Daily Murli for Thursday 13 July 2023

13-07-2023 praatahmurli om shanti "baapdaada"' madhuban

“meethe bachche - deh sahit sab kuchh bhool poora beggar bano, shivpuri aur vishnupuri se apna buddhiyog lagaao''

prashn:- kis baat mein tum bachchon ko baap samaan phraakdil banna hai?

uttar:- jaise baba phraakdil ban tum bachchon se kakhpan le tumhein vishwa ki baadshaahi dete hain। aise tumhein bhi phraakdil banna hai। jagah-jagah par godly university khol do। 3-4 ne bhi achha pad paaya to aho saubhaagya। sapoot ban satguru ka show karo। kabhi bhi kisi se paisa aadi nahin maango।

geet:- bachpan ke din bhula na dena…

om shanti। bachchon ko bahlaane ke liye yeh sab geet hain। baapdaada aur mama। mama do hoti hain। daadi (grand mother) aur maata। yeh tumhaari daadi bhi hai। tum brahma ki bachchiyaan ho aur shiv ki potriyaan ho। mama bhi brahma ki bachchi sarasvati hai। shiv-baba ki potri hai। bachchon ko sambhaalne ke liye jagat amba nimitta bani hui hai। shivbaaba hai bahuroopi। woh bahut khelpaal karte hain। svahez (manoranjan) hote hain na। jab sagaai hoti hai to bahut svahez karte hain aur jab shaadi ka samay hota hai to donon hi phate hue kapde pahante hain। tel lagaate hain। yeh rasam bhi yahaan ki hai। tum bachchon ko bhi baba samjhaate hain poora beggar banna hai। kuchh bhi nahin hoga to sab kuchh mil jaayega। deh sahit kuchh bhi na rahe। shivpuri, vishnupuri taraph hi buddhiyog lagaana hai। aur koi cheez mein aasakti nahin ho, to dekho baba bachchon ko bahlaate hain। yeh bhi baba ke anek raaz hain। dekho meera ka kitna gaayan hai। loklaaz khoi sirf is pavitrata ke kaaran। kitna naam nikla hai। unko to amrit bhi nahin mila। sirf shreekrishna se preet thi। shreekrishnapuri mein jaaoongi isliye vish ko chhoda। jaise pati ke pichhaadi stri sati banti hai na। ab aise to nahin meera yaad karte-karte krishnapuri mein gai। meera ko to 5-7 sau varsha hua hoga। bhaktin bahut achhi thi isliye koi achhe bhakta ke ghar janma liya hoga। unka naamaachaar kitna chala aata hai। yeh to bhakta meera thi, tum sachchi gyaan meeraayen banti ho। tum aai hi ho sooryavanshi, chandravanshi mahaaraani banne ke liye। bhal pahle anapdhe padhe aage bhari dhote hain। parantu mahaaraani to banengi na। agar bachpan ko bhool haath chhod diya phir to kabhi nahin mahaaraani banengi aur hi praja mein bhi kam pad paayengi। vaikuntha mein to aayenge parantu kam pad। baba ne samjhaaya hai bhakti karne vaalon se bhi poochhna chaahiye ki tum kya chaahte ho? shreekrishna ki bhakti kyon karte ho? zaroor dil hogi unki raajdhaani mein jaayen। parantu vahaan jaayenge kaise? bahut manushya kehte hain hamko shanti chaahiye। parantu ashaanti to saari duniya mein hai na। tum ek ko shanti milne se kya hoga। ham tumko 21janmon ke liye sada sukhi bana sakte hain। devtaayen is bhaarat mein hi sada sukhi the। ab woh raajdhaani sthaapan ho rahi hai। yahaan to hai hi maaya ka raajya। shanti mil nahin sakti। shanti ke liye alag jagah hai, sukh ke liye alag jagah hai। sukhdhaam maana sab sukhi। koi ek bhi duhkhi nahin rehta। aur duhkhadhaam mein phir ek bhi sukhi nahin rehta। yatha raaja raani tatha praja yahaan sab duhkhi hi duhkhi hain। sukhdhaam mein to jaanvar bhi kabhi duhkhi nahin hote। shanti ki duniya alag hai, jisko nirvaandhaam kehte hain। buddha paar nirvaan gaya। parantu gaya koi bhi nahin hai। agar khud chala gaya phir kya karke gaya। sab duhkhi hi duhkhi hain। sab lad rahe hain। barma, Ceylon bauddhiyon ki hai। woh bhi kehte hindu nikal jaaen। sahan nahin kar sakte। ab baba bhi dekhte hain anek dharma ho gaye hain to sahan nahin kar sakte hain, isliye sabko ekdam nikaal dete। satayug mein sirf ek dharma rehta hai। yeh sab gyaan tum bachchon ki buddhi mein hai। chitra haath mein uthaae vaanaprasthiyon ki service karni chaahiye। mandiron mein ghus jaana chaahiye। unhon se jaakar chit-chat karni chaahiye। shankar ke aage shivling dikhaate hain। to zaroor woh shankar se bada hua na! agar shankar bhagwan ka roop hai to phir unke saamne shivling rakhne ki kya darkaar hai! yeh sab sannyaasiyon ka phailaav hai, woh apne ko brahm gyaani tatva gyaani kahlaate hain। shiv ka to unhein pata bhi nahin hai। brahm tatva to rahne ka sthaan hai। ve to brahm aur tatva ko ek nahin maante hain। achha brahm gyaani, tatva gyaani hain phir apne ko shiv kyon kahlaate hain? woh to samajhte shiv bhi ek hi hai, brahm bhi ek hi hai। agar ek hi hai to bhala teen naam alag-alag kyon kiye hain? shiv ki to ling roop mein pooja hoti hai। brahm athva tatva ki pooja kis roop mein dikhlaai hai? woh to hai rahne ka sthaan। manushya to bahut moonjhe hue hain। tum bachchon ko ab hoshiyaar hona hai। sannyaasiyon se bhi koi niklenge, jo asul devi-devta dharma ke honge woh jhat utha lenge। koi 3-4 janmon se convert hue honge to itna jaldi nahin niklenge। taaje gaye hue honge to jhat niklenge। baba mein kashish hai na। aatmaayen hain sui, baba hai chumbak। ab sueeyon par kat chadhi hui hai। kat vaali sui oopar jaaye kaise। junk vaali cheez ghaaslet mein daali jaati hai। baba is gyaan amrit se sabki kat nikaalte hain, phir ham sachcha sona ban jaayenge। tum pattharnaath se ab paarasnaath bante ho। bhaarat paaraspuri thi। ab sone ka daam kitna chadh gaya hai। phir vahaan bahut sasta ho jaayega। ab yeh bhaarat pattharpuri bana hai। phir paaraspuri banega। hamaari buddhi mein woh chakra phirta rehta hai। saara din chakra buddhi mein phirega tab hi chakravarti raaje-raani banenge। duniya mein in baaton ko koi bhi nahin jaante hain। tum jaante ho satayug mein jo raajya karte unke 84 janma, phir treta vaalon ke zaroor kam honge। kahaan 84 janma, kahaan 84 laakh dikhlaate hain। phir to kalpa bhi itna lamba chaahiye, jo itne janma hon। hain sab gapode। hamesha pahle to chitra saamne de dena chaahiye। paisa tum kabhi nahin maango। tumhaara kaam hai unko dena। kuchh bhi dena hoga to aapehi dega। koi daam poochhe to bolo baba to gareebnivaaj hai। gareebon ke liye to free hai। baaki saahookaar jitna denge utna ham aur bhi chhapaayenge। paisa koi ham apne kaam mein nahin lagaate hain। jo milta hai woh auron ke hi kaam mein lagaaya jaata hai। saahookaar hi to dharmashaala aadi banaayenge na। haan gareeb bhi bana sakte hain, ismen kharcha kuchh nahin hai। jaise kakod gaanv ki maata kehti hai main centre kholoon। aisi godly university mein 3-4 ne bhi achha pad pa liya to aho bhaagya unka। ismen phraakdil hona chaahiye। baba dekho kitna phraakdil hai। kakhpan le aur baadshaahi de dete hain। sapoot bachche hi baba ki service kar sakte hain। kapoot kya karenge। kapoot ko thode hi baap varsa denge। tumko bhi satguru ka show karna hai। kaam athva krodh mein aaye to goya satguru ki ninda karaai phir pad pa nahin sakenge। bahut sambhaal karni chaahiye।

tumko sab dharma vaalon ko samjhaana hai। musalmaanon ko bhi samjhaao - tum khuda ki bandagi karte ho to zaroor bande thahre। bhala khuda kahaan hai? khuda hi rachayita aur rachna ka knowledge bata sakte hain। woh to rehte hain shantidham mein। unko yaad karne se tum shanti ka varsa le sakte ho। varsa lete-lete vikarma vinaash ho jaayenge aur phir tum khuda ke paas chale jaayenge। yeh gyaan sab dharmo ke liye hai। yeh hai bilkul nai baat। gyaan se tumhaara beda paar ho jaata hai aur kahin jaane ki darkaar hi nahin rehti। to meethe bachche ab tum svarga mein chalte ho to pavitra zaroor banna hai। dekho bhaarat mein pavitrata nahin hai to dhakke khaate rehte hain। kitne hangaamen hain - jo gaandhi sikhlaakar gaye hain, praja follow kar rahi hai। mehtar, majdoor, driver aadi strike karte hain to government ka dam hi naak mein chadha dete hain। government unhon ko saaph kah deti itna kharcha ham laayen kahaan se। to woh kehte tum to mauj udaate ho, dhan hi dhan ikattha karte rehte ho। hamne gunaah thode hi kiya hai, hamko talab (paghaar) chaahiye। strike kar lete to dhandha thahar jaata hai। yeh sab hona hi hai। kahaan anaaj sabji nahin milegi, doodh nahin milega। jahaan tahaan khitpit hai। yeh sab hangaama hokar shanti hogi। arjun ko vinaash ka aur vishnupuri ka saakshaatkaar karaaya hai na। tumko bhi ab ho raha hai। dekho tum kitne laadle bachche ho। bahut janmon ke ant mein aakar mile ho to poora saubhaagya lo।

(baarish bahut tej pad rahi thi) dekho baba ki bhi gyaan varsha bahut hui hai to us baarish ki bhi bahut varsha hui hai। baarish ke liye bhi yagya rachte hain to pees ke liye bhi yagya rachte hain, parantu peaceful to ek bhagwan hai। woh jab aaye to shanti ka gyaan deve। dene vaala to vahi hai na। achhe bachchon ko tolput kaha jaata hai। mithaai khilaai jaati hai woh jismaani mithaai, yeh hai roohaani mithaai jo roohaani baap dete hain। dehi-abhimaani ho rehna badi manzil hai, ismen mehnat hai। baba kehte 8 ghanta to dehi-abhimaani bano। phir bhal shareer nirvaah arth kaam bhi karo। raat ko jaago to bahut achhi lagan lagegi। kamaai hai na। he neend ko jeetne vaale bachche mujhe shvaanson shvaans yaad karo। vichaar saagar manthan karo। raat din jitna yog mein rahenge, vikarma vinaash honge। jitna-jitna gyaan ka simran karenge utni kamaai hogi। baaki service to bahut hai। baba se poochhenge to baba kahenge baithe raho। aaraam karo। ismen poochhne ki darkaar nahin। baba ne loklaaj kul ka kuchh khyaal kiya kya! are baadshaahi milti hai। baaki haan harek ka apna-apna part hai। phir baba se poochhna hai। harek ko apni-apni raay poochhni hai kyonki harek ka karmabandhan alag hai। paise hain to alaukik service mein saphal karne hain। bachchon ko mahaaveer banna hai। gaaya bhi hua hai mera to ek shivbaaba doosra na koi। vahi sabka baap hai। shivbaaba kehte hain main sabhi ko vaapis le jaane aaya hoon। baap kehte hain is duniya mein ek bhi manushya trikaal-darshi aastik nahin hain। sab naastik hain। baap ko na jaanne vaale। baaki riddhi siddhi vaale bahut hain। maaya bhi koi kam nahin hai, is maaya par hi jeet paani hai isliye kavach pada rahe। kavach ka arth hi hai manamnaabhav। shivbaaba ko yaad karo, dehi-abhimaani bano। is antim janma mein tum ek hi baar dehi-abhimaani bante ho। phir satayug se kaliyug tak yeh dehi-abhimaani banne ki shiksha koi deta hi nahin। is samay hi dehi-abhimaani banna padta hai kyonki ab shareer chhod mere paas aana hai। devtaayen dehi-abhimaani kyon banen, unko vaapis thode hi jaana hai। yeh gyaan abhi tumko milta hai। tum ashareeri the phir yeh shareer dhaaran kar part bajaaya, ab phir shareer chhod vaapis jaana hai। apni avastha ko jamaana hai। maaya par jeet paani hai। grihastha vyavhaar mein to rehna hai। hans bagule iktthe rehte hain to vighna padte hain। asuron ke sitam bhi bahut sahan karne hain। ghar baithe pran kar lete hain, baba kuchh bhi ho jaae ham aapse varsa to zaroor lenge। kitni maar khaate hain। drama anusaar yeh part kalpa pahle bhi chala tha। jo bahut sitam sahan karte hain vahi saubhaagyashaali hain। phir bhi aakar mile hain na! unki praalabdha to ban gai na। haan ismen mehnat hai, asur se devta banna hai। jab tak jeete hain gyaan amrit peena hi hai। baba nai-nai baaten samjhaate rehte hain। yuktiyaan bataate rehte hain। isko vichaar saagar manthan kaha jaata hai। buddhi ki mathaani chalaani chaahiye। raat ko bhi shivbaaba ko yaad kar so jaao, service ka shauk hoga to unko neend thode hi aayegi। khyaalaat chalta rahega। is point par kya-kya samjhaayen। gyaan ko achhi reeti andar ghotna hai। jab gyaan ghisenge tab hi raajtilak lene ke laayak banenge। jo teekhe-teekhe bachche hain unhon ko follow karna chaahiye, badi jabardasta kamaai hai, jinke paas laakh karod hain ve sab khalaas ho jaayenge। thode time mein dekhna kya hota hai। phir manushya jaagenge। ladaai aadi ki rehearsal hoti rahegi। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi cheez mein aasakti nahin rakhni hai। dehi-abhimaani hokar rehna hai। yaad ka kavach sada pahankar rakhna hai।

2) neend ko jeet shvaanson shvaans baap ko yaad karna hai, gyaan ka simran kar kamaai jama karni hai। buddhi ki mathaani chalaani hai।

vardaan:- sarvashaktimaan ke saath ki anubhooti dvaara sarva praaptiyon ka anubhav karne vaale tripta aatma bhav

jahaan sarvashaktimaan baap hai vahaan sarva praaptiyon ka anubhav svatah hota hai। jaise beej hai to jhaad samaaya hua hai। aise sarvashaktimaan baap ka saath hai to sada maalaamaal, sada tripta, sada sampanna honge। kabhi kisi baat mein kamjor nahin honge, kabhi koi complaint nahin karenge, sada complete। kya karen, kaise karen...yeh complaint nahin। kyon ki queue samaapta। jo sada saath rehte hain woh chalenge bhi saath।

slogan:- naynon mein jaise noor samaaya hua hai aise buddhi mein shiv pita ki yaad samaai ho।