Daily Murli for Thursday 9 March 2023

09-03-2023 praatahmurli om shanti "baapdaada"' madhuban

“meethe bachche - tumhein baap ke occupation aur gunon sahit use yaad karna hai, yaad se hi tum vikarmaajeet banenge, vikaaron ki mail bhasma hogi''

prashn:- gyaan ki dhaarna kin bachchon ko bahut sahaj ho sakti hai?

uttar:- jinmen koi bhi puraane ulte sulte sanskaar nahin hain, jinki buddhi yaad se shuddh hoti jaati hai, unhein gyaan ki bahut achhi dhaarna hoti hai। 2- pavitra buddhi mein hi avinaashi gyaan ratna thahrenge। 3- bhojan bahut shuddh ho - baap ko sveekaar karaakar phir khaane se bhi gyaan ki dhaarna achhi hoti hai। gyaan ko dhaaran karte-karte tum murleedhar ban jaate ho।

geet:- tumhaare bulaane ko ji chaahta hai…

om shanti। aatma paramatma ko bulaati hai sirf aatma kahen to kahenge aatma to vaani se pare hai isliye kehte hain jeevaatma, paramatma ko bulaati hai। bhakton ki buddhi paramatma ke baare mein kahaan-kahaan jaati hai। kuchh bhi manushya samajhte nahin kyonki woh samajhte hain paramatma sarva-vyaapi hai to buddhi kahaan jaayen। sarvavyaapi samajhne ke kaaran kahenge sab bhagwan ke roop hain। bulaate hain parantu buddhi mein lakshya nahin hai। parampita paramatma taraph buddhi jaati nahin hai। kisi bhi jeev aatma ki buddhi mein yeh nahin aata ki ham us jyotilingam ko yaad kyon karte hain? woh hamko kya dete hain, jo ham unko yaad karte hain? jo bahut achha dekar jaate hain, unko yaad kiya jaata hai। unki yaad jindagi bhar rehti hai। koi ne paai paisa diya woh to len-den chalti hi hai। parantu samjho koi gareeb hai, unko koi makaan banaakar deve ya unki kanya ko shaadi karaane mein koi madad karta hai to saari aayu unki yaad rahegi। unke naam roop ki yaad rahegi। phalaane ne hamko makaan banaakar diya। yahaan bhi tum bachche samajhte ho baap hamko vishwa ka maalik banaate hain। manushyon ko to na aatma ka, na paramatma ka gyaan hai। aatma hai sookshm te sookshm, jiska pata nahin padta। kab andar pravesh karti hai phir nikal jaati hai, bahut maheen baaten hain। unka saakshaatkaar bhi divya drishti se hi dekh sakte hain। woh brahm kehte hain to brahm ka bhi saakshaatkaar ho padega। akhanda light hi light dekhne mein aayegi। brahm tatva to zaroor badi roshni dekhne mein aayegi। parantu paramatma koi woh cheez to nahin hai na, jo manushya samajh baithe hain। tum bachchon ki bhi buddhi mein aage ling roop rehta tha। abhi to buddhi mein hai ki woh star hai। aatma ka vahi roop hai, doosri koi cheez ho nahin sakti। paramatma bhi vahi bindi roop hai। ab lakshmi-naaraayan ki itni mahima hai, unmein kya beauty hai? aatma aur shareer donon satopradhaan pavitra hain। harshitmukh hain, gore hain। aatma to bahut sookshm cheez hai na। samjhaaya jaata hai aatma maili ho jaati hai to light kam hoti hai। yeh light kam aur jaasti ki bhi bahut maheen baat hai। ham deepak ka misaal dete hain, parantu aatma unse bhi chhota sa star hai। saakshaatkaar hota hai dekha aur gaya। ab tum baap ka simran karte ho। baap ne apna roop bataaya hai। tum jaante ho shivbaaba ko yaad karne se vikarma vinaash hote hain। bhal aur manushya shiv ko yaad karte hain parantu is gyaan se yaad nahin karte। woh jaante hi nahin। na jaanne kaaran vikarma vinaash ho nahin sakte। yeh jaante hi nahin ki ham yog lagaane se vikarmaajeet banenge। achha phir kya hoga? yeh bhi nahin jaante। tumko baap samjhaate hain yog se tum vikarmaajeet banenge। 5vikaaron ki mail bhasma hogi। samjhaani milne ke baad us khushi se yaad karenge। woh yeh nahin jaante ki baap ko yaad karne se vikarma vinaash honge। abhi baap knowledge dete hain। baaki manushya to hain andhashradha mein, jisse bhakti maarga mein alpakaal sukh milta hai।

ab unko yahaan bulaate hain, tum jaante ho bulaane ki to darkaar hi nahin। jabki paramatma ko jaante hi nahin to phir bulaate kaise? jisko yaad kiya jaata hai, unke mahatva ko, occupation ko, gunon ko jaanna chaahiye। paramatma ki pahchaan koi ke paas bhi hai nahin isliye janma janmaantar kya-kya karte aaye hain, kuchh bhi samajh nahin। ab baap baith samjhaate hain। geet mein bhi kehte hain baba aap aakar gyaan sunaao to ham sunkar phir auron ko sunaayenge। jaise shaastron mein aate mein namak hai vaise in bhakti maarga ke geeton mein bhi thoda bahut hai। yeh geet baap ki mahima mein hai baap ko bulaate hain ki aap aakar hamko sunaao to ham phir auron ko sunaayenge। aakar hamko raajayog sikhlaao phir ham murleedhar banenge। murleedhar ko hi gyaani tu aatma kaha jaata hai। tum bachche jaante ho baap to hai niraakaar। phir woh aaye kaise? abhi to samjha hai ki aatma paramdham se aati hai। pahle-pahle garbha mein jaana padta hai। jeev ki aatmaayen sab baap ko yaad karti hain, parantu unke occupation ka kuchh bhi pata nahin hai। aise hi sirf bulaate rehte hain। woh aata hi nahin। baap kehte hain main apne poore time par aata hoon jabki sangamayug shuru hota hai। sangamayug kab aata hai? jab raat poori ho din hona hota hai। sangamayug aaya aur baap bhi saath aaya। sangamayug par hi baap baith padhaate hain। yeh sab baaten tum brahman bachche hi jaante ho। baap baith samjhaate hain main niraakaar aaoon kaise। yeh to kabhi koi ne khyaal nahin kiya hai। agar kaliyug ke ant mein aaya hoga to phir se aayega na। kaliyug ant aur satayug aadi ke sangam par aate hain। zaroor kuchh kaarya karne ke liye aate hain। zaroor srishti ko paavan karne aayenge, tab kehte hain ki ab aadi sanaatan devi-devta dharma sthaapan karne aate hain। kaise aate hain, yeh bhi koi nahin jaante hain। baap ko aakar praja rachni hai va raajayog sikhaana hai to kisko sikhaayenge? satayug aadi mein to hai devta varna। iske pahle hai brahman varna। to zaroor brahma tan mein aakar brahman varna rachna pade। brahma ko kaha hi jaata hai prajaapita। ab woh brahma aaye kahaan se। kya sookshm vatan se utar aaye? jaise dikhaate hain vishnu avatran, oopar se garood par savaar ho aate hain। ab vishnu ko to yahaan aana nahin hai। vishnu ke do roop lakshmi-naaraayan jo hain unhonne bhi yahaan is padhaai se yeh pad paaya hai। vishnu ke do roop lakshmi-naaraayan hi paalna karte hain। parantu aise koi garood par utarte nahin hain aur phir vahaan lakshmi-naaraayan ki aatma koi iktthi nahin aati hai। pahle naaraayan ki aatma aayegi phir lakshmi ki aayegi। svayanvar karenge tab vishnu yugal roop kahlaayenge। raadhe krishna barobar vishnu ke do roop hain। chhotaapan bhi dikhaana pade na। yeh baaten aur koi nahin jaante hain। baap baith samjhaate hain jab yeh pahla number 84 janma poore karte hain to hamko inmen hi aakar phir inko pahla number banaana pade। 84janma bhog zaroor vriddha avastha ko paaya hoga to unka naam rakha hai brahma। inmen pravesh kiya hai।

ab tum bachche samajhte ho manushya srishti kaise aur kab rachte hain। is baat ka aur koi manushya ko gyaan ho na sake। manushya jab koi achhi nai cheez ki invention nikaalte hain to government ke paas jaate hain phir woh usko vriddhi mein laane mein madad karti hai। yeh bhi gyaan aise hai। pahle-pahle baap aaya ismen pravesh hua, inmen baith gyaan diya। pahle thoda-thoda tha ab vriddhi ko paata jaata hai। kitni guhya te guhya baaten tum sun rahe ho। pahle halka gyaan tha ab gahra milta jaata hai। parantu aatma mein puraane ulte sulte bhakti ke sanskaar jo hain woh jab niklen tab gyaan ki dhaarna ho। yog ho tab vikarma vinaash hote jaayen aur buddhi shuddh hoti jaaye। pahle thoda bhi gyaan sunne se kitna nasha chadha aur bhaage। phir kitne toot bhi pade। maaya bhi hairaan kar deti hai। ab brahma ke bachche woh ho gaye brahmaakumaar aur kumaariyaan। yeh poori reeti samjhaana hai। nahin to manushya darte hain। ab baap ko to zaroor brahma ka shareer lena pade। so bhi bada chaahiye। chhote bachche mein pravesh karenge kya? kehte hain bahut janmon ke ant ke janma ke ant mein aata hoon। isne bahut shaastra padhe hain, guru kiye hain। to anubhvi hoga na। baap kehte hain main vaanaprastha avastha mein aata hoon। shaastra aadi padhe hain tab to samjha sakte hain। ab tum bachche jaante ho kaise baba aata hai aur aakar manushya se devta banaate hain arthaat puraani duniya ko naya banaate hain। tum ko abhi naya bana rahe hain। is puraane tan mein raajayog seekh phir satayugi naya shareer jaakar lenge। phir devi-devta kahlaayenge। vahaan maaya hoti nahin। yeh tum samjha sakte ho ki ham brahmaakumaar kumaariyaan hain। brahma ko prajaapita kaha jaata hai। yeh to sab maanenge ki bhagwan ne Adam-beebi (brahma sarasvati) dvaara rachna rachi hai। geeta mein kehte hain main raajaaon ka raaja banaata hoon। shoodra se brahman banaakar gyaan amrit pilaae asur se devta banaate hain। bhal yeh likha hua hai parantu pahle shoodra varna se brahman varna mein laate hain to tum samjha sakte ho ham brahmaakumaar kumaari hain। brahma hai prajaapita। vaastav mein brahma ki santaan tum bhi ho, braahmanon ki shurooaat sangam par hi hoti hai। brahma dvaara ham brahman padhte hain। roodra gyaan yagya ki sambhaal karte hain। ham apne vikaaron ki aahuti dete hain। yagya mein sab kuchh svaaha kiya jaata hai na। to ham roodra gyaan yagya mein aur koi kichda nahin daalte, apne paapon ko svaaha karte hain। koi aag aadi to jalaai nahin jaati। na koi aavaaj aadi hi karte hain। woh to kitna aavaaj karte hain - svaaha, svaaha.... ham to yog mein rehte hain, koi aavaaj nahin। chup। yog agni se paap bhasma ho jaate hain। is roodra gyaan yagya mein yog agni se ham apne 5vikaaron ko svaaha karte hain to paap bhasma ho jaate hain। brahma ki beti sarasvati bhi gaai hui hai jisko jagdamba kehte hain, unse sab kaamnaayen poori hoti hain। woh amba phir lakshmi banti hai।

bachchon ko points to bahut samjhaai jaati hain, dhaarna bhi ho na। dhaarna tab ho jab yog mein rahen phir vikarma bhi vinaash ho, buddhi pavitra nahin hogi to avinaashi gyaan ratna thahrenge nahin। bachchon ko samjhaaya hai ki pahle bhog lagaakar phir khaaya jaata hai kyonki unka hi sab diya hua hai। to phir pahle unko yaad kar bhog lagaate hain, aahvaan kiya jaata hai। phir jaise ki saath mein milkar khaate hain। baba to hai sampoorn pavitra। ham hain jaise bheelniyaan। ham yaad karte hain to kya baba hamaare saath baith kha sakta hai। ham apne ko sampoorn pavitra to kah nahin sakte। to ham bheelniyon ke saath woh khaayenge? phir vaasna le lete hain। vaasna lena koi khaana to nahin hua na। khushbu le lete hain। haan koi 75 percent dhaarna karne vaale achhe bachche bhojan banaakar baba ko khilaayen to vaasna laayak bhi ho kyonki baba hai bilkul shuddh। woh ham patit ke saath khaaye yeh law nahin kehta। woh vaasna le sakta hoga? baba kehte hain main vaasna bhi kyon loon, main to nishkaami hoon। vaasna lene ki bhi mere paas kaamna nahin hai। main 100 percent nishkaami hoon। bhog oopar jaata hai, bahuroopi baith devtaaon ko khilaate hain। devtaayen chaahte hain ham brahma bhojan khaayen to baba mama aur phir oopar se devtaaon ki aatma aati hai, woh baith khaati hai। phir bhi roochi se tab khaayegi jab pakaane vaale yogi hon। devtaayen bhi brahma bhojan ki mahima karte hain। baap to kehte hain main aaya hua hoon tumhaari service karne। ham to tumhaara poora nishkaami servant hoon। tum bhal 36 prakaar ke to kya 108 prakaar ka bhog lagaao, bhakton ne hi bhog lagaaya aur bhakton ne hi baant kar khaaya। bhagwan nishkaami hai to bhi offer karna chaahiye। bade raajaayen aadi kabhi haath mein nahin lete hain। unmein bhi kisam-kisam ke hote hain। koi le bhi lete hain। baba ka raajaaon aadi se connection raha hai na। to ham baba ko bhog lagaate hain, kaamna hai ki ham baba se vishwa ka maalik banne raajaai leven। woh to hai hi daata। yeh saari sookshm baaten hain। bhog kahaan le nahin jaate hain। yahaan hi baith vaikuntha ka saakshaatkaar karte hain। yahaan se jaise ki gum hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap bhal nishkaami hai lekin bhojan ka bhog zaroor lagaana hai। bahut shuddhi se bhojan banaakar baba ke saath baithkar khaana hai।

2) is roodra yagya mein yogbal se apne paap svaaha karne hain। aavaaj mein nahin aana hai, chup rehna hai। buddhi ko yogbal se pavitra banaana hai।

vardaan:- nyaare aur pyaare pan ki visheshta dvaara baap ke priy banne vaale nirantar yogi bhav

main baap ka kitna pyaara hoon - iska hisaab nyaarepan se laga sakte ho। agar thoda nyaare hain, baaki phans jaate hain to pyaare bhi itne honge। jo sada baap ke pyaare hain uski nishaani hai svatah yaad। pyaari cheez svatah aur nirantar yaad rehti hai। to yeh kalpa-kalpa ki priy cheez hai। aisi priy vastu bhool kaise sakte! bhoolte tab ho jab baap se bhi adhik koi vyakti ya vastu ko priy samajhne lagte ho। agar sada baap ko priy samjho to nirantar yogi ban jaayenge।

slogan:- jo apne naam-maan aur shaan ka tyaag kar behad seva mein rehte hain vahi paropkaari hain।