Daily Murli for Friday 8 July 2022

08-07-2022 praatahmurli om shanti "baapdaada"' madhuban

“meethe bachche - vaahyaat (vyartha) baaton mein tumhein apna amoolya samay barbaad nahin karna hai, baap ki yaad se aabaad hona hai''

prashn:- baapdaada donon hi niranhakaari ban bachchon ke kalyaan ke liye kaun si raay dete hain?

uttar:- bachche, sadaiv samjho humein shivbaaba padhaate hain। bhal brahma baba bhi tumhein padha sakte hain lekin shivbaaba ko yaad karne mein hi tumhaara kalyaan hai isliye yeh daada nirhankaari ban kehte hain main tumhein nahin padhaata hoon। padhaane vaala ek baap hai, use hi yaad karo। unki yaad se hi tum vikarmaajeet banenge, vikarma vinaash honge। meri yaad se nahin।

om shanti। ab bachche saamne baithe hain, bachchon ki buddhi mein zaroor hoga ki patit-paavan parampita paramatma jo gyaan ka saagar hai woh is brahma tan dvaara hamko padha rahe hain। buddhi to pahle jaayegi apne shantidham mein, phir aayegi yahaan। shivbaaba aaye hain is brahma tan mein hamko raajayog sikhaane। student ki buddhi mein yeh hoga na ki hamko kaun padhaate hain। school mein jaayenge to samjhenge na ki phalaana teacher hamko padhaate hain। unka naam bhi khyaal mein rehta hai। okhon se dekhte bhi hain। satsang bhi kisam-kisam ke hote hain। vahaan kahenge phalaana mahaatma hamko phalaana shaastra sunaate hain। bhinna-bhinna anekaanek shaastra sunaate hain। janma-janmaantar aise sunte hi aaye ho। abhi tum yahaan baithe-baithe yaad karte ho shivbaaba ko। tum samajhte ho hamaara patit-paavan baba woh shiv hai। vahi aakar brahma dvaara hamko padhaate hain। yeh brahma bhi padhaate hain। jab brahmaakumaar kumaariyaan bhi padha sakte hain, to kya brahma nahin padha sakte hain! phir bhi tum aise hi samjho ki hamko shivbaaba hi padhaate hain, na ki brahma। ismen tumhaara bahut phaayda hoga। isko hi nirhankaareepna kaha jaata hai। baap aur daada donon hi niranhakaari hain। yeh khud kehte hain bhal main bhi padhaata hoon parantu samjho ki shivbaaba padhaate hain। jitna shivbaaba ko yaad karenge utna vikarmaajeet bante jaayenge। hamesha samjho ki shivbaaba patit-paavan gyaan ka saagar hamko padhaate hain। jitna ho sake shivbaaba ko bhoolna nahin hai। varsa bhi unse hi paana hai। shivbaaba kehte hain nirantar mujhe yaad karo। brahma ki aatma ko bhi kehte hain tumko mere paas aana hai। uthte baithte mere ko yaad karne ka purushaartha karo, ismen kamaai bahut hai। health bhi bahut achhi milegi। kabhi bhi time vesta nahin karo। hear no evil, talk no evil… sivaae gyaan aur yog ke koi bhi vaahyaat baaten nahin karni hai। jismen gyaan kam hai to zaroor agyaan hi hoga। jharmui jhagmui karte rahenge। aisi baaten kabhi nahin sunna। jab aise dekho ki woh vaahyaat baaten sunaate hain to samjho yeh hamaara dushman hai। phaaltu baaten sunaakar time vesta karte hain। baap kehte hain aisi phaaltu baaten nahin suno। koi ki glaani karenge, koi ke liye kuchh bolenge। kahenge aisi baaten kabhi nahin sunna, na kabhi sunaana। jismen gyaan nahin hai vahi aisi baaten sunaakar aur hi nuksaan karte rahenge isliye baar-baar samjhaaya jaata hai ki service mein tatpar raho। in chitron par jitna ek do ko samjhaayenge utna dhaarna bhi hogi। yahaan baith chitra dekho - yeh khyaal karo, yeh shivbaaba hai, yeh daada hai। in dvaara hamko varsa milta hai। phir is patit duniya ka vinaash ho jaayega। aisi-aisi baaten karte apne ko bhi bahla sakte ho। woh achha hoga। jharmui jhagmui ki to paap aatma ban jaayenge। baap kehte hain bachche paap aatma nahin banna। duniya ka samaachaar, phalaani aisi hai, usne yeh kiya, aisi baaten jo sunte aur sunaate hain woh muphta samay barbaad karte hain। tum to bahut aabaad ho rahe ho। vishwa ke maalik ban rahe ho। barobar bhaarat aabaad tha। ab barbaad hai। baap dvaara aabaad ho rahe ho। baap aur srishti chakra ko yaad karna yeh to bada hi sahaj hai। is sangamayug ka koi ko pata nahin hai। kaliyug mein sab patit hain, satayug mein sab paavan the। baap kehte hain main kalpa-kalpa ke sangamayug par aata hoon, patiton ko paavan banaane। ajaamil jaise paapi bhi hain। yeh hai hi paap ki duniya, ismen koi chain nahin hai। woh punya aatmaon ki chain paane ki duniya hai। yeh baaten koi samjha na sake। kisi ki bhi buddhi mein nahin hai ki chain kahaan milta hai। yeh tum samjhaate ho ki sukhdhaam mein sukh milta hai। yeh hai hi duhkhadhaam। bhal bade-bade mahal banaakar baithe ho parantu raasta saara patit banaane ka hi hai। nahin to bhaarat ki itni utarti kala kyon hoti। chadhti kala karne vaala ek hi baap hai। baaki sab giraane vaale hain, ismen bahut samajh ki baat hai। andhashradha ki koi baat nahin hai। teacher kehte tumko bi.A. padhaate hain, to jhooth thode hi ho sakta। yeh behad ka baap bhi kehte hain main tumko sahaj raajayog sikhaakar raajaaon ka raaja banaata hoon। svarga ka raaja banaata hoon। svarga ka raaja aur narka ka raaja banne mein raat din ka pharka hai। narka mein jo raaja raani bante hain, woh daan punya se bante hain। alpakaal ka sukh milta hai। aur svarga ke raaja raani bante hain padhaai se। yeh bhi tum jaante ho - baba ka plan kya chal raha hai। saari srishti jo duhkhadhaam hai, unko sukhdhaam, shantidham banaana hai। jaante ho bhaarat sukhdhaam tha। baaki sab aatmaayen shantidham mein thi। abhi to sab duhkhadhaam mein hain।

phir shantidham, sukhdhaam mein jaana hai। jo raajayog seekhte hain vahi sukhdhaam mein aayenge, baaki hisaab-kitaab chuktu kar shantidham mein chale jaayenge। shantidham-sukhdhaam kya hai, yeh duniya mein kisko pata nahin hai। yeh baba bhi kehte hain ham nahin jaante the। jo khud maalik tha woh bhool gaya hai, to baaki manushya kya jaante honge। drama anusaar sabko girna hi hai। ab phir chadhne ka samay hai। baap kehte hain main aaya hi hoon sabko sukhdhaam, shantidham le chalne। tumhaare paas bahut aayenge, kahenge man ko shanti chaahiye। sukhdhaam ka vaartaalaap to koi karne vaala hai nahin। sannyaasi to nivritti maarga vaale hain, woh to kabhi sukh ka raasta bata nahin sakte। to jaise baap ko taras padta hai ki inhon ko sukhdhaam shantidham mein le jaaoon। bachchon ko bhi aana chaahiye ki baap ka parichay dena hai। baap se zaroor bhaaratvaasiyon ko varsa milna chaahiye। ham narka mein kyon hain, ham hi svarga mein the। ab narka mein hain। parantu in baaton ko bilkul hi samajh nahin sakte hain। maaya ne buddhi ka taala bilkul hi banda kar diya hai, jo itni sahaj baat bhi samajh nahin sakte hain। bhagwan jab svarga ka rachayita hai to zaroor ham svarga ke maalik hone chaahiye। ab nahin hain kyonki raavanraajya hai। is raavan raajya ka vinaash to ab hona hi hai। inke liye vahi mahaabhaarat ladaai saamne khadi hai। bada sahaj hai। parantu jab kiski buddhi mein baithe। buddhi mein na baithne ke kaaran aapas mein jharmui jhagmui bahut karte hain। time barbaad karte hain। aisi baaten kaanon se kabhi nahin sunna। tum apni padhaai mein tatpar raho, tab hi pad milega। paathshaala mein jo achhe student hote hain woh bahut achhi reeti padhte hain। imtahaan ke dinon mein khaas ekaanta mein jaakar padhte hain ki kahaan naapaas na ho jaaen। naapaas hone vaale dhakke khaate rahenge। baap kehte hain jitna ho sake ek baap ki yaad mein raho। sajni ki saajan se sagaai hui aur bas chhaap lagi। achha-aaj shaadi ki, kal pati mar gaya। saari aayu usko yaad karti rahegi। ab woh to patit banaane vaale hain, baap kehte hain main tumko svarga ka maalik banaata hoon। to aise baap ko kitna yaad karna chaahiye। maaya tumhaara yog todne ki bahut koshish karegi, parantu tumko bahaadur rehna hai। sankalp bahut toofaan laayenge। jo agyaan kaal mein bhi nahin aate the, jaise vaidya log kehte hain - inse darna nahin hai। aise nahin darkar jaae doosri davaai karo। nahin। baba bhi kehte hain - darna nahin hai। mansa ke toofaan bahut aayenge lekin karmendriyon se koi vikarma nahin karna। ek do ko gyaan sunaakar kalyaan karna। baba bahut samjhaate hain ki tum apni masti mein masta raho। ghar mein geeta paathshaala kholo। charity begins at hom। bachchon ko bhi svarga ka maalik banaao। baap stri ko, bachchon ko rachte hain sukh ke liye। tum bhi jaante ho ham bhavishya ke liye kamaai karte hain। to kyon nahin stri bachchon aadi ko bhi karaayen। unko ghadi-ghadi bolo dhandha dhori bhal karo, sirf baap ko yaad karte raho। yeh practice aisi pad jaae jo pichhaadi mein vinaash ke samay ek baba ki hi yaad rahe।

baap kehte hain - tum sab abhi vaanaprastha avastha mein ho। sabko mere paas aana hai। ham aaye hain le jaane ke liye। tumhaare pankh toote hue hain। sannyaasi to brahm tatva ko yaad karenge, woh baap ko yaad kar na saken। haan jo devta dharma vaala hoga woh maanega aur shivbaaba ko yaad karne lag padega। brahman banne bigar devta to ban na saken। varnon ki baajoli hai na। shoodra varna ke the। ab brahma dvaara brahman ban daade ka varsa pa rahe hain। shoodra se brahman bane hain। phir ham nai duniya ke maalik ban jaayenge। brahman hain sabse oonch। braahmanon ki choti hai na। ham baajoli khelte hain। ismen 84 janma ka gyaan second mein milta hai। jaise baajoli khelte-khelte teerthon par jaate hain, itna mahatva rehta hai। badi bhaavna se jaate hain। aajkal to teerthon par bhi sharaab aadi peete hain। aadat hoti hai to chhipaakar jeb mein bottle le jaate hain। baba sab baaton ka anubhvi hai। rath bhi baba ne poora anubhvi liya hai। inko bhi baap kehte hain, tumne bahut guru kiye hain, satsang kiye hain। parantu ab woh sab bhool jaao। abhi jo main sunaata hoon, woh suno। bhagwan ne arjun ko kaha, rath to vaastav mein yeh hai। rath mein rathi hai shivbaaba। tum sab arjun ho gaye। baaki ghode gaadi ki to baat hi nahin। na sena ki koi baat hai। woh hai bhaktimaarga। yeh hai gyaan maarga। bhakti ki department hi alag hai। gyaan dene vaala ek baap hai, baaki to sab bhagat hain। saari duniya ke jo bhi manushya hain sabki aatma kehti hai O god father। aatmaayen samajhti hain, vahi aatmaon ka baap hai। jaanti bhi hain hamaara laukik father bhi hai। phir kyon nahin heavenly god father ko yaad karte hain। sirf duhkh ke samay kyon yaad karte ho। baap kehte hain main itna sukh shanti deta hoon, jo phir duhkh mein mujhe hi yaad karte ho। to aapas mein tumko yeh gyaan ki baaten karni hain। mitra sambandhiyon ke paas athva officers ke paas bhi jaana hai, sabse tailuk rakhna hai। badi yukti se unko gyaan ratnon ka daan bhi dena hai। shaadi mein bhi jaana hai to seva arth। tum gupta ahinsak sena ho, tumhein kisi bhi prakaar ki hinsa nahin karni hai। duhkh nahin dena hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) oonch pad paane ke liye apni padhaai mein tatpar rehna hai। jharmui jhagmui ki vyartha baaten nahin sunni hai। apna samay vyartha nahin gavaana hai।

2) ek do ko gyaan sunaakar kalyaan karna hai। kabhi bhi mansa toofaanon ke vash ho karmendriyon se koi vikarma nahin karna hai।

vardaan:- sarva shaktiyon roopi birth right ko har samay kaarya mein lagaane vaale master sarvashaktimaan bhav

sarva shaktiyaan baap ka khajaana hain aur us khajaane par bachchon ka adhikaar hai। adhikaar vaale ko jaise bhi chalaao vaise woh chalega। aise hi sarvashaktiyaan jab adhikaar mein hongi tab number one vijayi ban sakenge। to check karo ki har shakti samay par kaam mein aati hai! har paristhiti mein adhikaar se shakti ko use karo। bahutkaal se shaktiyon roopi rachna ko kaarya mein lagaane ka abhyaas ho tab kahenge master sarvashaktimaan।

slogan:- koi bhi mahaan kaarya sabhi ke umang aur utsaah se hi sambhav hai।