Daily Murli for Friday 3 March 2023

03-03-2023 praatahmurli om shanti "baapdaada"' madhuban

“meethe bachche - jab svachchha paudhon par 5 vikaaron ki mail chadhti hai tab bhrashtaachaar badhta hai, ab tumhein shreshthaachaari banna aur banaana hai''

prashn:- shreshtha banne ke liye shri shri shivbaaba ki shreshtha mat kaun si milti hai?

uttar:- shreshtha banne ke liye baap ki shreemat milti hai - bachche, kam se kam 8 ghante meri service par raho, 8 ghanta bhal us government ki service karo lekin 8 ghanta mujhe yaad karo va svadarshan chakra phiraao। saath-saath shankh dhvani karo sabko kaho ki grihastha vyavhaar mein rehte kamal phool samaan rahkar baap se varsa lo।

geet:- kisne yeh sab khel rachaaya…

om shanti। meethe-meethe bachchon ne geet suna। bachche pahle bahut hi satayug ke sukh bhogte the, bahut masta the। khushiyaan hi khushiyaan thi। sirf bhaarat hi tha aur koi khanda nahin tha। bhaaratvaasi yatha raaja raani tatha praja sab bahut maje mein the, khushi mein the। kabhi koi bhrashtaachaar nahin hota tha। satayug mein devi-devta shreshthaachaari the, jinhon ki kitni mahima gaai jaati hai! mahima yatha raaja raani tatha praja sabki hoti hai। phir maaya aakar chatakti hai। yeh bhi drama bana banaaya hai, jisko achhi reeti samajhna hai। baap ke sivaae koi samjha na sake। baap hi bhaarat aur vishwa ko sada sukhi, shaantamay banaae, sab kuchh karke phir khud chhip jaate hain। yeh kiski mahima hai? parampita paramatma ki। bhaarat mein jab svarga tha to devi-devtaaon ka raajya tha, satopradhaan tha, duhkh ka naam nishaan nahin tha। phir aadhaakalpa baad raavan-raajya hua। satayug ke devtaaon ke liye gaaya jaata hai - sampoorn nirvikaari, maryaada purushottam। vahaan to kabhi bhrashtaachaar ho nahin sakta। vahaan to shreshthaachaari the। paudhe jo svachchha the un par 5 vikaaron ki mail chadhne se bhrashtaachaar hote-hote ab poora bhrashtaachaar ho gaya hai। raaja-raani tatha praja, jo shreshthaachaari the, woh sab abhi bhrashtaachaari ban pade hain। gaate bhi hain - mujh nirgun haare mein koi gun naaheen। aap hi raham karo, O god father, raham maangate hain। devi-devtaaon ke aage jaakar kehte hain hamko aisa banaao। drama ko to jaante nahin ki woh phir aisa kab banenge? to tum shreshthaachaari the, bhrashtaachaar ka naam nahin tha। is samay sabhi manushya bhrashta ban pade hain। yatha raaja raani tatha praja, ab bhrashtaachaari se shreshthaachaari kaise ban sakte hain - yeh koi nahin jaante hain। yeh hai hi patit duniya। bhrashtaachaar hona hi hai। ab baap kehte hain jo kuchh samjho woh phir auron ko samjhaao।

baap ki mahima gaate hain apne aap sab kuchh karke apne aap chhipaaya। niraakaar bhagwan ko aana zaroor padta hai। shiv jayanti manaate hain। kaise aate hain - abhi tum bachche jaante ho। shiv hai patit-paavan, unko aana hi tab hai jab saari srishti patit ban jaati hai। usko aakar paavan banaana hai। do chaar ko to paavan nahin banaayenge na। yatha raaja raani tatha praja paavan the phir ab yatha raaja raani tatha praja patit hain। abhi to raaja raani hain nahin। jaante hain raaze log the, ab unhon ki raajaai hai nahin। British government thi to saahookaar log, jameendaar aadi dhan dete the। koi ne 20-30 hajaar diya to title mil jaata tha। baba anubhvi hai na। shivbaaba ne bhi anubhvi rath liya hai। aisa-vaisa rath thode hi lega। bade-bade raajaayen hote hain to woh ghode bahut first class rakhte hain। jaanavron mein bhi koi-koi bahut achhe hote hain। jaise oont koi bahut achhe hote hain। baitho to jaise aeroplane chalta hai। koi to aisa hota hai jo bahut dande lagaane padte hain। to barobar yeh bhaarat paanch hajaar varsha pahle svarga tha। yeh to mashhoor hai। Christian log bhi kehte hain Christ se teen hajaar varsha pahle svarga tha। to barobar kalpa paanch hajaar varsha ka ho gaya। khud hi kalpa ki aayu batlaate hain phir satayug ko laakhon varsha kehte hain। aisi-aisi points baba samjhaate hain, jo dhaaran kar doosron ko samjhaani hain, parantu samjhaate nahin।

abhi tum bachche jaante ho barobar ham shreshthaachaari the। yatha raaja raani tatha praja shreshtha the। sher bakri ikatthe jal peete the। vahaan kans, jaraasandhi, hiranyaakashyap aadi kuchh bhi nahin the। hiranyaakashyap aadi ko satayug mein aur shreekrishna ko phir dvaapar mein le gaye hain। raavan ko treta mein le jaate hain। sab asuron ke alag-alag naam de dete hain। kumbhakran aadi bhi sab asuron ke naam hain। abhi hai aasuri sampradaay arthaat aasuri mat par chalne vaale। abhi baap aakarke shreemat dete hain jisse tum brahman se devta bante ho। parampita paramatma brahma ke mukh kamal se brahman, devta aur kshatriy dharma ki sthaapna karte hain। doosra koi dharma vahaan hota nahin। satayug treta mein to doosra koi dharma sthaapan hua nahin hai। donon yug ki ej to ek jaisi 1250 varsha hai। satayug mein daivi raajya, treta mein kshatriy raajya... sooryavanshi aur chandravanshi। yeh sooryavanshi aur chandravanshi raajdhaani kisne sthaapan ki? kya aise kahenge ki chandravanshi raajdhaani raam ne sthaapan ki? sooryavanshi raajdhaani lakshmi-naaraayan ne sthaapan ki? nahin, donon hi sthaapan karne vaala parampita paramatma hai। svarga ka rachayita hai baap। satayug-treta ki raajaai rachi hai। gaaya bhi jaata hai parampita paramatma ne brahma mukh se brahman, devta aur kshatriy dharma racha। baap kehte hain yeh jo tumko gyaan sunaata hoon yeh phir praayahlop ho jaayega। islaami, bauddhi aadi jo dharma sthaapan karke gaye hain unka naam, roop, desh, kaal aadi to nahin bhoolenge। unko to sab jaante hain na। yeh devta dharma main kaise sthaapan karta hoon - yeh gyaan sab bhool jaayenge। dvaapar mein phir kitne dharma sthaapan ho jaate hain। ek hi islaami bauddhi dharma mein yeh saikdon ho gaye hain। aapas mein kitna ladte hain! abhi tum jaante ho baba kaise sab kuchh karke apne aapko chhipa leta hai। svarga mein jo devi-devtaayen the unko phir maaya aakar chatki। poore begun ban gaye hain। gaate bhi hain - mujh nirgun haare mein koi gun naaheen, tab to gunvaan devtaaon ki pooja karte hain। bade-bade raajaaon ke paas andar mahlon mein mandir rehte hain। pooja karte hain। aisa koi raaja nahin hoga jiske paas mandir na ho।

ab bachche jaante hain shivbaaba ki shreemat par chalna hai। kadam-kadam par shreemat leni hai tab hi so devi-devta banenge। parantu shreemat par bhi chalte nahin। baba kehte hain koi bhi baat mein kuchh moonjho to chitthi likhkar poochho। baap ko yaad karo। maaya aisi hai jo svarga sthaapan karne vaale parampita paramatma ko yaad karne nahin deti। baba jaante hain toofaan bahut aayenge। parantu chitthi likh poochhna chaahiye - is haalat mein kya karen? bachche ki shaadi hai - is haalat mein kya karen? koi mara hai - kya karen? mat leni chaahiye। shreshtha banna hai to shreemat par chalna hai। shreekrishna ki mat to ho na sake। shreekrishna patit duniya mein kaise aa sakta hai! shreekrishna ki aatma khud antim janma mein raajayog seekh rahi hai। sirf shreekrishna ki aatma hai kya? jo bhi devi-devta gharaane vaale hain woh brahman bane hain। kadam-kadam shreemat par chalna hai। baap kehte hain jitna ho sake baap ko yaad karte raho। tumhaare paapon ka bojha bahut hai। bhal koi government service mein hain। aath ghante government ki naukri hai, baaki jo samay hai usmein yaad karo। kam se kam aath ghanta tum meri service karo, baap ko yaad karo, svadarshan chakra phiraao, shankh-dhvani karo। kaun si? sabko kaho - grihastha vyavhaar mein rehte kamal phool samaan rah karke baap se varsa lo। baap svarga rachte hain to svarga ka varsa milna chaahiye। bhaarat hi svarga ka maalik banta hai। abhi to narka ka maalik hai। narka mein duhkhi hote hain tab baap ko yaad karte hain parantu jaante nahin ki baap kya dega। baap ke liye kehte hain sarvavyaapi hai, bhittar-thikkar mein hai। baap kehte hain - tumne kitni bhool ki hai। parantu yeh bhi drama mein noondh hai। ab unse baahar niklo। yeh bhakti aadi karte-karte tum tang ho gaye ho। abhi bhakti bhi vyabhichaari ho gai hai। maut aakar saamne khada hai to shreemat par chalna chaahiye। parantu bachche aise baap ko bhool jaate hain। maaya raavan ka raajya kaise chalta hai - yeh bhi koi jaante nahin। raavan ka but jalaate hain। yeh peechhe rivaaj nikla hai। raavan ko jalaate hain parantu har varsha raavan bada hota jaata hai। aage 10 foot ka banaate the, phir 15 foot ka banaaya, phir 50 foot... ekdam chhat jitna lamba banaate hain। buddha ka bhi bahut bada chitra banaate hain। itne bade manushya to hote nahin। jaasti mein jaasti manushya 6 foot honge। lakshmi-naaraayan bhi itne hi honge। aise nahin, vahaan aayu badi hoti to bade ban jaate hain। nahin, manushya, manushya hi hain। jaise abhi dekhte hain, bhinna-bhinna variety hai। koi kaale, koi kaise। bhaarat mein sundar bhi the, abhi shyaam bane hain। sundar banaane vaala hai baba। woh hai haseen musaaphir, woh tumse baat kar rahe hain। unko bhoolna nahin chaahiye। inko (saakaar ko) bhal bhool bhi jaao। hamesha samjho baba ham sajniyon ko khoobsoorat pareezaada banaate hain। kehte hain na ek talaav hai, jahaan dubki lagaane se manushya pari ban jaate hain। abhi tum samajhte ho gyaan saagar dvaara gyaan ki pari ban jaate hain। abhi to narka ki pari ho na। bhal kitna bhi koi fashion kare, powder aadi lagaave phir bhi hai to narka mein na। koi se bhi poochho yeh svarga hai va narka hai? kehte hain saahookaaron ke liye svarga hai। svarga-narka ko bhi jaante nahin। to shreemat ka khyaal rakhna chaahiye। shreemat ko bhi jaante nahin, jisne itna shreshtha banaaya unka naam-roop gum kar diya hai। gaate hain - tum maat-pita ham baalak tere...। ab maata kisko kaha jaata hai - yeh tum jaante ho। zaroor jismen baap pravesh kar rachna rachte hain, unko maata kahenge। yahaan tum samajhte ho ham prajaapita brahma ki mukh vanshaavli hain। shivbaaba ke potre-potriyaan hain। to baap ke bhi naam hain। beech mein baap dalaal zaroor chaahiye, jo tum potre potriyaan kahlaao, daade se varsa lo। to yeh dalaal hai, inse varsa nahin mil sakta। inko bhi varsa shivbaaba se lena hai। shivbaaba ki mat par chalna hai। tumhein brahma ke dvaara shivbaaba se varsa milta hai, parantu baba kehte hain tum inko bhi bhool jaao। shivbaaba se tumko mat leni hai। shiv jayanti manaate hain parantu bilkul jaante nahin। svarga banaane vaale baap ka yaadgaar gum kar diya hai। narka banaane vaalon ke yaadgaar rakh diye hain। din-pratidin bhrashtaachaar hota jaata hai। koi ko agar krodh aata hai to samajhna chaahiye hamaare mein yeh bhoot hai phir ham shreshthaachaari kaise kahla sakte। tumhein shreshthaachaari banne ka purushaartha zaroor karna hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki yaad aur gyaan saagar ke gyaan se sundar gyaan pari banna hai। kadam-kadam par shivbaaba ki mat zaroor leni hai।

2) shreshthaachaari banne ke liye andar se bhooton ko nikaal dena hai। koi bhi bhrashta banaane vaala kaam nahin karna hai।

vardaan:- samasyaaon roopi pahaad ko udti kala dvaara second mein paar karne vaale sahaj purushaarthi bhav

himaalay parvat jitni badi samasya ko bhi paar karne ke liye udti kala ki vidhi ko apnaao। sada apne saamne sarva praaptiyon ko emerge rakho, aur udti kala mein udte raho to samasya roopi pahaad ko second mein paar kar lenge। sirf vartamaan aur bhavishya praalabdha ke anubhvi bano। jaise sthool netron dvaara sthool vastu spashta dikhaai deti hai aise buddhi ke anubhav ke netra dvaara praalabdha spashta dikhaai de, har kadam mein padmon ki kamaai jama karte raho।

slogan:- jo sabka aadar karte hain vahi aadarsha moorta bante hain।