Daily Murli for Tuesday 7 February 2023

07-02-2023 praatahmurli om shanti "baapdaada"' madhuban

“meethe bachche - is samay tumhein niraakaari mat mil rahi hai, geeta shaastra niraakaari mat ka shaastra hai, saakaari mat ka nahin, yeh baat siddha karo''

prashn:- kaun si guhya baat badi yukti se first class bachche hi samjha sakte hain?

uttar:- yeh brahma hi shreekrishna bante hain। brahma ko prajaapita kahenge shreekrishna ko nahin। niraakaar bhagwan ne brahma mukh se brahman rache hain। shreekrishna to chhota bachcha hai। geeta ka bhagwan niraakaar paramatma hai। shreekrishna ki aatma ne purushaartha karke yeh praalabdha paai। yeh bahut guhya baat hai - jo first class bachche hi yukti se samjha sakte hain। 20 naakhoon ka jor dekar yeh baat siddha karo tab service ki saphalta hogi।

geet:- kaun aaya mere man ke dvaare…

om shanti। bachchon ne suna yeh aankh nahin jaan sakti hai, kisko? bhagwan ko। yeh aankhe shreekrishna ko to jaan sakti hain। baaki bhagwan ko nahin jaan sakti। aatma hi paramatma ko jaan sakti hai। aatma maanti hai ki hamaara parampita paramatma niraakaar hai। niraakaar hone kaaran, in aankhon se na dekhne kaaran itni yaad nahin thaharti। yeh niraakaar baap niraakaari bachchon (aatmaon) ko kehte hain। tumko niraakaari mat milti hai। geeta shaastra hai hi niraakaari mat ka। saakaari mat ka nahin hai। geeta dharmashaastra hai na। islaamiyon aadi ka bhi dharma shaastra hai। ibraahim ne uchchaara, buddha ne, Christ ne uchchaara। unhon ke to chitra hain। geeta jo sarva shaastramai shiromni hai, uske liye manushyon ne shreekrishna ka chitra dikha diya hai। parantu baap samjhaate hain yeh wrong hai। geeta mainne uchchaari, mainne raajayog sikhlaaya aur svarga ki sthaapna ki hai। main hoon niraakaar parampita paramatma। main tum sarva aatmaon ka baap manushya srishti ka beejroop hoon। mujhe hi vrikshapti kaha jaata hai। shreekrishna ko vrikshapti nahin kahenge। parampita paramatma hi manushya srishti ka beejroop, creator hai। shreekrishna ko creator nahin kahenge। woh to sirf daivi gun vaala manushya hai। bhagwan hai ek। shreekrishna ko koi sabhi ka paramatma nahin kah sakte। baap kehte hain main 5 hajaar varsha ke baad kalpa ke sangam par aata hoon। main saare srishti ka baap hoon, mujhe hi god father kehte hain। shreekrishna ka naam dene se parampita paramatma ko jaan nahin sakte। yahi badi bhaari bhool kar di hai। geeta dvaara aadi sanaatan devi-devta dharma mainne hi sthaapan kiya hai। mujhe shiv va roodra bhagwan kaha jaata hai aur koi bhi sookshm devta ko va manushya ko bhagwan nahin kaha jaata। lakshmi-naaraayan aadi koi ko bhi paramatma nahin kaha jaata hai। kaha jaata hai paramatma ek hai। bhagvaanuvaach bhi hai to zaroor bhagwan aaya hoga aur aakarke raajayog sikhaaya hai। baap kehte hain kalpa pahle bhi mainne tum bachchon ko kaha tha। shreekrishna kabhi bhi bachche-bachche nahin kah sakte। parampita paramatma hi sabko bachche kehte hain। kalpa pahle bhi mainne tum bachchon ko kaha tha ki dehi-abhimaani bano, mujh niraakaar ko apna baap bhagwan samjho। saakaari baap prajaapita brahma thahra kyonki brahma dvaara hi bhagwan ne brahman braahmaniyaan rache hain। shreekrishna prajaapita nahin hai। bhagwan kehte hain main brahma mukh dvaara brahman braahmaniyaan rachta hoon। yeh brahma hi shreekrishna banta hai, yeh kitni guhya baat hai। yeh samjhaane mein badi yukti chaahiye। first class bachchiyaan hi samjha sakengi। baap kehte hain bahut achha bachcha va bachchi ho jo siddha kare ki geeta ka bhagwan niraakaar paramatma hai। jisne geeta rachi usne hi bachchon ko raajayog sikhaaya aur svarga racha। zaroor oonche te ooncha baap hi raajayog sikhaayega। shreekrishna ne to praalabdha paai hai। praalabdha dene vaala hai parampita paramatma। shreekrishna hai unka bachcha। shreekrishna ki aatma ne purushaartha kiya aur praalabdha paai। purushaartha karaane vaale ko udaakar, purushaartha kar praalabdha paane vaale ka naam rakh geeta ko khandan kar diya hai।

service ko badhaane ke liye bachchon ko 20 naakhoon ka jor dena chaahiye। geeta kisne uchchaari? geeta dvaara kaun sa dharma kisne sthaapan kiya? is hi baat se tum achhi reeti jeet pahan sakte ho। parampita paramatma dvaara svarga ke maalik bante hain, na ki shreekrishna dvaara। to is baat par mehnat karni hai। sab shaastra hain geeta ke bachche। to bachchon se kabhi varsa mil nahin sakta। varsa to zaroor baap hi denge। kaaka, chaacha, maama, guru aadi koi se bhi varsa nahin milta hai। behad ke baap se hi behad ka varsa milta hai। yeh likhat aisi saaph kar likhni hai ki samajh jaayen to barobar geeta khandan ki hai। geeta ko defame kiya hai, isliye bhaarat kangaal ban gaya hai। kaudi tulya ban gaya hai। aisi likhat likho। bhaarat ko svarga banaane vaala kaun hai? svarga kahaan hai? kaliyug ke baad satayug hoga to unki sthaapna zaroor sangam par honi chaahiye। shiv bhagvaanuvaach - main kalpa-kalpa sangam par paavan duniya banaane aata hoon। aise siddha karo jo samjhen ki shiv paramatma hi sabko duhkhon se liberate karte hain, na ki shreekrishna। geeta ke bhagwan ko jo samajh jaayenge vahi aakar phool chadhaayenge। sabhi nahin chadhaayenge, jo samajh gaye woh phool ban bali chadh jaayenge। baba ko koi phool dete hain to baba kehte hain mujhe aise phool (bachche) chaahiye। kaante mere par bali chadhen to main unko phool banaaoon। babulnaath bhi mera naam hai। babul ke kaanton ko phool banaane vaala mujhe hi kehte hain, shreekrishna to svayan phool hai। woh hai garden oph allaah, yeh hai devil forest। inko phir deity garden baap banaata hai। tum hi nai duniya ke maalik bante ho। lakshmi-naaraayan ki deity dynasty kahi gai hai। brahman kul ki dynasty nahin kahenge। yeh brahman kul hai। parampita paramatma ne brahma dvaara praja rachi hai, isliye inko prajaapita kaha jaata hai। shivbaaba ko va shreekrishna ko prajaapita nahin kahenge। yeh to krishna par kalank lagaaye hain ki 16108 raaniyaan thi। yeh to prajaapita brahma ne itne bachche aur bachchiyaan paida ki hain।

gyaan ka saagar hai hi ek parampita paramatma। paap ka danda dharmaraaj dete hain। president ko bhi bade se bada judge kasam denge। raaja se kabhi kasam nahin uthvaaya jaata hai kyonki unhein raaja banaata hai bhagwan। woh hai alpakaal ke liye। yahaan to baap 21 janmon ke liye raajya-bhaagya dete hain। vahaan kasam uthaane ki baat nahin hai। yeh manushya srishti roopi vriksha hai, koi jangali vriksha nahin hai। parampita paramatma ko vrikshapti kaha jaata hai। shreekrishna is vriksha ka raaz nahin bata sakte, vrikshapti hi samjha sakte hain। nar se naaraayan to baap hi banaayega, na ki shreekrishna। mukhya dharma shaastra hain 4, baaki sab hain danta kathaayen। pahla-pahla dharma kaun sa sthaapan hua aur kiske dvaara? svarga mein tha devi-devta dharma, to zaroor woh baap hi rachega। baap puraani duniya se liberate karte hain kyonki duhkh bahut hai। traahi-traahi karte hain। baap se svarga ka varsa lena hai to abhi lo। saadhaaran aadmi koi varsa de nahin sakta। bachchon ko sarva praapti karaane vaala hai hi baap। behad ka baap hi svarga ka maalik banaate hain। aisi-aisi temptation deni hai। jaise shikaari log koi se shikaar karaate hain to saari taiyaari kar shikaar saamne laakar sirf unse shikaar karaate hain। yahaan shikaar karaana hai maataaon se। baap kehte hain shikaar maataaon ke aage le aana hai। maataayen bahut hain। naam ek ka baala ho jaata hai। tum shakti sena ho। shakti dynasty nahin kahenge। shakti sena ki mukhya hai jagdamba, kaali, sarasvati। baaki chandika aadi ulte naam bhi bahut rakh diye hain। to tum bachchon ko aisi baaton par clear karna hai ki oonche te ooncha bhagwan phir brahma vishnu shankar। prajaapita brahma ki beti hai sarasvati। unko goddess oph knowledge kehte hain। to zaroor unke bachchon ko bhi goddess oph knowledge kahenge। ant mein vijay to tumhaari hone vaali hai। koi-koi geeta se vedon ka maan jyaada rakhte hain। to bhi geeta ka prachaar jyaada hai। baap kehte hain main aata hoon sangamayug par। shreekrishna ka chitra hai hi satayug ka। phir 84 janmon mein roop badalta jaata hai। gyaani tu aatma tab ban sakte hain jab parampita paramatma aakar aatma ka gyaan deve। parampita paramatma hai gyaan ka saagar। un dvaara tum gyaani tu aatma bante ho। baaki sab hain bhakta tu aatma। baap kehte hain mujhe gyaani tu aatma priy lagte hain। mahima saari geeta ki hai। dhyaani se gyaani shreshtha hain। dhyaan trance ko kaha jaata hai। yeh to baap se yog lagaana hai। dhyaan mein jaane se koi bhi faayda nahin hai।

baap kehte hain mainne raajayog sikhaaya tha। shreekrishna ko yeh praalabdha mainne hi di thi। zaroor agle janma mein purushaartha kiya hoga। saari sooryavanshi raajdhaani ne mere dvaara hi praalabdha paai hai। delvaada mandir ka contrast bhi aise likho jo padhne se hi manushyon ko jhat teer lag jaaye। form bhi bharaana hai ki behad ka baap gyaan ka saagar hai, bahut meetha hai, hamko raajayog sikhlaata hai। us satguru bigar hai ghor andhiyaara। aise baap ki mahima karne se buddhi mein lav aayega। baap sammukh aakar janma de tab to lav hoga na। tumko janma diya hai tab to lav hua hai। baap kahne se hi svarga yaad aata hai। baba svarga ki sthaapna karte hain। ham unse varsa le rahe hain। vishvaas karo ya na karo। behad ka baap to sabhi ka baap hai, unse zaroor svarga ka varsa milega। baap hai hi nai duniya ka rachayita। to zaroor nai duniya ka varsa dega। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ka priy banne ke liye buddhi mein gyaan ko dhaaran kar gyaani tu aatma banna hai। baap se yog lagaana hai। dhyaan ki aash nahin rakhni hai।

2) maataaon ko aage rakh unka naam badhaana hai। authority se geeta ke bhagwan ko siddha karna hai। 20 naakhoon ke jor se service ko badhaana hai।

vardaan:- shreshtha jeevan ki smriti dvaara vishaal stage par vishesh part bajaane vaale hero paartadhaari bhav

brahma baap ne aap bachchon ko divya janma dete hi - pavitra bhav yogi bhav ka vardaan diya। janmate hi badi maa ke roop mein pavitrata ke pyaar se paalna ki। sada khushiyon ke jhoole mein jhulaaya, sarvagun moorta, gyaan moorta, sukh-shanti swaroop banne ki har roz lori di, aise maat-pita ke shreshtha bachche brahmaakumaar kumaari hain, is jeevan ke mahatva ko smriti mein rakh vishwa ki vishaal stage par vishesh part, hero part bajaao।

slogan:- bindu shabd ke mahatva ko jaan bindu ban, bindu baap ko yaad karna hi yogi banna hai।

maateshvari ji ke anmol mahaavaakya

pahle pahle yeh jaanna zaroori hai ki apna asli lakshya kya hai? vo bhi achhi tarah se buddhi mein dhaaran karna hai tab hi poorn reeti se us lakshya mein upasthit ho sakenge। apna asli lakshya hain - main aatma us paramatma ki santaan hoon। asul mein karmaateet hoon phir apne aapko bhoolne se karmabandhan mein aa gai, ab phir se vo yaad aane se, is eeshvareey yog mein rahne se apne kiye hue vikarma vinaash kar rahe hain। to apna lakshya hua main aatma paramatma ki santaan hoon। baaki koi apne ko ham so devta samajh us lakshya mein sthit rahenge to phir jo paramatma ki shakti hai vo mil nahin sakegi। aur na phir tumhaare vikarma vinaash honge ab yeh to apne ko full gyaan hai, main aatma paramatma ki santaan karmaateet ho bhavishya mein jaakar jeevanmukta devi devta pad paayenge, is lakshya mein rahne se woh taakat mil jaati hai। ab yeh jo manushya chaahte hain hamko sukh shanti pavitrata chaahiye, vo bhi jab poorn yog hoga tab hi praapti hogi। baaki devta pad to apni bhavishya praalabdha hai, apna purushaartha alag hai aur apni praalabdha bhi alag hai। to yeh lakshya bhi alag hai, apne ko is lakshya mein nahin rehna hai ki main pavitra aatma aakhreen paramatma ban jaaoongi, nahin। parantu hamko paramatma ke saath yog lagaae pavitra aatma banna hai, baaki aatma ko koi paramatma nahin banna hai।

2) is avinaashi eeshvareey gyaan par anek naam dhare gaye hain (rakhe gaye hain)। koi is gyaan ko amrit bhi kehte hain, koi gyaan ko anjan bhi kehte hain। gurunaanak ne kaha gyaan anjan guru diya, koi ne phir gyaan varsha bhi kaha hai kyonki is gyaan se hi saari srishti sabja (hari bhari) ban jaati hai। jo bhi tamopradhaan manushya hain vo satoguni manushya ban jaate hain aur gyaan anjan se andhiyaara mit jaata hai। is hi gyaan ko phir amrit bhi kehte hain jisse jo manushya paanch vikaaron ki agni mein jal rahe hain usse thande ho jaate hain। dekho geeta mein paramatma saaph kehta hai kaameshu krodheshu usmein bhi pahla mukhya hai kaam, jo hi paanch vikaaron mein mukhya beej hai। beej hone se phir krodh lobh moh ahankaar aadi jhaad paida hota hai, usse manushyon ki buddhi bhrashta ho jaati hai। ab us hi buddhi mein gyaan ki dhaarna hoti hai, jab gyaan ki dhaarna poorn buddhi mein ho jaati hai tab hi vikaaron ka beej khatma ho jaata hai। baaki sannyaasi to samajhte hain vikaaron ko vash karna badi kathin baat hai। ab yeh gyaan to sannyaasiyon mein hai hi nahin। to aisi shiksha deven kaise? sirf aise hi kehte hain ki maryaada mein raho। parantu asul maryaada kaunsi thi? vo maryaada to aajkal toot gai hai, kahaan vo satayugi, tretaayugi devi devtaaon ki maryaada jo grihastha mein rahkar kaise nirvikaari pravritti mein rehte the। ab vo sachchi maryaada kahaan hai? aajkal to ulti vikaari maryaada paalan kar rahe hain, ek do ko aise hi sikhlaate hain ki maryaada mein chalo। manushya ka pahla kya pharja hai, vo to koi nahin jaanta, bas itna hi prachaar karte hain ki maryaada mein raho, magar itna bhi nahin jaante ki manushya ki pahli maryaada kaunsi hai? manushya ki pahli maryaada hai nirvikaari banna, agar koi se aisa poochha jaae tum is maryaada mein rehte ho? to kah dete hain aajkal is kaliyugi srishti mein nirvikaari hone ki himmat nahin hai। ab mukh se kehna ki maryaada mein raho, nirvikaari bano isse to koi nirvikaari ban nahin sakta। nirvikaari banne ke liye pahle is gyaan talvaar se in paanch vikaaron ke beej ko khatma karna tab hi vikarma bhasma ho sakega। achha। om shanti।