Daily Murli for Thursday 7 July 2022

07-07-2022 praatahmurli om shanti "baapdaada"' madhuban

“meethe bachche - 21 janmon ke liye raavan ki janjeeron se liberate hona hai to baap ki shreemat par chalo, baap aate hi hain tumhein sab duhkhon se liberate karne''

prashn:- sabse bhaari manzil kaun si hai? jiska purushaartha bahutkaal se chaahiye!

uttar:- antakaal mein ek baap ki hi yaad rahe aur koi yaad na aaye, yeh bahut bhaari manzil hai। agar koi yaad aaya to isi duniya mein janma lena pade, isliye bahutkaal se shivbaaba ki yaad mein rahne ka abhyaas karo।

prashn:- kai bachchon ki avastha chalte-chalte daanvaadol kyon ho jaati hai?

uttar:- kyonki pakka nishchay nahin hai। jab nishchay mein kami aati hai tab paare ki tarah avastha neeche oopar daanvaadol hoti hai। kabhi bahut khushi rehti, kabhi khushi kam ho jaati।

geet:- bholenaath se niraala…

om shanti। bachche samajhte hain ki ham bholaanaath shivbaaba ke sammukh baithe hain aur brahma mukh dvaara yeh sahaj raajayog bhi seekh rahe hain। sab vedon granthon shaastron upnishdon ka saar baap baith samjhaate hain। yeh bachchon ki hi buddhi mein baitha hai। chitron mein bhi hai brahma dvaara sthaapna। to brahma dvaara hi sabhi ved shaastron ka saar sunaaya hai। tum bachchon ko yeh sab kaun samjhaate hain? parampita paramatma bholaanaath shiv। woh niraakaar hai isliye har baat brahma dvaara samjhaate hain। jisko samjhaate hain woh phir auron ko samjhaate hain। agar nahin samjha sakte to goya woh khud nahin samjhe hain arthaat besmajh hain। besmajh ko samjhaaya jaata hai। baap sabko kehte hain tum besmajh ho। tum mujh baap ko jaante ho? tum bhaaratvaasiyon ne varsa liya tha। satayugi svaraajya tha phir raavan raajya hone se tumne varsa ganva diya। raavan raajya ke kaaran tum patit, besmajh, kangaal ban pade ho। sabhi aasuri mat par hi chalte hain। tum samajhte ho kalpa pahle hamko baap ne samajhdaar banaaya tha। ham vishwa ke maalik bane the, abhi ham maaya ke gulaam ban pade hain। sampatti ke gulaam nahin, maaya raavan ke gulaam। 5 vikaaron ki janjeeron mein ham bandhe hue hain aur shok vaatika mein hain। barobar raavan ka raajya saare vishwa par hai। bhaaratvaasi khaas, saari duniya aam sab raavan ki janjeeron mein bandhe hue hain isliye jo kuchh karte hain, wrong karte hain। baap aakar sab right bataate hain isliye parampita paramatma ko righteous kahenge। raavan ko unrighteous kahenge। aadhaakalpa righteous raajya chalta hai। aadhaakalpa unrighteous raajya chalta hai। raavan raajya ko jhoothi duniya kaha jaata hai। tum bachche hi jaante ho। gyaan saagar parampita paramatma shiv humein samjha rahe hain brahma dvaara। gaaya bhi hua hai second mein jeevanmukti। aise bahut kehte hain - second mein jeevanmukti। parantu is samay sab jeevanbandh mein hain, khaas bhaarat। bhaaratvaasi hi ek second mein jeevanmukti ka varsa lete hain। abhi tum bachche jaante ho ham bhagwan ke bane hain। bhagwan khud kehte hain tum hamaare bachche ho, jaante ho eeshvar hi nai duniya ki sthaapna karte hain to zaroor puraani duniya mein aana pade। puraani duniya ko patit bhrashtaachaari kaha jaata hai। sabhi bhagwan ko bulaate hain ki hamaare jeevan ko mukta karo। duhkh se liberate karo। manushya jaante nahin ki duhkh ka raajya kab aur kaun sthaapan karte hain। bhal shaastra bahut padhe hue hain। vidvaan pandit aadi hain jinhen ghamanda bahut hai। parantu koi aisa nahin jo second mein jeevanmukti kisko de sake। koi kah bhi nahin sakte ki ham jeevanmukti de sakte hain ya sabki sadgati kar sakte hain। main hi khaas bhaarat, aam sabki sadgati karta hoon। gaaya bhi jaata hai parampita paramatma sarva ka sadgati daata hai। sarva ka liberator hai, duhkh se liberate karte hain। sukh se koi liberate karte hain kya? duhkh se liberate to baap karte hain। achha sukh se liberate kaun karte hain? bhaarat sukhi tha na। phir sukh se liberate kar duhkh mein kaun laaya? sukh se liberate karne vaala hai raavan। ab raam ki shreemat par chalne se tum 21 janmon ke liye liberate hote ho। usko kaha jaata hai jeevanmukti ya sadgati। bachchon ki buddhi mein ab baitha hai। barobar bhaarat jeevanmukta tha tab sukhdhaam tha। ab bhaarat duhkhadhaam hai, jeevanbandha mein hai। behad ka question ho jaata hai। to baap behad ki hi yeh sab baaten sunaayenge, jo had mein manushya to jaante hi nahin। na svarga ko, na narka ko jaante hain। woh to yeh sab kalpana samajh lete hain। jeevanmukta to koi ban nahin sakenge। yeh to avinaashi bana banaaya drama hai, ismen koi change nahin ho sakti। mukhya hai shivbaaba। usko creator, director bhi kehte hain। brahma vishnu shankar ka bhi part hai। jagat amba, jagat pita ka bhi part hai। devi-devtaaon ka bhi part hai। phir islaami, bauddhi aadi-aadi apna-apna part bajaate hain, vahi part phir sabko bajaana hai। phir part mein ek dharma ho jaayega। phir doosre dharma vaale apne samay par apna part repeat karenge।

abhi tum jaante ho is samay brahman kul ki repetition hai। prajaapita brahma se brahman kul ki sthaapna hoti hai। unko brahman sampradaay kaha jaata hai। Christ se Christian sampradaay ki rachna hui। parampita paramatma ne brahma aur brahma dvaara brahman sampradaay rachi to phir woh itne sab mukh vanshaavli honge। kukh vanshaavli to ho na saken। kehte hain na - tum maat-pita... to yeh sab adopted children hain। yeh hai hi adoption। pahle brahma ko adopt kiya phir brahma dvaara tum brahman braahmaniyaan adopt hote ho। tum jaante ho ham shivbaaba ke potre brahma ke bachche hain। pahle ek braahmanon ka kul hai। bada bhaari kul hai। abhi hi adopt karte hain। phir kabhi yeh adoption hoti hi nahin। sannyaasiyon ki hoti hai। woh apne jigyaasuon ko adopt karte hain। kahenge tum hamaare followers kahla na sako। gharbaar chhod kaphni pahnen tab followers kaha jaae। yahaan tum ho brahman, tumko yahi sachcha sahaj raajayog ka raasta sabko bataana hai। kuchh na kuchh samjhaana hai। ek second mein baap se varsa milta hai। parampita paramatma se zaroor mukti jeevanmukti ka hi varsa milega। shivbaaba ko hi yaad karna hai। sab aatmaon ka baap hai shiv, unko yaad karne se tum svarga ka maalik banenge। laukik baap ko yaad karne se svarga ke maalik nahin banenge। bhal ghar mein raho parantu shivbaaba ko yaad karo। ham aatma shivbaaba ki santaan hain, isi nishchay mein rehna hai।

poora nishchay na hone se hi avastha daanvaadol hoti hai। jaise paara hota hai na। abhi-abhi khushi ka paara chadhta hai। abhi-abhi bhool jaayenge। abhi baap kehte hain tumko ghar vaapis jaana hai। phir aakar nai khaal lenge। tum jaante ho ham punarjanma lete aaye hain। sarpa ke liye punarjanma ki baat nahin hoti। woh ek puraani khaal chhod doosri nai le lete hain। vaise tumko bhi badalna hai। manushya jab boodhe hote hain to kehte hain, ab jaana hai। jhat saakshaatkaar hota hai। abhi ham baalak banne vaale hain। unko pata hai ki abhi ham shareer chhod baalak banenge, phir satopradhaan shareer milega। puraane shareer ko jadajdeebhoot kaha jaata hai। duniya bhi pahle nai hoti hai phir kala kam hoti jaati hai isliye 4 bhaag rakha gaya hai। kehte hain kalpa ki aayu to bahut badi hai। kalpa mein 84 laakh yoniyaan leni padti hain। tumne to kalpa ko chhota kar diya hai। phir duhkh dekho kitna hai। laakhon varsha aayu lagaane se samajhte hain 84 laakh janma hote honge। yeh baap baith samjhaate hain। yeh kabhi bhoolna nahin chaahiye, student teacher ko kabhi bhoolte nahin hain। tum bhi jaante ho ham padhne aate hain eeshvareey class mein। murli sab centres vaale sunte hain। padhaane vaala to ek gyaan ka saagar hi thahra। unko hi gyaan ka saagar patit-paavan, sarva ka sadgati daata kaha jaata hai। sarva arthaat bhaarat aur sabhi khanda aa jaate hain। tum ho eeshvareey santaan, tum eeshvar dvaara jitna padhenge utna oonch pad paayenge। padhaai bhi badi sahaj hai, sirf do akshar yaad karne hain। tum koi ko bhi kah sakte ho parampita paramatma behad ke baap ko yaad karo to tumko svarga mein behad ka sukh milega। bas ek baap ko yaad karo। antakaal mein agar koi doosra yaad aaya to antakaal jo stri simre... aise janma mein jaayenge। baap kehte hain manzil bahut bhaari hai। saavdhaani se seedhi par sambhaal kar chalna hai। ek do ko saavdhaan karte rehna hai। shivbaaba ko yaad karte raho। baap baith bachchon ko samjhaate hain bachche in gurooon ka bhi mujhe uddhaar karna hai, tum maataaon dvaara। tum maata guru bigar koi ka bhi uddhaar nahin hona hai। maata ko hi nimitta rakha jaata hai। jagat amba mukhya hai na। unka dekho kitna prabhaav hai। brahma ka itna nahin hai। sirf pushkar mein mandir hai। vahaan par bahut karke purush hi jaate hain। amba ka bahut maan hai। jahaan tahaan deviyon ke mandir par bahut mele lagte hain। guruon ki mat par chalte-chalte bahut dhakke khaaye hain। phaayda kya hua? kuchh bhi nahin। utarti kala hone se bhaarat ko patit to banna hi hai। vaapis koi ja nahin sakte। tum samajh gaye ho jo bhi manushya maatra hain sab patit hain। jadajdeebhoot avastha mein hain, usmein sab aa jaate hain। is duniya mein manushyon ko kitna duhkh hai। kadam-kadam par duhkh badhta hi jaata hai।

tum bachche samajhte ho baahar to bilkul besmajh hain, baap ko hi nahin jaante। kehte bhi hain tum maat pita... zaroor woh svarga rachne vaala hai, jo hokar jaate hain phir unka gaayan chalta hai। ab tum jaante ho ki phir se svarga ki sthaapna ho rahi hai। jab svarga tha to doosre koi nahin the। ab doosre sab hain to yeh dharma nahin hain, foundation hai nahin। ab woh jo aadi sanaatan devi-devta dharma tha uski phir se sthaapna ho rahi hai। aadhaakalpa tak phir aur koi dharma nikalte nahin, ek hi dharma rahega। aadhaakalpa sooryavanshi chandravanshi svaraajya। yeh hai tumhaara eeshvareey janma siddha adhikaar, heavenly god fatherly birth right hai। ham apne svarga ki sthaapna kar rahe hain। raajya karne ke liye laayak ban rahe hain। vahi hamko padhaate hain, laayak banaate hain। roz-roz samjhaate hain, pakka karne liye। samjhaate hain - maaya tumhein yaad nahin karne degi, tum kitni bhi koshish karo, baba ko yaad karne liye to yuddha chalti hai na। baap baith raasta bataate hain ki kya karo, tum karmayogi bhi ho। haan bachche aadi tang karne lagte hain, raurav narka hai na। duhkh dene vaali santaan hain। vahaan hote hain sukhdaayi santaan kyonki sukhdhaam hai na। vahaan koi aisi cheez hoti nahin jisse duhkh ho va mailaapan ho। yahaan to kitna duhkh hai। beemaariyaan bhi kaisi-kaisi gandi nikalti hain। aage thode hi thi, kainsar ki beemaari ka naam bhi nahin suna tha। svarga mein koi beemaari hoti hi nahin। jab aasuri raajya shuru hota hai tab ye gandi beemaariyaan shuru hoti hain। yeh bhi drama bana hua hai। svarga mein kitni sundar gaayen hoti hain, kehte hain krishna ke paas aisi-aisi achhi gaayen thi, to unko bhi gvaala bana diya hai। krishna koi gvaala thode hi tha। tum kahenge shivbaaba ne yeh chaitanya human gaayen charaai hain। gyaan ghaas khilaate hain। gyaan ka kalash maataaon par rakha hai। baba kehte hain ab main jo sunaata hoon woh suno। pahli baat manamnaabhav। mujhe yaad karo to vikarma bhasma honge। yeh hai bahut sahaj upaay। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki shreemat par sabko raavan ki janjeeron se mukta kar jeevanmukti ka varsa dilaane ki seva karni hai।

2) ek baap se hi sunna hai। baaki jo suna use bhool jaana hai। manzil bhaari hai isliye ek do ko saavdhaan karte baap ki yaad dilaate unnati ko paana hai।

vardaan:- satyata ki himmat se vishvaas ka paatra banne vaale baap va parivaar ke snehi bhav

vishvaas ki naanv satyata hai। dil aur dimaag ki honesty hai to uske oopar baap ka, parivaar ka svatah hi dil se pyaar aur vishvaas hota hai। vishvaas ke kaaran full adhikaar usko de dete hain। ve svatah hi sabke snehi ban jaate hain isliye satyata ki himmat se vishvaaspaatra bano। satya ko siddha nahin karo lekin siddhi swaroop ban jaao to teevragti se aage badhte rahenge।

slogan:- sabse adhik dhanvaan woh hai jiske paas shanti va pavitrata ka khajaana hai।