Daily Murli for Tuesday 22 February 2022

22-02-2022 praatahmurli om shanti "baapdaada"' madhuban

“meethe bachche - tum sabko sachchi geeta sunaakar sukh dene vaale sachche-sachche vyaas ho, tumhein achhi tarah padhkar sabko padhaana hai, sukh dena hai''

prashn:- sabse oonchi manzil kaun si hai, jis par pahunchne ka tum purooshaartha karte ho?

uttar:- apne ko ashareeri samajhna, is deh-abhimaan par jeet paana - yahi oonchi manzil hai kyonki sabse bada dushman hai deh-abhimaan। aisa purushaartha karna hai jo ant mein baap ke sivaae koi yaad na aaye। shareer chhod baap ke paas jaana hai। yeh shareer bhi yaad na rahe। yahi mehnat karni hai।

geet:- is paap ki duniya se…

om shanti। jeev aatmaayen ya bachche samajhte hain dil mein ki abhi hamko baba kahaan le chalte hain। barobar jahaan se ham aaye hain vahaan hi le chalenge। phir hamko punya aatmaon ki srishti, jeev aatmaon ki duniya mein bhej denge। shreshtha aur bhrashta akshar nikle hain, zaroor jeev aatmaon ko hi kahenge। sukh va duhkh jab shareer mein hai tab hi bhoga jaata hai। bachche jaante hain ki ab baba aaya hai। baba ka naam hamesha shiv hai। hamaara naam saaligraam hai। shiv ke mandir mein saaligraamon ki bhi pooja hoti hai, baba ne samjhaaya tha - ek hai roodra gyaan yagya, doosra hai roodra yagya। usmein khaas banaaras ke braahmanon, panditon ko bulaate hain - roodra yagya ki pooja ke liye। banaaras mein hi shiv ke rahne ke anek mandir hain। shivkaashi kehte hain, asal naam kaashi tha। phir angrejon ne banaaras naam rakha। vaaraansi naam abhi rakha hai। bhakti maarga mein aatma paramatma ka gyaan to hai nahin। pooja donon ki alag-alag karte hain। ek bada shivling banaate hain baaki chhote-chhote saaligraam anek banaate hain। tum jaante ho - ham aatmaon ka naam hai saaligraam aur hamaare baba ka naam hai shiv। saaligraam sab ek size ke banaate hain to barobar baap aur bete ka sambandh hai। aatma yaad karti rehti hai he parampita paramatma। ham paramatma nahin hain। paramatma hamaara baba hai, yeh samjhaane ki mat tumko di gai hai। din-pratidin tumko shreemat milti rehti hai ki koi ko bhi pahle baap ka parichay de varsa dilaana hai। pahle tumko siddha karke samjhaana hai ki woh niraakaar baap hai। yeh prajaapita saakaar hai। varsa niraakaar se milta hai। ab baap samjhaate hain - mera ek hi shiv naam hai। doosra koi mera naam nahin। sabhi aatmaon ke shareer ke naam anek hain। mera koi shareer hai nahin। main supreme soul hoon।

baba poochhte hain bachche, tumhaara sabse bada dushman kaun hai? jo sayaane honge woh kahenge deh-abhimaan sabse bada dushman hai jisse hi kaam ki utpatti hoti hai। deh-abhimaan ko jeetne mein badi mushkilaat hoti hai। dehi-abhimaani banne mein hi mehnat hai। janma-janmaantar tum deh ke sambandh mein chale ho। ab jaante ho barobar main aatma avinaashi hoon, jiske aadhaar se yeh shareer chalta hai। religious minded jo bhi hain woh samajhte hain ki ham aatma hain, deh nahin hain। aatma ka naam ek hi rehta hai। deh ke naam badalte hain। aatma ek shareer chhod doosra leti hai। hamko baap kehte hain tumko chalna hai punya aatmaon ki duniya mein। yeh hai paap aatmaon ki duniya। bhrashtaachaari raavan banaate hain। 10 sheesh vaala koi manushya nahin hota parantu is baat ko koi nahin jaante। sabhi raamleela aadi mein part lete rehte hain। sab ek mat bhi nahin hain। koi-koi in sab baaton ko kalpana samajhte hain। parantu yeh nahin jaante ki raavan bhrashtaachaari ko kaha jaata hai। paraai stri ko churaana yeh bhrashtaachaar hai na। is samay sab bhrashtaachaari hain kyonki vikaar mein jaate hain। jo vikaar mein na jaayen unko nirvikaari kaha jaata hai, woh hai raamraajya। yeh hai raavan raajya। bhaarat mein hi raamraajya tha। bhaarat sabse praacheen tha। pahle number mein srishti par sooryavanshi devi devtaaon ka jhanda bulanda tha। us samay chandravanshi bhi nahin the। abhi tum bachchon ka yeh sooryavanshi jhanda hai। tumko manzil ka pata laga hai phir bhool jaate ho। school mein bachcha kabhi em object ko bhool nahin sakta। student teacher ko va padhaai ko kabhi bhool nahin sakte। yahaan phir bhool jaate hain। kitni badi padhaai hai, 21 janmon ke liye raajyabhaagya paate ho। aise school mein kitna achha aur rozaana padhna chaahiye। is kalpa agar naapaas hue to kalpa-kalpa naapaas hote hi rahenge। phir kabhi bhi paas nahin hona hai। to kitna purushaartha karna chaahiye। shreemat par chalna chaahiye। shreemat kehti hai achhi reeti dhaarna karo aur karaao। agar eeshvareey direction par nahin chalenge to oonch pad bhi nahin paayenge। apni dil se poochho - ham shreemat par chal rahe hain। apne ko miya mitthu nahin samajhna hai। ab apne se poochho to jaise yeh brahma sarasvati shreemat par chalte, ham aise chal rahe hain? padhkar aur padhaate hain? kyonki tum sachchi-sachchi geeta sunaane vaale vyaas ho। woh vyaas nahin jisne geeta likhi hai। tum is samay sukhdev ke bachche sukh dene vaale vyaas ho। sukhdev shivbaaba geeta ka bhagwan hai। tum unke bachche vyaas ho katha sunaane vaale।

yeh school hai, school mein bachche ki padhaai se number ka maaloom pad jaata hai। woh hai pratyaksha, yeh hai gupta। yeh phir buddhi se jaana jaata hai ki ham kis laayak hain! kisko padhaane ka saboot mila hai। bachche likhte hain baba phalaane ne hamko aisa teer lagaaya jo ham aapke ban gaye। koi to saamne aate bhi kah nahin sakte ki baba ham to aapke ban gaye। kai bachchiyaan pavitrata ke kaaran maar bhi khaati rehti hain। koi to bachche ban phir toot bhi padte hain kyonki achhi tarah se padhte nahin। nahin to baap kitna achhi reeti samjhaate hain ki bachche sirf mujhe yaad karo aur padho is knowledge se tum chakravarti raaja banenge। ghar ke baahar bhi likh do - ek second mein jeevanmukti mil sakti hai - janak misal, 21 janmon ke liye। ek second mein tum vishwa ke maalik ban sakte ho। vishwa ke maalik to zaroor devtaayen hi banenge na। so bhi nai vishwa, naya bhaarat। jo bhaarat naya tha so ab puraana ho gaya hai। sivaae bhaarat ke aur koi khanda ko naya nahin kahenge। agar naya kahenge to phir puraana bhi kehna padega। ham full naye bhaarat khanda mein jaate hain। bhaarat hi 16 kala sampoorn banta hai aur koi khanda full moon ho na sake। woh to shuru hi aadha se hota hai। kitne achhe-achhe raaz hain। hamaara bhaarat hi sachkhanda kahlaaya jaata hai। sach ke peechhe phir jhooth bhi hai। bhaarat pahle full moon hota hai। peechhe to andhiyaara ho jaata hai। pahla jhanda hai heaven ka। gaate bhi hain paradise tha... ham achhi tarah se samjha sakte hain kyonki hamko saara anubhav hai। satayug treta mein hamne kaise raajya kiya phir dvaapar kaliyug mein kya hua, yeh sab buddhi mein aane se kitni khushi aani chaahiye। satayug ko sojhra, kaliyug ko andhiyaara kaha jaata hai, tab kehte hain gyaan anjan satguru diya... baba ne kaise aakar tum ablaaon, maataaon ko jagaaya hai। saahookaar to koi mushkil hi khada hota hai। is samay sachmuch baba gareeb nivaaz hai। gareeb hi svarga ke maalik bante hain, saahookaar nahin। iska bhi gupta kaaran hai। yahaan to balihaar jaana padta hai। gareebon ko balihaar jaane mein deri nahin lagti isliye sudaama ka misaal gaaya hua hai। tum bachchon ko ab roshni mili hai, parantu tumhaare mein bhi nambarvaar hain। aur sabki jyot ujhaai hui hai। itni chhoti si aatma mein avinaashi part noondha hua hai। wonder hai na। yeh koi science ki shakti nahin hai। tumko ab baba se shakti milti hai, barobar yeh avinaashi chakra hai jo phirta rehta hai, inka koi aadi ant nahin hai। naya koi yeh baaten sune to chakri mein aa jaaye। yahaan 10-20 varsha vaalon ko bhi poora samajh mein nahin aata hai, na kisko samjha sakte hain। tumko pichhaadi mein sab pata pad jaayega ki phalaana, phalaane ke paas janma lega, yeh hoga... jo mahaaveer honge unhon ko aage chalkar sab saakshaatkaar hote rahenge। pichhaadi mein tumko satayug ke jhaad bahut najdeek dikhaai padenge। mahaaveeron ki hi maala hai na। pahle 8 mahaaveer, phir hain 108 mahaaveer। pichhaadi mein bahut first class saakshaatkaar honge। gaaya bhi hua hai - parampita paramatma ne baan marvaaye। naatak mein bahut baaten banaai hain। vaastav mein yeh sthool baanon ki baat nahin। kanyaayen, maataayen baanon se kya jaanen। vaastav mein yeh hain gyaan baan aur inhon ko gyaan dene vaala barobar parampita paramatma hai। kitni wonderful baaten hain। parantu bachchon ko ek hi mukhya baat ghadi-ghadi bhool jaati hai। sabse kade te kadi bhool hoti hai jo deh-abhimaan mein aakar apne ko aatma nishchay nahin karte। sach koi nahin batlaate। sach to koi aadha ghanta, ghanta bhi saare din mein mushkil yaad mein rah sakte hain। koi ko samajh mein bhi nahin aata ki yog kisko kaha jaata hai। manzil bhi bahut oonchi hai। apne ko ashareeri samajhna hai, jitna ho sake utna purushaartha karna hai, jo pichhaadi ke samay koi bhi yaad na pade। koi tatva gyaani, brahm gyaani achhe hote hain to gaddi par baithe-baithe samajhte hain ham tatva mein leen ho jaayenge। shareer ka bhaan nahin rehta hai। phir jab unka shareer chhootta hai to aas-paas sannaata ho jaata hai। samajhte hain koi mahaan aatma ne shareer chhoda hai।

tum bachche yaad mein rahenge to kitni shanti phailaayenge। yeh anubhav unhon ko hoga jo tumhaare kul ke honge। baaki to machchharon sadrishya marne vaale hain। tumhaari practice ho jaayegi ashareeri hone ki। yeh practice tum yahaan hi karte ho। vahaan satayug mein to aatma ek shareer chhod doosra leti hai। yahaan to tum jaante ho yeh shareer chhod baba ke paas jaana hai। parantu pichhaadi mein koi yaad na aaye। shareer hi yaad na rahe to baaki kya raha। mehnat hai ismen। mehnat karte-karte pichhaadi mein paas hokar nikalte ho। purushaartha vaalon ka bhi pata to padta hai na, unka show nikalta rahega। baandheli gopikaayen patra aise likhti hain, jo kabhi chhuteli bhi nahin likhti। unhon ko phursat hi nahin। baandheliyaan samajhti hain shivbaaba ne in haathon ka loan liya hai to shivbaaba ka patra aayega। aisa patra to phir 5 hajaar varsha ke baad aayega। kyon nahin baba ko patra roz likhen। naynon se kaajal nikaalkar bhi likhen। aise-aise khyaalaat aayenge। aur likhti hain baba main vahi kalpa pahle vaali gopika hoon। ham aapse milenge bhi zaroor, varsa bhi zaroor lenge। yogbal hai to apne ko bandhan se chhudaati rehti hain। phir moh bhi kismen na rahe। chaturaai se samjhaana hai। apne ko bachaana hai, tod nibhaane ke liye badi koshish karni hai। maataayen samajhti hain ham pati ko bhi saath le chalen। hamaara farja hai unhon ko samjhaana। pavitrata to bahut achhi hai। baba khud kehte hain kaam mahaashatru hai, inko jeeto। mujhe yaad karo to main tumko svarga ka maalik banaaoonga। aisi bachchiyaan hain jo pati ko samjhaakar le aati hain। baandheliyon ka bhi part hai। ablaaon par atyaachaar to hote hi hain। yeh shaastron mein bhi gaayan hai - kaameshu, krodheshu... koi nai baat nahin hai। tumko to 21 janmon ka varsa milta hai, isliye thoda kuchh sahan to karna hi padta hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yogbal se apne sab bandhanon ko kaat bandhanmukta hona hai, kisi mein bhi moh nahin rakhna hai।

2) jo bhi eeshvareey direction milte hain un par poora-poora chalna hai। achhi tarah se padhna aur padhaana hai। miyaan mitthu nahin banna hai।

vardaan:- baap ke pyaar ki paalna dvaara sahaj yogi jeevan banaane vaale smriti so samarthi swaroop bhav

saare vishwa ki aatmaayen paramatma ko baap kehti hain lekin paalna aur padhaai ke paatra nahin banti hain। saare kalpa mein aap thodi si aatmaayen abhi hi is bhaagya ke paatra banti ho। to is paalna ka practical swaroop hai - sahajyogi jeevan। baap bachchon ki koi bhi mushkil baat dekh nahin sakte। bachche khud hi soch-soch kar mushkil bana dete hain। lekin smriti swaroop ke sanskaaron ko emerge karo to samarthi aa jaayegi।

slogan:- sada nishchint sthiti ka anubhav karna hai to aatma-chintan aur parmaatma-chintan karo।