Daily Murli for Tuesday 19 April 2022

19-04-2022 praatahmurli om shanti "baapdaada"' madhuban

“meethe bachche - baap hai bhakton aur bachchon ki rakhvaali karne vaala bhakta-vatsalam, patit se paavan banaakar ghar le jaane ki jimmevaari baap ki hai, bachchon ki nahin''

prashn:- baap ka kalpa-kalpa farja kya hai? kaun sa ona baap ko hi rehta hai?

uttar:- baap ka farja hai bachchon ko raajayog sikhlaakar paavan banaana, sabhi ko duhkh se chhudaana। baap ko hi ona (phikar) rehta hai ki main jaakar apne bachchon ko sukhi banaaoon।

geet:- mukhda dekh le praani…

om shanti। yeh kaun poochh raha hai? baap jisko almighty authority kehte hain। baap ki mahima to karte hain va liberator, guide bhi kehte hain। woh hai sabki sadgati karne vaala। woh sarva ka duhkh-harta sukh-karta hai। samajhte hain ki woh hai paramdham ka rahne vaala। parantu agyaan ke vash kah diya hai, sarvavyaapi hai। sab bhagat hain bachche aur bhagwan hai baap। yeh to zaroor sab bachchon ko samjhaana chaahiye ki duhkh harta sukh karta hamaara baap hai। unka naam gaaya jaata hai - bhagat vatsalam। yeh naam koi guru gosaai ko nahin de sakte hain। ab bachche ya bhakta to bahut hain un par raham karne vaala ek hi baap hai। saari duniya ko ek baap hi aakar sukh shanti dete hain। samjhaate bhi hain lakshmi-naaraayan ke raajya ko baikuntha va svarga kaha jaata hai। is samay kaliyug hai, to baba ko kitna ona hoga। had ke baap ko bhi phurna hota hai। yeh hai behad ka baap। maaloom hona chaahiye ki sabhi bhakton ka kalyaankaari ek baap hi hai, unko hi phurna rehta hai ki bachchon ko jaakar sukhi banaaoon। jab manushyon par aaphten aati hain to sabhi bhagwan ko yaad karte hain, pukaarte hain he parampita paramatma bachaao। abhi tum bachchon ke sammukh baap baitha hai। baap kehte hain kya mujhe khyaal nahin hoga ki abhi sab patit ho gaye hain। main jaakar sabko raajayog sikhlaakar paavan banaaoon। yeh to mera kalpa-kalpa ka farja hai। bhal is samay pukaarte to sabhi hain parantu woh lav nahin hai। ab tum saare drama ko samajh gaye ho। baap kehte hain main tumko paavan banaane aaya hoon। yeh meri baat maanon to sahi na। sannyaasi bhi in vikaaron ko chhodte hain। unhon ka hai had ka sannyaas। hamaara hai behad ka sannyaas, saari puraani duniya ka। baap kitna achhi tarah samjhaate hain। prajaapita brahmaakumaar aur kumaariyaan practical mein hain na। board bhi laga hua hai। kitne dher bachche hain, sab kehte hain mama baba। gaandhi ko bhi father oph nation kehte hain। woh bhi bhaarat ka father tha, unko saari duniya ka to nahin kahenge na। saari duniya ka pita to ek hi hai। woh baap kehte hain kaam mahaashatru hai, tum in par jeet pahno। inmen koi sukh nahin hai। pavitra devi devtaaon ke aage jaakar sir jhukaate hain। samajhte kuchh nahin। baap sirf kehte hain bachche yeh antim janma pavitra bano to 21 janmon ke liye tumhaari kaaya kalpatru kar doonga। bahut sahaj hai। parantu maaya aisi hai jo hara deti hai। bhal 4-6 maas pavitra rehte hain phir bhi kamar toot padti hai। tum jaante ho baba kalpa poorva ke samaan samjha rahe hain। kaurav paandav bhaai-bhaai dikhaate hain। doosre gaanv va desh ke nahin hain। patit-paavan baap, avinaashi khanda bhaarat mein hi aate hain। yeh birth place hai। shiv jayanti bhi manaate hain। niraakaar shiv paramatma janma lete, naam shiv hai। shareer to nahin hai। aur sabke brahma vishnu shankar ke bhi chitra hain। oonche te ooncha ek bhagwan hai, woh inmen pravesh karte hain। parantu aaya kaise? kab aaya? kisko bhi yeh maaloom nahin hai। bhaarat mein hi shiv jayanti manaate hain। mandir bhi sabse bada yahaan hi hai, ismen bhi ling rakh diya hai। samjhaana chaahiye shiv zaroor aate hain। shareer bigar to kuchh hona hi nahin hai। sukh duhkh aatma shareer ke saath hi bhogti hai। aatma alag ho jaati hai to kuchh bhi kar nahin sakti। shivbaaba ne bhi kuchh kiya hoga। woh patit-paavan hai parantu kaise aakar sabko paavan banaate hain, yeh koi jaante nahin। ab baba saadhaaran tan mein pravesh kar part bajaate hain। gaate bhi hain brahma dvaara sthaapna। to patit duniya mein brahma kahaan se aaya? paramatma svayan kehte hain mera shareer to hai nahin। mainne inmen pravesh kiya hai। mera naam shiv hai। tum aakar mere bane ho, tabhi tumhaara bhi naam badalta hai। sannyaasiyon ke paas jaakar sannyaas karte hain to unhon ke bhi naam badli hote hain। ab baap sammukh aaya hai। eeshvar jisko aadhaakalpa tumne yaad kiya phir chalte-chalte tum unko bhi bhool jaate ho। sannyaasi to sukh ko maante nahin, woh sukh ko kaag vishta ke samaan samajhte hain। svarga ka naam to baala hai। koi marta hai to bhi kehte hain svarga gaya। nai duniya ko sukhdhaam, puraani duniya ko duhkhadhaam kaha jaata hai। baap itna samjhaate hain to kyon nahin unki mat par poorn roop se chalna chaahiye। baba aaya hai sabko mukti-jeevanmukti dene। baba ka part hai bachchon ko varsa dena। niraakaar rachayita baap se varsa kaise milta hai, yeh bhi tum jaante ho। mera parichay tumko kahaan se mila? bhagvaanuvaach। kya main krishna hoon! main brahma hoon! nahin। main to sabhi aatmaon ka niraakaar baap hoon। aur koi nahin kah sakta। bhal apne ko shivoham kehte hain parantu yeh nahin kah sakte ki main sabhi aatmaon ka baap hoon। woh apne ko guru kahlaate hain। vahaan baap to mila nahin, teacher mila nahin, phat se guru mil gaya। yahaan kaayde ka gyaan hai। yahaan tumhaara baap teacher guru main ek hi hoon। wonder khaana chaahiye - saari patit duniya ko kaise paavan banaate honge! 21 janma ka varsa dene vaale baap ki mat par kadam-kadam chalo। maaya dushtar hai। baba-baba kehte hain, padhte bhi hain, phir bhi aho maaya vash baap ko phaarakti de dete hain isliye kehte hain khabardaar rehna। baap ko bachche phaarakti deve to kahenge na - mainne tumhaari itni paalna ki phir bhi mujhe chhod diya। yahaan to auron ki seva karni hai, auron ko aap samaan banaane ki। yeh madad meri nahin karenge? phaarakti de naam badnaam kar dete hain। kitna mushkil hoti hai। ablaaon par bahut atyaachaar hote hain। gyaan yagya mein vighna padte hain। maaya kitne toofaan laati hai। bhakti maarga mein yeh nahin hota।

baap kehte hain - sayaane bachche, tum meri mat par chalo। apne dil roopi darpan mein dekhna chaahiye ki mainne koi vikarma to nahin kiya। baap ka ban thoda bhi vikarma karte ho to sau guna danda ho jaata hai। bahut nuksaan kar dete hain। dekhna hai ham apna khaata jama karte hain ya na karte hain। maaya ke bhooton ko bhaga dena chaahiye। aisi avastha ho tab dil par chadhen to takhta par bhi baithenge। woh bhi samajhte ho hamaara takhta kya hoga। shivbaaba ka mandir banaate ho to tumhaara mahal kitna sundar aur oonch hoga। main tumko vishwa ka maalik banaata hoon, tumhaare paas athaah dhan hoga। phir tum mera mandir banaate ho। saara dhan mandir banaane mein to nahin lagaayenge। abhi tum jaante ho ham vishwa ke maalik the। vahaan vishwa mahaaraajan ko dhan daata kahenge, usne bhakti maarga mein kitna bada mandir banaaya। tum bhi banaate ho। vahaan dvaapar mein sabhi raajaaon ke paas mandir rehta hai। pahle-pahle banaate hain shiv ka mandir phir devtaaon ka banaate hain। abhi baap tum bachchon ko kitna satya samaachaar sunaate hain। tum bachchon ko is padhaai se bahut khushi honi chaahiye। tum bachche jaante ho purushaartha se ham yeh banenge, phir shreemat par kyon nahin chalte। tum bhool kyon jaate ho। yeh to kahaani hai। ghar mein mitra sambandhi kahaaniyaan sunaate hain। baap bhi tumko saare srishti ke aadi madhya ant ki kahaani sunaate hain। tum 5 hajaar varsha pahle vishwa ke maalik the। baba roz yeh kahaani sunaate hain। tum bachche ban jaao। apne ko laayak banaao - raajya-bhaagya lene ke। yeh hai satya-naaraayan ki kahaani। yeh kahaani tumko sunkar phir auron ko sunaani hai, amar banaane ke liye। phir bhakti maarga mein kathaayen sunaayenge। phir satayug treta mein yeh gyaan bhool jaayega। baap kitna saadhaaran chalte hain। kehte hain main tum bachchon ka servant hoon। jab tum duhkhi bante ho to mujhe bulaate ho ki hamko aakar vishwa ka maalik banaao। patiton ko paavan banaao। manushya samajhte thode hi hain। tum samajhte ho ki baba hamko patit se paavan bana rahe hain, to baba ko bhoolna nahin chaahiye। tumhein oonch service karni hai। baap ko yaad karna hai aur ghar chalna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roz apne dil roopi darpan mein dekhna hai ki koi bhi vikarma karke apna va doosron ka nuksaan to nahin karte hain! sayaana ban baap ki mat par chalna hai, bhooton ko bhaga dena hai।

2) baap jo satya samaachaar va kahaani sunaate hain woh sunkar auron ko bhi sunaani hai।

vardaan:- har samay apne dil mein baap ki pratyakshata ka jhanda lahraane vaale dridh sankalpadhaari bhav

jaise sneh ke kaaran har ek ke dil mein aata hai ki humein baap ko pratyaksha karna hi hai। aise apne sankalp, bol aur karma dvaara dil mein pratyakshata ka jhanda lahraao, sada khush rahne ki dance karo, kabhi khush, kabhi udaas - yeh nahin। aisa dridh sankalp arthaat vrat dhaaran karo ki jab tak jeena hai tab tak khush rehna hai। meetha baba, pyaara baba, mera baba-yahi geet automatic bajta rahe to pratyakshata ka jhanda lahraane lagega।

slogan:- vighna vinaashak banna hai to sarva shaktiyon se sampanna bano।

maateshvari ji ke anmol mahaavaakya - “paramatma sukh daata hai na ki duhkh daata''

yeh to sabhi manushya jaante hain ki takdeer banaane vaala ek hai vahi paramatma hai। kahaavat bhi hai ki takdeer banaane vaala jara saamne to aa.. to yeh saari mahima athva gaayan ek paramatma ka hai। itna samajhte hue bhi jab koi kashta aata hai, to duhkhi hone kaaran kah dete hain yeh duhkh sukh, bhala bura yeh takdeer paramatma ne banaai hai। phir kah dete hain prabhu ka diya hua meetha karke bhogna hai। ismen hi apne ko santushta rakhen, ab prabhu ka bhaana (diya hua phal) bhi unko meetha rahne thode hi deta hai, parantu manushyon ko itni bhi buddhi nahin hai ki ham paramatma ko yeh dosh kyon dete hain! yeh dosh to khud manushya ka hai। manushya ne jo bhi karma kiye hain, use bhogna padta hai। to harek apne-apne karmon anusaar bhogta hai। phir agar koi shreshtha karma karte hain to sukh bhogte hain aur koi bhrashta karma karte hain to duhkhi bante hain। ab us bhaane ko bhi meetha kar bhogne ke liye manushya ko pahle samajh honi chaahiye isliye paramatma aakar khud gyaan aur yog sikhlaate hain। ab yeh kaayda hai jo jo maaya ka saath chhod paramatma ka saath leta hai, to maaya phir unka peechha nahin chhodti hai, bahut vighna daalti hai। ab paramatma ke sadke jo bhi kuchh sahan karte hain, vo bhogna meethi lagti hai। vo humein might aur light de dete hain। ab paramatma kehte hain bachche, bigdi hui takdeer main banaata hoon, to main takdeer ko banaane vaala hoon। baaki jo manushya apne aap vismrit karte hain, vo apni takdeer aapehi bigaadte hain parantu jo manushya mere milne arth bhogna bhogte hain, unke liye javaabdaar main hoon। ab vo bhi tab hoga jab aise kahenge ki paramatma teri meri ek marji ho, bhale laakhon duniya vaale kuchh bhi kahen parantu unhon ko poorn nishchay hai ki hamko padhaane vaala svayan paramatma hai, mainne usse sauda kiya hai, ab main kiski parvaah rakhoon! tabhi to kehte hain parvaah rahi paar brahm ki woh mil gaya..... ab paramatma kehte hain jo sirf meri hi sunte hain aur mujhe hi dekhte hain, aisi seedhi par jisne paanv rakha hai, unhon ko bhal maaya ki lahar hilaayegi bhi, parantu jinko poora nishchay ho chuka hai vo to prabhu ka haath kabhi nahin chhodenge। baaki aisa na ho jara si maaya ki uchhal mein aaye apni takdeer ko lakeer laga deve। takdeer ko bigaadna aur banaana yeh manushya ke haath mein hai। achha - om shanti।