Daily Murli for Wednesday 3 May 2023

03-05-2023 praatahmurli om shanti "baapdaada"' madhuban

“meethe bachche - gyaan ke thande chheente daal tumhein harek ko sheetal banaana hai, tum ho gyaan barsaat karne vaali sheetal deviyaan''

prashn:- baap ne tumhein gyaan ka kalash kyon diya hai?

uttar:- gyaan ka kalash mila hai pahle svayan ko sheetal banaakar phir sarva ko sheetal banaane ke liye। is samay harek kaam agni mein jal raha hai। unhein kaam chita se utaar gyaan chita par bithaana hai। aatma jab pavitra sheetal bane tab devta ban sake, isliye tumhein har rooh ko gyaan injection lagaakar pavitra banaana hai। tumhaari yeh roohaani seva hai।

geet:- jo piya ke saath hai…

om shanti। jo baap ke saath hai uske liye barsaat hai। ab barsaat aur baap। to bhala baap ki barsaat kaise? wonder khaayenge na। duniya in baaton ko nahin jaanti। yeh hai gyaan barsaat। tumko sheetal deviyaan banaane liye gyaan chita par bithaaya jaata hai। sheetal akshar ke against hai tapat (garam)। tumhaara naam hi hai sheetal devi। ek to nahin hogi na। zaroor bahut hongi, jinhon se bhaarat sheetal banta hai। is samay sabhi kaam chita par jal rahe hain। tumhaara naam yahaan sheetla deviyaan hai, sheetal karne vaali। thanda chheenta daalne vaali deviyaan। chheenta daalne jaate hain na। yeh hain gyaan ke chheente jo aatma ke oopar daale jaate hain। aatma pure banne se sheetal ban jaati hai। is samay saari duniya kaam chita par kaali ho padi hai। ab kalash milta hai tum bachchon ko। kalash se tum khud bhi sheetal bante ho aur auron ko bhi banaate ho। yeh bhi sheetal bani hai na। donon ikatthe baithe hain na। gharbaar chhodne ki baat nahin। lekin gaooshaala bani hogi to zaroor koi ne gharbaar chhoda hoga। kislie? gyaan chita par baith sheetal banne ke liye। jab tum yahaan sheetal banenge tab hi tum devta ban sakenge। baba ne samjhaaya bhi hai jab tak tumhaare dvaara koi aastik nahin bana hai to goya naastik hi hai। aastik duniya vaale aapas mein kabhi ladte-jhagadte nahin। naastik duniya vaale ladte-jhagadte hain। naastik kisko kaha jaata hai? jo mujh apne paarlaukik parmapriy parampita paramatma ko nahin jaante hain। saari duniya mein ghar-ghar mein rola hai kyonki parampita paramatma ko bhoolne kaaran naastik ban pade hain। behad ke baap aur unki rachna ke aadi-madhya-ant ko nahin jaante। behad ka baap samjhaate hain tum naastik kyon bane ho? behad ka baap jisko god father kehte ho, aise father ko kyon bhoole ho? father ka to occupation jaanna chaahiye। woh hai beejroop, sat-chit-aanand, gyaan ka saagar, shanti ka saagar... sab shiphten (visheshtaayen) unmein hain। unki shiphten alag hain। unko hi kaha jaata hai - tum maat-pita ham baalak tere... to zaroor woh maa-baap hoga na। jab tak alpha ko nahin jaana hai tab tak seedha ho nahin sakte। yeh to jaante ho ki satayug mein bhaarat mein god-goddess ka raajya tha। lakshmi-naaraayan ko god-goddess kehte the jo devi-devta dharma vaale honge woh samjhenge ki barobar lakshmi-naaraayan is bhaarat ke pahle-pahle maalik the। paanch hajaar varsha ki baat hai। dekho, baap-teacher jab samjhaate hain to chaaron taraph dekhte hain ki bachche achhi tarah sunte dhaaran karte hain ya buddhiyog aur kahaan bhatakta hai? jaise bhakti maarga mein bhal shreekrishna ki moorti ke aage baithe honge parantu buddhi dhandhe aadi taraph dhakka khaati rahegi। ekaagrachit us chitra mein bhi nahin rahenge। yahaan bhi poori pahchaan nahin hai to phir dhaarna bhi nahin hoti hai। shiv-baba yeh maaya ko vash karne ka vasheekran mantra dete hain। kehte hain tum apne parampita paramatma shiv ko yaad karo। buddhi ka yog unke saath lagaao। abhi tumhaara buddhiyog puraane ghar ki taraph nahin jaana chaahiye। buddhiyog baap ke saath latka rehna chaahiye kyonki tum sabko mere paas aana hai। main panda ban aaya hoon tumko le chalne liye। yeh shiv shakti paandav sena hai। tum ho shiv se shakti lene vaale। woh hai sarvashaktimaan to log samajhte hain paramatma to mare hue ko jinda kar sakte hain। parantu baap kehte hain - laadle bachche, is drama mein har ek ko anaadi part mila hua hai। main bhi creator, director, principal actor hoon। drama ke part ko ham kuchh bhi nahin kar sakte। manushya samajhte hain - patta-patta paramatma ke hukm se chalta hai। kya paramatma baith patte-patte ko hukm karenge? paramatma khud kehte hain - main bhi drama ke bandhan mein baandha hua hoon। aise nahin ki mere hukm se patte hilenge। sarvavyaapi ke gyaan ne bhaaratvaasiyon ko bilkul kangaal bana diya hai। baap ke gyaan se bhaarat phir sirtaaj banta hai।

tum bachche jaante ho delvaada mandir bhi theek bana hua hai। aadi dev dilvaala hai saare srishti ki dil lene vaala। bhakton ki dil lene vaala ek bhagwan kahenge na। yeh unhon ke hi yaadgaar hain। oopar mein hai devtaaon ke chitra aur neeche raajayog ki tapasya kar rahe hain। 108 bachche aasan lagaakar baithe hain shivbaaba ki yaad mein। unhonne hi bhaarat ko svarga banaaya hai। gaandhi ji bhi kehte the nai duniya raamraajya chaahiye, parantu us raamraajya nai duniya mein to hai pavitrata। woh to kar na sake। patit srishti ko paavan banaana, yeh to baap ka hi kaam hai। koi manushya yeh kaarya kar na sake। inke liye bhi kehte hain bahut janmon ke antim janma ke bhi ant mein main pravesh karta hoon to yeh patit thahra na। jo paavan the vahi patit bane hain, phir paavan bante hain। aapehi poojya aapehi pujaari। jo pujaari bhakta bane hain, bhagwan bhakton ko hi milte hain। baaki woh jo mukti ke liye purushaartha karte hain ki part bajaane se mukta ho jaae parantu moksha kisko bhi milta nahin hai। bhagwan kehte hain - mujhe bhi moksha nahin milta। mujhe bhi service par aana padta hai। bhakton ko raazi karna padta hai, is bhaarat ko maalaamaal banaane, ganvaaya hua svaraajya phir se dene, solvent banaane mujhe bhi patit shareer mein patit duniya mein aana padta hai। anek baar aaya hoon aur aata rahoonga। bhaarat ko gul-gul banaaoonga। yeh hai hi aasuri duniya, unko daivi banaata hoon। jo jo mujhe pahchaanenge vahi varsa lenge। shivbaaba kalpa-kalpa bhaarat ko varsa dene aate hain। unki jayanti aajkal manaate nahin। calendar se holy de bhi nikaal di hai। vaastav mein to ek hi shiv jayanti manaani chaahiye aur sabki jayantiyaan manaana worth not penny hai। ek parampita paramatma shiv ki jayanti manaana worth pound hai kyonki woh bhaarat ko sone ki chidiya banaate hain। mahima us ek ki hai। manushya samajhte hain patit-paavni ganga hai phir bhi ek se raazi thode hi hote hain। sab jagah bhatakte rehte hain। siddha karte hain barobar ham patit hain। gyaan ka saagar to ek hi paramatma hai jisse tum gyaan gangaayen nikli ho। tumhaare hi naam hain sarasvati, ganga, jamuna। ganga nadi par bhi mandir bana hua hai। vaastav mein gyaan gangaayen tum ho। tum devta nahin ho। tum brahman ho। ganga ke naam par devta ka chitra bhi rakh diya hai। unhon ko to pata nahin hai। gyaan gangaayen tum shaktiyaan ho। tum ab manushya se devta ban rahi ho is raajayog se। sachcha yog yeh hai। baaki to sab alpakaal health ke liye anek prakaar ke yog sikhlaate hain। yeh ek hi baba ke saath yog lagaane se ham ever healthy bante hain। ab baap baith bhaarat ko heaven banaate hain। jab tak apne ko aatma, paramatma ka bachcha nahin samjha hai tab tak varsa mil na sake, aur sab hain brothers। bhaaratvaasi phir kah dete ham sab fathers hain, eeshvar ke roop hain। shivoham tatatvam। ab fathers jo sab duhkhi hain, unko sukh ka varsa mile kahaan se। kitna ghor andhakaar hai। yahi hai raat। gyaan hai din। yeh sab baaten samajhne ki hain।

bachche tum ho roohaani social worker। woh hain jismaani social workers। tum rooh ko injection lagaate ho ki rooh pure ban jaaye। baaki to sab jismaani seva karte hain। baap baith samjhaate hain - kitna farka hai! tum god ko yaad kar god-goddess ban rahe ho। bhagwan khud kehte hain - laadle bachche, main tumhaara gulaam bankar aaya hoon। ab main jo kehta hoon so maano। usko shreemat bhagvat kehte hain। oonche te oonch woh hai। koi kahe brahma jayanti oonch hai, bilkul nahin। brahma-vishnu-shankar ko banaane vaala, unse kaarya karaane vaala shivbaaba hai na। nahin to nai srishti kaise bane? sabse oonch jayanti hai hi trimoorti shiv ki। shiv aate hi hain brahma, vishnu, shankar ke saath। to unki hi jayanti manaayi ja sakti hai। aajkal to kutte-billi sabki jayanti manaate rehte hain। kutton ko bhi kitna pyaar karte hain! aaj-kal ki duniya dekho kya hai! kahenge - satayug mein yeh sher aadi nahin honge। kaayda nahin kehta। satayug mein manushya bhi bahut thode honge, to jaanvar aadi bhi thode hote hain। beemaariyaan bhi pahle itni thode hi thi। abhi to kitni dher beemaariyaan nikal padi hain, to yeh jaanvar aadi peechhe vriddhi ko paate hain। satayug mein gaayen bhi badi achhi hoti hain। kehte hain - shreekrishna ne gaooyen charaai। aise nahin kehte - satayug mein aisi first class gaayen thi। devtaaon ke liye vahaan heere-javaahron ke mahal hote hain aur yahaan hain thikkar-bhittar ke। yeh sab samajhne ki baaten hain। jo samajh jaayenge woh kabhi school chhodenge nahin। em object samajhne bigar koi aakar baithe to bhi samajh nahin sakenge। jahaan bhi satsang mein jaate hain vahaan em object kuchh hoti nahin। yeh to paathshaala hai। paathshaala mein to zaroor em object chaahiye na। tum em object ko jaante ho, jinki takdeer mein nahin hoga unki buddhi mein gyaan kabhi tapkega hi nahin। jeevan-mukti mein bhi thode hi aayenge। pichhaadi vaale svarga mein aa na sake। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhiyog sada ek baap mein laga rahe। puraane ghar, puraani duniya mein buddhi na jaae। aisi ekaagrachit avastha banaani hai।

2) baap ki sarva shiphten (gun) svayan mein dhaaran karna hai। har aatma par gyaan ke chheente daal unki tapat bujhaae sheetal banaana hai।

vardaan:- har aatma se aatmik atoot pyaar rakh sneh sampanna vyavhaar karne vaale saphaltaamoorta bhav

jaise baap ke prati atoot, akhanda, atal pyaar hai, shreshtha bhaavna hai, nishchay hai aise brahman aatmaon se aatmik pyaar atoot aur akhanda ho। kisi ke kaise bhi sanskaar ho, chalan ho lekin brahman aatmaon ka saare kalpa mein atoot sambandh hai, eeshvareey parivaar hai, baap ne har aatma ko chunkar eeshvareey parivaar mein laaya hai, yeh smriti rahe to aatmik pyaar atoot hone se sneh sampanna vyavhaar hoga aur sahaj saphaltaamoorta ban jaayenge।

slogan:- antarmukhi woh hai jo jis samay chaahe aavaaj mein aaye aur jis samay chaahe aavaaj se pare ho jaae।