Daily Murli for Saturday 3 December 2022

03-12-2022 praatahmurli om shanti "baapdaada"' madhuban

“meethe bachche - ab kaliyug ki raat poori ho rahi hai, navayug banaane baap aaya hai, isliye tum jaago, baap ki yaad se apne vikarma vinaash karo''

prashn:- jin bachchon ki buddhi satopradhaan banti jaati hai, unki nishaani kya hogi?

uttar:- unhein doosron ko aap samaan banaane ke khyaal aate rahenge। woh apna aur doosron ka kalyaan karne ki yuktiyaan rachte rahenge। din-raat service mein lage rahenge।

prashn:- tum bachchon ko bade te badi kaun si kaarobaar mili hui hai?

uttar:- saari duniya ko baap ka parichay dene ki kaarobaar bahut badi hai। koi bhi aatma baap ke parichay bina rah na jaaye। raat-din chintan chalta rahe ki kaise kisko samjhaayen, shankhadhvani karen।

geet:- jaag sajniyaan jaag…

om shanti। yeh kisne jagaaya? sajni kahne vaala kaun hai? bachche jo samajhte hain ki behad ka baap ek hi hai, jiska asli naam shiv hai। baaki jo anek naam rakhe hain woh sab hain bhakti maarga ke। right naam ek hi shiv hai। jayanti bhi manaate hain woh ho gai parmaatma jayanti। gaate bhi hai niraakaar shiv jayanti। aatma ko jab shareer milta hai tab us shareer ka naam padta hai aur shiv to aatma ka hi naam hai। usko kaha jaata hai supreme soul। soul ka naam kya hai? naam gaaya hua hai shiv। gaaya bhi jaata hai shiv jayanti। aatma ki jayanti nahin kahenge। geeta ka bhagwan to shiv niraakaar hai - shreekrishna shareer ka naam hai, dehdhaari hai na। yeh to shivbaaba hi aakar sajniyon ko jagaate hain aur apni pahchaan bhi dete hain ki main aaya hoon nai duniya banaane। ab maamekam yaad karo। maaya par jeet paani hai। baba ko kehte bhi hain patit-paavan। devtaayen jo paavan the, abhi patit bane hain, isliye sabhi pukaarte hain ki he patit-paavan aao, aakar humein liberate karo। kisse? maaya raavan se athva shaitaan se। manushyon ko yeh samajh mein nahin aata hai ki abhi chalna hai। nav-yug, satayug ab aaya ki aaya। geet mein bhi kehte hain navayug, woh hai pavitra duniya। baap aate hi hain patit se paavan banaane ke liye। nai duniya ko naya yug athva satayug kaha jaata hai। yeh hai kaliyug puraani duniya। kumbhakran ki neend mein sab soye hue hain, unko aakar jagaate hain। maaya ne agyaan andhakaar ki raat mein sabko sula diya hai। ab baap kehte hain bachche kumbhakran ki neend se jaago। abhi is puraani duniya ka ant hai, maut saamne khada hua hai। ab raat poori hoti hai, din aana hai isliye tum jaago। tum samajhte ho baba aaya hua hai। ham bhi ghor andhiyaare mein soye pade the, ab baba aaya hai raat ko din banaane। baba kehte hain main tumhaare liye din arthaat navayug banaane aaya hoon। ab mujhe yaad karo to tumhaare vikarma vinaash honge kyonki is samay sab patit hain। sab kehte hain hamko is raavan se liberate karo। yeh koi samajhte nahin hain ki shaitaan ka raajya kab se shuru hota hai। baap aakar raavan ke chambe se chhudaate hain, kaise? yeh to baap hi jab aaye tab aakar sunaaye, tab phir anubhav se ham kisko samjha saken। sabko neeche utarte-utarte patit banna hi hai, mujh patit-paavan ko aana hi hai sangam par। duniya ke manushya to ghor andhiyaare mein hain। samajhte hain kaliyug ki aayu laakhon varsha padi hai kyonki shaastron mein ulta likh diya hai। ab daivi yug ki sthaapna honi hai। dozak ko bahishta banaane vaala baap hi hai। baap koi dozak thode hi rachenge। bachchon ko ab yeh pakka nishchay hai ki baba hamko padhaate hain। bahut samay se padhaate rehte hain।

ab trimoorti shivjayanti aane vaali hai। likhna hai shivjayanti so geeta jayanti। shreekrishna jayanti jab manaate hain tab geeta jayanti nahin manaate hain। shreekrishna to chhota bachcha hai, jab woh bada ho tab geeta sunaaye। trimoorti shiv jayanti maana hi geeta jayanti। yeh bahut samajhne ki baaten hain। vo log geeta jayanti ko alag kar dete hain kyonki samajhte hain shreekrishna to chhota bachcha hai, woh janmate hi geeta kaise sunaayega। tum bachchon ko hi baap baith raajayog sikhla rahe hain। yeh bhi gaaya hua hai - second mein jeevanmukti। barrister ke school mein baitha to bairistari padhne lag padte, usmein em object hai - main barrister banoonga। baaki usmein oonch pad paana yeh phir padhaai par madaar hai। koi phir achha padhte hain to oonch pad paate hain। nahin padhte hain to pad bhi kam, saara madaar hai padhaai par। tum yahaan manushya se devta banne aaye ho। parantu devtaaon mein bhi nambarvaar martabe hain। koi first class, koi second class, koi third class। yeh sab gupta baaten hain। koi ki buddhi mein aa nahin sakti। kaise ham apna raajya sthaapan kar rahe hain। mahaabhaarat ladaai bhi lagne vaali hai। parantu paandav sampradaay to ladte nahin। asur aur kaurav sapradaay aapas mein lad jhagadkar khatma ho jaate hain। to ab tum bachchon ko purushaartha karna hai। samjhaana bhi hai - baba samay prati samay direction dete rehte hain। niraakaar parampita paramatma raajayog kaise sikhlaayenge? zaroor shareer mein aayenge। baap shreemat de rahe hain - bachche tumko yaad ki yaatra par rehna hai। mujhe yaad karo। yeh hai yog agni, jisse vikarma vinaash honge। din-pratidin tumko achhi-achhi points milti rehti hain। patit-paavan ki point bhi achhi hai। patit-paavan baap ko bulaate bhi hain phir ganga mein jaakar snaan karte hain। tum likh bhi sakte ho bade-bade aksharon mein ki patit-paavan to parampita paramatma ko kaha jaata hai। gyaan ka saagar bhi vahi hai। saari duniya ko paavan banaate hain। saari duniya ka question hai na। duniya paavan kaise bane? ganga, jamuna aadi yeh nadiyaan to chali aati hain। abhi kaliyug ka samay hai to kuchh gadbad hoti hai। satayug mein phir sab nadiyaan apne thikaane par aa jaayengi। parantu inse paavan to koi bante nahin। bahut clear karke samjhaana hai। parche bhi baantane hain। woh bhi aadmi-aadmi dekhkar dena hai। mukhya do teen points zaroor samjhaani hain। vaastav mein is samay sab patit vikaari hain। sabki utarti kala hai। guroonaanak ne bhi kaha hai ki moot paleeti kapad... bhaarat ko shreshthaachaari to banna hi hai। isko bhrashtaachaari kahenge, shreshthaachaari sirf devtaayen hain। is samay aur koi ban na sake kyonki maaya ka raajya hai na। haan, baaki bhakti ka sukh milta hai। yahaan rachna bhi koi yogbal se nahin hoti hai, vikaar se paidaais hoti hai। pahle thode hote hain phir vriddhi hone se aapas mein ladte hain। har ek ko pahle sukh phir duhkh dekhna hai। yeh manushyon ki baat hai। satayug mein manushya sukhi hain to jaanvar aadi bhi sukhi rehte hain। to baap samjhaate hain aise-aise likho। trimoorti shiv jayanti so shreemat bhagvat geeta jayanti। phir samjhaana bhi hai, jo samajhte hain unhon ki dil hoti hai ki yeh baaten doosron ko bhi samjhaayen। samjhaane bigar vriddhi kaise hogi। drama anusaar jinka jo part hai samajhne aur samjhaane ka woh apna part bajaate hain। bhakti ka part bhi din-pratidin jor hota jaata hai। gaaya bhi hua hai jab bhambhor ko aag lagti hai tab okh khulti hai। tum bachchon ko shankhadhvani karni hai। raat-din chintan chalna chaahiye - kaise kisko samjhaayen। saari duniya ko baap ka parichay dena, kitni badi kaarobaar hai। duniya kitni badi hai। bahut dharma, bahut khanda hain। satayug mein ek hi dharma hota hai phir vriddhi ko paate hain। yeh bhi samajhte ho - prajaapita brahma dvaara hi brahman paida hote hain। brahman varna bhi nahin dikhaate hain to paida karne vaala bhi nahin dikhaate hain। to yeh samjhaana hai kaurav aur paandav dikhaate hain। tum ho brahman। prajaapita brahmaakumaar kumaariyaan hain to prajaapita zaroor chaahiye, jisse bhinna-bhinna biraadriyaan paida hoti hain। devta, kshatriy, vaishya, shoodra dikhaate hain। baaki sangamayugi braahmanon ko gum kar diya hai। gaayan bhi karte hain trimoorti brahma, parantu trimoorti brahma ka arth nahin nikalta। unhon ko dene vaala kaun? tum samajhte ho niraakaar baap ne brahma mukh dvaara baith samjhaaya hai। brahma ke mukh kamal se bachche paida hote hain। jab tumko sunaayen tab brahma bhi sune। tum na hote to shiv-baba kya karte। ek ko to nahin sunaaya jaata hai। shaastron mein ek arjun ka naam likh diya hai। to jis samay jo point nikalti hai, us samay usi service mein lagna chaahiye। tumhein har baat bahut clear karke samjhaai jaati hai। parantu yog mein rahen, paavan banen - yeh mehnat hai। vish chhodna, kitni mehnat hai। vish par hi jhagda hota hai। to bachchon ko service par yeh attention dena hai ki padhkar padhaana hai। is service mein hi kalyaan hai। ona rehna chaahiye। jo naye aate hain, unse form bharaane vaale bahut teekhe chaahiye। form bharaane samay yeh bhi poochho tum saadhna karte ho, muktidhaam jaane chaahte ho na। muktidhaam ka maalik to ek hi parampita paramatma hai, woh baap hi aakar paavan banaate hain। yeh snaan aadi to bhaarat mein hi karte hain aur dharmon mein nahin karte। woh phir apne dharma sthaapak ke aage maatha tekte hain, phool chadhaate hain। mahima gaate hain। unhon ko yeh to maaloom hi nahin hai ki patit-paavan ek hi baap hai। abhi Christmas mein Christ ka kitna manaate hain। phir bhi god father ko yaad karte hain, kehte hain O god father, unko pukaarte hain। unhon ko bhi (christians ko bhi) yeh knowledge milegi। baba to kehte rehte hain ki chitra banaao to vilaayat mein bhi bhej den। behad srishti ke kalyaan ke liye buddhi chalni chaahiye। baba ki buddhi chalti rehti hai। in chitron ka kadra bahut thodon ko hai। baap ne divya drishti dvaara yeh banaaye hain। kitna regard hona chaahiye, inse to bahut bhaari first class service hoti hai। drama anusaar koi niklenge jo chitra aadi banaayenge। aage chalkar aise buddhivaan bachche niklenge jo seva mein nai-nai invention karte rahenge, jise dekhte hi dil khush ho jaae। angreji to sab taraph phaili hui hai, bhaashaayen kitni dher hain। sab deshon mein angreji vaale zaroor honge isliye baba bhi angreji aur hindi ko uthaate hain। aakhreen sab bhaashaaon mein niklega। kisko bhi samjhaana hai bahut sahaj। parantu dekha jaata hai kiski buddhi mein nahin baithta to woh kya kaam karenge! dhan hai aur daan nahin karte hain to unko manhoos kaha jaata hai। ek kaan se sunte hain, doosre se nikaal dete hain। har ek ko apni unnati ka khyaal zaroor hona chaahiye। sang ke rang mein nahin aana hai। service mein busy rehna hai, nahin to bada bhaari ghaata pad jaayega। apni unnati ke liye koshish zaroor karna chaahiye। baba main jaakar bahuton ko aap samaan banaane ki service karti hoon, aise-aise khyaal aane chaahiye। unko kaha jaata hai satopradhaan buddhi। tamopradhaan buddhi na apna, na doosron ka khyaal karte hain, unko besmajh kaha jaata hai। satopradhaan buddhi samajhdaar hain। hisaab-kitaab bhi koi-koi ka bahut kada rehta hai। samajhte hue bhi phanse hue hain। is samay to raat din service mein laga rehna chaahiye। khud ki hi kamaai hai। mujhe baap se poora varsa lena hai। nahin to kalpa-kalpa ka ghaata pad jaayega। pahle apna kalyaan karenge tab doosron ka bhi kar sakenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan dhan daan karne mein manhoos nahin banna hai। apni aur doosron ki unnati ke liye yuktiyaan nikaalni hain।

2) manushya se devta banne ki padhaai padhni aur padhaani hai। service aur padhaai par poora attention dena hai। kade hisaab-kitaab ko yogbal se chuktu karna hai।

vardaan:- yaad aur seva dvaara apne bhaagya ki rekha shreshtha te shreshtha banaane vaale bhaagyavaan bhav

braahmanon ki janma-patri mein teenon hi kaal achhe se achhe hain। jo hua woh bhi achha aur jo ho raha hai vo aur achha aur jo hone vaala hai woh bahut-bahut achha। sabhi ke mastak par shreshtha takdeer ki lakeer kheenchi hui hai, sirf yaad aur seva mein sada busy raho। yeh donon aise natural hon jaise shareer mein shvaans natural hai। bhaagya vidhaata baap ne yaad aur seva ki yeh vidhi aisi di hai jisse jo jitna chaahe utna apna shreshtha bhaagya bana sakte hain।

slogan:- santushtata ki seat par baithkar paristhitiyon ka khel dekhna hi santushtamni banna hai।