Daily Murli for Friday 23 December 2022

23-12-2022 praatahmurli om shanti "baapdaada"' madhuban

“meethe bachche - yaad mein baithte samay aankhe kholkar baitho kyonki tumhein khaate-peete, chalte-phirte baap ki yaad mein rehna hai''

prashn:- bhagwan ko dhoondhane ke liye manushya dar-dar dhakke kyon khaate hain - kaaran?

uttar:- kyonki manushyon ne bhagwan ko sarvavyaapi kah bahut dhakke khilaaye hain। sarvavyaapi hai to kahaan se milega? phir kah dete hain paramatma to naam-roop se nyaara hai। jab naam-roop se hi nyaara hai to milega phir kaise aur dhoondhenge kisko? isliye dar-dar dhakke khaate rehte hain। tum bachchon ka bhatakna ab chhoot gaya। tum nishchay se kehte ho - baba paramdham se aaye hain। ham bachchon se in organs dvaara baat kar rahe hain। baaki naam-roop se nyaari koi cheez hoti nahin।

om shanti। meethe-meethe bachche baap ki yaad mein baithe hain। yeh kisne kaha aur kisko? sabhi aatmaon ke baap ne apne bachchon, aatmaon se bola। aatmaon ne organs se suna ki baba ne kya kaha? baap ne kaha, apne baap ko yaad karte ho? baap ko yaad karne ke liye kya aankhen banda karni hoti hain? bachche jab baap ko yaad karte hain to aankhe to khuli hui hoti hain। uthte-baithte, chalte-phirte bachchon ko baap ki yaad rehti hai। aankhe banda karne ki darkaar nahin। aatma jaanti hai ki mera baap in organs se mere se baat karte hain। paramdham se aaye hain, is patit puraani duniya ko nai duniya banaane। yeh buddhi mein hai, aankhe to khuli hui hain। baba baat karte hain, tum sunte bhi ho aur yaad mein bhi ho। kaun sunaate hain? parampita paramatma। unka naam kya hai? jaise tumhaare shareer ka naam hai। woh badalta rehta hai। ek shareer liya, chhoda phir doosra liya to naam bhi doosra padega। aatma ka naam badalta nahin hai। baap kehte hain main bhi aatma hoon, tum bhi aatma ho। main paramdham mein rahne vaala param aatma hoon, isliye supreme aatma kehte hain। supreme oonche te oonch ko kaha jaata hai। oonch aatmaayen bhi hain to neech aatmaayen bhi hain। koi punya aatma, koi paap aatma। baap kehte hain - mujh aatma ka naam sadaiv ek hi shiv hai। naam to zaroor chaahiye na। na jaanne ke kaaran kah dete hain naam-roop se nyaara hai। parantu naam-roop se nyaari koi cheez ho na sake। jaise aakaash hai, koi cheez to nahin hai na। polaar hi polaar hai। unka bhi naam to hain na aakaash। bahut sookshm tatva hai। achha unse bhi oopar devta rehte hain। woh bhi polaar hai। aakaash mein baithe hain। phir unse bhi oopar aur aakaash, usmein bhi aatmaon ke baithne ki jagah hai। woh bhi aakaash hai, jisko brahm tatva kehte hain। yeh teen tatva hain - sthool, sookshm, mool। aatmaayen to zaroor polaar mein rahengi na। to teen aakaash ho gaye। is aakaash mein khel hota hai to zaroor roshni chaahiye। mool vatan mein khel nahin hota, usko brahm tatva kehte hain। vahaan aatmaayen nivaas karti hain। woh hai oonch te oonch teen lok arthaat teen manzil hain duniya ki। aise nahin saagar ke neeche koi lok hai। paani ke neeche phir bhi dharti hai, jis par paani thaharta hai। to yeh hain teen lok। silence, movie aur talkie। yeh shivbaaba baith samjhaate hain। kya shivbaaba ko aankhe banda kar yaad karna hai? nahin। doosre log aankhe kyon banda karte hain? kyonki aankhe dhokha deti hain।

manushya khud kah dete hain paramatma naam-roop se nyaara hai। phir kehte hain patthar bhittar sabmen hain। 24 avtaar hain। kachchha machchha avtaar hai। vaastav mein hai sab jhooth hi jhooth। eeshvar ko sarvavyaapi kah kitna rola kar diya hai। bhakti maarga hai hi dhakka khaane ka maarga। mujhe bhi poore dhakke khilaate hain। ab bhakta bhagwan ko yaad karte hain ki hamko bhakti se, dhakkon se bachaao। jab yahaan aakar milte hain to kehte hain baba hamne aapko bahut dhoondha। bahut dhakke khaaye parantu aap mile nahin। are kab se dhakke khaaye? baba yeh pata nahin। ab baap samjhaate hain gyaan se hi sadgati hoti hai। manushya kumbha ke mele par dhakke khaane jaate hain। jahaan bhi paani hoga vahaan jaakar snaan karenge। kumbha arthaat sangam। asul hai aatma aur paramatma ka mela। parantu bhakti mein phir woh saagar aur paani ka mela bana diya hai। desh-deshaantar mela lagta hai। woh hai paani mein snaan karne ka mela। kai in baaton ko maante hain। kai nahin bhi maante hain। kai to na bhakti ko, na gyaan ko maante hain। bas manushya paida hota hai phir marta hai। nature hi hai। anek maten hain। ek hi ghar mein stri ki mat aur purush ki mat aur ho jaati hai। ek pavitrata ko maanenge doosra nahin maanenge। abhi tumko shreemat mil rahi hai। gaaya bhi hua hai - shreemat bhagvaanuvaach। unki mat se hi manushya se devta ban jaate hain। devta dharma abhi hai nahin। nishaaniyaan chitra hain jisse siddha hai ki aadi sanaatan devi-devta dharma tha woh raajya karke gaye hain। puraane se puraani cheez hai devi-devtaaon ki। lord krishna kehte hain va to kahenge god shri naaraayan। tum jaante ho lakshmi-naaraayan ka raajya tha jisko vaikuntha kaha jaata hai। shreekrishna vaikuntha ka maalik tha, satayug ka prince tha phir vahi krishna dvaapar mein kaise gaya? usi naam-roop se to aa na sake। vo jo chaitanya tha unke jad chitra yahaan hain। parantu woh aatma kahaan gai? yeh koi nahin jaante। baap batlaate hain - aatma 84 janma lete abhi yahaan part baja rahi hai। bhinna naam-roop, desh, kaal ka part bajaati aai hai। aatma hi kehti hai ham ek shareer chhod doosra lete hain। naam-roop, desh, kaal, mitra sambandhi sab alag-alag hain। doosre janma mein badal jaayenge।

tum jaante ho abhi ham padh rahe hain। phir ham so devi-devta banenge। sooryavanshi mein 8 janma lenge। ek shareer chhod doosra lenge। woh garbha jel nahin, garbha mahal hoga। yahaan garbha jel mein bahut saza bhogte hain। duhkh hota hai tab kehte bas abhi baahar nikaalo। ham phir paap nahin karenge। parantu baahar maaya ka raajya hone kaaran phir se paap karne lag padte hain। vahaan garbha mahal mein aaraam se rehte hain। to baap kehte hain sab ved-shaastra aadi ka saar main tumko hi samjhaata hoon। achha baba kumbha ke mele par samjhaate hain bahut snaan karne jaayenge। bahut bheed hogi। ilaahaabaad mein triveni par mela lagta hai। abhi woh koi sangam to hai nahin। sangam hona chaahiye saagar aur nadiyon ka। yeh to nadiyon ka sangam hai। do nadiyaan milti hain। woh phir kah dete teesri nadi gupta hai। ab gupta nadi koi hoti nahin। hain hi do nadiyaan। dekhne mein bhi do aati hain। ek ka paani saphed, ek ka maila dikhaai deta hai aur to koi hai nahin। ganga, jamuna hain। teen nahin hain। yeh bhi jhooth hua na। sangam bhi nahin hai। kalkatte mein saagar aur brahm putra milti hain। naanv mein baithkar us paar jaate hain, vahaan mela lagta hai। kitni mehnat karte hain। amarnaath par teertha yaatra karne jaate hain, vahaan bhi shivling ki moorti hai। woh ghar mein bhi rakh sakte hain। phir vahaan jaane ki darkaar nahin, yeh bhi dhakka khaana drama mein noondh hai। triveni mein jaate hain, samajhte hain woh patit-paavni hai। koi-koi ko yeh bhi maaloom nahin nadiyaan kahaan se aati hain। pahaad se aati hain। parantu paani to saagar se aata hai। baadal baraste hain to oonche pahaad hone kaaran barpha jam jaati hai। phir dhoop lagne ke kaaran jab barpha galti hai to paani ikattha hokar nadiyon mein aata hai। ab vichaar karo ki patit-paavan parampita paramatma gyaan ka saagar va gyaan nadiyaan? va paani ka saagar aur nadiyaan? bahut andhakaar mein dhakka khaate rehte hain। ab unko kaise bataayen ki yeh patit-paavni nahin hai, yeh to barsaat ka paani hai। baadlon se paani aata hai, baadal phir saagar se paani kheenchate hain। paani to patit-paavan ho nahin sakta। gaate bhi hain patit-paavan seetaaraam, he patit-paavan aao। aatmaayen kehti hain he patiton ko paavan banaane vaale baba raham karo।

baap samjhaate hain - yeh bhakti ke dhakke khaane se koi paavan bante nahin hain। yeh nadiyaan to anaadi hain hi। paani hai peene aur kheti karne ke liye। woh kaise paavan karega? abhi yeh tumhaara antim janma hai। main aata hoon tumko paavan banaane। satayug paavan duniya thi। yeh hai patit duniya। jo paavan the vahi 84 janma le patit bane hain isliye phir paavan banne ke liye baap ko bulaate hain। aadhaakalpa se utarti kala hoti aai hai। bhaarat satayug mein bahut sukhi tha, paavan tha। ab duhkhi hai kyonki patit hain isliye pukaarte hain O god father aur phir kah dete unka naam-roop hai nahin। tab pukaarte kisko hain? yeh bhi samajhte nahin jaise kehte hain aatma star misal hai। chamakta hai ajab sitaara। aatma bilkul chhoti bindi misal hai। teeka bhi yahaan lagaate hain aur kehte hain bhrakuti ke beech chamakta hai ajab sitaara… to itni chhoti si bindi aatma mein 84 janmon ka avinaashi part noondha hua hai। woh kabhi mit nahin sakta। yeh saara naatak immortal hai। chakra phirta rehta hai। aise nahin srishti ek jagah khadi hai। aadi sanaatan devi-devta dharma jo pahle tha, woh ab nahin hai। zaroor jab na ho tab to main aaoon। main aakar phir se devi-devta dharma ki sthaapna karta hoon। to chakra phirta hai। history-geography phir repeat hoti hai। satayug mein sooryavanshi raajya tha। treta mein chandravanshi ab phir tumko 84 janmon ka pata pada hai na। kaise ham chadhti kala mein aate hain। baap sabhi bachchon ko patit se paavan banaane ka raasta bataate hain। aise nahin kehte ki aankhe banda kar mujhe yaad karo। khaate-peete chalte mujhe yaad karna hai। aankhe banda kar khaana khaayenge kya? makkhi andar chali jaae।

tum bachchon ki aatma jaanti hai ki baba hamko padha rahe hain। woh kehte hain- bachche mujhe yaad karo to tum paavan banenge। jitna samay yaatra mein rehte hain to manushya pavitra rehte hain। lautkar aate hain to ghar mein phir patit ban jaate hain। tumhaari hai roohaani yaatra jo baap karaate hain। baap kehte hain - tumko amarlok mein chalna hai to mujhe yaad karo। aatma pavitra hone se hi tum ud sakenge। ant mati se gati hogi। baap ki shreemat se hi sadgati milti hai। shreemat kehti hai he aatmaayen maamekam yaad karo to khaad nikal jaae aur tum muktidhaam mein chale jaayenge, phir jeevanmukti mein aayenge। is chakra ko samajhne se tum chakravarti raaja banenge। satayug treta mein tum paavan the phir baap to poochhenge na ki tumko patit kisne banaaya? yeh bhi abhi tum bachche samajhte ho ki jab se raavan raajya shuru hota hai to patit ban padte hain। aadhaakalpa ke baad puraani duniya ho jaati hai। phir tumko sukh to nai duniya mein milna chaahiye। woh main hi aakar deta hoon। ham tumko paavan banaate hain, woh tumko patit banaate hain। main varsa deta hoon, raavan shraap dete hain। yeh hai khel। raavan tumhaara bada dushman hai। unka but banaakar jalaate hain। kabhi dekha shiv ka chitra uthaakar jalaayen? nahin। shiv to hai niraakaar। raam sukh dene vaala unko kaise jalaayenge। duhkh dene vaala hai raavan, kehte hain yeh anaadi jalaate aate hain। to kya shuru se hi raavan raajya tha? raamraajya hua hi nahin? yeh sab samjhaana pade। raavan raajya kab se shuru hua, yeh kisko pata nahin। aadhaakalpa se shuru hota hai। tum sab dropdiyaan pukaarti ho - baba hamaari raksha karo। are tum bolo hamko patit banna hi nahin hai। himmat chaahiye, nashtomoha banna hai। main sharan tab doonga jab tum nashtomoha banengi। mera to ek shivbaaba doosra na koi। pati, baal bachche yaad padte rahenge to varsa pa nahin sakengi। grihastha vyavhaar mein rehte hue baap ko yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par sabko paavan banaane ka raasta bataana hai। patit-paavan baap ka parichay dene ki yukti rachni hai।

2) baap se varsa lene ke liye va baap ki sharan mein aane ke liye poora-poora nashtomoha banna hai। aankh kholkar baap ko yaad karne ka abhyaas karna hai।

vardaan:- sarva shaktiyon ko samay par order pramaan kaarya mein lagaane vaale master sarvashaktimaan bhav

master ka arth hai ki har shakti jis samay aah100>vaan karo vo shakti practical swaroop mein anubhav ho। jis samay, jis shakti ki aavashyakta ho, us samay vo shakti sahayogi bane। shakti ko order kiya aur haazir। aise bhi nahin order karo sahanshakti ko aur aaye saamna karne ki shakti to use master sarvashaktimaan nahin kahenge। jaise shareer ki shaktiyaan order mein hain aise sookshm shaktiyaan bhi order pramaan kaarya karen, ek second ka bhi pharka na pade।

slogan:- prasannata ka aadhaar santushtata ki shakti hai।