Daily Murli for Tuesday 25 October 2022

25-10-2022 praatahmurli om shanti "baapdaada"' madhuban

“meethe bachche - tum karmayogi ho, karma karte hue baap ki yaad mein raho, yaad mein rahne se koi bhi vikarma nahin hoga''

prashn:- baap se buddhiyog na lagne ka mukhya ek kaaran hai - woh kaun sa?

uttar:- lobh। koi bhi vinaashi cheezon mein lobh hoga, khaane ka va pahanne ka shauk hoga to unki buddhi baap se nahin lag sakti isliye baba vidhi bataate hain bachche lobh rakho - behad ke baap se varsa lene ka। baaki kisi bhi cheez mein lobh nahin rakho। nahin to jis cheez se adhik pyaar hoga vahi cheez ant mein bhi yaad aayegi aur pad bhrashta ho jaayega।

geet:- jaag sajniyaan jaag…

om shanti। abhi yeh to bachche jaante hain yoon to saari duniya mein sab kehte hain ki ham sabhi aapas mein bhaai-bhaai hain। vi aar al brothers। parantu kyon nahin un aatmaon ko yeh samajh mein aata hai ki ham baap ke bachche hain। woh rachayita hai, ham rachna hain। jaanvar to nahin kahenge ham brothers hain। manushya hi samajhte hain aur kehte bhi hain ki ham sab brothers hain। rachta baap ek hai। usko kaha jaata hai parampita paramatma। aise ho nahin sakta ki behen ko bhaai kahen। jab sab apne ko aatma samajhte hain tab kehte hain ham aapas mein bhaai-bhaai hain। sivaae aatma ke aur kuchh ho nahin sakta। ek baap ke jismaani bachche to itne nahin ho sakte। abhi tumko achhi tarah yaad hai ki ham aapas mein bhaai-bhaai hain। baap baith bachchon ko padhaate hain। bhagvaanuvaach - he bachchon, to bahuton ko padhaate hain na। sirf aise nahin kahenge he arjun, ek ka naam nahin lenge। sabko padhaate hain। school mein master kahenge na - he bachchon, achhi tarah padho। hain to student। parantu teacher bada, bujurga hai isliye student ko bachche-bachche kehte hain। vahaan koi apne ko aatma to samajhte nahin hain। vahaan to jismaani sambandh hi rehta hai। jaise gaandhi ko baapu ka martaba de diya hai। mayor ko bhi father kehte hain। aise martabe to bahuton ko dete hain। yahaan to tum samajhte ho ham aatmaayen bhaai-bhaai hain। to bhaaeeyon ka baap zaroor chaahiye। sab aatmaayen jaanti hain woh hamaara baap hai jisko god father kehte hain। yeh aatma ne kaha hamaara god father। laukik father ko god nahin kahenge। tum jaante ho ham aatma hain। baba hamko padhaane aaye hain arthaat patiton ko paavan banaane aaye hain। hamko patit se paavan banaakar aur phir paavan duniya ka maalik banaate hain। yeh baaten koi bhi jaante nahin। yahaan tum bachche jaante hue bhi phir karma karne mein bhool jaate ho। yaad mein raho to vikarma nahin hoga। karmayogi to tum ho hi। sannyaasiyon ka hai karma sannyaas। sirf brahm tatva se yog lagaate hain। parantu saara din to yog laga nahin sakte। brahm mein jaane ke liye yog rakhte hain। samajhte hain brahm ko yaad karne se ham brahm mein leen ho jaayenge। parantu saara din to brahm ko yaad kar nahin sakte aur us yaad se vikarma bhi vinaash nahin hote hain। gaaya hua hai patit-paavan। woh to baap hi hai। aise to nahin kehte patit-paavan brahm athva patit-paavan tatva। sab baap ko hi patit-paavan kehte hain। brahm ko koi father nahin kehte। na brahm ki koi tapasya karte। shiv ki tapasya karte hain। shiv ka mandir bhi hai। tatva ka mandir ban sakega kya? brahm mein to ande sadrishya aatmaayen rehti hain isliye shaastron mein brahmaanda kaha hai। yeh naam koi hai nahin। vo ghar hai, jaise aakaash tatva mein kitne saakaari manushya rehte hain vaise vahaan phir aatmaayen rehti hain।

tum bachche jaante ho baba se ham drama ke aadi-madhya-ant ki knowledge le saare raaz ko jaankar, saare jhaad ki knowledge samajhkar master beejroop ban jaate hain। parampita paramatma mein saari knowledge hai, ham unke bachche hain। woh baith samjhaate hain। is kalpa vriksha ki utpatti, paalna aur sanhaar kaise hota hai, utpatti kahne se jaise nai duniya utpanna karte hain। sthaapna akshar theek hai। brahma dvaara patiton ko paavan karte hain। patit-paavan akshar zaroor chaahiye। satayug mein sab sadgati mein hain, kaliyug mein sab durgati mein hain। kyon, kaise durgati hui? yeh koi ko pata nahin। gaate bhi hain sarva ka sadgati daata ek hai। aatma samajhti hai - yeh ek khel hai। baap ki mahima gaate hain “sada shiv।'' sukh dene vaala shiv, gaate bhi hain duhkh harta sukh karta। bhaarat mein lakshmi-naaraayan ka raajya tha। ab to nahin hai। lakshmi-naaraayan ko bhagavti bhagwan kehte hain, unhon ki raajdhaani kisne sthaapan ki? bhagwan niraakaar hai, unse aatmaayen varsa paati hain। aatma hi 84 janma lete-lete girti aati hai। girte-girte durgati ko paati hai। yeh baat samjhaani hai, paramatma sarvavyaapi nahin hai। woh baap sadgati daata hai, ham sab bhaai-bhaai hain, na ki baap। aise thode hi kaha jaata hai - father ne brothers ka roop dhara hai। nahin, isliye pahle yeh bataao ki parampita paramatma se tumhaara kya sambandh hai? laukik sambandh ko to sab jaante hain। aatmaon ka hai niraakaar baap। unko heavenly god father kehte hain। father ne zaroor nai rachna ka maalik banaaya hoga। abhi ham maalik nahin hain। ham sukhi the। duhkhi kisne banaaya? yeh nahin jaante। aadhaakalpa se raavan ka raajya chala hai to bhaarat ki yeh haalat hui hai। bhaarat parampita paramatma ki birth place hai। bhaarat mein bhagwan aaya hai। zaroor svarga sthaapan kiya hoga। shiv jayanti bhi manaai jaati hai। tum likh bhi sakte ho - ham phalaana birth de mana rahe hain। to manushya wonder khaayenge, yeh kya kehte hain? badhaai bhi do। bataao ham patit-paavan, sadgati daata parampita paramatma shiv ki jayanti mana rahe hain। us din bahut shaadmaana karna chaahiye। sarva ke sadgati daata ki jayanti kam baat hai kya? aeroplane dvaara parche bade-bade shahron mein giraane chaahiye। to akhbaaron mein bhi padega। bahut sundar-sundar card banaane chaahiye। most beloved baap ki bahut mahima likhni chaahiye। bhaarat ko phir se svarga banaane aaya hai। vahi baap raajayog sikhla rahe hain। varsa bhi vahi dete hain। shiv jayanti ke card bahut achhe sundar chhapaane chaahiye। plastic par bhi chhap sakte hain। parantu ajun chhoti buddhi hain, raaja raani to koton mein koi banega। baaki zaroor albele jo honge woh praja banenge। maala 108 ki hai, baaki praja to bahut hogi। aise bhi nahin ham to albele hain, khoob purushaartha karna chaahiye। baba samjhaate bahut hain parantu amal mein mushkil laate hain। yahaan apne ko allaah ke bachche samajhte hain, baahar nikalne se maaya ullu bana deti hai, itni kadi maaya hai। raajaai lene vaale thode nikalte hain। chandravanshi ko bhi ham naapaas kahenge। tum sabki padhaai aur pad ko jaante ho। duniya mein raamchandra ke pad ko koi jaanta hoga? baba achhi tarah samjhaate hain। kaise ham shiv jayanti ke liye first class nimantran banaaven jo manushya chakrit ho jaaen। vichaar saagar manthan gaaya hua hai। shivbaaba ko thode hi vichaar saagar manthan karna hai। yeh bachchon ka kaam hai। baba raay dete hain - kiski buddhi mein aaye aur kaam na kare to baba unko anaadi kahenge। bachche jaante hain parampita paramatma hamko brahma dvaara vishnupuri ka maalik bana rahe hain। shankar dvaara vinaash hona hai। trimoorti oopar khada hai।

tum sab pande ho jo roohaani yaatra sikhlaate ho। tum bhi likh sakte ho - satya mev jayte... barobar satya baba hamko vijay paana sikhlaate hain athva vijay praapta karaate hain। koi etraaj uthaave to unko samjhaana hai। baba ka khyaal chala ki shiv jayanti kaise manaani chaahiye। geeta ka bhagwan shiv hai, na ki shreekrishna, iska bahut prachaar karna hai। woh rachayita, woh rachna। varsa kisse milega? shreekrishna hai pahli rachna। dikhaaya hai saagar mein peepal ke patte par shreekrishna aaya। yeh hai garbha mahal ki baat। svarga mein garbha mahal mein mauj rehti hai। yahaan narka mein garbha jel mein phathakte hain। satayug mein garbha mahal, kaliyug mein garbha jel hota hai। shreekrishna ka chitra kitna achha hai। narka ko laat maar rahe hain। shreekrishna ke 84 janma bhi likhe hue hain। bhagvaanuvaach, tum apne janmon ko nahin jaante ho, main tumko batlaata hoon। to jisne poore 84 janma liye hain unko hi samjhaata hoon। kitna sahaj hai। saath mein manners bhi chaahiye। lobh rakhna chaahiye - behad ke baap se varsa lene ka aur koi cheez ka lobh nahin isliye aisi koi cheez apne paas nahin rakhni chaahiye jo buddhi jaaye। nahin to pad bhrashta ho jaayega। deh sahit jo kuchh hai sabse buddhi nikaalni hai। ek baap ko yaad karna hai। koi manushya bahut furniture rakhne vaala hoga to marne samay woh yaad aata rahega। jis vastu se jaasti pyaar hoga woh pichhaadi mein yaad zaroor aayegi। baap bachchon ko samjhaate hain koi bhi cheez lobh ke vash chhipaakar mat rakho। yagya se har cheez mil sakti hai। chhipaake kuchh rakha to buddhi zaroor latkegi। baba ka pharmaan hai - shivbaaba ka bhandaara hai - bachchon ko sab kuchh milna hai। aisa bhi khyaal nahin aana chaahiye ki phalaane ko saadi achhi padi hai, ham bhi pahnen। are tum baap se raajaai ka varsa lene aai ho ki saadi ka varsa lene aai ho? jo achhi service karte hain un par sab kurbaan jaate hain। bolo, ham sivaae shiv ke bhandaare se mile hue aur kuchh pahan nahin sakti। ham yagya se hi lengi to baba ki yaad rahegi। shivbaaba ke bhandaare se yeh mila। nahin to chori aadi ki aadat pad jaati hai। are yahaan sacrifice (tyaag) karenge to vahaan bahut first class cheezen milengi। shivbaaba kahaan-kahaan bachchon ki pareeksha bhi lete hain। dekhen kitna deh-abhimaan hai। tumhaara vaayda hai - jo khilaayenge, jo pahnaayenge... aadi। dil mein samajhna chaahiye - yeh shivbaaba dete hain। itni first class avastha honi chaahiye। baba se poora varsa lena hai to shreemat par poora-poora purooshaartha karo। baba ki raay par chalo। baba mama kehte ho to poora-poora follow karo। sabko raasta bataao। baba se varsa mila tha, ab phir mil raha hai। yaad ki yaatra karte raho। baba samjhaate hain - tum jitna roostam banenge utna maaya zor se aayegi। tum moonjhate kyon ho? koi-koi bachche ko baba likhte hain tum to bahut achhi service karne vaale ho। maaya ke toofaan aayenge - kya saari aayu brahmacharya mein rahenge? budhaape mein bhi aakar chakri lagegi। shaadi karen, yeh karen। maaya boodhe ko bhi javaan bana degi। aisa phathkaayegi। tum darte kyon ho? bhal kitna bhi toofaan aaye, baba ko yaad karne se bach jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) lobh ke vash koi bhi cheez chhipaakar apne paas nahin rakhni hai। baap ke pharmaan par chalte rehna hai।

2) baba jo khilaaye, jo pahnaaye, ek shivbaaba ke bhandaare se hi lena hai। deh-abhimaan mein nahin aana hai। mama baba ko poora follow karna hai।

vardaan:- sarva khajaanon ko baantate aur badhaate sada bharpoor rahne vaale baalak so maalik bhav

baap ne sabhi bachchon ko ek jaisa khajaana dekar baalak so maalik bana diya hai। khajaana sabko ek jaisa mila hai lekin yadi koi bharpoor nahin hai to uska kaaran hai ki khajaane ko sambhaalna va badhaana nahin aata hai। badhaane ka tareeka hai baantana aur sambhaalne ka tareeka hai khajaane ko baar-baar check karna। attention aur checking - yeh donon pahre vaale theek hon to khajaana sada safe rehta hai।

slogan:- har karma adhikaareepan ke nishchay aur nashe se karo to mehnat nahin karni padegi।