Daily Murli for Saturday 11 March 2023

11-03-2023 praatahmurli om shanti "baapdaada"' madhuban

“meethe bachche - gyaan aur yogbal se puraane paapon ke khaate ko chuktu kar naya punya ka khaata jama karna hai, yogbal se ever healthy wealthy banna hai''

prashn:- sangamayug ki visheshtaayen kaun si hain, jo saare kalpa mein nahin ho sakti hain?

uttar:- sangamayug par hi 5 hajaar varsha ke baad aatma aur paramatma ka pyaara mangal milan hota hai। yahi samay hai baap se bachchon ke milne aur varsa lene ka। baap sabhi aatmaon ke liye isi samay gyaan dete hain, sabka liberator bante hain। sangamayug par hi devi-devta dharma ki sapling lagti hai, jo doosre dharma mein convert ho gaye hain woh nikal aate hain। sabhi apna-apna puraana hisaab-kitaab chuktu kar vaapas jaate hain। aisi visheshtaayen aur kisi yug ki nahin hain।

om shanti। parampita shiv naam zaroor lena hai। paramatma athva khuda, god to bahut hi kah dete hain। parantu father ka naam zaroor chaahiye। father ka naam hai hi shiv। niraakaar hai na। aatmaayen bhi vaastav mein niraakaar hain। yahaan aakar saakaar banti hain। kaha jaata hai parampita paramatma vahaan se bachchon ko athva preceptor ko bhej dete hain part bajaane। ab god father jab kehte hain to manushya ki buddhi mein laukik baap nahin aayega। woh to apne bachchon ka father hai। parantu he parampita kahne se buddhi oopar chali jaati hai। aatma hi yaad karti hai। jismaani father ko bhi aatma hi yaad karti hai, jo jisma dete hain। phir aatmaon ka jo asli baap hai unko bhi yaad karenge na। parantu woh kaun hai, kaun unko father kah bulaate hain? kyon unse raham maangate hain? woh sabka baap hai - yeh to sab jaante hain। lekin agar sab baap hi baap hain, to phir yeh pukaar siddha nahin hoti hai। kehte hain paramatma ne hi sab kuchh diya hai। yeh bachcha bhi paramatma ne diya hai। to god ko zaroor yaad karte hain। pukaarte hain aakarke hamko paavan banaao, liberate karo, in duhkhon se। to zaroor kahaan to le jaayenge na। sabhi ko liberate kar shantidham va sukhdhaam mein le jaate hain। kalpa-kalpa, kalpa ke sangamayug par hi aate hain। aise nahin beech mein aate hain। sabko le jaane tab aayenge jab naatak poora hona hai। baap kehte hain main ek hi baar aata hoon। mujhe koi ghadi-ghadi aana nahin padta hai। main ek baar aata hoon, jab sab tamopradhaan ban padte hain kyonki 84 janma to zaroor poore karne hain। agar pahle aaoon to 84 ka chakra poora ho na sake। chakra ka poora ant aana chaahiye na। jab aana hota hai tab phir bachchon ka aakar pahle-pahle baap banta hoon, phir teacher, satguru bhi banta hoon। baap janma dete hain, teacher shareer nirvaah arth shiksha dete hain aur guru kiya jaata hai sadgati ke liye। guru yahaan hi kiye jaate hain, satayug mein koi guru nahin karte hain। vahaan baap aur teacher hote hain। aise nahin ki baap teacher ban padhaate hain। baap alag, teacher alag hote hain। yahaan yeh baap, teacher, guru ek hi hai। tum bachchon ko adopt kiya hai। tum ho mukh vanshaavli, phir chaahiye padhaai। to saari srishti chakra ke aadi-madhya-ant ka raaz samjhaate hain। drama mein mukhya creator, mukhya actor kaun-kaun hain। saare vishwa ke chakra ki knowledge bataate hain। mool vatan, sookshm vatan, sthoolavtan ka saara samaachaar bataate hain। yeh saara chakra kaise phirta hai, pahle-pahle nai duniya mein kaun-kaun aate hain! pahle-pahle to bachchon ko yeh jaanna chaahiye ki woh hamaara behad ka baap hai। yeh brahma bhi kehte hain hamaara baap yeh shiv hai। brahma valda shiv। shivbaaba bhi kehte hain yeh brahma bachcha hai। mujhe inmen pravesh karna hai, to mainne inko adopt kiya। pahle inka naam asul lekhraaz tha, phir brahma naam rakha hai। mainne inko apnaaya hai। manushya baba-baba kehte hain parantu bigar jaane। shiv ke chitra ke aage jaate hain parantu woh haddi dil se samajhte nahin hain ki yeh hamaara baap hai। laukik baap ka agar koi chitra dekhte hain to jhat kahenge yeh hamaara baap hai। shiv ke aage woh haddi nahin niklega। bhal unko paramatma samajhte bhi hain parantu us roochi se haddi (jigri) nahin kahenge ki hamaara baap hai। sirf vandana karte hain bhaktimaarga ki rasam anusaar। unse praapti kya hoti hai, woh buddhi mein aayega nahin। yeh baap baith samjhaate hain। nishchay karne ke liye points to bahut dete hain parantu bachche bhool jaate hain। sabhi dharma vaalon ke liye yeh gyaan hai। chaahe military ka ho, chaahe civilian ho, gyaan sabke liye hai।

tum bachche jaante ho shivbaaba hamaara baap, teacher, satguru hai। yeh hamaara bahut puraana milan hai। paanch hajaar varsha ke baad aaye hain। ise aatmaon aur paramatma ka pyaara mangal milan kehte hain। parampita paramatma aakar sabhi aatmaon se milte hain। is samay hi sabka liberator bante hain। sabhi to shiksha nahin lenge। shiksha woh lenge jo devta banne vaale honge। manushya srishti ka itna bada jhaad hai, inse sapling lagaate hain। aaj government bhi kisam-kisam ki sapling lagaati rehti hai। baba bhi sapling lagaate hain phir jo is kul ke hain woh nikal aate hain। jo devi-devta dharma vaala va is foundation vaala hoga unka hi sapling lagta hai। tum asul devi-devta dharma ke ho phir aur-aur dharma vaalon ka bhi sapling lagega, jo convert ho gaye honge woh nikal aayenge। kisam-kisam ke musalmaan, paarsi aadi aate hain na। apne daivi dharma ke jhaad ki hi sapling lagti rahegi। ab tum bachche practical mein samajhte ho woh ek hi baap hamaara baap, teacher, satguru hai। manushya to kahenge baap ne hamko janma diya, phir phalaane teacher ne padhaaya। phir pichhaadi mein guru karte hain। koi nahin bhi karte hain। har ek ki apni-apni maanyata hai। koi na koi ka simran zaroor karte hain। baap ko yaad karenge va koi mitra sambandhi ko yaad karenge। ab tumko aur sabki yaad bhool ek baap ko hi yaad karna hai। vahi satya baap, satya teacher, satguru hai। sach khanda ki sthaapna karne vaala hai। saare srishti ke aadi madhya ant ke chakra ki history-geography bataate hain। ham svadarshan chakradhaari bane hain to zaroor chakra yaad karna pade। yeh srishti ka chakra kaise phirta hai, shuru se ant tak chakra ko jaante ho aur yeh kalpa ke sangamayug par hi jaan sakte ho। beech mein to koi jaan na sake। baap padhaate hi hain kalpa-kalpa, kalpa ke sangamayug par। saare world ki history-geography ka raaz aur koi bhi samjha na sake, baap hi samjhaate hain। baap dvaara tum svadarshan chakradhaari ban chakravarti raaza bante ho। vahaan yeh knowledge phir gum ho jaati hai। naatak poora hua phir aatma ke andar jo part hai raajaai ka, woh shuru hoga। is samay tumhaara part hai seekhne ka। baba ka aana, bachchon ko knowledge sikhlaana, oonch pad praapta karaana - abhi ka part hai। pad praapta kar liya phir khatma। phir yeh srishti chakra ki knowledge praayahlop ho jaati hai। koi bhi manushya ko is srishti chakra ka knowledge nahin hai। sannyaasi to chakra ko maante hi nahin। jhaad ko dekh kehte hain yeh to kalpana hai। to tum bachchon ko bhi dhaarna karni hai। yog poora nahin hoga to dhaarna hogi nahin। buddhi pure ban na sake। kehte hain na sherni ka doodh sone ke bartan mein hi thahar sakta hai। to yeh bhi gyaan amrit bachchon ko milta hai। bartan lohe se badalkar sone ka hoga tab hi dhaarna hogi, ismen achha purushaartha kiya jaata hai। bahut sahaj hai, world ki history-geography ko jaanna hai। satayug mein kaun raajya karte the, kitna samay kiya, gharaana hota hai na। to usko kahenge deity dynasty ne 1250 varsha raajya kiya, kya ladaai se raajya liya? nahin। abhi ke purushaartha ki praalabdha paai hai। yeh saara chakra tum kisko bhi samjhaao to bahut khush honge। bhal military ke hon, dehli mein aate the na। unhon ko bhi baba samjhaate the na ki tumne suna hai, jab geeta sunaai jaati hai to usmein bhagvaanuvaach hai - jo yuddha ke maidaan mein marenge woh mujhe praapta karenge, svargavaasi honge। parantu aise nahin ki sirf geeta padhte va sunte hain to svarga mein chale jaate hain, tumko agar svargavaasi banna hai, baap se varsa lena hai to baap ko yaad karo, shreemat par chalo। yeh gyaan abhi hi milta hai kyonki abhi svarga ke dvaar khulte hain। yeh gyaan abhi ke liye hi hai। shivbaaba ko yaad karne ki practice karni hai।

abhi behad ka baap samjhaate hain mujhe yaad karo। us guru ke badle ek shivbaaba ko yaad karna pade। mehnat hai। woh baap sabhi ka ek hi hai। us dvaara hi svarga ka varsa mil sakta hai। shanti sukh ka varsa unse milta hai। yeh samay hai hi baap dvaara baap se milne ka athva varsa paane ka। satayug mein tha hi ek dharma to anek dharma vinaash aur ek dharma ki sthaapna ka kaam parampita paramatma ka hi hai, doosra koi kar na sake। jo baap dvaara padhte hain, raazayog seekhte hain woh svarga mein chale jaate hain। tum jaante ho ab kaliyug ka ant hai। mahaabhaari ladaai bhi saamne khadi hai, jo padhenge vahi pad paayenge। baaki sab hisaab-kitaab chuktu kar vaapis chale jaane vaale hain। tumko abhi practical mein apne paapon ka khaata chuktu kar aur punya ka khaata jama karna hai। jitna-jitna gyaan aur yog mein rahenge to puraana khaata bhasma ho naya jama hota jaayega। yogbal se tumhaari aayu badhegi। tum ever healthy, wealthy bante jaayenge। gyaan aur yog se donon milte hain। yeh tumhaare liye hospital bhi hai to college bhi hai। vaastav mein sachchi-sachchi university yeh hai। government ki jo university hain unko university nahin kahenge। universe to saare vishwa ko kaha jaata hai। usmein vishwa ki knowledge koi hai nahin। woh sab hai had ki। kitni haden daal di hain। university ko hindi mein kaha jaata hai vishwa vidyaalay। saare vishwa se koi bhi aakar padhe। us university mein to aisa ho na sake। yahaan koi bhi aakar padh sakte hain। vishwa ka rachayita hi yeh vishwa vidyaalay sthaapan karte hain। ham likhte bhi aise hain। ab vishwa vidyaalay ya university mein farka kya hai। woh hindi, woh angreji akshar hai। yeh vishwa ke rachayita ne vishwa vidyaalay racha hai। jahaan baap manushya ko devta, raazaaon ka raaza banaate hain। liberate karte hain। shreemat to milti hai parantu aasuri mat vaale shreemat ko bhi maante nahin। yahaan is shreemat se kitna shreshtha bante hain। apne tan-man-dhan se bhaarat ko svarga bana rahe hain aur hai saara gupta। baba bhi gupta aate hain। shreekrishna to gupta ho na sake। parantu baap ko na jaanne ke kaaran shreekrishna ka naam geeta mein daal diya hai aur phir krishna ki dance dikhaai hai। woh to prince princess aapas mein karte honge। vahaan praja thode hi ja sakti hai। baap samjhaate to bahut hain। kehte hain gyaan dhan lekar phir daan karte jaao। badi oonch padhaai hai aur padhna bhi aise saadhaaran hai। kursi par to aasan laga na saken। yeh taang-taang par chadhaakar baithna yeh raajaai baithak theek hai। yoon to tum kaise bhi baitho। satayug mein to golden spoon in mouth hai। bachchon ne saakshaatkaar bhi kiye hain। kaise vimaanon mein sona bharkar aate hain। mahal aadi bahut jaldi sab kuchh ban jaata hai। ab bhi baba ke dekhte-dekhte bijli motor aadi kya-kya ban gaye hain। aage anaaj kitna sasta tha। to satayug mein kitna sasta hoga। yahaan sone ke sikke ki keemat 100 roopaya hai to vahaan ek paisa hogi। to kitna farka hai। to tumko ek janma ki padhaai se 21 janmon ki raazaai milti hai aur kya chaahiye। baba yuktiyaan bataate rehte hain। bachchi agar gyaan nahin leti hai to unko shaadi karaani pade। bachcha agar gyaan na leve to kahenge jaakar apna kamaao aur shaadi karo। baba raay to har baat ki dete hain। shaadi par jaana hai to sirf phal lekar shivbaaba ko yaad kar khaayenge to woh pavitra ban jaayega। achha!

baapdaada ka meethe-meethe sikeeldhe brahman kul bhooshan svadarshan chakradhaari noore ratnon prati yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se jo gyaan dhan liya hai uska daan karna hai। gupta reeti se padhaai padhkar 21 janmon ki raajaai leni hai।

2) aur sabki yaad bhulaakar ek baap ko satya baap, satya teacher aur satguru ke roop se yaad karna hai।

vardaan:- roohaani nashe dvaara duhkh-ashaanti ke naam nishaan ko samaapta karne vaale sarva praapti swaroop bhav

roohaani nashe mein rehna arthaat chalte-phirte aatma ko dekhna va aatma-abhimaani rehna। is nashe mein rahne se sarva praaptiyon ka anubhav hota hai। praapti swaroop roohaani nashe mein rahne vaali aatma ke sab duhkh door ho jaate hain। duhkh-ashaanti ka naam nishaan bhi nahin rehta kyonki duhkh aur ashaanti ki utpatti apvitrata se hoti hai। jahaan apvitrata nahin vahaan duhkh ashaanti kahaan se aai! jo paavan aatmaayen hain unke paas sukh aur shanti svatah hi hai।

slogan:- jo sada ek ki lagan mein magan hain vahi nirvighna hain।