Daily Murli for Wednesday 24 May 2023

24-05-2023 praatahmurli om shanti "baapdaada"' madhuban

“meethe bachche - sachchi shanti ki anubhooti karne ke liye is shareer se detach ho jaao, jab chaaho shareer roopi baaja bajaao aur jab chaaho isse nyaare ho jaao''

prashn:- pyaar ke saagar shivbaaba ke pyaar ki kamaal kaun si hai?

uttar:- pyaar ka saagar shivbaaba bachchon ko pyaar se shiksha dekar aap samaan ati meetha, ati pyaara bana dete hain। unke pyaar ki kamaal hai jo tum poojya lakshmi-naaraayan samaan ban jaate ho jinke deedaar ke liye manushyon ki aaj bhi bheed lagti hai। baap aaye hi hain bachchon ko manushya se devta, pujaari se poojya banaane।

geet:- tu pyaar ka saagar hai…

om shanti। is samay tum bachchon ko gyaan ka teesra netra mila hai arthaat aatma ki okh khuli hui hai। trinetri kaha jaata hai na, isko teejri ki katha bhi kehte hain। vaastav mein hai ek hi naam ‘raajayog' raajaai praapta karne ke liye। raajaai praapta karaane vaale se aur raajaai se yog - iska hi akshar hai manamnaabhav, madhyaajeebhav। mujhe yaad karo, apne swaroop ko yaad karo। baap ne koi sanskrit mein geeta nahin sunaai hai। bachche jaante hain baap kya samjhaate hain aur shaastron mein kya hai। baap pyaar ka saagar to zaroor hai tab to pyaare te pyaari vastu ko yaad kiya jaata hai na। baap bhi jaante hain bachchon ko jaakar sada sukhi banaata hoon। yeh daada to bada sukhi tha, inko koi duhkh nahin tha। parantu yeh nahin jaante the ki baap kya aakar sukh dete hain। abhi tum anubhvi bante jaate ho। baap aakar sada sukhi, sada shant banaate hain। sukh hota hi hai sampatti se। baap aakar varsa dete hain। koi dhanvaan bhi hote hain bachchon ko varsa dete hain, sukhi banaate hain। parantu shanti to de na sake। shanti to sab chaahte hain। sannyaasi bhi kehte hain man ki shanti chaahiye kyonki man-buddhi hai aatma ke andar। to kehte hain man ki shanti kaise ho। baba ne samjhaaya hai poochho aatma ko ashaanta kisne kiya hai? vo log to kah dete hain aatma duhkh-sukh se nyaari, abhokta, asochta hai। yeh nahin jaante man-buddhi aatma ke organs hain। baap samjhaate hain ashaanta maaya karti hai। aatma ka svadharma hai hi shant। baaki yeh organs hain। parantu shanti mein kahaan tak baithe rahenge। sannyaasiyon ka to hai hi hathayog, andar khadde mein chale jaate hain। yahaan to sahaj reeti baap baith knowledge dete hain। karmayog hai na। yoon to shanti raat ko bhi milti hai। achha, ham aatma in organs se kaam lete va nahin lete - yeh to hamaare haath mein hai, main baaja nahin bajaata hoon। apne ko detach samjho, ismen okh moondane ki bhi darkaar nahin। aatma in okhon se dekhti rehti hai। aatma ko okhen mili hain dekhne ke liye। baaki jabaan se kaam nahin leta hoon। aise hi baith jaata hoon। parantu sirf baith jaane se koi bhi faayda nahin। faayda hai hi baap ko yaad karne se। jab tak sarvashaktimaan se yog nahin to koi faayda ho nahin sakta। yog ko hi agni kaha jaata hai। inko yuddha ka maidaan bhi kaha jaata hai। maaya par jeet paane ka maidaan hai। yog se tumhaari aayu bhi badhti hai। vikarma bhi vinaash hote hain। badi khushi hoti hai। baba ko yaad karte-karte baba ke paas chale jaayenge। hai to sab drama, parantu baap har ek baat samjhaate hain। baap ko yaad karte raho, saath-saath service bhi karni hai kyonki tum hathayogi to nahin ho। organs mile hain kaam karne ke liye।

tum jaante ho aatmaayen pahle satopradhaan rehti hain। phir sato rajo tamo mein aati hain। abhi shuru se lekar sab tamopradhaan hain। koi-koi achhi aatma hogi to naam baala rehta hai। parantu pichhaadi vaalon mein taakat kam rehti hai। pahle aatma mein taakat jaasti rehti hai। to behad ka baap hai pyaar ka saagar। kitna kheenchata hai। dekho, yeh lakshmi-naaraayan kitne kheenchate hain। unhon ko kisne itna meetha banaaya? koi nahin jaante। jo khud poojya the, vahi pujaari bane hain। tumhaare mama-baba woh bhi nahin jaante the। abhi jaanne se jaag uthte hain। oho! ham so devta hain। bhagwan baith jagaate hain। maaya par jeet paane ki yukti batlaate hain। baaki aur koi hathiyaar aadi nahin hain। manushya yeh bhi nahin jaante hain ki maaya kisko kaha jaata hai। bilkul hi besmajh hain। aise pattharbuddhi banen tab to baap aakar paaras-buddhi banaayen। lakshmi-naaraayan most beloved hain। is samay sab hain tamopradhaan। paramatma ko na jaanne ke kaaran thikkar-bhittar ko yaad karte rehte hain। brahma, vishnu, shankar ko bhi nahin jaante hain। woh hain sookshm vatan vaasi। lakshmi-naaraayan aadi ko daivi gun vaale manushya kahenge। shreekrishna daiveegun vaala tha, satayug aadi mein। shreekrishna ko bahut pyaar karte hain, jhulaate hain। agar shreekrishna peechhe dvaapar mein aaya to shreeraam ko bhi jhulaana chaahiye। parantu raam ko kabhi aise jhulaate nahin hain। tum jaante ho aatma ek shareer chhod yeh bhaagi doosre shareer mein। deri nahin lagti hai। sabse teekhi daudi pahanne vaali aatma hai। second bhi nahin lagta hai, isse teekha roohaani rocket koi hota nahin। baaki ve sab hain jismaani cheezen।

tu pyaar ka saagar hai। yeh ek ki mahima gaai jaati hai। zaroor kuchh kiya hai na, tab to mahima gaate hain na। ab tum bachche jaante ho - shivbaaba bahut pyaar ka saagar hai। kamaal hai baba ke pyaar ki, shiksha dekar aisa lakshmi-naaraayan bana dete hain, woh bhi kitne pyaare hain, unka deedaar karne ke liye kitne manushya jaate hain। shreenaath dvaare mein deedaar ke liye soten (dande) lagte rehte hain। kitni bheed ho jaati hai। baba kehte hain tum bachchon ko bhi itna meetha, itna pyaara banaata hoon! tum so devi-devta the। ham so, so ham kehte hain na। vaastav mein hai so ham, ham so। so ham baba ke bachche the, so ham devi-devta the phir so ham kshatriy bane। baaki aatma so paramatma, paramatma so aatma aisi baat nahin hai। so ham aatma poojya devi-devta the, phir 84 janma lete hain। so ham devta the, phir do kala kam ho gai, kshatriy bane, phir vaishya bane aur do kala kam hui, isko kaha jaata hai svadarshan। ek second lagta hai is chakra ko phiraane mein। abhi phir so ham eeshvar ki santaan bane hain - yeh nasha chadhna chaahiye isliye gaaya jaata hai ateendriy sukh poochhna ho to gopi vallabh ke gop-gopiyon se poochho। abhi ham so phir se aakar baba ke bane hain। ham so phir devta banenge। ham so kal raat mein the, aaj din mein hain। gaaya bhi jaata hai - gyaan anjan satguru diya, agyaan andher vinaash......। ham bilkul tamopradhaan the, ab baap hamko kya banaate hain, kitni shauk se paalna karte hain। baba ko gaali bhi bahut khaani padti hai। parantu samajhte hain yeh bhi drama hai। nothing new। yuddha ke maidaan mein mehnat to zaroor karni hai। aise nahin bigar mehnat koi raajaai mil jaayegi। student aise thode hi kahenge ki master ji aasheervaad karo। achha number paane ke liye to purushaartha karna hai। yeh godly college hai। bhagvaanuvaach - main tum bachchon ko raajaaon ka raaja banaata hoon, iska arth bhi koi samajh nahin sakte। to behad ka baap bachchon ko vishwa ka maalik banaate hain। capital (raajdhaani) yahi jamuna ka kantha dehli hai। capital bahuton ke haath mein aai hai। ab to thikkar-bhittar ki dehli hai। phir to banegi sone ki। baaki aise nahin, sone ki dvaarika neeche gai phir nikal aai। lanka koi aur nahin, is samay yeh saari duniya lanka hai। raavan ka raajya chal raha hai। sab sajniyaan shok vaatika mein baithi hui hain। vahaan hoti hai ashok vaatika। yahaan to kadam-kadam par shok duhkh hai। baba aakar bahut meetha banaate hain। kehte hain meethe-meethe bachchon kabhi kisko duhkh nahin dena hai। sukh-shanti ka daata ek hi baap hai। woh aakar sukh-shanti ka varsa dete hain, to shreemat par chalna pade। dhandhaadhori se jitna samay mile baap ko yaad karo। pavitrata ka bal chaahiye, jisse nirogi kaaya paayenge। bhaarat ke praacheen yog ki bahut mahima hai। jab samay aata hai tab baap khud hi aakar knowledge dete hain। manushya to de nahin sakte hain। aise bahut sannyaasi baahar mein jaate hain, kehte hain bhaarat ka pracheen yog sikhaane aaye hain। parantu woh koi raajayog nahin sikhaate। yeh bhi drama mein noondh hai। bhaarat ka praacheen raajayog hai। baap kehte hain main aata hi hoon kalpa ke sangamayuge। unhonne sangamayug akshar nikaal yuge-yuge kah diya hai। baap samjhaate hain satayug-treta ka sangam hota hai, do kala kam hoti hai। kaliyug mein to bilkul hi kalaayen khatma ho jaati hain। tum in varnon mein aate ho - devta varna, kshatriy varna.....। tum bachche yathaartha reeti samajhte ho ki yeh saara khel hai। bhaarat par hi haar aur jeet ka khel hai। maaya haraati hai aur baap aakar jeet pahnaate hain। yeh koi nahin samjhaate hain ki maaya ne ashaanta kiya hai। ab baba kehte hain tumne shanti ka haar ganvaaya hai। ab phir vahi shanti ka haar main tumhein pahnaata hoon, jisse tum ever shant ban jaate ho। yeh svadarshan chakra bhi andar phirna chaahiye। baahar mein shankh bajaayenge to raaja-raani ban jaayenge। aur kuchh karna nahin hai। ati sahaj hai। baap ki pahchaan mili, baba hamaara svarga ka rachayita hai। barobar ham svarga ke maalik the। ab phir se baba aaya hai svarga ka maalik banaane। bas, baba abhi to aapke hain, doosra na koi। geeta mein shreekrishna ka naam daalne se kah dete hain - mera to girdhar gopaal doosra na koi... samajhte hain shreekrishna hi bhagwan hai। sab ek hi ek hain। bhagwan ko na jaanne ke kaaran naastik ban gaye hain। abhi tum baap ko jaanne ke kaaran aastik ban gaye ho। woh hai vinaash kaale vipreet buddhi। vipreet buddhi maana paramatma se preet nahin hai। baap hai pyaar ka saagar, shanti ka saagar, sukh ka saagar - unki bahut mahima hai। aise nahin, yeh brahma, vishnu, shankar sab ek hi bhagwan hain। naaraayan bhi bhagwan hai, raam bhi bhagwan hai। ek taraph paramatma ko naam-roop se nyaara bhi kehte hain aur phir bhittar-thikkar mein bhi kah dete hain। abhi tum baap ko jaankar baap se poora varsa lene ka purushaartha kar rahe ho।

yeh makaan aadi sab shivbaaba bana rahe hain bachchon ke liye kyonki yahaan aap bachchon ko padhna hai। musaaphiri poori karke ghar ke jab najdeek pahunchte hain to samajhte hain, abhi ham ghar mein aakar pahunche hain। tum bachchon ko bahut khushi hogi। saakshaatkaar se baba bahlaayenge kyonki hangaama ho jaata hai। to aise samay baap ke saath rehna chaahte hain phir saakshaatkaar hona bahut sahaj hoga। yog mein baithe-baithe tum bahut-bahut saakshaatkaar karte rahenge। khushi mein tum dance karte ho। baaki sab shareer chhod chale jaayenge। khoone naahek khel hai। tumhaare saath koi ki yuddha nahin hai। phir saakshi ho dekhenge parantu himmat bhi chaahiye। kamjor to thahar na sake। jitna duniya mein jaasti duhkh hoga utna baba tumko bahlaane ke liye sukh dega। baithe-baithe bahut saakshaatkaar hote rahenge। itne bachche hain, shivbaaba ka bhandaara to zaroor bharpoor hoga। bachchon se hi sab kuchh hota hai। koi ke paas 7 bachche honge usmein bhi koi gareeb, koi saahookaar honge। bachche to thahre na। yeh to bada baap hai। behad ka ghar hai। yeh maat-pita hai phir tum bachchon ko sambhaalne ke liye jagdamba ko nimitta rakha hai। kumaari mama mein gyaan-yog ki taakat bhari hui hai। baba bhi yog mein rehte hain। murli chalti hai। aise to nahin samajhte ho shivbaaba hi murli chalaate hain। inki soul bhuttu hai kya! bhal samjho yeh bhuttu hai। shivbaaba hi murli chalaate hain to unko yaad karna achha hai। sadaiv samjho - inmen shivbaaba aakar hamko padhaate hain। baap kehte hain mujhe yaad karne se sada salaamat rahenge। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ham so, so ham ki smriti se svadarshan chakra phiraate roohaani nashe mein rehna hai। baap samaan ati meetha, ati pyaara banna hai।

2) sada salaamat rahne ke liye ek baap ko hi yaad karna hai। sirf shanti mein nahin baithna hai। sarvashaktivaan baap ko yaad kar shakti bhi leni hai।

vardaan:- tapasya aur seva dvaara bhavishya raajya-bhaagya ka sinhaasan lene vaale sinhaasandhaari bhav

jo bachche yahaan seva ki seat par najdeek hain woh bhavishya mein raajya sinhaasan ke bhi najdeek hain। jitna yahaan seva ke sahayogi utna vahaan raajya ke sada saathi। yahaan tapasya aur seva ka aasan aur vahaan raajya bhaagya ka sinhaasan। jaise yahaan har karma mein baapdaada ki yaad mein saathi hain vaise vahaan har karma mein bachpan se lekar raajya karne ke har karma mein saathi hain। jo sada sameep, sada saathi, sada sahayogi, sada tapasya aur seva ke aasan par rehte hain vahi bhavishya mein sinhaasandhaari bante hain।

slogan:- roohe gulaab woh hai jo apni roohaani vritti se vaayumandal mein roohaaniyat ki khushbu phailaata rahe।