Daily Murli for Sunday 21 May 2023

21-05-23 praatahmurli om shanti ''avyakt-baapdaada'' revise 14-12-94 madhuban

samay, sankalp, bol dvaara kamaai jama karne ka aadhaar - teen bindi lagaana

aaj baapdaada kis sabha mein aaye hain? ye saari sabha kin aatmaon ki hai? baapdaada dekh rahe hain ki har ek highest, richest hain। duniya vaale to kehte hain richest in di world lekin aap sabhi hain richest in kalpa। is samay ka jama kiya hua khazaana saara kalpa saath mein chalta hai। saare kalpa mein aisa koi bhi nahin milega jo ye soche ki is janma mein to richest hoon lekin bhavishya mein bhi anek janma saahookaar se saahookaar rahenge। aur aap sabhi nishchay aur nashe se kehte ho ki hamaara ye khazaana anek janma saath rahega। guarantee hai na? to aisa richest saare kalpa mein dekha? to aaj baapdaada apne shaahan ke bhi shaah, raajaaon ke bhi raaja bachchon ko dekh rahe hain। ek-ek din mein kitni kamaai jama karte ho? hisaab nikaalo, jama ka khaata kitna teevra gati se badhta ja raha hai? aur badhaane ka saadhan kitna sahaj hai! ismen mehnat hai kya? aapki kamaai va jama khaata badhne ka sabse sahaj saadhan hai - bindi lagaate jaao aur badhaate jaao। aap bhi bindi, baap bhi bindi aur drama mein bhi beeti ko bindi lagaana। to kamaai ka aadhaar hai bindi lagaana। aur koi maatra hai hi nahin। kya, kyon, kaise - ye question mark ki maatra, aashcharya ki maatra, kisi ki aavashyakta nahin hai kyonki master knowledgeful ban gaye। to ‘kaise' shabd ‘aise' mein badal gaya। badal gaya ya abhi bhi ‘kaise-kaise' kehte ho? ‘pata nahin' ye shabd sankalp mein bhi badal gaya? trikaaldarshi ye svapna mein bhi nahin soch sakte to mukh se to bolne ka savaal hi nahin hai। sangam par saara khel hi teen bindiyon ka hai। sabse sahaj bindi hoti ya question mark sahaj hai? bindi sahaj hai na? bindi lagaane mein kitna time lagta? second se bhi kam। bindi lagaana aata hai ki kalam khisak jaati hai? kai baar bindi ke bajaay kalam bhi lambi lakeer kheench leti hai। bindi lagaane se ek second mein aapke kitne khazaane bach jaate hain। khazaanon ki list to jaante ho na? agar bindi ke bajaay aur koi maatra lagaate ho va lag jaati hai, to socho gyaan ka khazaana gaya, shaktiyon ka khazaana gaya, gunon ka khazaana gaya, sankalp ka khazaana gaya, energy gai, shvaans saphal ke bajaay asphalta mein gaya, samay gaya! kitna gaya? lambi list ho gai na? to ye kabhi bhi nahin socho ki ek-do second hi to gaya। lekin ek second mein ganvaaya kitna? ek second bhi kitna bhaari ho gaya? har samay apne jama ka khaata badhaate chalo। kamaaya kya aur ganvaaya kya? in sabhi khazaanon mein se kitne khazaane ganvaaye? baapdaada bhi bachchon ke jama ke khaate check karte rehte hain। jab khaata dekhte hain to muskaraate rehte hain। kya dekhte honge jo muskaraate hain? amritvele milan bhi manaate, roohrihaan bhi karte, vaayde bhi bahut achhe karte ki ye karenge, ye karenge, bahut achhi-achhi baaten karte hain lekin chalte-chalte saare din mein koi na koi khazaana ganva bhi dete hain। phir aadhaar kya banaate hain? baapdaada ko bhi apni achhi-achhi baaten sunaane lagte hain। agar vyartha sankalp chala to kya ye jama hua ya ganvaaya? to phir baaten kya karte hain? sirf sankalp mein chala na vo to theek ho jaayega, baap ko bhi dilaase dilaate hain ki theek ho jaayega, purushaarthi hain na, sampoorn to nahin hue hain, ho jaayega…। to baapdaada kehte hain ki ye ga-ga ke geet saare din mein bahut sunte hain lekin ye bhi kab tak? kya ant mein sampoorn hona hai? ki bahut kaal ke abhyaas se bahut kaal ka varsa paana hai? varsa avinaashi chaahte ho? sampoorn varsa chaahte ho ki adhoora chalega? aur purushaartha mein adhoora purushaartha chalega? to purushaartha ke samay to karenge, dekhenge, banenge, kar hi lenge, ho hi jaayega... ye sochte ho aur praapti ke samay ge-ge karenge? usmein to sampoorn praapti chaahiye, sampoorn varsa chaahiye। sabhi lakshmi-naaraayan banne mein haath uthaate ho। maaloom bhi hai ki lakshmi-naaraayan ki bhi aath gaddiyaan chalengi lekin haath to lakshmi-naaraayan mein uthaate ho na? to lakshmi-naaraayan ka arth hai number one paas with honour hona। baapdaada bachchon ki himmat ko dekhkar khush bhi hote hain। raam-seeta mein koi nahin haath uthaata। himmat achhi hai aur himmat vaale ko madad bhi milti hai। sirf purushaartha ke samay bhi jaise baap ke aage sankalp karte ho vaise hi ye bol aur karma mein laao।

baapdaada ne dekha samay ke khazaane ka mahatva jitna rakhna chaahiye utna kai bachche nahin rakhte hain। ek din ka bhi chart check karen to majority ka samay vesta ke khaate mein jaata dikhaai deta hai। dvaapar kaal se vyartha sunne, dekhne aur phir sochne ki aadat na chaahte bhi aakarshit kar leti hai aur isi kaaran samay ka khazaana vesta ke khaate mein chala jaata hai। pahle bhi sunaaya ki second ka bhi kitna mahatva hai! doosri baat, majority vyartha bol mein bhi samay vesta karte hain। ek ghante ke andar bhi check karo ki jo bhi bol bola, har bol mein aatmik bhaav aur shubh bhaavna hai? bol se bhaav aur bhaavna donon anubhav hoti hai। agar har bol mein shubh bhaavna, shreshtha bhaavna nahin hai to avashya maaya ki bhaavnaayen hain। vo to anek hain, eershya, hashad, ghrina, ye bhaavnaayen chaahe kisi bhi percent mein samaai hui hoti hai। kai baar bol ke tape record baapdaada sunte hain। har ek ki automatic tape bharti jaati hai aur jis ghadi jiski bhi sunna chaahe vo sun sakte hain। har bol ka saar nahin hota। kai baar kehte bhi ho meri bhaavna, mera bhaav kharaab nahin tha, aise hi nikal gaya va bol diya lekin jis bol mein aatmik bhaav aur shubh bhaavna nahin, vo kis khaate mein jama hoga? vesta mein hua na? to kamaai ka khaata jyaada hoga ya ganvaane ka khaata jyaada hoga? ye to ganvaaya na? to bol mein bhi ganvaane ka khaata jyaada hota hai। to bol ko bhi check karo। aise hi bol diya ye bhaasha badli karo। samartha bol ka arth hi hai jis bol mein kisi aatma ko praapti ka bhaav va saar ho। agar saar nahin hai to jama ka khaata to nahin hoga na? jitna ek din mein jama kar sakte ho, to baapdaada ne dekha jitne ke hisaab se utna nahin hai। to kya karna padega? lakshmi-naaraayan to banna hi hai na? ki nahin bane to bhi harja nahin! pahle janma se lekar shreshtha praalabdha paani hai ki doosre-teesre janma se shuru karenge? pahle janma mein nahin aao, doosre-teesre mein aao, pasanda hai? nahin pasanda hai na? to itna jama ka khaata hai? agar khaata kam jama hoga to praalabdha kya khaayenge? utna hi khaayenge jitna jama kiya hai। to aaj baapdaada ne sabhi ke jama ke khaate dekhe। doosron ko samay ka mahatva bahut achha sunaate ho, sangamayug ki mahima kitni achhi karte ho! to svayan bhi sada samay ke mahatva ko saamne rakho। samay ke pahle apne shreshtha bhaagya ke aadhaar se praaptiyon ka khaata full jama karo।

sangamayug ke samay ki visheshta hai ki teenon roop ki praapti hai। ek varse ke roop mein, doosra padhaai ko source oph income kehte hain to padhaai ki praapti ke aadhaar se aur teesra hai vardaan ke roop mein। varsa bhi hai, income bhi hai aur vardaan bhi hai। praapti bahut bhaari hai, bahut badi hai! sirf sambhaalne vaale bano। varsa bhi behad hai, income bhi behad hai aur vardaan bhi behad ke hain। kabhi socha tha ki roz bhagwan ka vardaan milega? itne vardaan kisi ko bhi, kabhi bhi nahin mil sakte। lekin aap to kehte ho hamaara to adhikaar hai। varse par bhi, padhaai par bhi aur vardaan par bhi। chhoti baat nahin hai, bahut badi hai! teenon hi sambandh se teenon ke oopar apna adhikaar praapta kar liya na? sabhi fakhur se kehte hain na baap mera hai। ye kehte ho kya ki mera nahin, tera hai? hamaare liye baap padhaane aata hai ye samajhte ho na? to padhaai par adhikaar hai na? aur vardaata ke paas vardaan hai hi kiske liye? harek sochta hai ki mere liye hi vardaata baap hai। to teenon par adhikaar hai। kahne mein to bahut saadhaaran hai iseeliye to duniya vaale hansate hain ki, hain kya aur kehte kya hain? to adhikaar ko sada smriti mein rakh kadam uthaao। emerge roop mein rakho, merge roop mein nahin। hain to brahmaakumaar, hain hi baba ke... aise nahin। emerge rup mein, man mein, buddhi mein, karma mein emerge rakho। man mein ye sankalp emerge ho ki main ye hoon, buddhi mein smriti swaroop ho aur karma mein adhikaari ke nishchay aur nashe se har karma ho। aise nahin, amritvele to emerge rehta hai phir saare din mein merge ho jaata hai। nahin, sada emerge roop mein rahe। to jama ka khaata badhaao। teevra gati se badhaana, dheela-dhaala nahin karna kyonki samay aap master rachayita ke liye ruka hua hai। abhi bhi prakriti ko order karen to kya nahin kar sakti hai? agar paanchon hi tatva halchal machaana shuru kar den to kya nahin ho sakta aur kitne mein ho sakta? to samay, prakriti aur maaya vidaai ke liye intazaar kar rahi hai। aap sampoornata ki badhaaiyaan manaao to vo vidaai lekar hi jaayegi। maaya bhi dekhti hai abhi ye taiyaar nahin hain to chance leti rehti hai। prakriti ko order karen? purush taiyaar hain? prakriti to taiyaar ho jaayegi। order karen? ki gyaan sarovar taiyaar ho peechhe order karen? aise ever ready ho, ki ready ho? shaktiyaan ever ready hain? sampoorn ho gaye? thode ko to ever ready nahin kahenge na? ye socho, check karo ki agar is ghadi bhi mahaavinaash ho jaaye to apni tasveer dekho knowledge ke aaine mein, ki main kya banoonga? aaina to sabke paas hai na? clear hai na? to apne takdeer ki tasveer dekho। baap ko kya time lagega? jab brahma ke liye gaayan hai ki sankalp se srishti rach li to kya sankalp se vinaash nahin ho sakta? baap jaante hain raajdhaani chalni hai to usmein ek brahma kya karega? saathi chaahiye na? to brahma baap bhi aap saathiyon ke liye ruke hue hain। to baap bachchon se prashn karte hain, bachche to baap se prashn bahut kar chuke hain। abhi baap bachchon se prashn karte hain ki date fix karo। sabhi kaam ki date fix karte ho na? to iski bhi date fix karo, iska bhi muhoorta hona hai na। gyaan sarovar ki bhi date fix hai, hospital ki bhi date fix hai। iski date kya hai? ye kisko fix karni hai? baap ko nahin karni hai। ye baap ne aap bachchon ke haath mein diya hai। koi kaam to aap bhi karenge, ki sab baap karenge? date fix ka programme banaana। achha!

(naye bachchon ko dekhte hue) dekho, aap naye-naye bachche jo aaye hain, aap se sabka kitna pyaar hai? pahla chance aap sabko hi dete hain। sab khush-raazi hain? kitne pair prithvi mili hai? do pair ya teen pair? (do pair) do pair mein bhi raazi to ho, takleeph to nahin hai na? khaana-peena to achha mil raha hai na? mele mein aisi paalna aur koi ki ho hi nahin sakti। mele dekhe hain na? aisa brahma bhojan, aisa parmaatma parivaar kahaan milta hai? sardi lagti hai? mausam ki bhi mithaai hoti hai। to ye sardi bhi mausam ki mithaai hai, mithaai to khaani chaahiye na? sabko shaalon ki saugaat to milti hai na? koi mele mein aisi saugaat milti hai ya khaali hokar aate ho? achha nayon ki dil poori hui, madhuban dekh liya? pahle svapna mein tha, abhi saakaar mein ho gaya। kitna bhi sthaan badhaayenge lekin kam hona hi hai, kyon? socho, abhi 9 laakh jama hue hain? pahle janma ki sankhya hi taiyaar nahin hui hai। vo to honi hai na? kitne makaan banaayenge? kitne gyaan sarovar banaayenge? sabhi kehte hain sankhya badhaao। jitna sankhya badhaayenge, utni sankhya doosre varsha aur ho jaayegi to kya karenge? jitna mile utne mein raazi raho। mela bhi karna hai na? (talahti mein braahmanon ka vishaal sangathan hona hai) ye to mele mein aane nahin hain, ye to aa gaye। doosron ke liye itna bada mela pasanda hai? das hazaar soyenge! bheed nahin ho jaayegi? ye to samajhte hain hamko to chance milna nahin hai। intazaar ki ghadiyaan bhi pyaari hoti hain। ek saal ke baad jaana hai ye intazaar hota hai na? to intazaar mein purushaartha kitna achha chalta hai! aur jab hokar chale jaayenge to dekh liya, phir kya hoga? phir albelaapan aayega? nahin aayega? aur aage badhenge? ye bhi drama mein jo vidhi bani hai vo bahut hi phaayde vaali hai। ek saal mein pakke to ho jaate ho na? nahin to kachche-kachche aa jaate phir yuddha karni padti।

har saal mein aapke yahaan (madhuban mein) international mele kitne lagte hain? abhi bhi ye mela kya hai? international hai na? desh-videsh sab taraph ke hain na? duniya vaale to sochte hain international programme paanch saal mein ek kiya to bahut kar liya। aur madhuban mein kitne hote hain, pata padta hai? international mela ho gaya। aur sab khush! maza aata hai na? lekin aana tarna par। abhi to dekho das hazaar mein bhi tent to milega na? aakhir mein ye sab saadhan samaapta ho jaayenge। saare aabu ke pahaadon ko sone ke sthaan bana lo to kitne rah sakte hain? achha!

chaaron or ke highest aur richest shreshtha aatmaon ko, har khazaanon ke maalik sampanna aatmaon ko, sada svayan ko ever ready banaane vaale teevra purushaarthi aatmaon ko, sada samay, sankalp, bol dvaara shreshtha kamaai ka khaata jama karne vaale ati sameep aatmaon ko baapdaada ka yaad-pyaar aur namaste।

daadi ji se:- sab sahaj chal raha hai na? mela chal raha hai ya khel chal raha hai? santushtata ka khel chal raha hai। santushta karne vaale santushta karte hain aur santushta hone vaale santushta hote hain। ye santushtata ka khel sabhi ko pyaara lagta hai। aur sab theek hai? (talahti mein do tarna ka socha hai) pahle list dekho, peechhe do baari bhi hoga to koi baat nahin। baap bachchon ki sab aashaayen poorn karta hai। baap ko aane mein to koi takleeph nahin hai na। chaahe madhuban, paandav bhavan mein aaye, chaahe talahti mein aaye, unko aane mein koi takleeph nahin hai। takleeph to bachchon ko hai, lekin vo takleeph nahin lagti। jab bachche himmat rakhte hain ki hamaare liye takleeph nahin hai, manoranjan hai, to baap ko to tan mein hi aana hai na, bas। sangam par karna hi kya hai? mela aur khela। seva hai khel। mela manaao, seva ka khel karo, aur kya karna hai? khaao-piyo, brahma bhojan khaao। achha।

vardaan:- baba shabd ki diamond “ki''(chaabi) dvaara sarva khajaane praapta karne vaale parmaatma snehi bhav

jo parmaatma snehi bachche hain unhein baapdaada ek diamond shabd ki bahut badhiya saugaat dete hain - woh shabd hai “baba''। is chaabi ko sada saath rakho to sarva khajaanon ki praapti ho jaayegi। is chaabi ki, ki chain hai - sada sarva sambandhon se smriti swaroop rehna। saath-saath pratigya ke kangan aur sarva gunon ke shrringaar se saje sajaaye raho tab vishwa ke aage pharishte roop va dev roop mein prakhyaat honge।

slogan:- beeti ko paas karke, baapdaada ke paas (sameep) raho to paas with honour ban jaayenge।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay master sarvashaktivaan ke shaktishaali swaroop mein sthit ho sarva shaktiyon ka mahaadaan karen। duhkhiyon ki pukaar sunen, upkaar karen।