Daily Murli for Thursday 14 September 2023

14-09-2023 praatahmurli om shanti "baapdaada"' madhuban

“meethe bachche - yaad ke abhyaas ko sahaj banaane ke liye baap ko kabhi baap roop mein, kabhi teacher roop mein to kabhi satguru roop mein yaad karo''

prashn:- tum bachchon ko abhi saare vishwa mein kaun-sa dhindhora pitvaana hai?

uttar:- ab dhindhora pitvaao ki sukh ki duniya (svarga) ka rachayita svayan raajayog sikhlaane aaya hua hai। vo bachchon ke liye hatheli par bahishta lekar aaya hai isliye raajayog seekho। baap svayan kehte hain - bachche, ab tumhaare 84 janma poore hue hain, tumhein mere saath ghar chalna hai isliye deh ka bhaan chhod ashareeri bano। daiveegun dhaaran karo to daivi duniya mein chale jaayenge।

geet:- kaun aaya mere man ke dvaare…

om shanti। meethe-meethe bachchon ne geet suna ki abhi hamaari buddhi mein kiski yaad aai hai? sabki buddhi mein hai ki patit-paavan ek baap hai। angreji mein unko liberator kehte hain। liberate karte hain duhkh se। duhkh harta, sukh karta hai, yeh koi manushya va devta ka naam nahin hai। yeh hai hi ek patit-paavan baap ki mahima। patit-paavan, sadgati daata god father ko kehte hain। manushya ki yeh mahima ho na sake। lakshmi-naaraayan ko, brahma, vishnu, shankar ko patit-paavan nahin kah sakte। patit-paavan oonch te oonch ek hi hai। parampita paramatma ooncha unka naam bhi hai to ooncha unka thaanv (rahne ka sthaan) bhi hai। tumko nishchay hai ki yeh hamaara baba hai। shiv ko hi baba kehte hain, shiv hi niraakaar hai। shiv ka chitra alag, shankar ka chitra alag hai। woh (shiv) baap, shikshak, satguru hai। aaj satguroovaar hai। tumhaara to satguroovaar roz hai। satguru roz tumko padhaate hain aur woh tumhaara baap bhi hai, yeh to nishchay hona chaahiye na। unko sarvavyaapi nahin kahenge। tumhaari buddhi mein hai - patit-paavan parampita paramatma hamko raajayog sikhlaate hain, woh gyaan ka saagar hai। yeh to buddhi mein nishchay rehna chaahiye। yeh ek hi baap hai, jisko koi bhi roop mein yaad karo। buddhi oopar niraakaar taraph chali jaati hai। koi aakaar va saakaar nahin hai। aatmaon ko parampita paramatma se ab kaam pada hai parantu jaante nahin hain। gaate hain ki woh gyaan ka saagar hai। to gyaan ka saagar maana jo gyaan sunaakar sadgati kare। lakshmi-naaraayan ko yeh gyaan nahin hai। gyaan woh jo gyaan saagar se mile, isliye shaastron mein bhi gyaan nahin hai। gyaan saagar ko hi manushya srishti ka beejroop kehte hain। baap creator hai। woh hai behad ka baap aur sab hain had ke baap। ab behad ke baap ko sab yaad karte hain, jo baapon ka baap, patiyon ka pati, gurooon ka bhi guru hai, sab unko yaad karte hain, saadhna karte hain। aajkal chitron ke aage, raam ke aage, shankar ke aage ling rakhte hain। hai niraakaar, oonch te oonch hai, woh liberate karte hain। abhi to sab aatmaayen patit hain। 5 hajaar varsha pahle jab aadi sanaatan devi-devtaaon ka raajya tha to us samay ek hi raajya tha, sukh-dhaam tha। pavitrata, sukh, shanti sab thi। uska naam hi hai svarga, heaven। heaven ko sookshm vatan va mool vatan nahin kahenge। heaven ke against hai hell। yeh buddhi mein rakhna hai। ek behad ke baap ko hi yaad karna hai, unse svarga ka varsa milta hai। satguru raajayog sikhlaate hain, paavan duniya mein le jaate hain। ek ki kitni mahima hai! lakshmi-naaraayan ko yeh mahima nahin de sakte। ek hi niraakaar baap hai। aatmaayen bhi niraakaar hain, jab shareer se alag hain। baap kehte hain tum apna shareer lekar part bajaate ho। tum kitne janma part bajaate ho - yeh bhi jaante ho। brahma ka bhi chola hai। sookshm vatan mein bhi chola hai। shareer to hai na। kahenge unmein bhi aatma hai। brahma, vishnu, shankar ko bhi sookshm shareer hai। mujhe kehte hain niraakaar। bachchon ko samjhaaya hai - koi ko bhi bolo tumko do baap hain, tumhaare baap ko bhi do baap hain। sab us behad ke baap ko yaad karte hain। laukik baap to anek hain, yeh behad ka baap to ek hi hai। baap bhool jaae to teacher yaad pade, teacher bhool jaae to satguru yaad pade।

baap samjhaate hain - bhaarat abhi patit hai। pahle paavan tha to itni aatmaayen kahaan nivaas karti hongi? muktidhaam, vaanaprastha avastha mein arthaat vaani se pare। manushya boodhe hote hain to vaani se pare jaane ke liye guru ki sharan lete hain ki hamko nirvaandhaam pahunchaaven, parantu woh pahuncha nahin sakte। jhaad ko to badhna hi hai। mukhya part hai bhaarat ka, unmein bhi jo aadi sanaatan devi-devta dharma ke hain woh 84 janma lete hain। aatma paramatma alag rahe bahukaal… to hisaab karna chaahiye na। bahukaal arthaat jo pahle-pahle is srishti par part bajaane aate hain। barobar 84 janma unke hi hain। 84 ka chakra hi kehte hain, 84 laakh ka chakra nahin kehte। tum bachchon ko 84 ka chakra samjhaaya gaya hai, aage nahin jaante the। inse poochhenge to inki aatma bhi jaanti hai na। do aatmaon ka raaz bhi samjhaaya hai। doosri aatma pravesh kar sakti hai। ashuddha aatma ka bhi pravesh ho sakta hai। to parampita paramatma bhi aa sakte hain। baaki kehte hain main niraakaar na aaoon to raajayog kaise sikhlaaoon? mujhe hi gyaan saagar kehte hain, manushya svarga ki sthaapna to nahin karenge na। baap ko hi kaha jaata hai heavenly god father। vaikuntha ki raajdhaani hai। ek to nahin hai na। shreekrishna hai number one prince, satopradhaan। satopradhaan ko hi mahaatma kaha jaata hai। akele ko kumaar-kumaari kaha jaata hai। kumaari ka maan bahut hota hai। sagaai ho gai phir bhal pavitra rehte hain phir bhi yugal to ho gaye na। phir kumaari ka naam badal jaata hai। phir maata-pita ban jaate hain। bachcha paida hua tab kahenge maata-pita। shaadi ke baad samjhenge yeh maat-pita hain, understood hai ki santaan bhi hogi। phir unko kumaar-kumaari nahin kahenge।

tum bachche jaante ho abhi shreekrishnapuri sthaapan ho rahi hai। vahaan ek hi devi-devta dharma hai। baaki har ek dharma ka shaastra bhi alag-alag hota hai। kehte hain phalaane ka dharmashaastra yeh hai, ham phalaane dharma athva math mein jaate hain। aatmaon ko aakar apna part bajaana hai। koi se poochho - guroonaanak phir kab aayega? woh to kah dete jyoti jyot samaaya। to kya unko phir aana nahin hai? srishti chakra kaise repeat hoga? guroonaanak ki jab soul aai to unke pichhaadi sikkha dharma vaale aate jaate hain। abhi to dekho kitne ho gaye hain! phir bhi repeat karenge na। bataao phir kab aayenge? to bata nahin sakenge। tum kahenge yeh to 5 hajaar varsha ka chakra hai। guroonaanak ko 500 varsha hue, phir 4500 varsha ke baad aakar sikkha dharma sthaapan karenge। ham aadi sanaatan devi-devta dharma sthaapan karte hain। phir aur bhi nambarvaar aakar dharma sthaapan karenge। koi-koi bachche kehte hain hamaari buddhi mein itna nahin baithta hai। achha, thodi baat to baithti hai na। bhakton ka bhagwan baap ek thahra। kaha bhi jaata hai paap aatma, punya aatma। paramatma to kisko kaha nahin jaata। aise nahin, aatma jaakar paramatma banegi। jaise misaal dete hain - budbuda saagar mein leen ho jaayega। koi kahenge paar nirvaan gaya। jaise buddha ke liye kehte hain। koi phir kehte jyoti jyot samaaya। ab right kaun? paar nirvaan to theek hai। aatma bhi niraakaar hai। niraakaari duniya mein rehti hai। sookshm vatan mein hai movie। woh bhi jaise vahaan ki ek bhaasha hai, jo vahaan woh samajhte hain, samajh kar direction le aate hain। yeh bhi wonderful baat hai na। movie, talkie aur silence - teen hain। pahle movie ke bioscope bhi the phir unse kisko maja nahin aaya to talkie kar diya। sookshm vatan mein sirf brahma, vishnu, shankar hain। samjhaaya jaata hai oonch te oonch hai parampita paramatma, jo silence world mein rehte hain। ham aatmaayen bhi vahaan rehti hain। patit-paavan ek hi satguru hai। sarva ka sadgati daata vahi hai। baaki bhal koi apne ko guru kahlaaye, rishi kahlaaye, mahaatma kahlaaye parantu hain sab bhakta। paavan banaane vaale ko jaante hi nahin।

kehte hain paramatma sabko kabra se nikaal le jaate hain। dekhte bhi ho yeh vahi mahaabhaari mahaabhaarat ladaai hai। tum satayug ke liye raajayog seekh rahe ho। vinaash ke baad phir satayug ke get khulte hain। baap ne samjhaaya hai is samay tum baap se raajayog seekhte ho। tum yogbal se raajya lete ho। yeh hai nonviolence। koi bhi yeh nahin jaante hain ki nonviolence kisko kaha jaata hai। kaam kataari bhi nahin chalaani hai। yeh bhi hinsa hai। ahinsa parmo devi-devta dharma tha। vikaaron ke kaaran hi tumne aadi, madhya, ant duhkh paaya hai। vahaan hai hi nirvikaari duniya, jis kaaran aadi, madhya, ant duhkh nahin hota hai। woh hai amarlok, yeh hai mrityulok। mrityulok mein baith katha sunaate hain amar-lok mein jaane liye। baap kehte hain main trikaaldarshi hoon। tumko bhi trikaaldarshi, trinetri banaata hoon arthaat teenon lokon, teenon kaalon ko jaanne vaale। yeh bhagwan ki mahima hai। tum bachchon ko aap samaan banaakar saath le jaate hain। gyaan saagar ke bachche tum bhi master gyaan saagar ban jaate ho। baap kehte hain main manushya srishti ka beejroop, chaitanya, knowledgeful hoon। haan, ham jaan sakte hain beej se aise jhaad nikalta hai phir phal nikalta hai। ab yeh hai manushya srishti ka jhaad। baba kehte hain main is ulte jhaad ke aadi, madhya, ant ko, srishti chakra ko jaanta hoon। manushya kehte bhi hain paramatma sat hai, chaitanya hai, aananda ka saagar hai, sukh ka saagar hai, to unse zaroor varsa milna chaahiye। tum mujh apne baap se varsa le rahe ho। tum 21 janmon ke liye paavan ban jaayenge। main ever paavan hoon। tumko to part bajaana hai। is samay sirf tumhaari chadhti kala hai। tum master gyaan saagar ban jaate ho। phir satayug se lekar tumhaari kalaayen kamti hoti jaayengi। chadhkar phir utarna hi hai। abhi tum bachche behad ke baap se behad ka varsa lete ho। bahut service karte ho। baap hai patit-paavan। tum shiv shakti, paandav sena ho। patit duniya ko paavan duniya banaane mein madad karte ho। tumko hi vande maatram kehte hain। patit ko kabhi vande maatram nahin kahenge। baap aakar shakti-dal dvaara gupta service karaate hain। tum double ahinsa vaale ho, raajya lete ho parantu koi hathiyaar aadi nahin hain। pavitra rehte ho। woh sab hain double hinsak। ek to vikaar mein jaate hain, kaam-kataari se ek do ko duhkh dete hain aur phir aapas mein ladte-jhagadte bhi rehte hain। aajkal kitne duhkh ke pahaad girte hain। manushyon mein krodh kitna bhaari hai। apne aapko aapehi chamaat maarte hain। sabki glaani karte rehte hain। yeh bhi drama mein noondh hain। sabko girna hi hai। abhi tumhaari hai chadhti kala। tum dhindhora pitvaao ki svarga ka rachayita raajayog sikhlaane vaala woh bhagwan aaya hua hai। woh hatheli par bahishta le aaya hai। shreekrishna ko ham bhagwan nahin kahenge। woh daivi gunon vaala manushya hai। brahma, vishnu, shankar ko devta kahenge, unko daivi gun vaale manushya nahin kahenge। daiveegun satayugi manushyon mein hain, aasuri gun kaliyugi manushyon mein hain। daivi gunvaan aur aasuri gunvaan manushya hi bante hain। to baap baith samjhaate hain - tum baap ko kyon bhoolte ho? ghadi-ghadi mujhe yaad karo। tumhaare 84 janma poore hue, ab main tumko raajayog sikhlaane aaya hoon। phir bhi tum ghadi-ghadi bhool jaate ho। deh-abhimaan chhod apne ko ashareeri samjho।

achha! maat-pita baapdaada ka meethe-meethe sikeeldhe bachchon prati yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan trikaaldarshi, trinetri, trilokeenaath banna hai। baap ki mahima mein svayan ko master banaana hai।

2) double ahinsak banna hai। kisi bhi vikaar ke vasheebhoot ho hinsa nahin karni hai। baap ka madadgaar ban sabko paavan banaane ki seva karni hai।

vardaan:- jvaala roop ki yaad dvaara svayan ko parivartan kar brahman se pharishta, so devta bhav

jaise agni mein koi bhi cheez daali jaati hai to naam, roop, gun sab badal jaata hai। aise jab baap ke yaad ki lagan ki agni mein padte ho to parivartan ho jaate ho। manushya se brahman, phir brahman se pharishta so devta ban jaate ho। jaise kachchi mitti ko saanchen mein dhaalkar aag mein daalte hain to eet ban jaati, aise yeh bhi parivartan ho jaata, isliye yaad ko jvaala roop kaha jaata hai।

slogan:- shaktishaali aatma woh hai jo jab chaahe tab sheetal swaroop aur jab chaahe tab jvaala roop dhaaran kar le।