Daily Murli for Monday 31 January 2022

31-01-2022 praatahmurli om shanti "baapdaada"' madhuban

“meethe bachche - ab sach ki vaartaalaap karni hai, tum judge kar sakte ho ki right kya hai aur wrong kya hai''

prashn:- antaryaami baap duniya ke sabhi bachchon ke andar ki kaun si baat jaante hain?

uttar:- baap jaante hain ki is samay sabhi mein 5 bhoot pravesh hain, raavan sarvavyaapi hai। tum bachchon ne to 5 bhooton ka daan diya hai lekin kabhi koi vaapis le lete hain। maaya ki bahut kadi boxing hain। baar-baar haarne se kamjor ho jaate hain isliye baba kehte - bachche daan dekar phir vaapis nahin lena hai। maaya se haarna nahin। amritbele uth baap ko yaad karna to bhoot bhaag jaayenge।

geet:- nirbal se ladaai balvaan ki…

om shanti। dekho kaisa geet banaaya hua hai parantu samajhte kuchh bhi nahin hain। jaise geeta bhaagvat aadi banaaye hue hain parantu samajhte kuchh bhi nahin। abhi tum bachche in sabka arth samajhte ho। toofaan aur deeve ki kahaani kaise banaai hai। manushya to aise hi sun lete hain। tum poore arth ko jaante ho। baat yahaan ki hai। chhota deeva to kya, maaya ka toofaan aisa hai jo bade-bade deeve ko bujha deta hai। kabhi murjha jaate hain, yog kam ho jaata hai। yog ko ghrit kahenge। jitna yog lagaayen, utni jyoti jagi rahe। to yeh baat abhi ki hai। aatmaon ki jyoti jagaane ke liye shama ko aana padta hai, jisko hi paramatma kaha jaata hai। parvaane bhi manushya ke liye kahenge। tum kahenge parampita paramatma hamaare saamne haazir hai। ham aankhon se dekhte hain। unka shaareerik naam nahin hai। shiv to niraakaar hai aur knowledge-full hai। knowledge de rahe hain isliye tum kahenge ham haazir dekhte hain kyonki unse ham knowledge lete hain। sunaane vaala hai shiv। manushya kehte hain paramatma haajira-hajoor hai parantu poochho kahaan hai? kahenge sarvavyaapi hai। yeh to baat hi nahin thaharti। woh aakar raajayog sikhlaate hain। tum jaante ho shivbaaba hamko padha rahe hain। zaroor aankhon se dekhenge na! aatma bhi hai na! tum kehte ho ham aatma hain। zaroor star misal hai। dekhne mein bhi aati hai। khud aatma kehti hai main star hoon। bahut maheen hoon। aatma bhrakuti ke beech mein rehti hai, yeh bhi jaante hain। koi kehte ham kaise maanen! achha bhrakuti mein nahin samjho aankhon mein hai, kahaan na kahaan hai to sahi na। aatma hi kehti hai yeh mera shareer hai। bhrakuti shuddh sthaan hai isliye aatma ka nivaas sthaan yahaan dikhaate hain। teeka ki nishaani bhi yahaan di jaati hai। aatma kehti hai main ek shareer chhod doosra leti hoon। ismen sanshay ki to koi baat nahin। aatma yaad karti hai parampita paramatma ko। ab baap ne yaad dilaai hai। tumhaara part poora hua hai। tum patit ban gaye ho। tumse saari knowledge nikal gai hai। yeh bhi part hai, kisko dosh nahin de sakte। aatma kehti hai hamaare mein 84 janmon ka part hai। drama anusaar 84 janma bhogne hi padte hain। patit hona hi pade। yeh abhi tum jaante ho, jab samjhaaya jaata hai। tum kehte ho baba, barobar drama mein to part hi mera hai। aapne samjhaaya hai yeh anaadi drama hai। ham drama ke parvash hain। abhi tum eeshvar ke vash ho to drama ko jaante ho। phir tum raavan ke vash hone se betaale ban jaate ho। baba kehte hain main tumko kitni knowledge deta hoon। sab kehte hain yeh to bilkul nai knowledge hai। sach aur jhooth siddha kar bataaya jaata hai। bhaarat hi sachkhanda aur jhooth khanda banta hai। sachkhanda mein sach hi hoga। jhooth khanda mein jhooth ka hi vaartaalaap hai। ab jab tak tumko sach ki vaartaalaap na mile to tum judge kaise karo। baap kehte hain - ab tum judge karo ki main tumko right samjhaata hoon ya woh right samjhaate hain।

tum kehte ho main aatma hoon - meri aatma ko kyon tang karte ho? aatma hi tang hoti hai। aatma alag ho jaati hai to koi takleeph nahin hoti। shareer ke saath hi aatma duhkh sukh bhogti hai। phir nirlep kyon kehte ho! paramatma ke liye bhi kehte woh naam-roop se nyaara hai। lekin jab paramatma kehte ho to yeh bhi naam hua na। koi budbuda kehte hain, koi jyoti swaroop kehte hain। jaante kuchh bhi nahin। yeh ek hi drama hai jo repeat hota rehta hai। har ek actor ko apna part bajaana hai। ek drama hai, ek rachayita hai। in baaton ko koi jaante nahin। woh to samajhte aakaash mein yeh jo stars hain, usmein bhi duniya hai। vahaan bhi jaakar ham land karenge। plat khareed karenge। ab woh satya hai ya jo baap samjhaate hain woh satya hai? baap hi to knowledgeful, manushya srishti ka beejroop hai। koi to beej hoga na - is kalpa vriksha ka। baap samjhaate hain vriksha bhi ek hi hai। yeh vriksha abhi jadajdeebhoot avastha ko paaya hai। ab puraana jhaad ho gaya hai। phir naya kalam lagta hai kyonki jo mukhya devi-devta dharma hai woh praayah lop ho gaya hai। vistaar to saara ek beej ka hai na। to baap kitni achhi reeti baith samjhaate hain। phir yeh maaya billi jyoti bujha deti hai। toofaan lagne se kitne bade-bade jhaad gir padte hain। likhte hain baba maaya ke toofaan bahut aate hain, isko vighna bhi kaha jaata hai। baap kehte hain barobar raavan ki aasuri sampradaay vighna daalti hai, phir pukaarte hain। pukaarte-pukaarte phir maaya ke toofaan vikaar mein gira dete hain। puraane-puraane bhi gir padte hain। baap kehte hain maaya ke toofaan to aayenge। parantu tum stheriyam rehna। kabhi kisko gussa nahin karna। kehte hain baba hamko krodh bhoot ne jeet liya। baap kehte hain yeh boxing hain। ghadi-ghadi girte rahenge to kamjor ban jaayenge। tumne to vikaaron ka daan diya hai na। daan dekar phir vaapis nahin lena... koi bhi prakaar ka daan dekar phir vaapis nahin liya jaata hai। kahaani bhi hai na - raaja harishchandra ne daan diya tha.. yeh misaal baith banaaye hain। haan, to baap kehte hain insure karna ho to karo। nahin karenge to tumko kuchh bhi nahin milega। vaastav mein daan ki hui cheez vaapis ho nahin sakti। samjho kisi ne daan diya, makaan banaane mein। makaan ban gaya phir vaapas kaise ho sakta। kanya daan ki, paise diye shaadi ho gai, phir woh vaapas kaise denge। daan di hui cheez vaapas aa nahin sakti।

to baap samjhaate hain tum bachchon ko kitni khushi honi chaahiye। sab saadhu-santa aadi kehte hain paramatma sarvavyaapi hai। naam roop se nyaara hai। ab naam roop se nyaari koi cheez hoti nahin। aakaash ka bhi naam hai na। paramatma ka sab naam japte hain। shivling ki pratima hai। phir naam roop se nyaara kyon kehte ho? parantu hath se utarte hi nahin isliye baap ne samjhaaya hai - pahle-pahle koi mile to poochho parampita paramatma se aapka kya sambandh hai? woh pita hua na। tum bachche kahaan bhi service kar sakte ho। shiv ke mandir mein jaakar poochho - tumhaara parampita paramatma se kya sambandh hai? saamne shiv ka mandir khada hai। yeh aapka kya lagta hai? pita hai, to pita kabhi naam roop se nyaara va sarvavyaapi ho sakta hai kya? kitni achhi-achhi baaten samajhne ki hain। pita kehte ho to zaroor unka naam roop bhi hai। bandagi karte ho, yaad karte ho to zaroor unse kuchh praapti honi chaahiye। in sab baaton ko tumhaare mein bhi sab nahin samajhte hain। bhal yahaan sammukh baithe hain, woh bhi sab itna nishchay nahin kar sakte। aaj hain, kal nahin rahenge। tum sunenge phalaane chale gaye। dekhte ho kitne raphu-chakkar ho jaate hain। toofaan mein gir padte hain। vaastav mein saara gyaan tumhaari buddhi mein rehta hai। jaise baba beej hai unki buddhi mein saara drama ka gyaan hai। jo sikhaaya hai woh tumhaare paas bhi hai, jo tum koi ko bhi samjha sako। nambarvaar to hain। koi ki buddhi sato hai, koi ki rajo, tamo... baba se koi poochhe to baba bata sakte hain। yeh brahma bhi kehte hain ham bata sakte hain ki tumhaari buddhi satopradhaan hai va rajo tamo hai। saara service ke oopar madaar hai। koi ko gyaan ki achhi dhaarna hoti hai to kahenge satopradhaan buddhi hai। har ek khud bhi samajh sakte hain ki main kya karta hoon। poochhte hain baba hamaari koi bhool hai? baba kahenge number one bhool to yeh hai jo tum service nahin karte ho। jis kaaran pad bhrashta ho jaayega। service to dekhne mein aati hai na। kitna samjhaaya jaata hai ki mandiron aadi mein jaakar samjhaao। bhal gapoda maarte hain - ham service bahut kar sakte hain। parantu baba jaante hain ki yeh service kar nahin sakte hain। hai bahut sahaj। jhaad, drama ka gyaan bahut sahaj hai। sirf poochha jaata hai parampita paramatma se aapka kya sambandh hai? baap hai to varsa zaroor milna chaahiye। zaroor unke tum bachche ho, unse varsa mila hoga, jo ab ganvaaya hai। hamne bhi ganvaaya hua varsa phir se paaya hai। nishchay hone se jhat varsa paane lag padenge। parantu kiski takdeer mein nahin hai to maanenge bhi nahin। tadbeer kar nahin sakte। yeh bhi jaante hain woh baba hai antaryaami, main hoon baahrayaami। aise nahin saari duniya ke andar kya hai woh baithkar bataayenge। haan, yeh jaante hain ki sabke andar 5 bhoot pravesh hain, isliye kehte hain raavan sarvavyaapi hai। tumne abhi bhooton ka daan diya hi nahin, puraani duniya ke deh sahit sab sambandh se buddhiyog nikaal ek baap ko yaad karne mein hi badi mehnat hai। yeh mehnat raat ko achhi reeti ho sakti hai। abhi se practice karenge tab yaad kar sakenge, to amritvele ka asar achha chalega। savere jaagna pade। savere-savere uthkar bhakti maarga mein maala pherte hain। koi raam-raam japte hain, koi kya japte hain। anek mantra hain। kaashi ka pandit hoga to kahega shiv-shiv kaho... sannyaasi aadi sab log bhakta hain। saadhu saadhna karte hain, gharbaar chhod jangal mein jaate hain। yeh bhi saadhna hai na। hathayog maarga bhi drama mein hai। yeh to jaanna chaahiye ki svarga ka aadi sanaatan devi-devta dharma kahaan chala gaya! devtaaon ki pooja karte hain, parantu yeh nahin jaante - ham kis dharma ke hain। ham bhi pooja lakshmi-naaraayan ki karte the, dharma phir hindu kah dete the। abhi to ham likhte hain hamaara brahman athva devi-devta dharma hai phir bhi woh hindu likh dete kyonki bhaaratvaasi sab hindu hain। musalmaanon ka alag likhenge। baaki sab hinduon ki line mein aa jaate hain। yeh wonderful raaz hai।

ab tumhaari buddhi mein behad ki knowledge hai। is srishti chakra ko drama hi kahenge। drama repeat hota hai, naatak nahin। us naatak mein koi actor na ho to badle mein koi aur actor daal dete hain। koi beemaar ho to replace kar denge। chaitanya naatak hote hain, inko naatak bhi nahin, inko drama (film) kahenge। inmen koi change nahin ho sakti। manushya kehte hain ham mukti ko paayen। parantu drama mein yeh change ho nahin sakti। yeh koi jaante nahin ki yeh drama hain isse koi nikal nahin sakta। yeh badi samajhne ki baaten hain। hai bhi puraana, anek baar part bajaaya hai। chakra lagaaya hai। in baaton ko koi samajhne ki bhi koshish nahin karte। samajhte bhi hain ki barobar ek god hai aur yeh world ki history-geography repeat hoti hai। parantu jaanne ki koshish karen, uski phursat nahin hai। puraane bachchon ki hi buddhi mein nahin rehta। toofaan lagte rehte hain। aage chal vriddhi ko paate rahenge। bahut aayenge, samajhne ki koshish karenge। maut jab najdeek aayega tab jaldi samjhenge। tum to kehte ho ki vinaash aaya ki aaya। inse pahle varsa lena hai। phir tum kahenge kitna deri se aaye ho। abhi to raat-din yog mein raho tab vikarma vinaash ho। vikarma bahut hain। time lagta hai। inko bhi kitna samay laga hai। ab tak points rahi hui hain। ham to dhindhonra peette aaye hain ki maut aaya ki aaya। jaise sher ki ek kahaani hai na। woh samajhte yeh gapoda maarte hain। ek din vinaash to aa hi jaayega। phir bhaagenge, parantu tu let। hai yeh behad ki baat, phir inse woh kahaaniyaan bana di hain। vikarma vinaash ke liye yog agni bahut chaahiye। haan, naye-naye bahut aise bhi niklenge jo puraanon se bhi teekhe jaayenge। margin hai। baap kehte hain - bhal ghar mein rehte hue raat ko jaago। jitna jo daude। bhal raat ko neend bhi nahin karo। bahut teekhe jaayenge। yeh kitni taraavat ki knowledge hai। beda hi paar ho jaata hai। sab kaamnaayen siddha ho jaati hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vinaash ke pahle baap se poora-poora varsa lena hai। raat-din yog mein rah vikarma vinaash kar number aage lena hai।

2) deh sahit puraani duniya ke sab sambandhon ko buddhi se bhool ek baap ko yaad karna hai। jo cheez daan de di, use vaapas nahin lena hai।

vardaan:- sankalp roopi beej dvaara vaani aur karma mein siddhi praapta karne vaale siddhi swaroop bhav

buddhi mein jo sankalp aate hain, woh sankalp hain beej। vaacha aur karmana beej ka vistaar hai। agar sankalp arthaat beej ko trikaaldarshi sthiti mein sthit hokar check karo, shaktishaali banaao to vaani aur karma mein svatah hi sahaj saphalta hai hi। yadi beej shaktishaali nahin hota to vaani aur karma mein bhi siddhi ki shakti nahin rehti। zaroor chaitanya mein siddhi swaroop bane ho tab to jad chitron dvaara bhi aur aatmaayen siddhi praapta karti hain।

slogan:- yog agni se vyartha ke kichde ko jala do to buddhi svachchha ban jaayegi।

lavleen sthiti ka anubhav karo

samay pramaan lav aur law donon ka balance chaahiye। law mein bhi lav mahsoos ho, iske liye aatmik pyaar ki moorti bano tab har samasya ko hal karne mein sahayogi ban sakenge। shiksha ke saath sahayog dena hi aatmik pyaar ki moorti banna hai।