Daily Murli for Thursday 12 January 2023

12-01-2023 praatahmurli om shanti "baapdaada"' madhuban

“meethe bachche - baap ustaad ne tumhein manushya se devta banne ka hunar sikhlaaya hai, tum phir shreemat par auron ko bhi devta banaane ki seva karo''

prashn:- abhi tum bachche kaun sa shreshtha karma karte ho jiska rivaaj bhakti mein bhi chala aata hai?

uttar:- tum abhi shreemat par apna tan-man-dhan bhaarat to kya vishwa ke kalyaan arth arpan karte ho isi ka rivaaz bhakti mein manushya eeshvar arth daan karte hain। unhein phir uske badle doosre janma mein raajaai ghar mein janma milta hai। aur tum bachche sangam par baap ke madadgaar bante ho to manushya se devta ban jaate ho।

geet:- toone raat ganvaai…

om shanti। baap bachchon ko samjhaate hain, jab bachche samajhte hain tab phir auron ko samjhaate hain। nahin samajhte to auron ko samjha nahin sakte। agar khud samajhte auron ko samjha nahin sakte to goya kuchh bhi nahin samajhte। koi hunar seekhta hai to usko phailaata hai। yeh hunar to baap ustaad se seekha jaata hai ki manushya se devta kaise banaaya jaae। devtaayen jinke chitra bhi hain, manushya ko devta banaate hain to goya woh devta abhi nahin hain। devtaaon ke gun gaaye jaate hain। sarvagun sampanna.... yahaan koi manushya ke to aise gun nahin gaaye jaate। manushya mandiron mein jaakar devtaaon ke gun gaate hain। bhal pavitra to sannyaasi bhi hain parantu manushya unhon ke aise gun nahin gaate। woh sannyaasi to shaastra aadi bhi sunaate hain। devtaaon ne to kuchh nahin sunaaya hai। woh to praalabdha bhogte hain। agle janma mein purushaartha kar manushya se devta bane the। abhi koi mein bhi devtaaon jaise gun nahin hain, jahaan gun nahin vahaan zaroor avgun hain। satayug mein isi bhaarat mein yatha raaja raani tatha praja sarvagun sampanna the। unmein sabhi gun the। un devtaaon ke hi gun gaaye jaate hain। us samay aur dharma the nahin। gun vaale devtaayen the satayug mein, aur avgun vaale manushya hain kaliyug mein। ab aise avgun vaale manushya ko devta kaun banaave। gaaya bhi hua hai manushya se devta... yeh mahima to hai parampita paramatma ki। hain to devtaayen bhi manushya, parantu unmein gun hain, unmein avgun hain। gun praapta hote hain baap se, jisko satguru bhi kehte hain। avgun praapta hote hain maaya raavan se। itne gunvaan phir avguni kaise bante hain। sarvagun sampanna aur phir sarva avgun sampanna kaun banaate hain! yeh tum bachche jaante ho। gaate bhi hain mujh nirgun haare mein koi gun naahi। devtaaon ke kitne gun gaate hain। is samay to woh gun kisi mein nahin hain। khaan-paan aadi kitna ganda hai। devtaayen hain vaishnav sampradaay aur is samay ke manushya hain raavan sampradaay। khaan-paan kitna badal gaya hai। sirf dress ko nahin dekhna hai। dekha jaata hai khaan-paan aur vikaareepan ko। baap khud kehte hain mujhe bhaarat mein hi aana padta hai। brahma mukh vanshaavli brahman braahmaniyon dvaara sthaapna karaata hoon। yeh braahmanon ka yagya hai na। woh vikaari brahman kukh vanshaavli, yeh hain mukh vanshaavli। bahut farka hai। vo saahookaar log jo yagya rachte hain usmein jismaani brahman hote hain। yeh hai behad ka baap saahookaaron se saahookaar, raajaaon ka raaja। saahookaaron ka saahookaar kyon kaha jaata hai? kyonki saahookaar bhi kehte hain hamko eeshvar ne dhan diya hai, eeshvar arth daan karte hain to doosre janma mein dhanvaan bante hain। is samay tum shivbaaba ko sab kuchh tan-man-dhan arpan karte ho। to kitna oonch pad paate ho।

tum shreemat par itne oonch karma seekhte ho to tumko zaroor phal milna chaahiye। tan-man-dhan arpan karte ho। woh bhi eeshvar arth karte hain, koi ke through। yeh rivaaz bhaarat mein hi hai। to baap tumko bahut achhe karma sikhlaate hain। tum yeh kartavya sirf bhaarat to kya, parantu saari duniya ke kalyaan arth karte ho to uska evja milta hai - manushya se devta banne ka। jo shreemat par jaisa karma karte hain, aisa phal milta hai। ham saakshi ho dekhte rehte hain। kaun shreemat par chal manushya ko devta banaane ki seva karte hain। kitna jeevan parivartan ho jaata hai। shreemat par chalne vaale brahman thahre। baap kehte hain braahmanon dvaara shoodron ko baith raajayog sikhlaata hoon - 5 hajaar varsha ki baat hai। bhaarat mein hi devi-devtaaon ka raajya tha। chitra dikhaane chaahiye। chitron bigar samjhenge pata nahin yeh kaunsa naya dharma hai, jo shaayad vilaayat se aata hai। chitra dikhaane se samjhenge yeh devtaaon ko maante hain। to samjhaana hai ki shreenaaraayan ke antim 84 ven janma mein parampita paramatma ne pravesh kiya hai aur raajayog sikhla rahe hain। yeh unke 84 ven janma ka bhi ant hai। jo sooryavanshi devta the un sabhi ko aakar phir se raajayog seekhna hai। drama anusaar purushaartha bhi zaroor karenge। tum bachche abhi sammukh sun rahe ho aur bachche phir is tape dvaara sunenge to samjhenge ham bhi maat-pita ke saath phir so devta ban rahe hain। is samay 84 ven janma mein poore beggar zaroor banna hai। aatma baap ko sab kuchh surrender karti hai। yeh shareer hi ashva hai, jo svaaha hota hai। aatma khud bolti hai ham baap ke bane hain। doosra na koi। main aatma is jeev dvaara parampita paramatma ke direction anusaar seva kar raha hoon।

baap kehte hain yog bhi sikhaao aur srishti chakra kaise phirta hai woh bhi samjhaao। jisne saara chakra paas kiya hoga - woh in baaton ko jhat samjhenge। jo is chakra mein aane vaala nahin hoga woh thahrega nahin। aise nahin saari srishti aayegi! ismen bhi praja dher aayegi। raaja raani to ek hota hai na। jaise lakshmi-naaraayan ek gaaya jaata hai, raam seeta ek gaaya jaata hai। prince princess to aur bhi honge। mukhya to ek hoga na। to aisa raaja raani banne ke liye bahut mehnat karni hai। saakshi ho dekhne se pata padta hai - yeh saahookaar raajaai kul ka hai ya gareeb kul ka hai। koi maaya se kaise haarte hain, jo bhaaganti bhi ho jaate hain। maaya ekdam kachcha kha jaati hai isliye baba poochhte hain raaji-khushi ho? maaya ke thappad se behosh va beemaar to nahin padte ho! aise koi beemaar ho padte hain phir bachche unke paas jaate hain gyaan-yog ki sanjeevni booti dekar surjeet kar dete hain। gyaan aur yog mein na rahne kaaran maaya ekdam kala-kaaya chat kar deti hai। shreemat chhod manmat par chal padte hain। maaya ekdam behosh kar deti hai। vaastav mein sanjeevni booti yeh gyaan ki hai, isse maaya ki behoshi utar jaati hai। yeh baaten sabhi is samay ki hain। seetaayen bhi tum ho। raam aakar maaya raavan se tumko chhudaate hain। jaise bachchon ko sindha mein chhudaaya। raavan log phir chura le jaate the। abhi tumko phir maaya ke chambe se sabko chhudaana hai। baba ko to taras padta hai, dekhte hain kaise maaya thappad lagaae bachchon ki buddhi hi ekdam phira deti hai। raam se buddhi pher raavan ki taraph kar deti hai। jaise ek khilauna hota hai। ek taraph raam, ek taraph raavan। isko kaha jaata hai aashcharyavat baap ka bananti, phir raavan ka bananti। maaya badi dustar hai। choohe muaaphik kaat kar khaana kharaab kar deti hai, isliye shreemat kabhi chhodni nahin hai। kathin chadhaai hai na। apni mat maana raavan ki mat। us par chale to bahut ghutka khaayenge। bahut badnaami karaate hain। aise sabhi centres par hain। nuksaan phir bhi apna karte hain। service karne vaale roop-basanta chhipe nahin rehte। daivi raajdhaani sthaapan ho rahi hai, ismen sabhi apna-apna part zaroor bajaayenge। daudi lagaayenge to apna kalyaan karenge। kalyaan bhi ekdam svarga ka maalik। jaise maa baap takhtan-sheen hote hain to bachchon ko bhi hona hai। baap ko follow karna hai। nahin to apna pad kam kar denge। baba ne yeh chitra koi rakhne liye nahin banaaye hain। inse bahut service karni hai। bade-bade saahookaar log lakshmi-naaraayan ka mandir banvaate hain parantu yeh kisko pata nahin hai ki yeh kab aaye, inhon ne bhaarat ko kaise sukhi banaaya, jo sabhi unhon ko yaad karte hain।

tum jaante ho ki mandir hona chaahiye ek dilvaala ka। yeh ek hi kaaphi hai। lakshmi-naaraayan ke mandir se bhi kya hoga! woh koi kalyaankaari nahin hain। shiv ka mandir banaate hain, woh bhi arth rahit। unka occupation to jaante hi nahin। mandir banaave, occupation ko na jaanen to kya kahenge? jab svarga mein devtaayen hain to mandir hote nahin। jo mandir banaate hain, unhon se poochhna chaahiye lakshmi-naaraayan kab aaye the? unhon ne kya sukh diya tha? kuchh samjha nahin sakte। isse siddha hai ki jinmen avgun hain woh gunvaan ke mandir banaate hain। to bachchon ko bahut service ka shauk hona chaahiye। baba ko service ka bahut shauk hai tab to aise-aise chitra banvaate hain। bhal chitra shivbaaba banvaate hain parantu buddhi donon ki chalti hai। achha -

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

raatri class - 28-6-68

yahaan sabhi baithe hain samajhte hain ki ham aatmaayen hain, baap baitha hai। aatma abhimaani ho baithna isko kaha jaata hai। sabhi aise nahin baithe hain ki ham aatma hain baba ke saamne baithe hain। ab baba ne yaad dilaaya hai to smriti aayengi attention denge। aise bahut hain jinki buddhi baahar bhaagti hai। yahaan baithe bhi jaise ki kaan banda hain। buddhi baahar mein kahaan na kahaan daudti rehti hai। bachche jo baap ki yaad mein baithe hain ve kamaai kar rahe hain। bahuton ka buddhi yog baahar mein rehta hai, woh jaise ki yaatra mein nahin hain। time vesta hota hai। baap ko dekhne se bhi baba yaad padega। nambarvaar purushaartha anusaar to hai hi। koi koi ko pakki aadat pad jaati hai। ham aatma hain, shareer nahin hain। baap knowledgeful hai to bachchon ko bhi knowledge aa jaati hai। abhi vaapis jaana hai। chakra poora hota hai abhi purushaartha karna hai। bahut gai thodi rahi..... imtihaan ke dinon mein phir bahut purushaartha karne lag padenge। samjhenge agar ham purushaartha nahin karenge to naapaas ho jaayenge। pad bhi bahut kam ho jaayega। bachchon ka purushaartha to chalta hi rehta hai। deh abhimaan kaaran vikarma honge। iska sau guna danda ho jaayega kyonki hamaari ninda karaate hain। aisa karma nahin karna chaahiye jo baap ka naam badnaam ho isliye gaate hain sadguru ke nindak thaur na paaven। thaur maana baadshaahi। padhaane vaala bhi baap hai। aur kahaan bhi satsang mein em object nahin hai। yeh hai hamaara raajayog। aur koi aise mukh se kuchh kah na sake ki ham raajayog sikhlaate hain। woh to samajhte hain shanti mein hi sukh hai? vahaan to na duhkh, na sukh ki baat hai। shanti hi shanti hai। phir samjha jaata hai inki takdeer mein kam hai। sabhi se takdeer oonchi unki hai jo pahle se part bajaate hain। vahaan unko yeh gyaan nahin rehta। vahaan sankalp hi nahin chalega। bachche jaante hain ham sabhi avtaar lete hain। bhinna bhinna naam roop mein aate hain। yeh drama hai na। ham aatmaayen shareer dhaaran kar ismen part bajaati hain। woh saara raaz baap baith samjhaate hain। tum bachchon ko andar mein ateendriy sukh rehta hai। andar mein khushi rehti hai। kahenge yeh dehi-abhimaani hai। baap samjhaate bhi hain tum student ho। jaante ho ham devta svarga ke maalik banne vaale hain। sirf devta bhi nahin। ham vishwa ke maalik banne vaale hain। yeh avastha sthaai tab rahegi jab karmaateet avastha hogi। drama plan anusaar honi hai zaroor। tum samajhte ho ham eeshvareey parivaar mein hain। svarga ki baadshaahi milni hai zaroor। jo jaasti service karte hain, bahuton ka kalyaan karte hain to zaroor oonch pad milega। baba ne samjhaaya hai yeh yog ki baithak yahaan ho sakti hai। baahar centre par aise nahin ho sakti hai। chaar baje aana, neshta mein baithna, vahaan kaise ho sakta hai। nahin। centre mein rahne vaale bhal baithe। baahar vaale ko bhoole chuke bhi kehna nahin hai। samay aisa nahin hai। yeh yahaan theek hai। ghar mein hi baithe hain। vahaan to baahar se aana padta hai। yeh sirf yahaan ke liye hai। buddhi mein gyaan dhaaran hona chaahiye। ham aatma hain। unka yeh akaal takhta hai। tev (aadat) pad jaani chaahiye। ham bhaai-bhaai hain, bhaai se ham baat karte hain। apne ko aatma samajh baap ko yaad karo to vikarma vinaash ho jaayen। achha!

meethe meethe roohaani bachchon ko roohaani baapdaada ka yaadapyaar, goodnight aur namaste।

dhaarna ke liye mukhya saar:-

1) gyaan-yog ki sanjeevni booti se svayan ko maaya ki behoshi se bachaate rehna hai। manmat par kabhi nahin chalna hai।

2) roop-basanta ban service karni hai। maat-pita ko follow kar takhtansheen banna hai।

vardaan:- apni shaktishaali sthiti dvaara daan aur punya karne vaale poojyaneey aur gaayan yogya bhav

antim samay mein jab kamjor aatmaayen aap sampoorn aatmaon dvaara praapti ka thoda bhi anubhav karengi to yahi antim anubhav ke sanskaar lekar aadhaakalpa ke liye apne ghar mein vishraami hongi aur phir dvaapar mein bhakta ban aapka poojan aur gaayan karengi isliye ant ki kamjor aatmaon ke prati mahaadaani vardaani ban anubhav ka daan aur punya karo। yeh second ka shaktishaali sthiti dvaara kiya hua daan aur punya aadhaakalpa ke liye poojyaneey aur gaayan yogya bana dega।

slogan:- paristhitiyon mein ghabraane ke bajaae saakshi ho jaao to vijayi ban jaayenge।