Daily Murli for Sunday 12 March 2023

12-03-23 praatahmurli om shanti ''avyakt-baapdaada'' revise 18-01-94 madhuban

brahman janma ka aadi vardaan - sneh ki shakti

aaj chaaron or ke sarva bachchon ki sneh bhari smritiyaan samartha baapdaada ke paas sneh ke saagar samaan pahunch gai। har ek bachche ke dil mein dilaaraam samaaya hua hai aur dilaaraam ke dil mein sarva snehi bachche samaaye hue hain। sneh bahut badi shakti hai।

۰ sneh ki shakti mehnat ko sahaj kar deti hai। jahaan mohabbat hai vahaan mehnat nahin hoti। mehnat manoranjan ban jaati hai। khel lagta hai।

۰ sneh ki shakti deh aur deh ki duniya second mein bhoola deti hai। sneh mein jo bhulaana chaahe woh bhula sakte hain, jo yaad karna chaahe usmein sama jaate hain।

۰ sneh ki shakti sahaj samarpan kara deti hai।

۰ sneh ki shakti baap samaan bana deti hai।

۰ sneh sada har samay parmaatma saath ka anubhav karaata hai।

۰ sneh sada apne oopar baap ki duaaon ka haath chhatrachhaaya samaan anubhav karaata hai।

۰ sneh asambhav ko sambhav itna sahaj kar deta jaise kaarya hua hi pada hai।

۰ sneh nishpal (har samay) nishchinta anubhav karaata hai।

۰ sneh har karma mein nishchit vijayi sthiti ka anubhav karaata hai। aise sneh ki shakti anubhav karte ho na?

baapdaada jaante hain ki anek janma anek prakaar ki mehnat kar thaki hui aatmaayen hain। bhinna-bhinna bandhanon mein bandhi hui aatmaayen hone ke kaaran mehnat karti rahi hain isliye baapdaada mehnat se mukta hone ke liye sahaj vidhi ‘sneh ki shakti' sabhi bachchon ko vardaan mein dete hain। apne brahman jeevan ke aadi samay ko yaad karo। to janmate hi sabhi ko sneh ki shakti ne hi naya jeevan diya। sneh ki anubhooti ke liye mehnat ki? mehnat karni padi? sahaj anubhav kiya na। to yeh aadi janma ki anubhooti hi vardaan hai। pyaar-pyaar mein hi kho gaye। sada is sneh ke vardaan ko smriti mein rakho। mehnat ke samay is vardaan dvaara mehnat ko parivartan kar sakte ho। baapdaada ko bachchon ka mehnat anubhav karna achha nahin lagta। sneh ke shakti ki vismriti mehnat anubhav karaati hai।

۰ kitni bhi badi kaisi bhi paristhiti ho pyaar se, sneh se paristhiti roopi pahaad bhi parivartan ho paani samaan halka ban sakta hai। patthar ko paani bana sakte ho। kaisa bhi maaya ka vikraal roop va royal roop saamna kare to second mein sneh ke saagar mein sama jaao to saamna karne ki maaya ki shakti samaapta ho jaayegi। aapke samaane ki shakti chhu-mantra nahin lekin shiv-mantra ban jaayegi। sabke paas shiv-mantra ki shakti hai na ki kho jaati hai? shiv sneh mein sama jaao, sirf dubki maarkar nahin nikal aao। thoda samay smriti mein rehte ho - meetha baba, pyaara baba, dubki lagaakar phir nikal aate ho to maaya ki nazar pad jaati hai। sama jaao, to maaya ki nazar se door ho jaayenge। aur kuchh bhi nahin aae to sneh ki shakti janma ka vardaan hai। us vardaan mein kho jaao। kho jaana nahin aata hai? sneh to sahaj hai na! sabko anubhav hai na! koi hai jisko brahman jeevan mein roohaani sneh ka anubhav nahin ho? hai koi?

۰ sneh hi sahaj yog hai, sneh mein samaana hi sampoorn gyaan hai।

۰ aaj ke din ka mahatva bhi sneh hai।

amritvele se vishesh kis lahar mein lahra rahe ho? baapdaada ke sneh mein hi lahra rahe ho। sarva aatmaon ke andar ek baap ke sivaay aur kuchh yaad raha? sahaj yaad rahi na? ki mehnat karni padi? to sahaj kaise bani? sneh ke kaaran। to kya sirf aaj ka din sneh ka hai? sangamayug hai hi parmaatma sneh ka yug। to yug ke mahatva ko jaan sneh ki anubhootiyon ko anubhav karo। sneh ka saagar sneh ke heere-motiyon ki thaaliyaan bharkar de rahe hain। to apne ko sada bharpoor karo। thode se anubhav mein khush nahin ho jaao। sampanna bano। bhavishya mein to sthool heere-motiyon se sajenge। ye parmaatma pyaar ke heere-moti anmol hain, to isse sada saje sajaaye raho।

chaaron or ke bachchon ki yaad, sneh ke geet baapdaada sada bhi sunte rehte hain lekin aaj vishesh sneh swaroop bachchon ko sneh ke return mein sada snehi bhav, sada sneh ke vardaan dvaara sahaj udti kala ka vishesh phir se vardaan de rahe hain। sada jaise chhote bachche hote hain, koi bhi mushkil baat aayegi va koi bhi paristhiti aayegi to maat-pita ki godi mein sama jaayenge, aise second mein sneh ki godi mein sama jaao to mehnat se bach jaayenge। second mein udti kala dvaara baapdaada ke paas pahunch jaao to kaise bhi swaroop mein aai hui maaya door se bhi aapko chhu nahin sakegi kyonki parmaatma chhatrachhaaya ke andar to kya lekin door se bhi maaya ki chhaaya aa nahin sakti। to bachcha banna arthaat maaya se bachna। bachcha banna to achha hai na। bachcha banne ka arth hi hai sneh mein sama jaana। achha!

chaaron or ke dilaaraam ke dil mein samaaye hue bachchon ko, sada mehnat ko mohabbat mein parivartan karne vaali shaktishaali aatmaon ko, sada parmaatma sneh ke sangamayug ko mahaan anubhav karne vaali shreshtha aatmaon ko, sada sneh ki shakti se baap ke saath aur duaaon ke haath ko anubhav kar auron ko bhi karaane vaali vishesh aatmaon ko, sada sneh ke saagar mein samaaye hue samaan bachchon ko sneh ke saagar baapdaada ka yaad-pyaar aur namaste।

daadiyon se mulaakaat - aaj ke din kya-kya yaad aaya? vishesh will power ke haath yaad aaye? will power sab kaarya sahaj kara deti hai। brahma baap jyaada yaad aaya ya baap-daada donon yaad rahe? phir bhi brahma baap ki yaad ke charitra sabhi ko vishesh yaad aate rahe। brahma baap brahma bana hi tab jab baap-daada combined hue। parmaatma praveshta ke saath hi brahma ka kartavya shuru hua। is avyakt swaroop ke avyakt roop ke charitra bhi nyaare aur pyaare hain। 25 varsha ki seva ki history aadi se yaad karo, kitni teevra gati ki history hai। avyakt hona arthaat teevra gati se sarva kaarya hona। samay ka parivartan bhi fast aur seva ki vriddhi ki gati bhi fast। fast hui hai na! isliye avyakt hone se samay ko bhi teevra gati mili hai to seva ko bhi teevra gati mili hai। avyakt part mein aane vaali aatmaon ko bhi purushaartha mein teevra gati ka bhaagya sahaj mila hua hai। avyakt part mein aai hui aatmaon ko last so fast, fast so first ka vardaan praapta hai। (sabha se)

vardaan ko kaarya mein lagaao, sirf smriti tak nahin। samay pramaan vardaan ko swaroop mein laao। vardaan ko swaroop mein laane se svatah hi fast gati ka anubhav karenge। avyakt paalna sahaj hi shaktishaali banaane vaali hai isliye jitna aage badhna chaaho, badh sakte ho। baapdaada aur nimitta aatmaon ki aap sabke oopar vishesh sada aage udne ki duaaen hain। aise hai na? daadiyon ki bhi duaaen hain। sirf phaayda le lo। milta bahut hai, use kam karte ho। sirf buddhi mein kinaare rakhte nahin raho, khaao, kharcha karo। aata hai use karna, kharcha karna aata hai ki sambhaal kar rakhte ho? bahut achha, bahut achha ye sambhaal kar rakhna hai। achchhaai ko svayan prati aur doosron ke prati kaarya mein lagaao। yahaan kharchana arthaat badhaana hai। jaise aajkal ka fashion hai na, jo amoolya cheez hoti hai woh kahaan rakhte hain? (locker mein) use nahin karte, locker mein rakhte hue khush hote hain। to kai baar aise karte hain point badi achhi hai, vidhi badi achhi hai, sirf buddhi ke locker mein dekhkar khush ho jaate hain। to aap sabhi locker mein rakhte ho ya use karte ho? achha!

paandav sena ka kya haal hai? (achha hai) sirf achha-achha kahne vaale to nahin na। aisi sena taiyaar ho jo second mein jo order mile kar le। aise taiyaar hai? shakti sena taiyaar hai? shaktiyon ki seva apni hai, paandavon ki seva apni hai। paandavon ke sahayog ke bina bhi shaktiyaan nahin chal sakti, shaktiyon ke sahayog ke bina bhi paandav nahin chal sakte।

(daadi ji ne maiksiko ki conference ka samaachaar baapdaada ko sunaaya)

achha hai science vaale to kaam mein lage hi hain। prayog karne mein science vaale hoshiyaar hote hain na। to ek bhi achhi tarah se yogi aur prayogi ban gaya to bade se bade mike ka kaam karega।

(los enjilis mein bhookampa aaya hai) ye samay ke teevra gati ki nishaaniyaan samay prati samay prakriti dikha rahi hai। achha!

avyakt baapdaada ki personal mulaakaat - phal ki ichchha chhod merciful ban shubh bhaavna ka beej daalte chalo

baapdaada dvaara sarva bachchon ko is sangamayug par vishesh kaun-sa khazaana mila hua hai? khazaane to bahut hain lekin vishesh khazaana khushi ka khazaana hai। to khushi ka khazaana kitna shreshtha mila hai। to yeh sada saath rehta hai ya kabhi kinaare bhi ho jaata hai? jab anginat milta hai to har samay khazaane ko kaarya mein lagaana chaahiye na। log kinaare iseelie rakhte hain ki aaivel mein kaam mein aayega। lekin aapke paas to athaah hai। is janma ki to baat chhodo lekin anek janma yeh khushi ka khazaana saath rahega। anginat hai to use karo na। baapdaada ne pahle bhi sunaaya hai ki praan chale jaayen lekin khushi nahin jaaye isliye khushi ko kabhi bhi kinaare nahin rakho aur hi mahaadaani bano kyonki vartamaan samay aur kuchh bhi mil sakta hai lekin sachchi khushi nahin mil sakti। alpakaal ki khushi praapta karne ke liye log kitna samay va dhan kharcha karte hain phir bhi sachchi khushi nahin milti। to aise aavashyakta ke samay aap aatmaon ko mahaadaani banna hai। kaisi bhi ashaanta aatma, duhkhi aatma ho agar usko khushi ki anubhooti kara do to kitni dil se duaayen degi। aap daata ke bachche ho to pharaakhdili se baanto, baantana to aata hai na? to kyon nahin baantate ho? samay ko dekh rahe ho? dil se raham aana chaahiye। jo ashaanti-duhkh mein bhatak rahe hain vo aapka parivaar hai na। parivaar ko sahayog diya jaata hai na। to vartamaan samay mahaadaani banne ke liye vishesh merciful ke gun ko emerge karo। aapke jad chitra vardaan de rahe hain। to aap bhi chaitanya mein raham dil ban baantate jaao kyonki parvash aatmaayen hain। kabhi bhi ye nahin socho ki ye to sunne vaale nahin hain, ye to chalne vaale nahin hain। nahin, aap raham-dil bano, dete jaao। gaaya hua hai ki bhaavna ka phal milta hai। to chaahe aatmaon mein gyaan ke prati, yog ke prati shubh bhaavna nahin bhi ho lekin aapki shubh bhaavna unko phal de deti hai। aise nahin socho ki itna kuchh seva ki lekin phal to mila hi nahin। lekin phal ek jaise nahin hote। koi season ka phal hota hai, koi sada ka phal hota hai। to season ka phal season par hi phal dega na। to aapne shubh bhaavna ka beej daala, agar season ka phal hoga to season mein niklega hi। vaise bhi dekho jo kheti ka kaam karte hain, to jo season par cheez nikalne vaali hoti hai to ye nahin sochte hain ki 6 maas ke baad ye niklega isliye beej daalo hi nahin। to aap bhi beej daalte chalo। samay par sarva aatmaon ko jagna hi hai। aapki raham bhaavna, shubh bhaavna phal avashya degi। agar koi opposition bhi karta hai to bhi aapko apne raham ki bhaavna chhodni nahin hai aur hi socho ki ye opposition ya insult, gaaliyaan ye khaad ka kaam karengi। to khaad padne se achha phal niklega। jitni gaaliyaan denge, utna aapke gun gaayenge isliye har aatma ko daata ban dete jaao। achha maane to den, nahin। ye to levta ho gaye? lene ki ichchha nahin rakho ki vo achha bole, achha maane to den। nahin। isko kaha jaata hai daata ke bachche master daata। chaahe vritti dvaara, chaahe vibrations dvaara, chaahe vaani dvaara dete jaao। itne bharpoor ho na? sab khazaane hain?

double videshiyon ko dekh baapdaada double khush hote hain kyon? double purushaartha karte hain। ek to apna reeti-rasma parivartan karne ka bhi purushaartha karte hain। baapdaada dekhte hain ki umang-utsaah majority mein achha hai। agar kabhi umang-utsaah beech-beech mein neeche-oopar hota hai to aaj vidhi sunaai ki sama jaao, sneh ki godi mein chhip jaao, phir maaya aayegi hi nahin। ye to sahaj hai na। beej roop hone mein mehnat hai, ismen mehnat nahin hai। aur kuchh bhi nahin aaye lekin sneh mein samaana to aata hai ki ye mushkil hai? (nahin) to ye karo। abhi mushkil shabd nahin bolna। neeche aate ho to chhoti-si cheez badi lagti hai, oopar chale jaao to badi cheez bhi chhoti lagegi। farishte ho ya saadhaaran maanav ho? (farishta) farishta kahaan rehta hai? oopar rehta hai ya neeche? (oopar) to neeche kyon thaharte ho, achha lagta hai? kabhi-kabhi dil hoti hai neeche aane ki? nahin, phir kyon aate ho? baap ka saath chhodte ho tab neeche aate ho।

to double videshiyon ko double purushaartha ka pratyaksha phal double chance hai। iska phaayda lo। is varsha mein kya karenge? double service। mahaadaani-vardaani banenge ya khud baap ke aage kahenge shakti de do auron ko bhi shaktiyaan do। achha hai, himmat rakhne mein number le liya। abhi fast purushaartha kar aage udte chalo।

vardaan:- khushi ke khajaane se sampanna ban sada khush rahne aur khushi ka daan dene vaale mahaadaani bhav

sangamayug par baapdaada ne sabse bada khajaana khushi ka diya hai। roz amritvele khushi ki ek point socho aur saara din usi khushi mein raho। aise khushi mein rehte doosron ko bhi khushi ka daan dete raho, yahi sabse bade te bada mahaadaan hai kyonki duniya mein anek saadhan hote hue bhi andar ki sachchi avinaashi khushi nahin hai, aapke paas khushiyon ka bhandaar hai to daan dete raho, yahi sabse badi saugaat hai।

slogan:- mahaan aatmaon ka param kartavya hai - upkaar, daya aur kshama।