Daily Murli for Saturday 12 August 2023

12-08-2023 praatahmurli om shanti "baapdaada"' madhuban

“meethe bachche - 21 janmon ke liye punya ka khaata jama karna hai, yogbal se paapon ke khaate ko bhasma karna hai isliye antarmukhi bano''

prashn:- kis shreemat ka paalan karne se vaani se pare jaane ka purushaartha sahaj ho jaayega?

uttar:- shreemat kehti hai - bachche, antarmukhi ho jaao, baahar se kuchh bhi na bolo। is shreemat ko paalan karenge to sahaj hi vaani se pare ja sakenge। jitna yaad karenge, svadarshan chakra phiraayenge utna kamaai jama hoti jaayegi। yaad ke liye amritvele ka samay bahut achha hai। us samay uthkar antarmukhi ban aatma swaroop mein sthit hokar baith jaao।

geet:- toone raat ganvaai…

om shanti। yeh kaun samjhaate hain ki antarmukhi ho jaao, baahar se kuchh bhi na bolo, apni aatma ke swaroop mein sthit hokar baitho? baap bachchon se kehte hain mukh se kuchh bhi bolo nahin। raam-raam aadi to bahut kehte aaye parantu us kahne se bhi manushya paavan nahin ban sakte। manushya patit se paavan tab ban sakte jab patit-paavan baap ki shreemat par chalen। patit-paavan kahne se baap yaad aata hai। baap kehte hai ki tum barobar patit the na। ab tum paavan ban rahe ho। satayug mein koi patit hota nahin। paanch hajaar varsha pahle jab bhaarat paavan tha to ek hi dharma tha। baap to sukh ki hi srishti rachenge na। bhaarat sukhdhaam tha। lakshmi-naaraayan, raam-seeta aadi ke mandir satayug-treta ki nishaani hain। satayug mein barobar lakshmi-naaraayan ki dynasty thi। yahi bhaarat tha jismen sooryavanshi-chandravanshi ka raajya chalta tha, jo ab phir se sthaapan ho raha hai। isko kaha jaata hai world ki history-geography। yeh manushya hi to jaanenge। manushya nahin jaante to jaanvar se bhi badtar kaha jaata hai। baap ko jaanne liye kitne dhakke khaate hain, parantu jaan nahin sakte। tum baap ke bachche bane ho to baap apna parichay dete hain। pahle parichay nahin tha to iska parinaam kya hua? orphan, naastik, nidhan ke ban jaate hain। abhi tum baap ke bane ho, baap se varsa le rahe ho। bada bhaari varsa hai, 21 janma svarga ki raajdhaani milti hai, koi kam baat hai kya! lakshmi-naaraayan ko paanch hajaar varsha hua raajya karte। phir se history repeat hoti hai।

baap samjhaate hain - meri shreemat par chalo, antarmukhi bano, baaharmukhi mat bano। ab is samay hai ghor andhiyaara, inko raat kaha jaata hai। abhi savera aa raha hai। kaliyug ant ko ghor andhiyaara, satayug aadi ko ghor sojhra kaha jaata hai। baap kehte hain main aata hi hoon sangam par jabki sabhi manushya patit hain। abhi tum bachchon ko sada sukh ka varsa dene aaya hoon। vinaash saamne khada hai। bahut gai thodi rahi...... isliye ab jaldi-jaldi purushaartha kar behad ke baap se varsa lo, jaise sab le rahe hain। sab purushaarthi hain। ab sabko sweet hom, vaani se pare jaana hai। woh hai ham aatmaon ka ghar, nirvaandhaam। dhaam mein koi ek nahin rehte। jitni bhi jeev aatmaayen hain,, ve sabhi shareer chhod jaayenge apne ghar baba ke paas। woh hai niraakaari jhaad। jaise chitra mein bhi jhaad dikhaaya jaata hai। woh hai ham aatmaon ka ghar - shantidham। phir ham aayenge sukhdhaam। abhi 84 janmon ka chakra poora hota hai, kaliyug ke baad satayug zaroor aayega na। dvaapar ke baad kaliyug zaroor aayega। baap kehte hain - main kalpa-kalpa, kalpa ke sangamayuge aata hoon, puraani duniya ka vinaash karaata hoon। jab tak nai duniya sthaapan ho jaae tab tak is puraani duniya mein rehna pade। jab tak naya makaan ban jaayen tab tak puraane makaan mein baithe rehte hain na। phir jab naya ban jaaye phir puraane ko toda jaata hai। yeh bhi puraani cheez hai na। iske vinaash ke liye yeh hai mahaabhaarat ladaai। baap baith bachchon ko samjhaate hain। aatma hi samajhti hai - jismaani knowledge bhi aatma seekhti hai na। aatma kehti hai main principal hoon, surgeon hoon। aatma ki knowledge na hone kaaran deh-abhimaani ho jaate hain। aatma hi sanskaar le jaati hai। tum bachche samajhte ho shivbaaba ham aatmaon ko samjha rahe hain। ham aatma yeh puraana shareer chhod phir naya jaakar lengi। abhi ham shyaam hain phir sundar banenge। sundar se shyaam bante hain। 84 janma lag jaate hain। phir baba kaam chita se utaar gyaan chita par bithaae golden ej ka maalik bana dete hain। behad ka baap zaroor behad ka varsa dega na। baap to oonch te oonch hai। kehte hain bachchon ke liye vaikuntha ki saugaat laaye hai। hatheli par bahishta laaya hoon। second mein tum saakshaatkaar kar lete ho। kitne dher brahmaakumaar-kumaariyaan hain। zaroor brahma ke bachche hain aur shivbaaba ke potre hain। tum kehte ho ham shivbaaba se varsa lete hain। vahi sarva ka sadgati daata hai। raajayog sikhlaate hain। niraakaar kaise sikhlaaye, isliye organs dvaara padhaate hain। srishti chakra ki knowledge dete hain। jisko param aatma, supreme soul kehte hain uski hi saari mahima hai। gyaan ka saagar, patit-paavan woh hai to zaroor aana pade। tumko bhi master supreme athva paavan banaate hain। woh hai behad ka baap jisko sabhi bhakta bulaate hain। sabhi bhakton ka baap woh bhagwan hai - parampita paramatma। agar unko sarvavyaapi kah dete to phir varsa kaise milega? manushya ko bhagwan nahin kah sakte। shreekrishna ko bhi daiveegundhaari manushya kaha jaata hai, woh hai first prince। sabhi unko jhoole mein jhulaate hain। shivbaaba ko kabhi jhulaate nahin honge kyonki woh kabhi bachcha banta hi nahin। yeh to saakshaatkaar karaate hain samjhaane ke liye - ham tumhaara bachcha hoon, tum hamko apna vaaris banaayenge, balihaar jaayenge to main bhi balihaar jaaoonga। balihaar jaate ho to jaise main tumhaara baalak ho gaya।

manushyon mein kitni andhashraddha hai jahaan tahaan maatha tekte rehte hain isko kaha jaata hai gudiyon ki pooja। navraatri mein bahut gudiyaan banaayenge। unke occupation ka kisko pata nahin hai। 4-6 bhuja vaali devi thode hi hoti hai aur phir talvaar aadi de dete hain। devtaayen hinsak thode hi hote hain। shaastravaadiyon ne unhein bhi hinsak bana diya hai। nepaal mein bhi kaali ko poojte hain phir aise hai thode hi। mama aisi kaali jeebh vaali hai thode hi। manushya to manushya hi hota hai। brahma, vishnu, shankar hain sookshmavtanvaasi। bas, aur koi cheez hi nahin hai phir 8-10 bhuja vaale kahaan se aaye! yeh sab bhakti maarga ke alankaar banaate hain। paisa kamaane ke liye kuchh to chaahiye na। phir kisma-kisma ke chitra baith bana dete hain। vahaan hi dekho sundar shreekrishna ka mandir, vahaan hi saanvare shreekrishna ka mandir। kaaran to chaahiye na। kitni andhashraddha hai! ab bhakti maarga khatma ho gyaan maarga jindaabaad hota hai। baaki samay to thoda hai, sabko marna to zaroor hai। putra-potre vaaris banne nahin hain। vahaan tumko yeh gyaan hi nahin rahega ki sangam par hamne raajaai ke liye yeh purushaartha kiya tha। vahaan to pavitra srishti chal padti hai। yahaan tum jaante ho ki barobar ham baba ki raajdhaani ke hakdaar hain। vahaan yeh pata nahin rahega ki kaun-se karma kiye the, kaise banen - yeh sab bhool jaata hai। vahaan patit hote hi nahin, jo paavan banne ke liye guru ki darkaar pade। baap pair dhokar bachchon ko takhta par bithaate hain। guru chaahiye sadgati ke liye। vahaan to hai hi sadgati। guru ki darkaar hi nahin। baap kehte hain apne ko aatma samjho, deh-abhimaan mein na raho। main aatma abhi doctor ke roop mein hoon, main aatma magistrate hoon phir yeh shareer chhodne ke baad pata nahin kya banoonga? ham is shareer dvaara padhte hain। aatma hi in organs dvaara padhti hai, aatma hi sunti hai - yeh samajhne ki baaten hain, na ki danta kathaayen hain।

baap kehte hain yeh saari duniya kabristaan honi hai। ab jaago, nahin to bhambhor ko aag lagne ke samay haay-haay karenge। parantu kuchh bhi kar nahin sakenge, kaal kha jaayega, traahi-traahi karke rah jaayenge। sajaayen bhi bahut khaayenge। abhi humein paapon ka khaata khalaas kar punya ke khaate ko jama karna hai। nayesir 21 janmon ke liye jama karna hai। jama hoga baap ko yaad karne se। puraana khaata chuktu ho jaana chaahiye। gyaan kitna sahaj hai! tumhaari roj kitni kamaai hoti hai! jitna jo yaad karte hain, svadarshan chakra phiraate hain to athaah kamaai karte hain, anginat। vahaan koi ginti thode hi hoti hai। abhi jhopdiyon mein baithe hain phir mahlon mein baithenge। farka to rehta hai na - jhopdi aur mahal mein। brahma dvaara nai duniya sthaapan ho jaayegi to puraani duniya ka vinaash ho jaayega। abhi ki baat hai na। raajdhaani ki sthaapna ho jaayegi phir jisne jitna purushaartha kiya so kiya phir vinaash ho jaayega isliye ab gaphlat nahin karni chaahiye। savere uthkar yaad mein baith jaana chaahiye। jitna yaad ka chart rakho utna achha hai aur phir utna hi oonch pad paayenge। shivbaaba ke gale ka haar banenge। dil darpan mein dekhna hai ki main laayak bana hoon - lakshmi-naaraayan ko varne? ham baba-mama jaisi service karte hain? kisma-kisma ke phool hain। yeh baagvaan baba ka human gulshan hai। kahenge - dekho, kumaarka, manohar kitne achhe-achhe phool hain! yeh ratan jyot hai। baba is bageeche ko dekhte phir us bageeche mein jaakar phoolon ko dekhte hain। baagvaan jaanch karte hain phoolon ki, to bachchon ko follow karna chaahiye - number one, tu phool kaun-kaun hain? aisa banna chaahiye। 21 janmon ke liye raajaai pad paana koi kam baat thode hi hai! athaah sukh hain। vishwa ka maalik banna hai। yeh school hai। us jismaani padhaai ke saath yeh roohaani padhaai karo। teachers ke hamesha achhe manners hote hain। honest hote hain। school mein andhashraddha ki baat nahin। vahaan bairistari padhte, engineering padhte। yahaan tum raajaaon ka raaja banne ke liye padhte ho। sannyaasi to kah dete eeshvar sarvavyaapi hai। bas, khel hi khatma। behad ka baap bachchon ko samjhaate hain - bachche, yeh antim janma pavitra raho। tum bahut service kar sakte ho।

vahaan bhi education department hai। yeh bhi godly education department hai। tum bachche ho raajarishi। woh to gharbaar chhod dete hain। tum ghar mein rehte saari duniya ka tyaag karte ho। tumhaari buddhi mein ab nai duniya hai, jo baap hi banaate hain, isliye baap kehte hain tum mujhe yaad karo, yeh puraani duniya khalaas ho jaayegi। yeh roohaani college athva hospital bhi bahut bada hai, jisse tum ever healthy, ever wealthy bante ho। ghar-ghar mein tum yeh hospital athva college khol sakte ho, ismen kharcha kuchh bhi nahin। sirf teen pair prithvi ke chaahiye। achha!

maat-pita baapdaada ka meethe-meethe sikeeldhe bachchon prati yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uthkar yaad mein zaroor baithna hai, ismen gaphlat nahin karni hai। punya ka khaata jama karna hai।

2) em object ko buddhi mein rakh achhe manners dhaaran karne hain। roohaani padhaai zaroor karni hai। antarmukhi hokar rehna hai।

vardaan:- brahman jeevan ki visheshta ko jaankar use kaarya mein lagaane vaale sarva visheshta sampanna bhav

drama ke niyam pramaan sangamayug par har ek brahman aatma ko koi na koi visheshta mili hui hai। chaahe maala ka last daana ho, usmein bhi koi na koi visheshta hai, to brahman janma ke bhaagya ki visheshta ko pahchaano aur use kaarya mein lagaao। ek visheshta kaarya mein lagaai to aur bhi visheshtaayen svatah aati jaayengi, ek ke aage bindi lagte-lagte sarva visheshtaaon mein sampanna ban jaayenge।

slogan:- manamnaabhav ke mantra ki sada smriti rahe to man ka bhatakna banda ho jaayega।