Daily Murli for Friday 1 September 2023

01-09-2023 praatahmurli om shanti "baapdaada"' madhuban

“meethe bachche - deh sahit sabki yaad bhool, baap jo hai jaisa hai use yathaartha pahchaan svayan ko bindi samajh bindi roop se baap ko yaad karo''

prashn:- kaun sa gyaan is samay baap se hi tumhein milta hai aur koi nahin de sakte?

uttar:- tum stri-purush saath mein rehte grihastha vyavhaar ki sambhaal karte pavitra raho, yeh gyaan abhi isi samay baap tumhein dete hain aur koi yeh gyaan de nahin sakta। tumhein daan to 5 vikaaron ka karna hai lekin mukhya hai kaam, jis par poori vijay paani hai। sarvashaktimaan baap ki yaad aur shreemat par chalne se hi yeh taakat milti hai।

geet:- duhkhiyon par raham karo …

om shanti। vahi baap baith bachchon ko samjhaate hain। kaun hai yeh baap? yeh bachche jaante hain, jinke sammukh baap baithe hain। ab tum bachchon ki buddhi ka yog behad ke baap taraph hai। buddhi ka yog abhi had ke baap se todna hai। saari duniya ke jo bhi mitra sambandhi hain, balki is deh ko, duniya ko sabko bhoolna hai। yeh baap ke direction milte hain। baap bachchon ko kabhi nahin bhoolte hain। baap to kehte hain bhakti maarga mein bhi tum bhakton ki ham sambhaal karte aaye hain। parantu drama anusaar tum bachchon ko bhoolna hi hai। bhulvaati hai maaya। ham aatma hain - yeh bhi raavan bhula dete hain। deh-abhimaani bana dete hain। yeh tum bachchon ka part hai। aise nahin ki tum vahaan sirf baap ko bhool jaate ho, parantu woh jo hai jaisa hai, us baap ki yaad aur sukh dene ka gyaan bhool jaate ho।

abhi tum jaante ho baba kalpa-kalpa aate hain। baba kaisa hai - yeh bhi buddhi mein dhaaran karna hai। manushyon ne to shivling ka bada chitra bana diya hai। aur sabhi ke chitra to theek hain। jaise brahma, vishnu aur shankar ka chitra bhi theek hai, mandiron mein pooje jaate hain। parantu parampita paramatma ka naam, roop, desh, kaal jo hai, woh bhool jaate hain। chitra bhi bhool jaate hain। abhi tum bachchon ko samjhaaya jaata hai ki aatma bindi roop hai। star misal bindi hai। bhrikuti ke beech mein rehti hain। bachche jaante hain - ham aatma hain। shareer ki bhrakuti ke beech mujh aatma ka sthaan hai। yeh to sab maanenge। bahut sookshm bindi jaisi hai। yeh bhi jaante ho parampita paramatma bhi aise bindi roop hi hoga। khud aakar samjhaate hain main bhi bindi hoon, parantu manushyon ne bada roop jyortilingam bana diya hai। jaise buddha ka bhi bada lamba chauda roop banaate hain। paandavon ke shareer bhi bhakti maarga mein bahut lambe banaate hain। bhakti maarga mein lambe chitra hote hain। gyaan maarga mein chhoti cheez hoti hai। paramatma kehte hain main bindi hoon। kahaan-kahaan bahut bada ling bhi rakhte hain। nahin to bindi ki pooja kaise ho sake। pooja to zaroor badi cheez ki hogi na। tumko abhi bindi roop samjhaaya hai। in baaton ko manushya to samajh na saken। tum bachchon ko bhi pahle yeh samajh nahin thi। abhi jab paripakva avastha hui hai to samajhte ho yeh to yathaartha baat hai। agar shuru se lekar baba bhi samjhaate to ham samajh nahin sakte kyonki bindi koi cheez to hai nahin। ham maante nahin। parampara se shivling kaha jaata, yeh phir kya hai? to baap samjhaate hain ki woh bhi wrong hai। main jo tumhaara baap hoon, main bindi hoon। tumhaara bhi bindi roop hai। parantu pooja aadi ke liye bada shivling banaate hain। aatmaon ka roop bhi saaligraam banaate hain parantu aise hai nahin। aatma itni badi ho nahin sakti। aatma dekhne mein bhi bada mushkil aati hai। yeh samajhne ki badi guhya baate hain। aatma bhi bindi roop hai। is chhoti si aatma mein 84 janmon ka part hai। ek second na mile doosre se। 84 janmon ka part saara ek chhoti-si aatma mein noondha hua hai। yeh badi kudrat ki baat hai। saara part bindi mein rehta hai। us naatak mein bhi part bajaane vaalon ki buddhi mein saara part rehta hai na। woh hai chhota part, yeh 84 janmon ka part bhi achhi reeti samajhna hai aur phir samjhaane ki bhi badi yukti chaahiye। itni chhoti bindi hai, kitni chhoti hai, kitni shaktivaan hai! unko parampita paramatma kaha jaata hai। tum aatmaayen unse yog lagaane se ma. sarvashaktimaan bante ho। maaya par jeet paakar atal, akhanda, sukh-shaantimay raajya karte ho। kitni samajhne ki baaten hain।

yeh hai padhaai। hai bhi bahut sahaj। yeh baap hi samjha sakte hain, koi manushya nahin samjha sakte hain। barobar itni chhoti cheez parantu naam kitna bada rakhte hain - gyaan ka saagar। tum kehte ho manushya srishti ka beejroop, chaitanya hai, sat hai, avinaashi hai। kehte aate hain parantu kiski buddhi mein nahin aata hai - woh kya vastu hai? gun to bahut athaah gaate hain। abhi tum bachche baap ke sammukh baithe ho। jaan gaye ho। aatmaayen to sammukh hi hain। sab aatmaayen brothers hi hain। kitni chhoti-chhoti bindi hai, vichaar karo। mool vatan ka ham jo chitra banaate hain usmein bindu roop hi dikhaate hain। jaise stars aakaash tatva mein oopar khade hain, vaise hi mahtatva mein bhi ham aise star maaphik apne-apne section mein khade honge। jhaad chhote-chhote stars ka bana hua hai। vahaan se phir aatma aati hai, shareer dhaaran karti hai - part bajaane liye। kaise nambarvaar aatmaayen aati hain - yeh saari buddhi chalni chaahiye। har ek dharma ka section alag hoga। baap drishtaanta de samjhaate hain। banyan tree ka bhi misaal samjhaate hain। hindi bahut jagah chalti hai, to bachchon ko hindi bhaasha mein samjhaana padega। parampita paramatma bhi hindi bhaasha mein hi samjhaate hain। aajkal jahaan-tahaan iska prachaar karte rehte hain। ek bhaasha hona to mushkil hai। kai samajhte hain parampita paramatma to sab bhaashaayen jaante honge। parantu aise to ho na sake। athaah, anekaanek bhaashaayen hain। woh to seekhni padti hain। parampita paramatma ko to kuchh seekhna nahin hai। unhonne kalpa pahle jis bhaasha mein samjhaaya hai, usmein hi samjhaate hain। baaki bhaashaayen to harek ko padhni hoti hain। baap ko padhni hoti hain kya? tum dekhte ho shuru se hindi chali hai। sab hindi seekhte jaate hain। bhaarat mein hindi ka prachaar hai। baap bhi hindi mein samjhaate hain phir har ek ko apni bhaasha mein translation kar auron ko samjhaana pade। baap aur baap ki rachna ka parichay sabko samjhaana hai। sabhi ka sadgati daata woh ek baap hai। yeh sab jaanenge barobar baap aaya hua hai। baap kehte hain main bhaarat mein hi aata hoon। bhaarat hamaara birth place hai। shiv ke mandir, devi-devtaaon ke mandir bhi yahaan hain। devi-devtaaon ka raajya bhi bhaarat mein hota hai। baap bhi bhaarat mein aate hain। devi-devta dharma ki sthaapna yahaan hi ki hai। to mandir bhi zaroor yahaan chaahiye। auron ke itne mandir nahin honge। yahaan to bahut mandir hain। ghar-ghar mein lakshmi-naaraayan ke chitra, raadhe-krishna ke chitra, raam-seeta ke chitra rakhte hain kyonki bhaarat mein hokar gaye hain। parantu unhonne kaise raajya liya - woh bhool gaye hain। chaitanya mein raajya karke gaye hain। lakshmi-naaraayan vaikuntha ke mahaaraaja-mahaaraani hain। unhon ko raajya kiye kitna samay hua? yeh bhi jaante hain। mukh se kehte bhi hain Christ se 3 hajaar varsha pahle devi-devtaaon ka raajya tha। to Christ ko 2 hajaar varsha hue na। to jo aise kehte hain unhein usi baat par samjhaana chaahiye। kehte hain Christ se 3 hajaar varsha pahle devi-devtaaon ka raajya tha arthaat svarga tha। aise nahin ki Christ bhi us svarga mein tha। poochhenge Christian log tab kahaan the? yaani unhon ki aatmaayen kahaan thi? islaami, bauddhi, Christian aadi ki aatmaayen sab kahaan thi? yeh samjhaana to bada sahaj hai। woh sab nirvaandhaam va niraakaari duniya mein thi। niraakaari duniya bhi hai, duniya mein zaroor bahut rahne vaale hote hain। sabhi aatmaon ka nivaas sthaan mahtatva roopi niraakaari duniya mein hai। tum bachchon ki buddhi mein abhi yeh hai ki is samay sab devi-devtaaon ki aatmaayen haazir hain, tab baap aaye hain, phir se devi-devta dharma ki sthaapna karte hain। samjho, koi dharma aata hai pahle to bahut chhota hota hai। chhoti-chhoti shaakhaayen nikal jab poori hoti hain tab yeh tumhaara foundation bhi poora hota hai।

beej aur jhaad ka raaz samjhaana to bahut sahaj hai। manushya srishti ka jhaad bahut dharmon ka hai। samajhte bhi hain phalaana dharma tha to phalaana dharma nahin tha। abhi chhote-chhote dharma nikalte hain। aage to nahin the na। chhoti-chhoti shaakhaayen to abhi nikli hain। yeh tum bachche jaante ho aur koi nahin jaante। aatma aur paramatma ka bindi roop nahin jaante hain। abhi baba ne tum bachchon ko aakar samjhaaya hai। tum kehte ho baba ham aapke bachche hain। kalpa pahle bhi aapse mile the। aapke bachche bane the। bachche bante hain, baap ka varsa lene। baap kehte hain tum hamaare ho, goya adopt kiya, mukh vanshaavli bane। tum sab adopted ho। baba bhi brahma mukh se kehte hain - tum aatmaayen hamaari ho। tum aatmaayen bhi kehti ho baba aapne jo brahma tan mein aakar apna parichay diya hai, ham aapke hain। baba kahne se hi varse ki khushbu aani chaahiye। bachche hi kah sakte। yeh hai pravritti maarga। sannyaasiyon ke shishya bante hain, woh baap-bachche nahin bante। varsa baap se jaaydaad ka milta hai। woh to kahenge hamne guru kiya hai। guru se to jaaydaad ka varsa nahin milega। woh to jaaydaad ko chhod jangal mein chale jaate hain। woh jaaydaad de na saken। woh hain hi nivritti maarga vaale। baap to jaaydaad dete hain, unse kuchh nahin milta। jangal mein jaayenge to sannyaasi kahlaayenge। tum bhi sannyaasi kahlaate ho। woh hain hathayogi sannyaasi। tum raajayogi sannyaasi ho। sannyaasi arthaat 5 vikaaron ka tyaag karne vaale। so to tum tyaag karte ho aur phir pavitra duniya mein chale jaate ho। woh tyaag karte hain parantu pavitra duniya mein nahin jaate, patit duniya mein hi rehte hain।

to baap samjhaate hain aatma kitni chhoti hai! itni chhoti vastu mein kitni taakat hai, avinaashi bhi hai। woh baap is shareer dvaara samjhaate hain, tumhaari aatma samajhti hai। baap kehte hain main aata hi tab hoon jab kaliyug ka ant hai। tamopradhaan patit ho jaate hain। mujhe yaad bhi tab karenge jab sangam hoga tab hi ham aayenge, tab hi vinaash ke chinha bhi dekhne mein aayenge। so to barobar dekhte ho। abhi tumko samajh milti hai, woh phir auron ko deni hai। abhi kaliyug ka ant zaroor hai। yaadav, kaurav, paandav bhi hain। mahaabhaarat ladaai bhi hai। barobar, us samay raajayog bhi seekhte the। paandavon ne vijay paai, yaadav-kaurav vinaash hue। svarga mein to ek hi dharma hota hai। anek dharma khalaas ho jaate hain। yeh baap baith samjhaate hain। bachche jaante hain baba ki is raajayog ki shiksha se ham barobar so devi-devta pad paate hain। tum purushaartha karte ho ham to nar se naaraayan hi banenge। baap ka vaaris zaroor banenge, takhtansheen banenge। phir jitna jo purushaartha karenge utna pad paayenge। purushaarthi chhipe nahin rehte, woh bade masta hote hain। pahle-pahle pratigya karte hain। baap ke janma baad hai rakshaabandhan। baap ko jaante to pahle pratigya karni hai। baap kehte hain kaam mahaashatru hai। daan to paanchon hi vikaaron ka karna hai parantu pahle-pahle mukhya kaam hai, inse bada khabardaar rehna hai। bhal stri bhi saath ho, grihastha vyavhaar mein rehte pavitra rehna mehnat ka kaam hai। sarvashaktimaan baap ko yaad karne aur unki shreemat par chalne se taakat milti hai। baap ka farmaan hai - saath mein rehte, ikatthe rehte pavitra rehna hai। aage to stri puroosh ikatthe rahne se aag lagti thi। baap kehte hain ikatthe raho parantu aag na lage। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaaran ke liye mukhya saar:-

1) dil se baap ko yaad kar jaaydaad ki khushi mein rehna hai। poora paavan zaroor banna hai।

2) vichaar karna hai - “aatma kitni chhoti hai aur usmein kitna avinaashi part noondha hua hai'', bindu ban bindu baap ki yaad mein rehna hai।

vardaan:- svaichchha aur dridh sankalp se ek dekar padam lene vaale chatursujaan bhav

chatursujaan bachche mitti se bhare hue sookhe chaaval dekar ek ka padamguna bhaagya bana lete hain। sirf chaaval dete aur return mein sarva shaktiyaan, sarva khajaane, 36 prakaar se bhi jyaada variety le lete। parantu kai bachche woh bhi dene ke samay sudaama ke misal kachchha (bagal) mein chhipaakar rakhte hain। baap kheenchakar le sakte hain lekin kheenchakar liya to uska return itna nahin milega, isliye svaichchha aur dridh sankalp se ek dekar padam lena - yahi chaturaai hai। is dene mein hi kalyaan hai।

slogan:- saakshi ban nyaare hokar har khel ko dekhne vaale hi saakshi-drishta hain।

is maas ki sabhi murliyaan (eeshvareey mahaavaakya) niraakaar paramatma shiv ne brahma mukhakmal se apne brahmaavatson arthaat brahmaakumaar evan brahmaakumaariyon ke sammukh 18-1-1969 se pahle uchchaaran ki thi। yeh keval brahmaakumaareez ki adhikrit teacher bahnon dvaara niymit BK vidyaarthiyon ko sunaane ke liye hain।