Daily Murli for Friday 21 July 2023

21-07-2023 praatahmurli om shanti "baapdaada"' madhuban

“meethe bachche - saari srishti ka paalankarta ek baap hai, woh kabhi kisi ki paalna nahin lete, sada niraakaar hain - yeh baat siddha kar sabko samjhaao''

prashn:- godly student ki pahli mukhya nishaani kya hogi?

uttar:- godly student kabhi bhi murli sunne bigar nahin rah sakte। woh aise nahin kahenge ki humein murli sunne ki phursat hi nahin milti। jahaan bhi hain points mangaakar bhi padhenge। kitni athaah points chalti hain! agar murli nahin sunenge to dhaarna kaise hogi? yeh padhaai hai, supreme teacher padhaane vaala hai to bachchon ko murli kabhi miss nahin karni chaahiye।

geet:- tumhein paake hamne…

om shanti। ab tum aatmaayen baap ko jaan gai ho। bachche jaante hain ek hi shivbaaba hai jisko koi bhi sookshm va sthool shareer nahin milta hai। brahma, vishnu, shankar ka bhi sookshm shareer dikhaate hain। naam bhi hai। bachche samajhte hain - unmein aatma hai, sookshm shareer hai। is samay tum bachche trilokeenaath bante ho। lakshmi-naaraayan ko koi trilokeenaath nahin kahenge। lakshmi-naaraayan in teen lok (mool vatan, sookshm vatan, sthoolavtan) ko nahin jaante। har ek baat buddhi se nirnay karni hai ki right hai ya wrong hai! sirf jo suna sat-sat kehna - yeh to bhakti maarga hai। yahaan to achhi reeti samajhna hai। barobar brahma, vishnu, shankar ko sookshm shareer hai। sirf ek hi shiv niraakaar hai। mandir to unke anek prakaar ke bane hue hain aur naam bhi anek prakaar ke rakh diye hain। dher mandir hain, jahaan ling rakha rehta hai। baambe mein hai usko baabureenaath kehte hain। hai to ek shiv, vilaayat aadi taraph bhi bahut naam rakhe hue hain। abhi bachche jaante hain - ham aatma hain। parampita paramatma ham bachchon ko samjha rahe hain। teenon lokon ka gyaan de rahe hain। is samay hi tum trilokeenaath ho kyonki tum jaante ho। jab tak koi jaane nahin to naath ban kaise sakte? sirf brahma ki aulaad brahman hi trilokeenaath hain, jinko teenon lokon ki knowledge hai। knowledgeful, blissful baap hai। woh niraakaar baap hamko knowledge de rahe hain। koi saakaar manushya ko god nahin kaha ja sakta। yahaan to sarvavyaapi kah dete hain।

abhi tum bachche samajh gaye ho - god father ek hi niraakaar shiv hai, jiski paalna bhi nahin hoti hai। aur sabhi ki paalna hoti hai। aatma chhote shareer mein aati hai। garbha mein to apna angootha choosti hai। shivbaaba ko angootha nahin, jo choosna pade। shivbaaba kehte hain - main to garbha mein hi nahin jaata hoon, aur sab to garbha mein jaate hain। phir unki paalna bhi hoti hai। maa jaise khaana aadi khaati hai, koi khatti cheez khaati hai to uska asar bachche par padta hai to bachche ko nuksaan hota hai। shivbaaba poochhte hain - hamaari tum paalna kaise karenge? hamko to kehte hi hain saari srishti ka paalan-karta। to mere oopar koi hai nahin। in baaton ko achhi reeti samajhna chaahiye। vichaar saagar manthan kar points nikaalni chaahiye। barobar shivbaaba baba hai। unko maashook bhi kaha jaata hai। sabhi manushya maatra aashik hain us maashook ke। tum sab sajniyaan ho, woh saajan thahra। saajan hai niraakaar। koi saakaar va aakaar ko saajan nahin kaha ja sakta। sabhi ka maashook ek hi niraakaar baba hai। niraakaar aatmaayen apne maashook ko yaad karti hain। yaad kyon karti hain? zaroor kuchh na kuchh takleeph hai। sabhi bhakta bhagwan ko yaad karte hain। yeh aashik-maashook niraakaari hain। woh jo saakaari aashik-maashook hote hain unhon ki bhi mahima hai aur woh bahut thode hote hain। ek-doosre ke shareer par phida hote hain। unka koi vikaar ke liye pyaar nahin hota hai। sirf ek-do ko dekhte rehte। dekhne bigar sukh nahin aayega। shareer ko yaad karte hain। kahaan bhi baithe rahenge। samjhenge hamaare saamne maashook khada hai। unko saakshaatkaar hota hai kyonki woh pavitrata ka prem hai। shareer ki bhi shobha hoti hai na। vikaar ke liye nahin, ek-do ko dekh khush hote hain। khaate hue unki yaad aai, bas, khaana bhool jaayega। unko hi dekhte rahenge। woh bhi thode hote hain। yahaan to sabhi ke sabhi aashik hain। us maashook (shivbaaba) ke, parantu kitne thode sachche aashik bante hain jo paas with honours hote hain! 8 daanon ki kitni mahima hai! to jab bhakton ko bhagwan mila hai to unko kitna yaad karna chaahiye! baap kehte hain - bachche, nirantar mujhe yaad karo kyonki mere se tumko bahut sukh milta hai। woh to karke alpa kaal ka sukh mil jaata hai। aapas mein bahut lav rehta hai। yeh phir hai behad ke baap se behad ka lav। behad ka pyaar ek mein rehta hai। bachche jaante hain - unka koi shaareerik naam nahin hai।

vishnu ke do roop lakshmi-naaraayan ki zaroor dynasty hogi। satayug aadi mein lakshmi-naaraayan ka raajya hoga to zaroor praja bhi hogi। buddhi bhi kehti hai - satayug aadi mein itne honge phir vriddhi hoti jaayegi। satayug aadi mein lakshmi-naaraayan ka raajya tha। barobar jamuna ke kanthe par raadhe-krishna ki raajdhaani thi। ganga-jamuna aadi yeh to bahut nadiyaan hain। nadi kinaare rehte the। yeh jo dikhaate hain saagar mein dvaarika doobi aadi - aisi koi baat nahin। na koi saagar ke kinaare devtaaon ke gaanv hote hain। yeh bambai thode hi hogi। abhi yeh tumhaari buddhi mein hai। most beloved god father, Christ ko god father nahin kahenge। jaante hain Christ messenger hai। parampita paramatma ne unko bheja hai। aate hain niraakaari duniya se। unko god father nahin samajhte। preceptor samajhte hain। hinduon ko pata nahin hai - hindu dharma kab aur kisne sthaapan kiya? hindu dharma to hai nahin। aadi sanaatan devi-devta dharma hai। Adam-shumaari (jan-ganna) mein agar hamse poochhte hain to ham kahenge ham to brahman hain। is samay ham koi hindu thode hi hain। is samay ham hain hi brahma mukh vanshaavli brahman। parantu tum bhal brahman dharma bataayenge vo phir bhi hindu mein daal denge। vahaan svarga mein to Adam-shumaari hoti hi nahin kyonki hai hi ek devi-devta dharma। to poochhne ki darkaar hi nahin। yahaan bahut dharma hain isliye poochhte hain। yeh sab baaten baap baith samjhaate hain। to buddhi se baap ko yaad karna hai। woh hai hi niraakaar aur unka ek hi naam hai। brahma, vishnu, shankar ke bhi aakaari chitra dekhne mein aate hain। shiv ka kahaan hai? samajhte bhi hain ki yeh bhagwan hai। ham apne ko bhagwan kahla nahin sakte। aatmaayen to punarjanma leti hain। aise nahin, baap bhi punarjanma lete hain।

abhi tum teenon lokon ko jaante ho isliye tumhaara trilokeenaath naam hai। jaanne vaale hi naath hue। tumko ab triloki ka gyaan hai। tum brahman hi jaante ho aur koi bhi jaan na sake। satayug mein yeh gyaan hi nahin rehta। yeh sirf tumko milta hai, isliye tumhaara naam baala hai। delvaada mandir mein shiv, aadi dev, aadi devi aur tum bachche ho kyonki tum abhi service karte ho। baap aate hain patiton ko paavan banaane to tum bachchon ki madad lete hain। baap kehte hain jo-jo mere madadgaar bante hain, unhon ko main jaanta hoon। yeh to koi bhi samajh sakte hain, jiski evaz phir tumko svarga ka maalik banaate hain। student sab ek jaise to nahin honge। shivbaaba ki dukaan hai manushya ko devta banaane ki phir unmein nambarvaar hain। mahaarthiyon ka centre zaroor achha chalta hoga। samjhenge achhe salesman hain। shivbaaba ke sab dukaan hain। tum avinaashi gyaan-ratnon ka vyaapaar karte ho। yeh baap kitna saadhaaran hai! kitna farka hai sach aur jhooth ka! sach bataane vaala to ek hi baap hai। baaki sab jhooth hi jhooth hai। bade te badi jhooth - jo shreemat dene vaale parampita paramatma ko sarvavyaapi kah dete hain! aage to beanta kah dete the। raavan kaun hai, kab se aaye hain - yeh bhi koi nahin jaante। raavan ko vo log treta mein le gaye hain। shreekrishna ko dvaapar mein le jaate hain। satayug ko jaante hi nahin। raam-seeta the treta mein। vahaan raavan ki to baat hi nahin uth sakti hai। sab yahaan ki baaten hain। yeh to ek gapoda laga diya hai। koi ko samjhaao to phir kah dete yeh in bi.ke. ki kalpana hai। ab bachchon ko samjhaaya gaya hai। points nikalti hain woh dhaaran karni hai। jahaan bhi ho points mangaakar padhna chaahiye। aise nahin ki phursat nahin hai। are, godly student kahe - hamko phursat nahin to unko kya kahenge? koi ko dhaaran kaise kara sakenge? itni athaah points chalti hain, woh agar murli nahin sunenge athva nahin padhenge to dhaarna kaise hogi? yeh to education hai। supreme teacher padhaane vaala ek hi hai। agar murli nahin sunenge to points suna kaise sakenge?

yeh to bachche samajhte hain baap janma-maran rahit hai। woh punarjanma nahin lete। parantu unki jayanti manaate hain। yeh to shiv jayanti ko bhi khatma karte jaate hain। ab kaun bataaye shiv ka janma kaise hua? kya kiya hoga? geeta mein shreekrishna ka naam daala hai parantu usi roop se to aa na sake। shreekrishna ko vaikunthanaath kahenge, trilokeenaath nahin। to vaikuntha athva svarga yahaan hi tha। shreekrishna bhi yahaan tha। raadhe-krishna koi bhaai-behen nahin the। donon alag-alag apni-apni raajdhaani mein the। bachchon ne saakshaatkaar kiya hai - kaise svayanvar hote hain? baba ne shuru mein tumko bahut bahlaaya tha। akele hi andar bhatthi mein pade the। koi mitra-sambandhi aadi se nahin milte the। to baba ne bahut dikhaaya। phir bhi pichhaadi mein tum bahut dekhenge। samjhenge ham jaise vaikuntha mein baithe hain। ant ke samay manushya hairaan hote hain। bahut aaphten aani hain, inko kaha jaata hai - ati khoone naahek। duniya nahin jaanti। aise bhi nahin, woh government koi mat legi। abhi to sabka vinaash hona hai। tum avinaashi baap se avinaashi pad pa rahe ho। bhal praja mein aayen to bhi aho saubhaagya। vahaan sukh hi sukh hai। yahaan hai duhkh hi duhkh। ab baap padhaane aaye hain to padhna bhi chaahiye na। bhal kaam hai, hath kaar de dil yaar de........ buddhiyog baap ke saath laga hua ho। grihastha vyavhaar mein rehte hue yaad unko karna hai। are, baap svarga ka maalik banaate hain, kya samajhte ho! 21janma raajaai karte ho। koi phikra ki baat nahin। yahaan to dekho, manushyon ko kitna phikra rehta hai! vahaan phikra hota nahin। tum vahaan praalabdha bhogte ho। parantu vahaan yeh bhi pata nahin padega। yeh knowledge tumko abhi hai ki ham avinaashi baap se varsa le rahe hain। phir automatically ham raajdhaani ka varsa lete rahenge। aise nahin ki daan-punya karne se raaja banenge। nahin। is samay ke purushaartha ki woh praalabdha hai। to kitna purushaartha karna chaahiye jisse 21 janma ki praalabdha banti hai! vahaan purushaartha-praalabdha ki baat hoti nahin। vahaan koi apraapta vastu hi nahin jiske liye purushaartha karna pade। sab dhanvaan hain। yahaan manushya padhte hain ki ham judge banen, doctor banen........ vahaan to na judge, na doctor aadi hote। vahaan koi paap karte hi nahin। vahaan koi chor-chakaar hoga nahin। tum saare vishwa ke maalik bante ho। koi baat ki parvaah nahin rehti। anna aadi par paise lagte nahin। yahaan bhi baba ke hote 8-10 aane man anaaj milta tha। to unse aage kya hoga? ab to kitni manhagaai hai! ajun mahangaai aur badhegi, phir sastaai ho jaayegi। drama anusaar sab-kuchh tumko milna hai। unki madad se tumko raajdhaani milni hai। do bandar ladte hain, makkhan tumko milta hai। duniya thode hi jaanti hai ki tumko padhaane vaala kaun hai! yeh hai bhi gupta vesh mein। tumko ek second mein vaikuntha ki raajdhaani de dete hain। khuda dosta ki kahaani hai na। yeh mahima baap ki hai। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) achha hoshiyaar salesman ban avinaashi gyaan-ratnon ka vyaapaar karna hai। avinaashi praalabdha banaane ke liye apna buddhiyog ek baap se lagaana hai।

2) paas with honour hone ke liye sachcha-sachcha aashik banna hai। nirantar ek maashook ki yaad mein rehna hai।

vardaan:- sarvashaktimaan ke saathi ban sarva ke prati shubh bhaavna rakhne vaale chintan va chinta mukta bhav

kai bachche chintan karte hain ki phalaane ki beemaari theek ho jaae, bachcha va pati gyaan mein chal jaae, dhandha theek ho jaae...yeh bhaavna to achhi hai, lekin aapki yeh chaahnaayen poorn tab hongi jab svayan halke ho baap se shakti lenge। iske liye buddhi roopi bartan khaali chaahiye। sabhi ka kalyaan chaahte ho to svayan shaktiroop ban sarvashakti-maan ke saathi ban shubh bhaavna rakh chalte chalo। chintan va chinta mukta bano, bandhan mein nahin phanso।

slogan:- jo prashnon se paar rehte hain vahi sada prasannachit rehte hain।