Daily Murli for Monday 17 July 2023

17-07-2023 praatahmurli om shanti "baapdaada"' madhuban

“meethe bachche - abhi tum baap, teacher, satguru - teenon ke sammukh baithe ho, baap ki yahi kripa hai jo teacher ban tumhein padha rahe hain, satguru ban saath mein le jaayenge''

prashn:- tum bachchon ka baap se kaun-sa vaayda hai? tumhaara kartavya kya hai?

uttar:- baap se vaayda hai - baba, ham aapse jo kuchh sunte hain woh doosron ko bhi avashya sunaayenge। aap samaan banaayenge। hamaara kartavya hai - baap samaan sabko padhaana kyonki abhi buddhi ka taala khula hai। jaise ham varsa le rahe hain aise merciful ban doosron ko bhi varsa dilaana hai।

geet:- le lo duaayen maa-baap ki…

om shanti। abhi bachche maa-baap ke sammukh baithe hue hain athva bachche school mein teacher ke paas baithe hue hain। bachche jaante hain ham satguru ke paas bhi baithe hain gyaan sunne ke liye। kisse sunne? gyaan saagar to baap hi hai। jaante hain woh paramdham se padhaara hua hai hamko shiksha dene। tumhaari buddhi paramdham, sweet hom taraph lagi hui hai। bhal padhaate to yahaan hi hain, maat-pita sammukh baithe hain to bhi buddhiyog athva yaad nirvaandhaam taraph hi hai। hamko baap ke saath ghar jaana hai। phir vishnu ke ghar aayenge। woh bhi ghar hai, yeh bhi ghar hai। shreekrishnapuri sasurghar jaana hai। pahle to baap jo laayak banaate hain unko yaad karna hai। maa-baap kanya ko laayak banaate hain na। sasur ghar jaayegi to maa-baap ka show karegi ki bachchi to badi achhi sulakshani hai। abhi tum jaante ho ham parampita paramatma ke sammukh baithe hain, padh rahe hain। baap bachchon par bahut mehnat karte hain। yeh hai unki kripa। bachcha barrister banta hai to kahenge maa-baap ne achhi reeti paalna ki hai। padhaaya hai। maat-pita creator bhi hote hain, director bhi hote hain। mel bachchon ka moh baap mein jaata hai। bachchi ka moh maa ke paas jaata hai kyonki bachchon ko baap se varsa milna hai। kumaari to jaakar maa banti hai। abhi yahaan tum brahman kul bhooshan ho। brahman to gaaye jaate hain। prajaapita brahma ki santaan to bahut hain। un braahmanon se bhi tum poochh sakte ho - tum mukh vanshaavli ho to brahma ki mukh santaan ho? kukh santaan to laukik maat-pita se janma lete hain। brahma mukh se tum kab paida hue? batla nahin sakenge। tum practical mein jaante ho - ham brahma mukh kamal se adopt hue hain। adopt kiya hai shivbaaba ne। yahaan tum samajhte ho - ham baap-teacher-guru teenon ke sammukh baithe hue hain। baap to manners sikhlaate hain - shreekrishna jaise gunvaan, sarvagun sampanna........ yahaan hi banna hai, purushaartha karke। manushya to yeh nahin jaante ki raadhe-krishna agle janma mein kaun the? yeh sirf tum bachche hi jaante ho। jo poojya the vo hi pujaari bane phir poojya bante hain। pujaari bhakta ko kaha jaata hai। nar se naaraayan va beggar se prince banaane ka varsa baap bigar koi de na sake। tumse agar koi poochhe - tum kya kar rahe ho? to tum bolo - ham god father dvaara padh rahe hain। em object to harek ki buddhi mein hai na। ham baba se behad ka varsa le rahe hain। svarga ka varsa hai hi lakshmi-naaraayan va prince-princess banna। yahaan is college mein tum prince-princess bante ho। jaante ho bhavishya naye vishwa ka prince-princess banne liye ham padh rahe hain। naye vishwa ko satayug kaha jaata hai। satayug mein athva kaliyug mein honge to manushya hi na। knowledge bhi manushya ko milti hai। jaanvar ko to nahin denge। manushya daivi gun vaale the। abhi aasuri gunon vaale bane hain phir ham daivi-gun vaale bante hain। yeh tum bachchon ki buddhi mein hai। yeh to sahaj samajhne ki baat hai। 84 janmon ka chakra bhi bhaarat ke liye hi hai। 84 janmon ke chakra ka raaz aur kiski buddhi mein nahin baithega। svadarshan chakra to shreekrishna ko tha। vishnu, lakshmi-naaraayan ka combined roop hai। chhotepan mein raadhe-krishna the। parantu vo bhi sirf shreekrishna ko dete hain। raadhe ko kabhi chakra nahin dikhaate। lakshmi ko bhi nahin, sirf naaraayan ko dikhaate hain va vishnu ko dete hain। usmein lakshmi aa jaati hai। vaastav mein svadarshan chakradhaari tum ho।

tum jaante ho ham badi wonderful padhaai padh rahe hain god father se। vo hi gyaan ka saagar, manushya srishti ka beejroop hai, sat hai, chaitanya hai। aatma ko hi sat aur chaitanya kaha jaata hai। shareer ko sat aur chaitanya to kah nahin sakenge। bachche ka shareer 5 maheene tak jad hote bhi garbha mein vriddhi ko paata rehta hai। vriddhi ko to har cheez paati hi hai। parantu yeh manushya ki aatma mahaan hai। manushya ki mahima bhi hoti hai to manushya ki glaani bhi hoti hai। akhbaar mein chhapa - England ka prime minister church mein gaya to saath mein billi ko lekar gaya। dekho, billi ka bhi kitna maan hota hai। vahaan tum bhi bina permit ke nahin ja sakte aur billi ko permit mil jaati hai। bahut manushya kehte hain - kutta bhi bhagwan ko yaad karta hai! baang bharta hai na! vo bhi god sirf kehte, jaante kuchh nahin। to manushya aur jaanvar mein kya farka hua? tum ab kitne oonch bante ho। abhi tumhaari bahut mahima niklegi। practical mein tumhaara jab prabhaav niklega to kahenge - bas, brahmaakumaariyon paas jaana hai। brahmaakumaar-kumaariyaan shiv ke potre aur potriyaan hain। baba to ek hai na। mama-baba ek hain jisse tum rache jaate ho। tum jaante ho ham shivbaaba ke potre va potriyaan hain। ismen boodhe va javaan aadi ki baat nahin hai। ham shivbaaba ke potre brahma ke putra potre thahre। kitni sahaj baat hai। yeh braahmanon ka kul hai na। creator to baap hi hua। tum jaante ho ham shivbaaba ke bachche is jhaad ke pahle-pahle founder hain। yeh brahma sangam par thur mein baithe hain na। ham oonch te oonch shivbaaba ke potre hain, usse ham svarga ka varsa pa rahe hain। yeh kabhi bhoolna nahin chaahiye। deh sahit jo kuchh bhi hai sabko bhool ashareeri banna hai। abhi hamko vaapis jaana hai - daade ke paas athva sweet hom jaana hai। ham shivbaaba ke potre-potriyaan hain। baap bhi to zaroor chaahiye। barobar ham brahmaakumaar kumaariyaan hain। shiv ke potre hain, daade ka hi varsa milta hai। vishwa ki baadshaahi ko hi sachcha svaraajya kaha jaata hai। saare vishwa ka tum maalik bante ho। koi ka dar nahin। usko advet raajya kaha jaata hai। vahaan doosra koi rehta nahin। sarvagun sampanna, ahinsa parmo dharma vaale ban jaate hain। baba ne samjhaaya hai - hinsa do prakaar ki hoti hai। ek violence ki, doosri hinsa hai phir kaam kataari chalaana। ham double ahinsak hain। satayug mein hinsa ki baat nahin hoti। na jismaani, na vikaar ki। ahinsa parmo devi-devta dharma kehte hain। uske ham bhaati bante hain। brahman se phir ham devta banenge। hamaara manushya naam nikal jaata hai। ham manushya se devta bante hain। jaise barrister, engineer aadi bante hain। kaise bane so to woh khud hi jaan sakte। tum jaante ho is padhaai se devta bante hain। bahut sahaj hai। variety dharmo ka yeh jo jhaad hai, uske aadi-madhya-ant ka tumko gyaan hai, jo aur koi ko nahin hai। tum jaante ho hamaara baap teacher paramdham se aaye hain - hamko padhaane। paramdham kitna oonch hai। aeroplane bhi vahaan ja na sake। baba bigar pankh kaise aakar padhaate hain, to itni khushi rahni chaahiye। hamaara baba teacher bhi hai। rehte hain paramdham mein, vahaan se aakar hamko padhaate hain। unko to bahut hi service karni hai। bhakton ko bhi raazi karne ki service karni hoti hai। bhakta mujhe nahin jaante। unhon ki main itni service karta hoon, naudha bhakti vaalon ki bhi dil poori karta hoon। jiska bhi saakshaatkaar bachchon ne kiya hai। naudha bhakti mein baithte hain - bas, shreekrishna darshan do। aankhon se jaarozaar aansu bahaate rehte hain। jab aisi teevra bhakti karte hain tab saakshaatkaar karaata hoon। woh hai bhakti maarga। to is samay unhon ko bhi raazi karta hoon। tumko to sammukh baith sunaata hoon, padhaata hoon। bhagvaanuvaach to barobar hai। ismen koi shak nahin। geeta mein bhi likha hua hai - he bachche, tumko nar se naaraayan banaane raajayog sikhla raha hoon। parantu naam shreekrishna ka daal diya hai। shreekrishna ki aatma to is samay antim janma mein hai। vo baith padhti hai। bachche jaante hain - barobar sooryavanshi chandravanshi raajdhaani sthaapan ho rahi hai। ham purushaartha karke avashya varsa lenge। baba kitna merciful hai! aakar bachchon ko god lete hain। bachche kehte hain - baba, aap vo hi ho, ham bhi vahi hain, jo phir se aakar mile hain। aap vahi baba hain, ham vahi aapke bachche hain। ab aap aaye ho raajya-bhaagya dene। baba phir se hamko padha rahe hain। ham shiv ke potre-potriyaan hain। prajaapita brahma naam bhi baala hai। yeh to jaante ho - svarga ka rachayita parampita paramatma hi hai, varsa unse milega। brahma ko bhi unse mila tha। yeh baap tum braahmanon se baat kar rahe hain। kitna achhi reeti samjhaate hain। phir bhool kyon jaate ho? baba ke ghar mein baithe hain। baba hi teacher ban padhaate hain। ham raajayog seekh rahe hain। ham jaayenge shantidham phir aayenge sukhdhaam। is kaliyugi duniya ka vinaash hona hai। kalpa pahle muaaphik tumko saakshi ho dekhna padta hai। dekhte chalo - kaise imtahaan paas kiya, kaise vinaash hua? phir jahaan jeet, vahaan janma kaise hota hai? kaise mahal aadi banaayenge? buddhi mein hai - aise nahin, sone ki dvaarika koi neeche padi hai, woh nikal aayegi। kehte hain - raavan ki bhi sone ki lanka thi। aise to kuchh hai nahin। sone ke mahal to devtaaon ke hote hain। abhi to nahin hai। abhi to bhaarat ka beda hi garka ho gaya hai। ab tum bachche salvage karte ho narka roopi vishay saagar se। baaki steamer aadi ki koi baat nahin hai। tum saagar ke bachche jal mar bhasma ho gaye the। kaam chita par baith kaale ban gaye the। tum sundar the phir saanvare ban gaye। bhaarat ke tum devi-devtaayen kitne sundar the! tum sab shyaam-sundar ho। bachche jaante hain - ham kiske aage baithe hai? aisa koi satsang nahin hoga jahaan god father baith raajayog sikhlaate hain। niraakaar baap kiske to shareer mein aaye hain na। shreekrishna jaisa kaise aayega। haan, unki aatma to yahaan hi hai na।

abhi tumhaari buddhi ka taala khula hai। jaante ho ham baba se vishwa ke maalik bante hain। varsa lete hain। tum hi mama-baba kehte ho to tumhein padhaai mein follow karna hai isliye gaaya jaata hai - follow father। sachcha father chaahiye na, artificial to nahin! gaandhi ko bhi baapu ji kehte the parantu varsa to kuchh bhi nahin mila। vo hua had ke baapu ji se had ka varsa। unko behad ka nahin kahege। yeh behad ka baapu ji to paramdham se aaye hain। tumko svarga ka maalik banaate hain। tum ab trikaaldarshi bane ho aur tum hi vaikuntha ke maalik bante ho। behad ke baap mein kitna lav rehna chaahiye! aur sang tod ek tum sang jodoon। yeh tumhaari pratigya baap ke saath hai। kitna pyaar se baap baith bachchon ko samjhaate hain! aur koi kya jaane shivbaaba kab aaye? rakshaabandhan kab hua? daiveegun dhaaran kaise kiye? geeta shaastra padhte-sunte hain parantu samajhte kuchh bhi nahin। tumhaara hai orally। ismen shaastron aadi ki baat nahin। bhagwan baith sikhlaate hai। sangam par hi sikhaaya tha। abhi tum sammukh sunte ho to nasha chadhta hai। phir woh nasha kam nahin hona chaahiye। yeh koi manushya nahin padhaate hain। parampita paramatma jo gyaan ka saagar hai, woh padha rahe hain। brahmaakumaar-kumaariyaan sab sun rahe hain। sunkar phir auron ko sunaate ho। tumhaari agreement hai - baba se sunkar phir sunaayenge zaroor। nahin to suna kislie hai! ab tum behad baap ke bachche bane ho। baap kehte hai - maamekam yaad karo। deh sahit deh ke sabhi sambandh aadi chhodo। baap shiv, tum ho saaligraam। baap aur bachche। baap kehte hain - ham niraakaari, tum bhi niraakaari the। phir yahaan part bajaane aaye ho। ab phir jaana hai vaapis। baba brahmaanda ka maalik hai। tum bhi brahmaanda ke maalik the। jisko paramdham, nirvaandhaam, mool vatan aadi kehte hain। yeh sab naam hain। mool vatan, sookshm vatan, sthoolavtan - yeh saamne chakra phirta rehta hai। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai mein maat-pita ko follow karna hai। khushi mein rehna hai ki oonche te oonche dhaam se bhagwan humein padhaane aate hain।

2) ab humein vaapas sweet home jaana hai, isliye ashareeri banne ka abhyaas karna hai। deh sahit sab kuchh bhool jaana hai।

vardaan:- aavaaj se pare shreshtha sthiti mein sthit rah shanti ki shakti ka anubhav karne vaale ma. beejroop bhav

aavaaj se pare rahne ki shreshtha sthiti sarva vyakta aakarshanon se pare nyaari aur pyaari shaktishaali sthiti hai। ek second bhi is shreshtha sthiti mein sthit ho jaao to uska prabhaav saara din karma karte hue bhi svayan mein vishesh shanti ki shakti ka anubhav karenge। isi sthiti ko karmaateet sthiti, baap samaan sampoorn sthiti kaha jaata hai। yahi master beejroop, master sarvashaktivaan ki sthiti hai, is sthiti dvaara har kaarya mein saphalta ka anubhav hota hai।

slogan:- mahaan aatma woh hai jiska har bol mahaavaakya hai।