ki mehnat karni hai। kisi dehdhaari mein lagaav nahin rakhna hai। neend ko jeetne vaala ban raat mein kamaai jama karni hai।

vardaan:- apne sneh ke sheetal swaroop dvaara vikraal jvaala roop ko bhi parivartan karne vaale sneheemoorta bhav

sneh ke return mein vardaata baap bachchon ko yahi vardaan dete hain ki “sada har samay, har ek aatma se, har paristhiti mein snehi moorta bhav।'' kabhi bhi apni snehi moorta, sneh ki seerat, snehi vyavhaar, sneh ke samparka-sambandh ko chhodna, bhoolna mat। chaahe koi vyakti, chaahe prakriti, chaahe maaya kaisa bhi vikraal roop, jvaala roop dhaaran kar saamne aaye lekin use sada sneh ki sheetalta dvaara parivartan karte rehna। sneh ki drishti, vritti aur kriti dvaara snehi srishti banaana।

slogan:- kathinaaeeyon ko paar karne se taakat aati hai isliye unse ghabraao mat।

lavleen sthiti ka anubhav karo

lavleen sthiti vaali samaan aatmaayen sada ke yogi hain। yog lagaane vaale nahin lekin hain hi lavleen। alag hi nahin hain to yaad kya karenge! svatah yaad hai hi। jahaan saath hota hai to yaad svatah rehti hai। to samaan aatmaon ki stage saath rahne ki hai, samaaye hue rahne ki hai।