Daily Murli for Tuesday 15 March 2022

15-03-2022 praatahmurli om shanti "baapdaada"' madhuban

“meethe bachche - tumhein aisa baap mila hai jo baap teacher satguru teenon hi ek hai isliye ab bhatakna chhod sachchi-sachchi kamaai mein lag jaao''

prashn:- nai duniya mein raajya karne ke laayak kaun bante hain?

uttar:- jo abhi sarvashaktimaan baap se sarvashaktiyaan praapta karte hain। tum bachche roohaani warriors ho। baap ki mat par apni raajdhaani sthaapan kar rahe ho। baap tumhein shreemat dete hain ki yogbal se tum vijay praapta karo।

prashn:- kin bachchon ke har kadam mein kamaai jama hoti hai?

uttar:- jo har karma shreemat par karte hain unke har kadam mein kamaai hi kamaai hai। yaad mein rehna bhi kamaai, service karna bhi kamaai, yagya seva karna bhi kamaai।

geet:- om namo shivaae…

om shanti। abhi tum bachchon ko yeh maaloom hua ki ek hota hai laukik baap, doosra hota hai paarlaukik baap। jab koi bhi duhkh hota hai to paarlaukik maat-pita ko yaad kiya jaata hai। koi sirf paramatma ko yaad karte hain, koi kehte hain tum maat-pita.... chaahe koi maata ko yaad kare ya na kare, lekin jab god father kehte hain to maata zaroor hai hi। bachche maata bigar to paida ho bhi nahin sakte। to paarlaukik maat-pita hai, jinko yaad kiya jaata hai। zaroor woh kuchh sukh dekar gaye hain। yaad aata hai bhaarat sukhdhaam tha, svarga tha। laukik maa-baap se duhkh milta hai tab to paarlaukik ko yaad kiya jaata hai kyonki unse bahut sukh milta hain। narka mein hain tab yaad karte hain ki phir se svarga mein jaakar sukh ghanere paaven। guru log to kehte hain - jap-tap-bhakti aadi karo। baba to aisi mat nahin dete hain। laukik baap to kahenge padhne ke liye teacher ke paas jaao, phir vaanaprastha avastha hogi to kahenge guru ke paas jaao। baba to tumko aisa nahin kehte hain। dekho, laukik aur paarlaukik mein kitna farka hai। woh kitna bhatkaate, yeh to kehte hain main tumhaara baap bhi hoon, teacher bhi hoon, guru bhi hoon, to phir tumko bhatkaaoonga kaise? yeh to teenon hi khud hai, isliye inko sab yaad karte hain। manushya to bhakti maarga mein bahut dhakke khaate hain। gyaan maarga mein dhakke khaane ki baat hi nahin। yeh bhakti aur gyaan, duhkh aur sukh ka khel bana hua hai, jo bachchon ko samjhaate hain। had ka teacher had ki padhaai padhaate hain। main behad ka teacher tumko behad ki padhaai padhaata hoon। tum jaante ho yeh hai mrityulok। vo jo padhaai padhaate hain, puraani duniya ke liye aur ham jo kuchh padhte hain nai duniya ke liye। yeh duniya din-pratidin puraani hoti jaati hai, inmen sukh kabhi bhi milna hi nahin hai। sukh aur duhkh, yeh khel kaise bana hua hai, yeh baap hi samjhaate hain। baap aatmaon se baat karte hain ki bachche tum hi sukh mein the phir jab raavan ki praveshta hoti hai tab dheere-dheere duhkh shuru hota hai। phir kalpa ke sangam par aakar tumko sukh mein le jaata hoon। abhi tumhaari buddhi ka taala khula hua hai, jo tum jaante ho yeh sab baaten yathaartha hain, yeh baap ke sivaae koi suna nahin sakte। baba hi aakar tum bachchon ko sukh deta hai। abhi tum jaante ho aatma avinaashi hai। yeh shareer to badalna padta hai। paramatma bhi param aatma hai, unka naam shiv hai, jo sabhi manushya maatra hain, unka rachayita hai। yahaan sab hain had ke creator। baba hai behad ka creator।

satayug se lekar kaliyug tak tumko jo baap mile hain woh hain had ke। satayug mein tumhaari praalabdha hai। vahaan tumko ek baap aur ek bachcha milta hai। kaliyug mein ek baap ko 8-10 bachche honge। prajaapita brahma ko dekho kitne dher bachche hain। parantu woh hain mukh vanshaavli, jo bi.ke. bante hain, phir satayug mein jaakar devta banenge। vo laukik baap, teacher, guru sab had ki baaten sunaate hain, yeh paarlaukik baap behad ki baaten sunaate hain। nai baaten baap bachchon ke aage hi bolte hain। bhal ghar mein rehte bhi tum yeh nai shiksha praapta karo। yeh bhagwan ki paathshaala hai। yeh hai shreemad bhagvat geeta paathshaala athva gyaan ke geet, jo tum hi sunte ho। gyaan-saagar baap hi aakar tumko gyaan-gyaaneshvari banaate hain। mama ko kahenge gyaan-gyaaneshvari। humanity ka sijra shuru hota hai। pahle hai prajaapita brahma phir hai jagat amba। pahle-pahle brahman rachte hain phir hain devta, kshatriy, vaishya, shoodra। jagat amba ka bhi bada martaba hai। parantu unko koi jaante hi nahin hain। dheron ke dher deviyon ke chitra bana diye hain। vaastav mein 8-10 bhuja vaale koi manushya hote hi nahin। vishnu ko 4 bhujaayen dikhaate hain, parantu 4 taange nahin dikhaate hain। yeh sab hai gudiyon ka khel। kalkatte mein bahut deviyaan banaate hain, bahut kharcha karte hain। khila-pilaakar phir jaakar dubote hain, yeh sab hai bhakti maarga। tum jaante ho ham so devi-devta the phir asur banen phir baap aakar so devi-devta banaate hain। abhi yeh bhrashtaachaari duniya hai। government bhi kehti hai, parantu seedha poochho tum patit ho? to maanenge nahin। are tum patit-paavan ko bulaate ho, sab bulaate hain yatha raaja-raani tatha praja। sannyaasi pavitra bante hain, yeh bhi drama mein noondh hai। bhaarat jaisa pavitra khanda koi hota hi nahin isliye unko kaha jaata hai sachkhanda, phir vahi jhoothkhanda banta hai। bhaarat ko paavan banaane baap bhaarat mein hi aate hain। bhaarat mein hi shiv ka avatran hota hai। somnaath ka mandir kitna bhaari banaaya hai। bhaaratvaasiyon ne hi banaaya hai, jisko baap ne itna saahookaar banaaya hai। baap to yahaan patit duniya aur patit shareer mein aate hain paavan banaane। lekin kai bachche pahchaante hi nahin hain kyonki saadhaaran hai। phir bhakti maarga mein tumhaare paas paise bahut hote hain to heere javaahron ke tum mandir banaate ho। satayug mein to anginat paise hote hain। vahaan paise ki ginti nahin, beshumaar dhan rehta hai। to baap jinko saahookaar banaate hain woh kitna bada yaadgaar banaate hain। jo pahle lakshmi-naaraayan the, vahi 84 janma bhogte hain। number one mein vo girte hain, bhakta bante hain। to jisne banaaya, uska hi yaadgaar banaate hain। lakshmi-naaraayan vikarmaajeet banen phir so vikarmi bante hain। to unhon ka farja hai pahle jisne aisa banaaya, unki pooja karna। somnaath ka mandir kitna first class tha - jinhonne loota, woh to mar gaye। baaki nishaaniyaan lagi hui hain। ab tum jaante ho ham so poojya ban rahe hain, phir pujaari banenge phir mandir banaana shuru karenge। sirf ek mandir to nahin hoga। raajaayen apne ghar mein bhi mandir banaate hain, jaise ghar mein gurudvaara banaate hain। pahla number kisne gurudvaara banaaya hoga phir bhakti maarga shuru ho jaata hai। pahle avyabhichaari bhakti karte hain phir vyabhichaari। aajkal to manushya apni bhi pooja karaate hain, unko kaha jaata hai bhoot pooja। bhoot pooja bhi duniya mein athaah hai, jo aaya so chitra banaate jaate hain। bhakti maarga hai na। abhi tumhaari buddhi mein saara gyaan hai। baap sangam par ek hi baar aakar knowledge dete hain। shaastron mein to anek avtaar likh diye hain। avtaar ek hota hai। avatrit to aatma bhi hoti hai parantu avtaar manushya ko nahin kaha jaata hai। avtaar ek hi niraakaar baap hai jisko saari duniya bulaati hai। father to ek hi hoga na, jo paramdham mein rehte hain। to mother bhi chaahiye। kya mother bhi paramdham mein rehti hai? nahin। mother father ka prashn yahaan hota hai। father ko yahaan create karna hai, isliye behad ke baba ko yaad karte hain। baba aakar svarga ki rachna karo, usko kaha jaata hai heavenly god father। abhi to kitna duhkh, ladaai, maaraamaari hai isliye bulaate hain he god father raham karo। he patit-paavan aao। ham sab duhkhi patit hain। he baba phir aakar svarga, shreshtaachaari banaao। tum sab bhrashtaachaari the, ab shreshthaachaari ban rahe ho। bhrashtaachaari ko shreshtaachaari banaana - ek baap ka hi kaam hai। jo world god father hai, woh jaante hain sab bachche is samay nidhanke ban gaye hain। unhon ko dhanka, shreshtaachaari banaana hai। 10-20 manushyon ko to shreshtaachaari nahin banaayenge। bhaarat shreshtaachaari tha to deity government thi। ab raavanraajya hai to 5 vikaaron ki praveshta hai। bhagvaanuvaach, ek niraakaar ko hi bhagwan kaha jaata hai। ek geeta ko khandan karne se sab shaastra khandan ho jaate hain। baap kehte hain maine tumko jab raajayog sikhaaya tha to bhaarat svarga ban gaya tha। geeta mainne sunaai thi। krishna ko saari duniya ka bhagwan kah na saken। ham aatmaon ka baap to niraakaar bhagwan hai। baaki yeh kaise kaha - geeta ka bhagwan shreekrishna hai। kehte hain vyaas ne likha hai। parantu baap kehte hain naye vishwa ka rachayita gyaan ka saagar, patit-paavan main hoon। mujhe hi sabhi aatmaaen pukaarti hain he patit-paavan paramatma aao, aakar mujhe paavan banaao। niraakaar baap hi brahma dvaara paavan duniya ki sthaapna, patit duniya ka vinaash karaate hain। phir jo pavitra bante, vahi raajya-bhaagya karte hain। tum ho shiv shakti sena, jagat amba nimitta bani hui hai। woh bhi shivbaaba se yog lagaae shakti le rahi hai, raavan par vijay paane। bhaarat mein hi raavan raajya hai, bhaarat mein hi raavan ko jalaate hain। bhaarat shreshtaachaari tha, yahaan kaliyug mein bhaarat bhrashtaachaari hai। yahi khel hai। bhrashtaachaari se shreshtaachaari aur shreshtaachaari se bhrashtaachaari। yeh chakra kaise phirta hai, yeh badi samajhne ki baaten hain।

tum bachche jaante ho ham sab kuchh karte hue bhaarat ko svarga bana rahe hain, baap ki shreemat par। tum ho roohaani warriors, yogbal vaale। sarvashaktimaan baap ki mat par apni raajdhaani sthaapan kar rahe ho। baap mat dete hain ki yogbal se tum vijay pa sakte ho। yog mein rehna - yeh bhi kamaai hai। yagya service karna, yeh bhi kamaai hai। aur sab chal rahe hain manushyon ki mat par aur tum ho sarvashaktimaan baap ki mat par, aur koi vishwa par jeet pa na sake। drama mein unka part hi nahin hai, world par raajya karne ka। kitni bade te badi aur saadhaaran baaten hain। pradarshani se abhi tak itna samajhte nahin hain to bhi praja nikalti rehti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har karma shreemat par karna hai। yaad mein rahkar yagya seva kar apni kamaai jama karni hai।

2) bhatakna chhod bhavishya nai duniya ke liye padhaai padhni hai। gyaan ko dhaaran kar gyaan-gyaaneshvar, gyaan-gyaaneshvari banna hai।

vardaan:- amritvele apne mastak par vijay ka tilak lagaane vaale svaraajya adhikaari so vishwa raajya adhikaari bhav

roz amritvele apne mastak par vijay ka tilak arthaat smriti ka tilak lagaao। bhakti ki nishaani tilak hai aur suhaag ki nishaani bhi tilak hai, raajya praapta karne ki nishaani bhi raajtilak hai। kabhi koi shubh kaarya mein saphalta praapta karne jaate hain to jaane ke pahle tilak dete hain। aap sabko bhi baap ke saath ka suhaag hai isliye avinaashi tilak hai। abhi svaraajya ke tilakdhaari bano to bhavishya mein vishwa ke raajya ka tilak mil jaayega।

slogan:- gyaan, gun aur shaktiyon ka daan karna hi mahaadaan hai।

anmol gyaan ratna (daadiyon ki puraani diary se)

jis samay koi daivi vatsa samajhta hai ki main tan, man, dhan sahit yagya mein svaaha arthaat arpanmay ho chuka us samay us arpan hue vatsa mein kuchh bhi apnaapan nahin rehta hai। sab yagya ki service mein aa jaata hai। usmein bhi tan aur man to najdeek rehta hai, dhan phir bhi alag hai। to tan man ko yagya ki service mein lagaana hi shuddh seva hai। yadi kehta hai tan man dhan yagya mein arthaat eeshvar prati hai, to phir apne liye kuchh bhi rah nahin sakta aur man koi bhi maaya ke ashuddha sankalp taraph daud nahin sakta kyonki eeshvar ko arpan kiya to eeshvar hai shuddh, shant। to woh man roopi ghode ko koi bhi ashuddha sankalp taraph na daudaakar apne vash mein karta hai। yadi maaya ke haath mein deta hai to maaya variety hone kaaran bhinna-bhinna prakaar se angoori lagaati hai। phir anek prakaar ke vikalpa aakar man par chadhaai karte hain। to usko samajhna chaahiye ki kya abhi bhi mere mein kuchh apnaapan raha hua hai? kyonki yadi yagya prati svaaha hua to phir pavitra ho gaya। phir yagya ki service bigar koi bhi taraph tan man work kar nahin sakta isliye is ati guhya aur maheen raaz ko samajhkar apne par bahut hi attention rakh khabardaari se chalna hai। achha - om shanti।