Daily Murli for Tuesday 23 May 2023

23-05-2023 praatahmurli om shanti "baapdaada"' madhuban

“meethe bachche - maat-pita ko poora-poora follow kar sapoot bano, yaad aur shreemat ke aadhaar par hi baap ke takhtansheen banenge।''

prashn:- kis purushaartha se second mein jeevanmukti praapta ho sakti hai?

uttar:- purushaartha karo antakaal mein ek baap ke sivaae doosra koi bhi yaad na aaye। iske liye buddhi ko grihastha vyavhaar mein rehte bhi nyaara rakho, sab kuchh bhoolte jaao, shreemat par chalte raho। kisi ko bhi kaanta nahin lagaao। har kadam mein maat-pita ko follow karo। koi bhi kami hai to avinaashi surgeon ko sach-sach batlaao।

geet:- nai umar ki kaliyaan…

om shanti। bachchon ko is geet ka arth samjhaate hain। yeh jo mahima karte hain is desh mein janmi thi seeta..... yoon to vaastav mein mel aur female sab seetaayen hain kyonki sab bhaktiyaan hain, bhakti karne vaale, bhagwan ko yaad karte hain। yeh sajniyaan saajan ko yaad karti hain। kislie? phool banne liye। kehte bhi hain na - kamalphool samaan rehna hai। ab tum jaante ho - ham aatmaon ka baap paramatma hai। unse svarga ka varsa milna hota hai, jisko jeevan-mukti kaha jaata hai। jeevanmukti ka varsa zaroor milega satayug ke liye, kaliyug ke liye nahin। nai duniya shuru hoti hai goya naatak naya shuru ho jaata hai। duniya puraani hai to naatak bhi puraana ho jaata hai। ab yeh hai puraani duniya। nai duniya mein lakshmi-naaraayan jaise phool the। abhi tum jaante ho ham kaanton se phool ban rahe hain - svarga ka maalik banne liye। kaanta ve hain jo ek do ke oopar kaam kataari chalaate hain। tumko nishchay hai ham aatmaon ka baap aaya hua hai phir se sada sukhi svarga ka maalik banaane। is nishchay mein gadbad nahin honi chaahiye। baap ne aakar inko (daada ko) bhi samjhaaya hai। yeh kehte hain barobar ham nahin jaante the। ham pahle satayug mein dharmaatma the। dharmaatma unko kaha jaata hai jo kaam kataari nahin chalaate। dharmaatma sirf unko nahin kehte jo daan-punya karte hain। manushya jo kuchh karte unka phal doosre janma mein milta hai। woh indirect daan karna hai। eeshvar arth daan karte hain। jaise koi krishna arth bhi karte hain। parantu shreekrishna ko geeta ka bhagwan samajhne kaaran munjhaara kar diya hai। bhagwan kehte hain - main bhaarat mein hi aaya hoon। tum bachche jaante ho - hamaara baap paramdham se aaya hai। hamko kehte hain - bachche, ab naatak poora hota hai, mujhe yaad karo। tum hi so lakshmi-naaraayan the। treta mein hain raam-seeta... shreekrishna ka yug to koi alag nahin hai। unhonne dvaapar mein daal diya hai। yeh phir bhi hoga। baap baith bachchon ko shaastron ka saar samjhaate hain। mainne koi geeta aadi haath mein nahin uthaai hai। mujhe to gyaan ka saagar kehte hain। mujhe bhakta aise bhi kehte hain sat hai, chaitanya hai... manushya jo bahut ved-shaastra aadi padhte hain, unko shaastron ki authority kaha jaata hai। ab yeh ved-shaastra aadi kahaan se shuru hue? bhakti maarga se। yeh drama anaadi bana hua hai। aise nahin ved-shaastra anaadi kahenge। agar anaadi kahen to satayug se lekar kaha jaaye। satayug mein to ved-shaastra hote nahin। yeh to bhakti maarga se shuru hote hain। ab baap ki buddhi mein hai ki main gyaan ka saagar hoon। is manushya srishti ko main hi jaanta hoon। baap aakar apna parichay dete hain। yeh srishti chakra kaise phirta hai, 84 janma kaise bhogte hain। tum jaante ho ham 84 janma sato, rajo, tamo mein part bajaate hain।

abhi baap ne aakar brahma dvaara yeh yagya racha hai। shivbaaba dvaara ham brahma ke bachche bane hain। to woh daada ho gaya। vahaan to hai hi baap ka varsa। aadhaakalpa se tum chaahte the - mukti-jeevanmukti ka varsa। yeh nahin jaante the ki baap bhakton ke paas aayenge, kya karenge। kehte hain bhagwan ghar baithe aa jaaye। so to bade ghar mein aayenge na। tumhaare liye to apna ghar chhota hai। yeh hai behad ka ghar। na jaane kab bhagwan bhakton ke paas aa jaaye। bhagwan to zaroor bhakton ke liye aayenge। bhakta bhagwan ke bachche thahre। aise nahin, bhagwan sab bhakton mein hai, sab bhagwan hain। nahin। baap direct baith samjhaate hain ki main aaoonga zaroor, aakar bachchon ko sukh doonga। manushya vilaayat se aate hain to badi wonderful saugaat laate hain। baap kehte hain ki main tumhaare liye vaikuntha saugaat laaya hoon। vahaan vish nahin milega। is gyaan amrit peene se tum svarga mein ja sakte ho। to zaroor jahar chhodna padega। main koi sanyaasiyon-udaasiyon misal pustak nahin uthaata hoon। main to shantidham-sukhdhaam ka maalik banaane liye raasta bataata hoon। he mere laadle bachchon, pardeshi baap aatmaon se baat karte hain। aur koi aise nahin kahenge ki main paramatma hoon, tum aatmaon se baat karta hoon। woh to kehte aham paramatma tat tvam। baap, baap ko varsa denge kya! baap zaroor bachchon ko varsa denge। tumhaari kitni vishaal buddhi bani hai। baap aakar buddhi ka taala kholte hain। buddhi mein mool vatan, sookshm vatan yaad hai। yeh hai sthool vatan। tum ab ban gaye ho trikaaldarshi। teenon lokon, teenon kaalon ko jaante ho। yeh hain detail ki baaten। nutshell mein to hain hi do baaten - baap aur varse ko yaad karna hai। yaad ke chart par hi madaar hai। ghar mein raho, yukti se chalo, baap aur varse ko yaad karo। chart rakho - ham kitna samay yog mein rahe? baap ko yaad karne se varsa zaroor milta hai। baap to bahut sahaj kar batlaate hain। parantu koi yaad kare bhi na। maaya ekdam bhula deti hai। koi-koi baandheli bachchiyaan aisi achhi hain jo ghar mein rehte bhi kai mahaarthiyon se achha yog mein rehti hain। shivbaaba ko bahut yaad karti hain - shivbaaba humein duhkh se chhudaao। jaante hain - shivbaaba se hamko svarga ki raajaai milti hai। ghar mein yaad karte-karte agar praan tyaag den to bhi bahut achha pad mil sakta hai। “mera to ek doosra na koi'' - isi nishchay se beda paar ho jaae। kitni maar khaati hain! aisa satsang to kabhi nahin dekha hoga jahaan striyaan maar khaati। satsang mein jaane se koi mana karte hain kya? dher satsang hain। yahaan to ablaaon par kitne atyaachaar hote hain, vighna padte hain! shuru se lekar chalta aaya hai। akaasur, bakaasur kaise le jaate the bachchon ko, vish ke liye maaren kitni khaati thi! koi to baat hogi na। achhe-achhe bachche bhal centres bhi kholte hain phir bhi chalte-chalte maaya ka vaar ho jaata hai। baap to dharmaraaj bhi hai। kehte hain - main kaalon ka kaal hoon। amritsar mein ek akaal takhta hai, iska arth koi samajhte nahin hain। baap kehte hain - main kaalon ka kaal bhi hoon। woh jamghat to ek do ko le jaate hain। baap kehte hain - main to sab aatmaon ko le jaaoonga isliye khush hona chaahiye। aadhaakalpa se bhakti ki hai parantu vaapis koi bhi ja nahin sakte। abhi aap sabhi ko le jaate ho।

manushya kehte hain - bhagwan kaalon ka kaal hai jo sabhi ko maar daalte hain। parantu main maarta nahin hoon। main to tumhein shareer se mukta kar, aatma ko gul-gul banaae vaapas le jaata hoon, ismen darne ki to baat hi nahin hai। bahut bachche marne se darte hain। darte woh hain jinka poora yog nahin। are, ham to taiyaari kar rahe hain vaapas jaane ki। baba aaya hai taiyaari karaae le chalne liye, to tum svargavaasi nahin banenge? kehte hain - phalaana svargavaasi hua। parantu jaate koi bhi nahin hain। svarga to bhaarat mein hota hai। woh tha satayug। kaliyug mein svarga kahaan se aaya। akhbaar mein daalte hain phalaana vaikuntha gaya, unko shraadh khilaate hain। ab vaikuntha mein to athaah vaibhav hain phir tum unko kya khilaayenge। unki to sadgati ho gai to phir yahaan ka bhojan khilaae patit kyon banaate ho। abhi tum bachche jaante ho sach-sach tumko nirvaandhaam jaane liye baba shiksha dete hain। khushi se jaana chaahiye। puraane kaanton se sambandh todna chaahiye। baap kitna sahaj kar batlaate hain, sirf mujhe yaad karo ismen to bahut khushi honi chaahiye। baap kehte hain ateendriy sukh poochhna ho to mere bachchon se poochho। abhi ke purushaartha se 21 janmon ki praalabdha banaate hain। ab nahin liya to khalaas। race badi bhaari hai। sabko purushaartha karna chaahiye। baap kehte hain - bachche, hamaare oopar jeet praapta karo। baba, mama, baapdaada, pitaashri kehte ho na। yeh baba bhi unse padh raha hai na। shivbaaba padhaate hain। yeh grihastha dhandhe aadi vaala tha na। aise khyaal nahin aana chaahiye - main peechhe aaya hoon, isliye daudi nahin laga sakta hoon। maa-baap kehte hain - sapoot bachcha woh jo follow kare। yeh maa-baap bhi purushaarthi hain। purushaartha karaane vaala hai maat-pita। tum maat-pita ham baalak tere.. to yeh bhi unka baalak hua na। yeh bhi grihasthi tha, tum bhi grihasthi ho। hai bada sahaj। ismen bhi kanyaaon ka to aho saubhaagya hai, unko jhat bacha lete hain। 5 vikaaron ki seedhi nahin chadhna hai। baal brahmachaari bheeshma-pitaamah ka misaal hai na। yeh raajayog hai। tum jaante ho ham bhavishya raajaai paane liye purushaartha kar rahe hain। mama-baba bhi purushaartha kar oonch te oonch pad paate hain। kalpa pahle bhi unhonne paaya tha। kehte hain - laadle bachche, tum hamaare takhta ka maalik banne liye purushaartha karo। mama-baba kehte ho to kyon nahin purushaartha karte ho, koi takleeph ho to baba ko bataao। is kaaran purushaartha kam chalta hai। baap hai avinaashi surgeon। baaki koi bhi takleeph ho to chaahe likho, chaahe sammukh aakar poochho। baap raay denge। mukhya baat hai baap aur varse ko yaad karna। nutshell mein yeh kaaphi hai। second mein jeevanmukti paane ka purushaartha karte-karte itna yaad karna hai jo ant kaal aur kuchh yaad na aaye। grihastha vyavhaar ko bhoolte jaao। kehte hain manzil to badi hai aur vishwa ka maalik banna hai। ladaai mein kitni mehnat kar had ki baadshaahi lete hain। tum to svarga mein vishwa ke maalik bante ho aur kya chaahiye। itna meetha baap duniya mein aur koi hota nahin। parantu is baap ke naam, roop, desh, kaal ko bhool gaye hain। barobar shiv ham aatmaon ka baap svarga ka rachta hai to svarga ka hi varsa dete honge na, yeh bhool gaye hain। kisko second mein bhi teer lag sakta hai। barobar behad ka baap hai, varsa dene aaya hai। creator hai। kiska? kya narka ka? aise to kabhi nahin kahenge। baap to svarga ka maalik banaane vaala hai। bas, ham to jhat jaakar unka haath pakadte hain। boodhe saadhaaran tan mein aaya hai। baap kehte hain - sab bachche besmajh pujaari patit ban pade hain। main aakar pujaari se poojya banaata hoon। yeh bhi pujaari tha। naaraayan ki pooja karta tha। chitra mein dikhaaya hai - lakshmi unke paanv dabaati hai। baap koi aise thode hi kehte hain ki charan dhokar piyo। baap kehte pahle lakshmi, peechhe naaraayan। to jo lakshmi banti hai, unka main paanv dabaata hoon। boodhi maataaon ko kehte tumne aadhaakalpa kitne dhakke khaaye hain। pahle avyabhichaari bhakti thi, ab vyabhichaari bhakti ban padi hai। thak gaye hain। baap ko sankalp utha - main jaakar nai srishti rachoon। baap to jaani jaananhaar hai। kehte hain - in bichaaron ne aadhaakalpa bhakti ki hai। ab bilkul thak pade hain। maut bhi bada kada hai, ek do ko khatma kar denge। baap hai knowledgeful। parantu kehte hain - main bhi bandhan mein baandha hua hoon। jaanta hoon - bachche bahut duhkhi hain। in par 5 vikaar aakar chatke hain। unko ab khaatiri dete hain। tumhaare sukh ke din aa rahe hain। abhi tum shreemat par chalo to shreshtha te shreshtha banenge। baap hai oonch te oonch। baaki sab hain rachna। brahma, vishnu, shankar ko paramatma nahin kahenge। supreme soul ek hi baap hai। brahma, vishnu, shankar - woh hue sookshmavtanvaasi। chitron mein brahma, vishnu, shankar ke aage shivling rakhte hain kyonki bachche hain na। yeh bhi woh nahin jaante। abhi tum bachchon ko divya drishti mili hai। tumko to bahut harshit rehna chaahiye। ham saare srishti ke aadi, madhya, ant ko jaante hain। baap se svarga ka varsa le rahe hain। sirf baap ko yaad karte hain। grihastha vyavhaar mein rehte hain, ismen koi chhodne ki baat nahin। pahle to gaooshaala banaani thi। nahin to yeh kaise hoshiyaar ban sakte। paandavon ko desh nikaala mila tha, to yeh gaooshaala bani na। ab tum samajhte ho ham kaanton se phool ban rahe hain। kyon na ham baba-mama ke takhta par baithen। baba bhi kehte hain follow kar nambarvaar takhta par baitho। apni dil se poochhna hai - ham baba ko yaad karte hain? raat ko hamesha potaamel dekho। saare din mein athva savere uthkar kitna samay baap ko yaad kiya? baap ko yaad kar shreemat par chalna hai। ek do ko kaanta nahin lagaana hai। kaam-krodh hai mukhya। inko jeeto to doosre chhote-chhote vikaar thande ho jaayenge। kaam mahaashatru hai। kaam ke kaaran ladaai-jhagde maaraamaari kitna karte hain। kehte hain - baba, bachche bahut ashaanta karte hain। svarga mein to kabhi koi kisi ko tang nahin karte। vahaan bachche bhi tang nahin karenge isliye ab baap aur svarga ke sukh ko yaad karo। bas, ab ham chale sukhdhaam। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maat-pita ke takhta ko jeetne ki daud lagaani hai। poora follow karna hai।

2) puraane koton se sambandh tod “mera to ek doosra na koi'' is nishchay mein pakka rehna hai।

vardaan:- har gun va shakti ko apna swaroop banaane vaale baap samaan sampanna bhav

jo bachche baap samaan sampanna banne vaale hain woh sada yaad swaroop, sarvagun aur sarva shaktiyon swaroop rehte hain। swaroop ka arth hai apna roop hi woh ban jaae। gun va shakti alag nahin ho, lekin roop mein samaaye hue hon। jaise kamjor sanskaar ya koi avgun bahutkaal se swaroop ban gaye hain, usko dhaaran karne ki mehnat nahin karte। aise har gun har shakti niji swaroop ban jaae, yaad karne ki bhi mehnat nahin karni pade lekin yaad mein samaaye rahen tab kahenge baap samaan।

slogan:- “baba'' shabd hi sarva khajaanon ki chaabi hai, ise sada sambhaalkar rakho।