Daily Murli for Tuesday 31 May 2022

31-05-2022 praatahmurli om shanti "baapdaada"' madhuban

“meethe bachche - tumhein shuddh nasha hona chaahiye ki ham shreemat par apne hi tan-man-dhan se khaas bhaarat aam saari duniya ko svarga banaane ki seva kar rahe hain''

prashn:- tum bachchon mein bhi sabse adhik saubhaagyashaali kisko kahen?

uttar:- jo gyaan ko achhi reeti dhaaran karte aur doosron ko bhi karaate hain, ve bahut-bahut saubhaagyashaali hain। aho saubhaagya tum bhaaratvaasi bachchon ka, jinhen svayan bhagwan baithkar raajayog sikhla rahe hain। tum sachche-sachche mukh vanshaavli brahman bane ho। tumhaara yeh jhaad dheere-dheere badhta jaayega। ghar-ghar ko svarga banaane ki seva tumhein karni hai।

om shanti। tum bachche samajhte ho ki ham sena hain। tum ho sabse powerful kyonki sarvashaktimaan ke tum shiv shakti sena ho। itna nasha chadhna chaahiye। baba yahaan nasha chadhaate hain, ghar mein jaane se bhool jaate hain। tum shiv shakti sena kya kar rahe ho? saari duniya jo raavan ki janjeeron mein bandhi hui hai, unko chhudaate ho। yeh shokvaatika mein hain। bhal aeroplane mein ghoomte hain। bade-bade makaan hain, parantu yeh to sab khatma hone vaale hain। inko runya ke paani (mrigtrishna) misal raajya kaha jaata hai। baahar se dekhne mein bhabhka bahut hai, andar polampol laga hua hai। dropdi ka misaal bhi hai। baba kehte hain ki main jab aaya tha to yahi sab tha jo abhi tum dekh rahe ho। partition bhi ab hua jo tum dekh rahe ho। baaki ladaai ke maidaan aadi ki to baat hai nahin। yeh rath hai jismen shivbaaba viraajmaan ho baithkar bachchon ko gyaan dete hain। tum bhaarat ki seva kar rahe ho। jo bhi tyohaar hain, is bhaarat mein manaaye jaate hain - woh sab abhi ke hain। teejri ki katha, geeta ki katha, shiv puraan, raamaayan aadi sabhi is samay ke liye baith banaaye hain। satayug, treta mein to yeh baat nahin hai। baad mein shaastra banaane shuru kiye hain। woh to phir bhi banenge। tum bachchon ne sab samajh liya hai। aage to bilkul ghor andhiyaare mein the। is samay koi bhi srishti chakra ko yathaartha reeti nahin jaante hain। abhi tum bachchon ko shuddh anhakaar hona chaahiye। tum tan-man-dhan se bhaarat ki seva kar rahe ho, khaas bhaarat ki aam saari duniya ki। baap ki madad se ham mukti jeevanmukti ka raasta batlaate hain। tum shreemat par ye seva karte ho। shreemat hai shivbaaba ki। parantu shiv ka naam gum kar diya hai। baaki brahma ki mat aur shreekrishna ki mat dikhaai hai। so bhi krishna ko dvaapar mein le gaye hain। tum bhaarat ko svarga arthaat heere misal banaate ho। parantu ho kitne saadhaaran, koi ghamanda nahin। tumko yahaan apna sab kuchh svaaha karna hai, goya shivbaaba par poora-poora bali chadhna hai। to shivbaaba phir 21 janma bali chadhte hain। baba aise nahin kehte ki grihastha vyavhaar nahin sambhaalna hai। woh bhi sambhaalna hai, parantu shreemat par। avinaashi surgeon se kuchh chhipaana nahin। gaaya bhi jaata hai guru bigar ghor andhiyaara। yeh brahma daada bhi kehte hain ki shivbaaba bigar ham aur tum bilkul ghor andhiyaare mein the। woh to shiv shankar ko mila dete hain। brahma kaun hai? kab aate hain? kya aakar karte hain? har ek baat samajhna chaahiye na। jaanvar to nahin samjhenge। abhi tum bachche nambarvaar purooshaartha anusaar jaan gaye ho। vidvaan, pandit aadi koi nahin jaante hain ki satguru bigar ghor andhiyaara hai। guru log to bahut hain। sabhi ka satguru ek hai, jisko vrikshapti kehte hain। to tum bachchon ko nasha chadhna chaahiye। yeh duniya jo in okhon se dekh rahe ho, woh nahin rahegi। jo ab buddhi se jaante ho vahi rehna hai। to is puraani duniya se mamatva mita dena chaahiye। bachchon ko bhi sambhaalna hai। baba ko kitne dher baal-bachche hain। koi to kehte hain baba ham aapka do maas ka bachcha hoon। koi kehte ek maas ka bachcha hoon। ek maas ke bachche bhi jhat dhaarna kar ekdam javaan ban jaate hain aur koi to 20 varsha vaale bhi jaamde (baune) ban jaate hain। yeh to tum jaante ho ki naya jhaad hai, dheere-dheere vriddhi ko paayenge। pahle zaroor patte niklenge। baad mein phool niklenge। yahaan hi phool banna hai। vahaan sab phool hi phool hain। yahaan to koi gulaab ke, koi champa ke bante hain। jaisi-jaisi dhaarna aisa pad mil jaata hai। vahaan phool ki baat nahin। martabe ki baat hai। to yeh nasha rehna chaahiye ki ham in okhon se pavitra shivaalay svarga ko dekhenge। aadhaakalpa sirf kehte the ki phalaana svarga padhaara। woh kaamna practical mein baap hi ab poori karte hain।

abhi tum baap ke bachche ban jaate ho to bhaarat ka khaana aabaad ho jaata hai। 33 karod devta gaaye jaate hain, woh itne koi satayug treta mein nahin rehte hain। yeh to saare bhaarat ke devi-devta dharma ki aadamshumaari hai। baahar ki taraph dekho to kitne friction pad gaye hain। cheen-jaapaan hai to bauddhi, naam phir bhi bauddha ka lenge lekin friction (matbhed) kitni hai। yahaan bhaarat mein to shivbaaba ko uda diya hai, unko bilkul jaante hi nahin। chitra hain, gaate bhi hain, nandeegan bhi hai parantu jaante nahin। abhi tum bachche jaante ho, baap ne bataaya hai ki ham paramdham se aakar yahaan yeh shareer le part baja rahe hain। tum chakra ko jaan gaye ho। gyaan-anjan satguru diya, agyaan andher vinaash। aage to kuchh bhi pata nahin tha। abhi behad ke baap creator, director, mukhya actor ko tum jaan gaye ho। 84 janma kisko lene chaahiye! kaun lete honge, to tum jaante ho। tumhaara ab teesra netra khula hai to itna nasha rehna chaahiye। manushya jab sharaab peete hain to bhal deevaala maara hua ho to bhi nashe mein samajhte hain ki sabse saahookaar main hoon। baba to vaishnav the, kabhi touch nahin kiya। baaki suna hai ki sharaab piya aur nasha chadha। kehte hain ki yaadvon ne bhi sharaab pi, moosal nikaal ek do ke kul ka naash kiya। yahaan bhi military ko sharaab pilaate hain to marne, maarne ka khyaal nahin rehta। nasha chadh jaata hai। to tum bachchon ko bhi sadaiv naaraayni nasha rehna chaahiye। ham vahi kalpa pahle vaale shakti sena hain। anek baar hamne bhaarat ko heere jaisa banaaya hai, ismen moonjhane ki baat nahin hai। sanshaybuddhi vinshanti, nishchaybuddhi vijayanti। sanshay buddhi oonch pad nahin paayenge। praja mein kam pad pa lenge। vahaan to tumhaare mahlon mein sadaiv baaje bajte rahenge। duhkh ki baat hi nahin। aage raajaaon ke mahlon ke darvaaje ke baahar chabootre par shahnaaeeyaan bajti thi। abhi to woh raajaaon ka thaath khatma ho gaya hai। praja ka raajya ho gaya hai।

abhi tum bachche jaante ho ki ham pavitra ban yog mein rah aur chakra ko yaad karte-karte bhaarat ko svarga bana denge, parantu bahut bachche bhool jaate hain। baba raay dete hain ki sabse achha kartavya hai gareebon ki seva karna। aajkal gareeb to bahut hain। manushya hospital bahut banaate hain to mareezon ko sukh mile, jo hospital kholenge unko doosre janma mein kuchh achhi kaaya milegi, rogi nahin banenge। koi-koi achha tandaroosta hote hain, mushkil kabhi beemaar hote hain। to zaroor aage janma mein tandaroosti ka daan diya hoga। woh hai hospital kholna। koi education mein bahut hoshiyaar hote hain to zaroor vidya ka daan kiya hoga। koi-koi sannyaasiyon ko chhotepan mein hi shaastra kantha ho jaate hain to kahenge past janma ke aatma sanskaar le aai hai। to yahaan bhi koi 3 pair prithvi ka lekar yeh roohaani hospital khole aur likh de ki aakar 21 janmon ke liye health ka varsa lo baap se। kitni sahaj baat hai। tum poochhte ho bataao lakshmi-naaraayan ko yeh varsa kisne diya, to zaroor poochhne vaala khud jaanta hoga। baap hi svarga ka rachayita hai। kaise rachta hai, woh baitho to ham samjhaayen। ham bhi unse varsa le rahe hain। shivbaaba, brahma baba dvaara sthaapna kara rahe hain phir paalna bhi vahi karenge। shankar dvaara vinaash bhi hona hai। vinaash zaroor narka ka hoga na। nai duniya to ab ban rahi hai। chhote se badge par tum samjha sakte ho ki brahma dvaara sthaapna ho rahi hai। yahi raajayog hai। manushya se devta banna hai, jo apne kul ka hoga usko jhat dil mein lag jaayega। uska chehra hi chamak jaayega aur purushaartha se apna varsa le lenge। apne brahman kul ke jo hain - woh shudra kul se badalne zaroor hain, yeh drama mein noondh hai। tum bhaarat ki bahut seva karte ho parantu gupta। aage bhi aise-aise ki thi। drama ko abhi achhi reeti jaanna hai। gaaya jaata hai aap muye mar gai duniya। baaki aatma rah jaati hai। aatma to marti nahin। aatma shareer se alag ho jaati hai to unke liye duniya hi nahin rahi। phir jab shareer mein jaayegi tab maa-baap ka sambandh aadi naya hoga। yahaan bhi tumko ashareeri banna hai। abhi to yeh duniya practical mein khatma honi hai।

baap kehte hain mujhe yaad karte raho to vikarmo ka jo bojha hai woh utar jaayega aur tum sampoorn ban jaayenge। bachchon ke manners bahut achhe hone chaahiye। bolna, chalna, khaana, peena…। bahut thoda bolna chaahiye। raajaayen log bahut thoda aur aahiste bolte hain, chup rehte hain। tumhaare mein to bahut phazeelat (sabhyata) honi chaahiye। devtaaon mein phazeelat thi। yahaan to manushya bandar misal hain to badaphzeelat hain। kuchh bhi akla nahin। behad ka baap jo srishti ko svarga banaate hain, unko patthar thikkar kutte billi sabmen dhakel diya hai। maaya ne ekdam buddhi ko godrej ka taala laga diya hai। ab baba aakar taala kholte hain। abhi tum bachche kitne buddhivaan ban gaye ho। shivbaaba, brahma, vishnu, shankar, lakshmi-naaraayan, jagdamba aadi sabki biography ko tum jaan gaye ho।। ab tumko satguru shivbaaba se poori samajh mili hai। baba knowledgeful hai na। har ek apne dil se poochhe to barobar ham kuchh nahin jaante the। bandar jaisi chalan thi। ab ham sab jaan gaye hain। baba nai rachna kaise rachte hain। oonche te ooncha brahman kul banaate hain so tum jaante ho। moorti jo poojya hai woh kuchh bolti nahin hai। abhi tum samajhte ho ki ham hi poojya phir pujaari bante hain।

abhi tum sachche-sachche brahma mukh vanshaavli brahman ho। tum jaante ho ki sangam yug par satayug ki rachna kaise hoti hai, yeh aur koi nahin jaante। barrister padhaayega to kya banaayega? bhagwan bhi aakar sahaj raajayog sikhlaate hain। aho saubhaagya bhaaratvaasi bachchon ka… tumhaare mein bhi saubhaagyashaali woh jo achhi reeti dhaarna karke doosron ko karaate rehte hain। aage chal bahut ghar svarga banenge। jhaad dheere-dheere badhta hai। mehnat hai। jitna oonch jaayenge utna maaya ke toofaan zor se aayenge। pahaadi par jitna oonch jaayenge utna toofaan thandi aadi ka saamna bhi hoga। service mein jitna time mile utna achha hai, advertise karo। jo dil mein raay aave woh bataao ki aise-aise karna chaahiye। baba kahenge ki bhal karo। bichaare manushya bahut duhkhi hain। is samay sab tamopradhaan ban pade hain। koi bhi cheez sachchi nahin rahi hai। jhoothi maaya, jhoothi kaaya... ab tum bachche svargavaasi bante ho।

(geet:- nai umar ki kaliyaan) is geet mein seeta ki mahima karte hain। jis desh mein seeta thi, woh desh pavitra tha। us desh mein phir raavan kahaan se aaya? wonder to yeh hai ki phir kehte ki bandaron ki sena li। ab bandaron ki sena kahaan se aai! yahaan bhi manushyon ka lashkar hai। government bandaron ka lashkar thode hi leti hai। phir vahaan bandaron ki sena kaise aai? yeh bhi samajhte nahin hain। achha।

meethe-meethe sikeeldhe bachchon prati maat-pita baapdaada ka yaadapyaar aur aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sampoorn banne ke liye yaad ki yaatra se apne vikarmon ka bojh utaarna hai, achhe manners dhaaran karna hai। sabhyata (phazeelat) se vyavhaar karna hai। bahut kam bolna hai।

2) kisi bhi baat mein sanshay buddhi nahin banna hai। bhaarat ko svarga banaane ki seva mein apna sab kuchh saphal karna hai। shivbaaba par poora-poora bali chadhna hai।

vardaan:- sarva khajaanon ko vidhi poorvak jama kar sampoornata ki siddhi praapta karne vaale siddhi swaroop bhav

63 janma sabhi khajaane vyartha ganvaaye, ab sangamayug par sarva khajaanon ko yathaartha vidhi poorvak jama karo, jama karne ki vidhi hai-jo bhi khajaane hain unhein sva prati aur auron ke prati shubh vritti se kaarya mein lagaao। sirf buddhi ke locker mein jama nahin karo lekin khajaanon ko kaarya mein lagaao। unhein svayan prati bhi use karo, nahin to loose ho jaayenge isliye yathaartha vidhi se jama karo, to sampoornata ki siddhi praapta kar siddhi swaroop ban jaayenge।

slogan:- parmaatma pyaar ka anubhav hai to koi bhi rukaavat rok nahin sakti।