Daily Murli for Wednesday 8 February 2023

08-02-2023 praatahmurli om shanti "baapdaada"' madhuban

“meethe bachche - tum brahman hi godly student ho, tumhein baap ne rachta aur rachna ka gyaan dekar master jaani-jaananhaar banaaya hai, abhi tum sab kuchh jaan jaate ho''

prashn:- doosron ko samjhaane ki phalak kin bachchon mein rahegi?

uttar:- jinke paas gyaan ki poonji hai। jo svayan har baat ko samajhkar dhaaran karte hain vahi doosron ko falak se samjha sakte hain। tumhein falak se sabko baap ka parichay de unse varsa lene ki vidhi bataani hai।

geet:- takdeer jagaakar aai hoon…

om shanti। vaastav mein yeh geet gaane ki jaroorat nahin hai। parantu bahlaane ke liye yeh aavaaj karna padta hai। vaastav mein aatma ko aavaaj karne ki darkaar nahin। aatma to aavaaj se pare nirvaandhaam jaane chaahti hai। bahut baaje gaaje taaliyaan aadi sunkar aatma thaki hui hai isliye ab baap ko yaad karti hai - he bhagwan mujhe le jaao। bachche jaante hain yeh baap hamko samjha rahe hain। jaise ghar mein baap aur daada donon bachche-bachche kehte hain। daada aise nahin kahenge ki potre idhar aao। donon hi kahenge bachche idhar aao। yahaan to baap aur daada, saakaar aur niraakaar donon ikatthe hain। vaastav mein sabhi manushya-maatra ka yeh baap aur daada hai। to zaroor parampita paramatma ko srishti rachne aana pade। tumhaara naam bahut achha rakha hua hai - brahmaakumaar kumaariyaan। aabu mein bhi adhar devi aur kunvaari kanya ke mandir hain। to ek kanya to nahin hogi na, zaroor bahut honge। donon ka alag-alag mandir hai। adharkumaari kisko kaha jaata hai, kunvaari kanya kisko kaha jaata hai - yeh to tum hi jaante ho। yeh hai shiv shaktiyaan। andar bahut bada mandir bana hua hai। bahut kothriyaan hain to mandir bhi saakshi deta hai ki kumaariyaan aur adhar-kumaariyaan bahut hain। chitra jo banaate hain woh bhi yaadgaar hai, jo hokar gaye hain। jaise devi devtaaon ke chitra hain, zaroor hokar gaye hain। ve vishwa ke maalik the। ab nahin hain। vishwa ke rachta ne hi bhaarat ko vishwa ka maalik banaaya। kaise? so ab practical ban rahe hain। abhi kaliyug hai। satayug hai ek aadi sanaatan devi devta dharma। kaliyug mein anek dharma aur anek praja ka raajya hai। tum bachche jab sunte ho to samajhte ho baba yathaartha reeti theek samjhaate hain। parantu koi kaaranvash hamko dhaarna nahin hoti hai isliye auron ko bhi dhaarna nahin kara sakte hain। koi na koi vighna hai। ham dull student hain। baaki baap to bahut achhi reeti samjhaate hain। anek manushya, anek dharma hain। 5000 varsha pahle bhaarat svarga tha। bahut thode manushya the। sirf sooryavanshi aur chandravanshi woh aatmaayen paramdham se aai thi, apna part bajaane। baaki sabhi dharmon ki aatmaayen nirvaandhaam mein thi। abhi anek dharma hain baaki devi-devta dharma praayahlop hai, to zaroor phir satayug banega। parampita paramatma ko hi aakar svarga rachna pade। bhakta jo bhagwan ko yaad karte hain to unhon ko bhakti ka phal dene ke liye bhi yahaan aana padega। baaki sabko vaapis muktidhaam le jaana hota hai। aur to koi vaapis le ja nahin sakta। agar ek bhi guru gati sadgati ka raasta jaanta hota to phir unke pichhaadi laakhon shishya bhi jaate। un yaatraaon mein to jaakar phir laut aate hain। parantu muktidhaam se phir vaapis aaye hi kyon? ek ko raasta mile to sabko le jaaen। ab ek baap aaya hai to tum sabko raasta milta hai na। sabhi ko duhkh ki duniya se chhudaate hain, isliye unko liberator kehte hain। us niraakaar ko aane liye shareer chaahiye। to nai duniya ko rachne liye prajaapita bhi chaahiye। rachna yahaan rachni hai। to brahma bhi yahaan ka manushya chaahiye। sookshm vatan se utar neeche to nahin aayega। kehte bhi hain abhi brahma ki raat hai, to brahma mukh vanshaavli ki bhi raat hai। ab ant mein baap aaye hain din karne। brahma ki raat poori hoti hai to bi.ke. ki raat bhi poori hoti hai। prajaapita brahma to theek hai। vaastav mein sabhi manushya aatmaon ka baap paramatma ko kaha jaata hai। sabhi unko god father parampita paramatma kehte hain। sensible manushya jab god father kehte hain to koi manushya ko yaad nahin karte। koi to kehte hain woh jyoti swaroop hai, brahm hai। brahma vishnu shankar ko to brahm nahin kahenge। to pahle-pahle parichay dena hai apna ki ham bi.ke. hain। brahma ko bhi parampita paramatma rachte hain phir brahma mukh se braahmanon ko racha। prajaapita hai to zaroor bahut santaan hongi। is reeti sijra badhta jaata hai। braahmanon ka varna badal satayugi devta bante hain kyonki baap baith braahmanon ko raajayog sikhlaate hain। baap kehte hain tum mere dvaara mujhe aur meri rachna ko jaanne se sab kuchh jaan jaate ho। baaki kuchh jaanne ke liye nahin rehta। itna bada imtahaan paas kar lete ho arthaat master jaani jaananhaar ban gaye। godly student sirf brahman hi hote hain। devtaayen, vaishya va shoodra koi bhi godly student nahin hote hain। bhagvaanuvaach hota hi braahmanon prati hai। agar krishna bhagvaanuvaach ho to bhi kinhon prati? zaroor brahman chaahiye। to prajaapita dvaara brahman rachte hain। roodra gyaan yagya bhi brahma hi rachte hain। krishna gyaan yagya to kabhi nahin kehte। to pahle-pahle samjhaana hai ki hamko padhaane vaala svayan parampita paramatma hai jo hi gyaan saagar hai। vahi hamaara baap teacher satguru hai, phir ismen koi ulta sulta prashn uthaane ki darkaar hi nahin। itne dher bi.ke. hain koi ek do nahin hain। pahle-pahle padhaana hi alpha hai। alpha bigar manushya kuchh bhi jaan nahin sakte। unhon ko samjhaana chaahiye ki parampita paramatma shiv brahma mukh dvaara brahman rach rahe hain। akela brahma to rachta nahin hai। yeh points dhaaran karne ki hain। baba ke paas gyaan hai to tumko delivery karte hain। tum ho gyaan gangaayen। saagar to ek hi hai। yeh brahma bhi gyaan kantha karte hain, to yeh bhi gyaan ganga hui। gyaan kantha karne vaale ko gyaan ganga kaha jaata hai। usmein mel female donon aa jaate hain। gyaan saagar to ek hi baap hai। yahaan dekho paani ke saagar ko to tukda-tukda kar diya hai। satayug mein jab ek hi sooryavanshi raajaai thi to saagar ke tukde nahin the। kahaan bhi jaakar sair kar aate the। vahaan koi kah na sake ki meri had mein na aao athva paani na lo। yahaan to ek do ka paani hi banda kar dete hain। kitne tukde ho gaye hain। ab ham ek hi sachkhanda svarga ki sthaapna kar rahe hain। baap ka bhi vichaar saagar manthan hota hai tab to samjhaate hain। brahma bhi kahenge sabhi jeev aatmaayen hamaare bachche hain। aadi dev athva Adam sabhi ka baap hai। aise nahin us samay koi manushya nahin the phir Adam ne aadmi paida kiye। nahin, niraakaar baap ko pahle zaroor Adam mein aana pade tab to mukh vanshaavli rache। baaki aise nahin koi mukh se nikal aaye va naasika ya pavan se paida hue। yeh sab hain bhakti ki baaten। manushya to kachchha-machchha ko bhi poojte rehte hain। to pahli-pahli baat hai ki aatmaon ka baap kaun hai? woh zaroor svarga rachta hoga। ab to narka hai। abhi ham svarga ke liye raajayog seekh rahe hain, parampita paramatma dvaara। brahma bhi un dvaara padh rahe hain। parampita paramatma sabhi aatmaon ka baap hai। brahma jeev aatmaon ka baap hai। ham unki mukh vanshaavli brahmaakumaar aur brahmaakumaariyaan hain। hamko gyaan phir bhi gyaan saagar baap hi dete hain। ham shreemat par chalte hain, woh to naameegraami hai। brahma ki mat mashhoor hai। aise kabhi nahin kaha jaata ki vishnu bhi utar aaye to bhi tum nahin maanenge। yeh brahma ke liye hi kaha jaata hai। unko gyaan deta hai shiv। tum bhi shreemat par chal shreshtha bante ho। baap samjhaate hain ki main aakar devta dharma ki sthaapna karta hoon। yeh jo aarya samaaji itni khitpit karte hain unko bolo tum devtaaon ko to maante nahin ho, unko khandan karne vaale ho। ham hain devi-devta dharma ke। tumhaara dharma alag, devi-devta dharma alag hai। harek ko freedom hai apne dharma mein kuchh bhi kare। musalmaanon ka dharma alag hai। woh bahut debate karte hain ki tum aise kyon karte ho। vaise hamaara dharma aadi sanaatan devi-devta dharma hai, uska hi prachaar karte hain। tum interfere kyon karte ho? unhon ko bhi yukti se samjhaana hai। unse diskash karne ki jaroorat nahin। usse woh samjhenge nahin। jo bhi koi aaye to baap ka parichay do। ham baap se varsa le rahe hain। tumko bhi lena ho to aao। baap amarlok sthaapan kar raha hai isliye tumko paavan zaroor banna pade। baap kehte hain is raavan par jeet zaroor paani hai। ham shakti sena jeet pa rahi hain। hamaara ustaad kaise hamko jeet paana sikhla rahe hain, so aao to ham tumko samjhaayen। agar tumko jeet paani hai to tum bhi shaktidal mein shaamil ho jaao। baaki phaaltu baaten mat karo। parantu yeh falak se kah vahi sakenge jinke paas gyaan ki poonji hogi। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ko kantha kar master gyaan saagar athva gyaan ganga ban patiton ko paavan banaane ki seva karni hai।

2) har ek ko bahut yukti se samjhaana hai, kisi se bhi discuss nahin karni hai। sabko baap ka parichay dena hai।

vardaan:- purity ki personality aur royalty dvaara baap ke sameep aane vaale dehi-abhimaani bhav

jaise shareer ki personality aatmaon ko dehbhaan mein laati hai, aise purity ki personality dehi-abhimaani banaae baap ke sameep laati hai। purity ki personality aatmaon ko purity ki taraph aakarshit karti hai, purity ki royalty dharmaraajpuri ki royalty dene se chhuda deti hai। isi royalty anusaar bhavishya royal family mein aa sakenge। dehi-abhimaani bachche is personality dvaara baap ka saakshaatkaar karaane vaale roohaani darpan ban jaate hain।

slogan:- harek ki visheshta ko dekhne ka chashma sada laga rahe to vishesh aatma ban jaayenge।

maateshvari ji ke anmol mahaavaakya

1) apna yeh jo eeshvareey satsang hai, common satsang nahin hai। yeh hai eeshvareey school, college। jis college mein apne ko regular study karni hai, baaki to sirf satsang karna, thoda samay vahaan suna phir to jaisa hai vaisa hi ban jaata hai kyonki vahaan koi regular padhaai nahin milti hai, jahaan se koi praalabdha banen isliye apna satsang koi common satsang nahin hai। apna to eeshvareey college hai, jahaan paramatma baith humein padhaata hai aur ham us padhaai ko poori dhaaran kar oonch pad ko praapta karte hain। jaise rozaana school mein master padhaae degree deta hai vaise yahaan bhi svayan paramatma guru, pita, teacher ke roop mein hamko padhaae sarvottam devi devta pad praapta karaate hain isliye is school mein jvaainta hona zaroori hai। yahaan aane vaale ko yeh knowledge samajhna zaroor hai, yahaan kaunsi shiksha milti hai, is shiksha ko lene se hamko kya praapti hogi! ham to jaan chuke hain ki hamko khud paramatma aakar degree paas karaate hain aur phir ek hi janma mein saara course poora karna hai। to jo shuru se lekar ant tak is gyaan ke course ko poori reeti uthaate hain vo full paas honge, baaki jo course ke beech mein aayenge vo to itni knowledge ko uthaayenge nahin, unhon ko kya pata aage ka course kya chala? isliye yahaan regular padhna hai, is knowledge ko jaanne se hi aage badhenge isliye regular study karni hai।

2) bhagvaanuvaach bachchon ke prati bachche, jab paramatma khud is srishti par utra hua hai, to us paramatma ko humein pakka haath dena hai lekin pakka sachcha bachcha hi baba ko haath de sakta hai। is baap ka haath kabhi nahin chhodna agar chhodenge to phir nidhan ka ban kahaan jaayenge! jab paramatma ka haath pakad liya to phir sookshm mein yeh sankalp nahin chaahiye ki main chhod doon va sanshay nahin hona chaahiye। pata nahin ham paar karenge va nahin, koi aise bhi bachche hote hain jo pita ko na pahchaanne ke kaaran pita ke bhi saamne padte hain aur aise bhi kah dete hain hamko koi ki bhi parvaah nahin hai। agar aisa khyaal aaya to aise na laayak bachche ki sambhaal pita kaise karega phir to maano ki gira ki gira kyonki maaya to giraane ki bahut koshish karti hai kyonki pareeksha to avashya legi ki kitne tak yoddha roostam pahalvaan hai! ab yeh bhi zaroori hai, jitna jitna ham prabhu ke saath roostam bante jaayenge utna maaya bhi roostam ban hamko giraane ki koshish karegi। jodi poori banegi jitna prabhu balvaan hai to maaya bhi utni balvaani dikhlaayegi, parantu apne ko to pakka nishchay hai aakhreen bhi paramatma mahaan balvaan hai, aakhreen unki jeet hai। shvaanso shvaans is vishvaas mein sthit hona hai, maaya ko apni balvaani dikhlaani hai, woh prabhu ke aage apni kamjori nahin dikhaayegi, bas ek baari bhi kamjor bana to khalaas hua isliye bhal maaya apna force dikhlaaye, parantu apne ko maayaapti ka haath nahin chhodna hai, vo haath poora pakda to maano unki vijay hai, jab paramatma hamaara maalik hai to haath chhodne ka sankalp nahin aana chaahiye। agar haath chhoda to bada moorkha thahra isliye paramatma kehta hai, bachche jab main khud samartha hoon, to mere saath hote tumhein bhi samartha avashya banna hai। samjha, bachche। achha। om shanti।