Daily Murli for Friday 14 July 2023

14-07-2023 praatahmurli om shanti "baapdaada"' madhuban

“meethe bachche - yaad rakho hamaara baap, teacher aur satguru - teenon hi combined hai to bhi khushi ka paara chadhega, unki shreemat par chalte rahenge''

prashn:- braahmanon ka pahla lakshan kaun sa hai? kis baat mein braahmanon ko expert banna hai?

uttar:- braahmanon ka pahla lakshan hai padhna aur padhaana। kisi par bhi gyaan ka rang chadhaane mein bahut-bahut expert bano। bhal koi insult kare, gaali de lekin koshish karke dekho to us par asar zaroor hoga। paatra dekhkar daan dena hai। avinaashi dhan bhi vyartha na jaaye isliye badi khabardaari chaahiye। paisa bhi kisko sambhaal se dena hai।

geet:- jo piya ke saath hai…

om shanti। godly student ne yeh geet suna। tum bachche hi godly student ho। aise nahin ki sabhi school mein godly student hote hain। nahin, vahaan to manushya padhaate hain। sannyaasi bhi shaastra sunaate hain। gyaan ko vaastav mein koi barsaat nahin kaha jaata hai। barsaat to paani ki hoti hai। parantu yeh mahima gaai hui hai kyonki parampita paramatma ko gyaan saagar bhi kaha gaya hai। baap kehte hain - mujhe gyaan saagar knowledgeful bhi kehte hain। knowledge ko barsaat, paani va amrit nahin kaha jaata। jaise maan sarovar ka taalaab hai। amritsar mein bhi ek taalaab hai jisko ve log amrit samajhte hain। yeh baap baith samjhaate hain। padhaai ko amrit va barsaat nahin kahenge। samajhte hain - amrit hai, isse duhkh door ho jaayenge। vaastav mein to is knowledge se tumhaare sab duhkh door hote hain 21 janmon ke liye। jo piya ke saath hai unke liye barsaat hai। yahaan yeh baap, teacher, satguru - teenon hi combined hain। yeh ek baat bhi bachche yaad rakhen to khushi ka paara chadh jaaye। parantu maaya ghadi-ghadi bhula deti hai। yahaan tum bachche chalte ho shreemat par। shreemat se tum shreshtha bante ho। bhagwan hai oonche te ooncha baap। oonche te oonch baap ki padhaai se hi oonch te oonch ban sakte ho। ab jo piya ke sammukh baithe hain, sab student hain। yahaan baithenge, padhkar phir apne ghar jaana hai। din-pratidin student to bahut ho jaayenge। agar sabhi ko ek hi ghar mein saath rakhen to kitna bada makaan chaahiye! saara aabu makaan bana den to bhi poora nahin hoga। kitne centres hain? abhi to ajun thode hain, isse bhi hajaar guna jaasti honge। ek hajaar, do hajaar, paanch-saat hajaar bhi centres ho sakte hain। phir ghar-ghar mein yeh gyaan-gangaayen gyaan ki varsha karengi। itne dher bachche ho jaayenge। jahaan-tahaan dekho centres kholte rehte hain। koi geeta paathshaala naam rakhte hain, koi brahmaakumaari eeshvareey vishwa vidyaalay naam rakhte hain। vaastav mein brahmaakumaari naam rakhne se darna nahin chaahiye। kai bachche darte hain ki bi.ke.naam dekh hangaama na kar den isliye geeta paathshaala naam rakh dete hain। geeta paathshaala akshar to common hai। samajhte hain - koi vighna na pade isliye bi.ke.naam badal doosra roop de dete hain। vaastav mein to baat ek hi hai। andar ghusne se chitra aadi dekh jhat samajh jaayenge - yeh to vahi bi.ke. hain isliye naam badalne ki aisi jaroorat nahin hai। isse to achhi reeti siddha hota hai ki vaastav mein yeh brahma ki santaan brahmaakumaar-kumaariyaan hain। yeh to achha hai na। tum sabse kah sakte ho - vaastav mein tum bhi brahmaakumaar-kumaariyaan ho। prajaapita brahma ko to jaante ho। woh rachayita hai manushya srishti ka। niraakaar parampita paramatma koi aatmaon ka rachta nahin, woh to aatmaon ka anaadi baap hai। prajaapita brahma bhi to anaadi hai। aatmaon ka baap inmen aate hain। aakar brahma ko adopt karte hain - praja rachne ke liye। brahma dvaara brahman kul rachna hai। yeh to samjhaane mein aur hi sahaj hoga। parantu darte hain। kahenge bi.ke. ke paas mat jaao। geeta paathshaala mein bhal jaao। ghar-ghar mein gyaan-ganga ka arth bhi manushya nahin samajhte hain।

bhakti maarga mein naarad ko mukhya gina jaata hai। jhaanjh bajaane vaala bhakta tha। aise nahin, naarad koi aise roop vaala hai jaise chitra dikhaate hain। vaastav mein bandar to tum sabhi the। soorat manushya ki, seerat bandar ki thi। yoon to sab naarad hain। sab bhakta hain na। samajh sakte hain - jab tak ham daiveegun vaale manushya na banen tab tak ham lakshmi ko var na saken। sabhi mel athva female bhakta naarad hain। kaha jaata hai - apni seerat to dekho, tum to bandar ho kyonki tumhaare mein 5 vikaar hain, isliye lakshmi ko var nahin sakenge। hai saari yahaan ki baat। baba ne samjhaaya hai ki sabhi dushaasan athva duryodhan hain। dropdiyon ke cheer harte hain isliye maataayen pukaarti hain - hamko nangan hone se bachaao, raksha karo। kanyaayen kehti hain - laaj rakho girdhaari। naam to bahut rakh diye hain। manushyon ka buddhiyog chala jaata hai shreekrishna taraph। parantu kisi bhi dehdhaari ko yaad karne se vikarma vinaash nahin ho sakte। sirf chaahte hain saakshaatkaar ho। achha, saakshaatkaar ho jaaye parantu manushya se devta banne ki knowledge to mil na sake। jab brahman banen aur gyaan ko samjhen tab devta ban saken। brahman banne se bhakti chhoot jaati hai। pahle ek haphta ismen dene se ham manushya ko mandir laayak bana sakte hain। parantu time to lagta hai। yeh to barobar hai - tum baap ke saath ho। baba ke paas aate ho, phir jaate ho to kitna dil andar duhkh hota hai! lekin sab to saath mein nahin rah sakenge, yeh ho na sake। koi kahaan se, koi kahaan se bhaag aate hain। yeh rasma yahaan hi hai। saadhu-santa aadi paas to dher jaakar ikatthe hote hain। koi bhi kisko mana nahin karte। yahaan to pavitra banne ki baat aati hai isliye rokte hain। sannyasiyon mein to sirf males gharbaar chhod chale jaate hain। yahaan to kumaariyaan-maataayen sabhi hain। kanyaaon ko maa-baap, doctor aadi kehte hain - shaadi nahin karengi to beemaar ho jaayengi। unko samjhaana chaahiye - are, sannyaasi kitne bante hain। bahut chhote-chhote brahmachaari vahaan rehte hain। phir woh brahmachaari to kabhi beemaar nahin hote। yahaan kyon beemaar honge? shaadi bigar to dher rehte hain। sannyaasiyon ke oopar bhi koi case kar na sake। kabhi koi stri unse ghar kharcha nahin maangati hai। woh to bhaag jaate hain। stri kharcha kahaan se laaye phir aas-paas vaale log unko sambhaal lete hain। gareeb jaasti bhaagte hain। duhkhi hote hain to phir vairaagya aata hai। tum bhal duhkhi the parantu woh vairaagya ki baat nahin। tumko to pahle hatheli par bahishta dikhaaya jaata hai। pavitra banne bigar baikuntha kaise ja sakenge? bahaadur banna chaahiye isliye hi shivshakti sena naam hai। shivbaaba saath yog lagaane se shakti milti hai। gyaan ki dhaarna hone ke baad phir samarpan hona hai। gyaan ki dhaarna nahin hogi, nashtomoha nahin honge to maaya aakar pathkaayegi। shaadi karne ki dil hogi to phir saara brahmaakumaariyon ka naam badnaam ho jaata hai। pahle nashtomoha banna pade। tum log itne bhatthi mein rahe to bhi kitne nashtomoha nahin bane, yaad aati rahi। yahaan se gaye, mitra-sambandhiyon ka munh dekha aur lattu ho baith gaye। moh ne gher liya। yeh bhi drama ki bhaavi। abhi bhi baap kehte hain - pahle-pahle to nashtomoha bano। ek most beloved baap ke ban jaao। kuchh bhi ho jaaye, ham to baap ki hi service par rahenge। kaha jaata hai na - chadhe to chaakhe baikuntha ras, gire to chaknaachoor। aise nahin ki chhodkar aa jaayen phir moh sataaye। aise bahut sannyaasi log jaakar phir vaapas laut aate hain। sannyaasi ghar mein vaapis aayen to aaspaas vaale niraadar karte hain। samajhte hain - yeh kaam ke liye bhaaga hai। yahaan bhi samjha jaata hai - yeh poora nashtomoha nahin bana tha, vikaaron ne gher liya। baba ke paas koi khaan-paan ki takleeph nahin hai। shuru se lekar kitni sambhaal karte aaye hain। gareeb-saahookaar ek samaan hain। mama-baba bhi sabko sikhlaane liye bartan maanjate the। jhaadu lagaate the। deh-abhimaan todne ke liye kiya jaata hai। sannyaasi bhi aise karaate hain। koi bada aadmi hoga to unse lakdi aadi kataayenge - deh-abhimaan todne liye। yahaan to badi bhaari milkiyat milti hai! ek second mein 21 janma ki baadshaahi! sannyaasiyon ke paas to kuchh bhi praapti nahin hai। baaki pavitra hain isliye apvitra maatha tekte hain। yeh to raajayog hai, vishwa ka maalik bante hain।

vikaar mein nahin jaana hai। meera bhi pavitra rehna chaahti thi na। woh to bhakti maarga mein thi। shreekrishna ka deedaar karti thi। uski dil lagi shreekrishna se, to bhala woh vikaar mein kaise jaayegi? so bhi ek janma। karke meera doosre janma mein bhi bhakti maarga mein gai ho। aise bhi kah sakte hain - woh bhakti maarga mein gai kyonki ant mati so gati hoti hai। shreekrishna se dil thi to bhakta hi ban jaayegi। parantu bhakti maarga mein kuchh mila to nahin। gyaan maarga mein to 21 janmon ka varsa milta hai। bhakti bhi pahle shiv ki karte hain phir devtaaon ki। abhi to dekho - choohe-billi aadi sabki bhakti karne lag pade hain। shreekrishna ko chhod hanoomaan-ganesh aadi ki bhakti karne lag padte। satayug-treta mein bhi kalaayen kam hoti jaati hain aur bhakti mein bhi kalaayen kam hoti jaati hain। abhi to koi kaam ke nahin rahe hain। jab aisi haalat hoti hai tab baap aakar samjhaate hain। aadha kalpa oonch chadhte hain phir aadha kalpa ke baad girna shuru hota hai। manushya samajhte hain - girna hi hai to phir gyaan lekar kya karen? parantu eeshvareey knowledge bigar manushya to koi kaam ke nahin hain। ham-tum kya the, kuchh bhi nahin। gyaan zaroor chaahiye। shareer nirvaah arth padhte hain na। kanyaaon ko bhi aajkal shareer nirvaah arth padhna padta hai। aage yeh kaayda nahin tha। kanyaayen ghar sambhaalti thi, bachche naukri ke liye padhte the। ab behad ka baap tum bachchon ko padha rahe hain। agar sabhi yahaan baith jaayen to phir mitra-sambandhiyon aadi ko gyaan kaise denge? jaana pade। padhna aur padhaana hai। koi to bilkul padhte hi nahin। to samajhna chaahiye - yeh hamaare brahman kul ka nahin hai। rang lagaane ki koshish zaroor karni chaahiye। ismen darne ki baat nahin। koshish karne se phir koi na koi ko rang lag jaayega। bhal koi insult kare, gaali de, tum purushaartha karke dekho, kis na kis par asar zaroor hoga। bichchhu chalta hai to narma cheej dekh vahaan dank maar deta hai। jaanch karta hai। yahaan bhi bachchon ko bahut expert banna chaahiye। avinaashi dhan kahaan vyartha kisko nahin dena hai। paatra dekh daan karna hai। agar kisko daan diya aur usne koi vikarma kar liya to unka paap us daan dene vaale par aa jaayega। yahaan badi khabardaari chaahiye। paisa to badi sambhaal se kisko dena hai poochhkar। yahaan to jo bhi bana rahe hain yeh sab jaldi hi toot-phoot jaayenge। yeh makaan bhi bachchon ke rahne liye bane hain। yeh to jaante hain - sab tootne hain। earthquake hogi to mandir aadi sab tootenge। hamaari raajdhaani mein yeh kuchh hoga nahin। na America, Russia aadi hogi। sirf bhaarat khanda rehna hai - yeh tum jaante ho। baaki duniya to ghor andhiyaare mein hai। baba ka yeh kitna bada school hai! ismen teachers bhi nambarvaar hain। sabhi ek samaan to hote nahin। ismen tum dekhenge sabse bada teacher to shivbaaba hai। phir hai yeh brahm putra nadi। kehte bhi hain tvamev maataashcha pita........ to yeh maata thahri na। phir sarasvati ka bhi naam hai। brahma ki raashi par brahmaputra naam theek hai। dikhaate bhi hain - saagar aur brahmaputra nadi ka mela hota hai, yahaan phir aatma aur paramatma ka yeh mela hai, iska hi yaadgaar bhakti maarga mein gaaya jaata hai। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) most beloved baap ka banne ke pahle poora-poora nashtomoha banna hai। jab avastha pakki ho tab seva mein lagna hai।

2) is duniya se dil ka vairaagya rakh pavitra banne mein bahaadur banna hai। daan bahut khabardaari se paatra ko dekhkar karna hai।

vardaan:- paristhitiyon ko sidescene samajh paar kar aage badhne vaale master sarvashaktimaan bhav

sada apne master sarvashaktimaan swaroop ki smriti mein raho to har paristhiti aise anubhav hogi jaise ek sidescene hai। paristhiti samajhne se ghabra jaate lekin side scene arthaat raaste ke najaare samjhenge to sahaj paar kar lenge kyonki najaaron ko dekh khushi hoti hai, ghabraate nahin, vighna-vighna nahin hai lekin aage badhne ka saadhan hai। pareeksha se class aage badhta hai, isliye kabhi koi baat mein ruko nahin, sada master sarvashaktimaan hoon - is smriti se udti kala ka anubhav karte raho।

slogan:- aise sahajyogi bano jo aapko dekhne se hi doosron ka yog lag jaae।