Daily Murli for Wednesday 30 March 2022

30-03-2022 praatahmurli om shanti "baapdaada"' madhuban

“meethe bachche - tum baap ke bane ho is duniya se marne ke liye, aisi avastha pakki karo jo ant mein baap ke sivaae koi bhi yaad na aaye''

prashn:- sabse teekhi aag kaun si hai jo saari duniya ko is samay lagi hui hai, usko bujhaane ka tareeka sunaao?

uttar:- saari duniya mein is samay “kaam'' ki aag lagi hui hai, yeh aag sabse teekhi hai। is aag ko bujhaane vaali roohaani mission ek hi hai, iske liye svayan ko fire brigade banaana hai। sivaae yogbal ke yeh aag bujh nahin sakti। kaam vikaar hi sabki satyaanaash karta hai isliye is bhoot ko bhagaane ka poora purushaartha karo।

geet:- mahphil mein jal uthi shama…

om shanti। jo achhe-achhe serviceable bachche hain, woh is geet ke arth ko achhi reeti samajh jaate hain। is geet ko sunne se saare srishti chakra, rachta aur rachna ke aadi-madhya-ant ko jaana jaata hai। geet bajaaya jaata hai ki manushya jaan jaayen। kis dvaara? gyaan ke saagar dvaara। bachche jaante hain ki ham baap ke bante hain is puraani duniya se markar apne paramdham mein jaane ke liye। yeh purushaartha aur koi kara na sake sivaae ek baap ke। baap kehte hain mera banne se tumko is duniya se marna hoga। pichhaadi mein aisi avastha pakki honi chaahiye jo sivaae ek baap ki yaad ke aur kiski bhi yaad na aaye। tum bachche jaante ho shama aai hai parvaanon ko saath le jaane ke liye। parvaane to dheron ke dher hain। pradarshani mein bhi dekho kitne dher aate hain। kai bachche to pradarshani ka arth bhi nahin samajhte honge। puraani duniya ko phir nai duniya banaane ki pradarshani। puraani duniya ka vinaash ho nai duniya ki phir sthaapna kaise hoti hai। yeh sangam par hi dikhaaya jaata hai। donon ikatthe to ho na saken। ek khatma honi hai zaroor। tumhaare mein bhi jo achhe-achhe bachche hain woh jaante hain। raamraajya arthaat nai duniya sthaapan ho rahi hai। raamraajya sthaapan hone ke baad raavan raajya khatma ho jaayega। jab tum raamraajya ke bhaati bante ho to tumhaare mein koi bhi bhoot nahin hona chaahiye। bhooton ko bhagaane ki koshish karni chaahiye। pahle-pahle kaam agni ko bujhaana hai। apne liye fire brigade banna hai। yeh aag sabse teekhi aur bilkul gandi hai, sivaae yogbal ke bujha nahin sakte। so bhi yahi savaal hai saari duniya ka। sabko kaam ki aag lagi hui hai। is aag ko bujhaane vaali roohaani mission ek hi hai। unko zaroor yahaan aana pade। kehte bhi hain he patit-paavan aao। patit kaami ko kaha jaata hai। he kaam ki aag (bhoot) ko bhasma karne vaale aao। yahaan majority to patit hain। bhal koi pavitra rehte hain। tumko yukti bataata hoon inko kaise bujhaao। yeh kaam agni bhi sato, rajo, tamo mein aati hai। tamopradhaan woh hain jo bilkul rah nahin sakte। aag lagi rehti hai। manushya ki satyaanaash yeh kaam vikaar karta hai। satayug mein koi dushman hota nahin। vahaan na raavan hota, na manushya ke dushman hote। tum samjhaate ho bhaarat ka sabse bada dushman raavan hai। khel hi saara bhaarat par bana hua hai। satayug mein raamraajya, kaliyug mein raavanraajya। cartoon mein bhi dikhaaya hai - woh bhi manushya, yeh bhi manushya। devtaaon ke aage haath jodkar jaakar kehte hain aap sarvagun sampanna ho, ham paapi duhkhi hain। yeh bhaarat shreshthaachaari paavan tha zaroor। jahaan devi devtaayen raajya karte the। lakshmi-naaraayan aur raam seeta, donon ka raajya tha। hai unhon ka gharaana। praja ka chitra to nahin banaayenge। ab baap kitna sahaj karke samjhaate hain। samjhaakar phir kehte hain buddhi mein dhaarna hoti hai na। jaise meri buddhi mein dhaarna hai, jhaad, drama ki knowledge hamaare paas hai isliye mujhe gyaan ka saagar kehte hain। srishti ke aadi madhya ant ka gyaan mere paas hai। mujhe pavitrata ka bhi saagar kehte hain। patit-paavan bhi mujhe hi kehte hain jo aakar saare bhaarat ko paavan banaate hain। yeh hai raajayog aur gyaan। bairistari padhte hain unko kahenge bairistari yog kyonki us padhaai se hi barrister ban jaate hain। yeh baap kehte hain tum bachchon ko aakar raajayog sikhaata hoon। raajaayen bhi sab bhagwan ko yaad karte hain। bhagwan se kya milega? zaroor svarga ka varsa milna chaahiye।

tum sabse poochhte ho ki parampita paramatma ka parichay hai? woh baap rachayita hai to zaroor svarga rachta hoga aur svarga ki raajaai dete hain, jo ham bachchon ko mili thi। ab nahin hai phir le rahe hain। jaise kalpa pahle bhaaratvaasiyon ne li thi। ab phir se bhaaratvaasiyon ko leni hai। (naarad ka misaal) tum bachche bhi poochhte ho chalenge vaikuntha? bhagwan se nai duniya ka varsa lenge? bhaarat ko hi varsa mila tha, ab nahin hai aur koi ko to mil na sake kyonki bhaarat hi bhagwan ki janma bhoomi hai। to charity begins at hom। yahaan vaalon ko hi denge। parantu bahut bachchiyaan samjha nahin sakti hain। bahut bachchon ko saakshaatkaar bhi karaate hain। dikhaate hain tum vaikuntha ke prince princess bante ho। yeh hai hi manushya se prince banne ki paathshaala। prince banna va raaja banna ek hi baat hai। yeh saakshaatkaar hota hai ki purushaartha kar aisa bano। baap ki shreemat par chal purushaartha karo। sirf krishna ko dekha yeh koi badi baat nahin hai। aise to aage bahut dekhte the, phir chale gaye। saakshaatkaar hua phir padhte nahin hain, aisa bante nahin hain। itna purushaartha nahin karte kyonki bhooton ka vaar hai। deh-abhimaan ka kada bhoot hai। buddhi mein rehna chaahiye ki khel poora hota hai। hamne 84 janmon ka part poora kiya, ab ham yeh puraana chola chhodta hoon। yeh bhi sirf yaad pad jaaye to aho bhaagya, khushi ka paara chadha rahe। ab ham jaate hain vaapis muktidhaam mein। yeh kiski bhi buddhi mein nahin baith sakta। bhal sannyaasi hain woh kehte hain ham shareer chhod brahm mein leen ho jaayenge। parantu tatva ko yaad karne se vikarma vinaash nahin honge to ja kaise sakte hain। le jaane vaala hai hi ek raam, sabhi bachchon ko le jaayega। aapehi to koi ja nahin sakta। purushaartha karte hain kyonki is duniya mein rehna achha nahin lagta। koi phir kehte hain ham is naatak mein aaye hi nahin, anek mat-mataantar hain। guru gosaai aadi karodon ki andaaj mein hain। sabki apni-apni mat hai। bhal kehte hain aapka gyaan bahut achha hai। baahar gaye aur khalaas। aate to bahut hain parantu unki takdeer mein nahin hai। itna martaba chhodkar aaven, yeh nahin ho sakta hai, isliye gareeb hi uthaate hain। yahaan to aakar bachcha banna pade। koi sannyaasi guru itne sab followers ko chhod aave, bada mushkil hai। so bhi yeh pravritti maarga, mel female donon ko ikttha rehna pade। nishchaybuddhi vaalon ki jhat pareeksha li jaati hai। dekhen guroopna chhodte hain। baba ka banna padta hai na। baba kisko bhi samjhaane ka sahaj upaay bhi samjhaate hain। sirf poochhna hai parampita paramatma se tumhaara kya sambandh hai? woh zaroor mukti jeevanmukti denge। manushya, manushya ko de na saken। baba se varsa lene ke liye, aakar seekhna pade, shreemat jo kahegi so karenge! pahle-pahle nishchaybuddhi chaahiye, phir shreemat jo mile। pahle-pahle parichay hi baap ka dena hai। dheron ke dher aate hain। kehte hain yeh bahut achhi cheez hai। parantu khud thode hi khade hote hain, sirf apni raay dekar chale jaate hain। yeh maaloom nahin padta ki yeh kiski mat par chal rahe hain। kehte hain aisi pradarshani to jagah-jagah honi chaahiye। mat dene lag padte hain। are eeshvar ko thode hi mat di jaati hai। parantu practice padi hui hai mat dene ki। baaki khud baith samjhen, yeh nahin। yahaan koi mat deni nahin hai, shreemat par chalna hai। pahle baap ka banna hai phir woh jo shreemat de ki aise koi ko samjhaao। phir jab kisko samjhaaven woh likhkar de ki mujhe to shreemat par chalna hai, tab samjhen ki kuchh theek samjha hai। aate to dher hain parantu achhi tarah samajhte nahin hain। gyaan ke matvaale bante nahin। is samay sab hain bhakti ke matvaale। jap, tap, paath aadi sab bhakti ke liye karte hain। bhagwan kehte hain aadhaakalpa tumne bhakti ki hai - bhagwan se milne ke liye। sab bhagat thahre। bhagwan to ek hi hai। ek ko hi kehte hain patit-paavan। to khud bhi sab patit thahre। yeh hai raavanraajya। is kalpa ke sangam ka hi gaayan hai। kalpa ke sangamayuge yuge baap aate hain।

satayug hai kalyaankaari svarga, kaliyug hai akalyaankaari narka। raavan hai akalyaankaari, raam hai kalyaankaari। yeh knowledge bachchon ki buddhi mein tapakni chaahiye। ona rehna chaahiye ki jaakar bichaaron ka kalyaan karen। koi-koi mein aisi khaami hai jo unse sab hairaan ho jaate hain। kehte hain baba phalaane mein yeh avgun hai। bahut samaachaar aate hain। baba ka kehna hai - samaachaar do to saavdhaani mile। koi avgun hoga to service kam karenge। aajkal padhe likhe - vidvaan, pandit to bahut hain, woh bahut teekhe hain। kachche bachchon ka to maatha hi kharaab kar den isliye teekhe-teekhe bachchon ko bulaate hain। samajhte hain yeh hamaare se hoshiyaar hain। pradarshani se bhi baba samaachaar mangaate rehte hain। kaun-kaun achhi service karte hain, ismen bade hoshiyaar chaahiye। koi bole tum shaastra aadi padhte ho? bolo, yeh to ham jaante hain - yeh ved shaastra, janma-janmaantar sab padhte aaye hain। abhi hamko baba ka direction hai ki kuchh nahin padho। main jo sunaaoon woh suno। meri mat par chalo, mujhe yaad karo to vikarma vinaash honge। abhi maut saamne khada hai। main aaya hoon tumko le jaane ke liye, main tumhaara baap hoon। tumko mukti jeevanmukti doonga। har ek ko drama anusaar pahle mukti mein jaana hai phir jeevanmukti, satopradhaan mein aate hain isliye kaha jaata hai sarva ke sadgati daata, sarvodaya। sarva mein saari duniya aa jaati hai। sarva maana saari duniya ka baap samjhaate hain, woh sab hain alpakaal had ki service karne vaale। behad ka sarvodaya leader to ek hi hai। saari vishwa par daya kar vishwa ko badalne vaala hai। tum jaante ho baba hamko vishwa ka maalik banaane aaye hain। ever healthy, wealthy ban jaayenge। parantu itna bhi kisko buddhi mein nahin baithta। do akshar bhi baithe to achha hai। ham bhagwan baap ke bachche hain। bhagwan se svarga ka varsa milna chaahiye। mila hua tha, ab nahin hai phir mil raha hai। baap kehte hain mujhe yaad karo, varse ko yaad karo। ek do ko yahi mantra do main tumhaara behad ka baap hoon। dharma sthaapna ke liye dhakke to khaane padte hain। buddhi mein yeh rehna chaahiye ki ab naatak poora hota hai। baaki thoda samay hai, jaana hai apne ghar phir hamaara nayesir part shuru hoga। yeh buddhi mein rahe to bahut achha।

tum bachchon ke kadam-kadam mein padam bhare hue hain। badi jabardasta kamaai hai। khud bhagwan kamaai karne ki raay dete hain। raay par chalne se svarga mein to pahunch jaate hain। parantu svarga mein bhi phir oonch pad paana chaahiye। yeh kamaai hai chupchaap karne ki। karmendriyon se karma karo parantu dil saazan ki taraph ho, bas beda paar hai। badi jabardasta kamaai hai। baap ki service mein rahne se automatically bahut aamadni hoti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab yeh naatak poora hua, humein vaapis muktidhaam mein jaana hai। is khushi mein rah puraani deh ka abhimaan chhod dena hai।

2) ek baap ki mat par chalna hai। baap ko apni mat nahin deni hai। nishchaybuddhi ban baap ki jo shreemat mili hai, us par chalte rehna hai।

vardaan:- bhinna-bhinna sthitiyon ke aasan par ekaagra ho baithne vaale raajayogi, svaraajya adhikaari bhav

raajayogi bachchon ke liye bhinna-bhinna sthitiyaan hi aasan hain, kabhi svamaan ki sthiti mein sthit ho jaao to kabhi pharishte sthiti mein, kabhi light house, might house sthiti mein, kabhi pyaar swaroop lavleen sthiti mein। jaise aasan par ekaagra hokar baithte hain aise aap bhi bhinna-bhinna sthiti ke aasan par sthit ho variety sthitiyon ka anubhav karo। jab chaaho tab man-buddhi ko order karo aur sankalp karte hi us sthiti mein sthit ho jaao tab kahenge raajayogi svaraajya adhikaari।

slogan:- vaphaadaar woh hai jise sankalp mein bhi koi dehdhaari aakarshit na kare।