Daily Murli for Wednesday 13 September 2023

13-09-2023 praatahmurli om shanti "baapdaada"' madhuban

“meethe bachche - tumhaara kisi se bhi vair nahin hona chaahiye kyonki tum ho sabke kalyaankaari, vair rakhne vaale ko half caste brahman kahenge''

prashn:- kaun si smriti buddhi mein sada rahe to nirbhay ban jaayenge?

uttar:- sada smriti mein rahe ki ham sachkhanda ke maalik devi-devta ban rahe hain, shareer ko koi maarta bhi hai lekin aatma ko maar nahin sakta। goli shareer ko lagti hai। main aatma to ja rahi hoon baba ke paas, hamko kya dar hai। ham baithe hain, chhat gir jaati hai, ham baba ke paas chale jaayenge। ismen darne ki koi baat nahin। aisa nirbhay banna hai।

geet:- maata O maata…

om shanti। bachchon ne jagat amba ki mahima suni। ab manushya to sirf gaate rehte hain jagat amba ke mele lag rahe hain। yeh phir hai sangam। bachchon ka baap ke saath mela। baap hai to maa zaroor hai। bhaarat mein jagat amba ki jeevan kahaani koi bhi jaante nahin। jagat ko rachne vaali arthaat jagat amba। jagat amba ke mandir bhi hain। abhi tum bachchon ko samajh mili hai, gyaan ka teesra netra mila hai। abhi tum bachche jaante ho, jiska yaadgaar bana hua hai woh zaroor srishti ke sangam par aaye honge। inko jagat amba kaha jaata hai। jagatpita, prajaapita bhi hai na।

is behad drama ka aadi-madhya-ant kya hai aur mukhya actors kaun-se hain - yeh koi nahin jaante। hero-heroine bhi actor hote hain na। sirf do nahin honge। zaroor unki sena hogi। jagat amba ki bhi sena hogi। unko shaktiyaan bhi kaha jaata hai। shakti sena naameegraami hai। shakti kahaan se aai? zaroor sarvashaktimaan parampita paramatma se hi shakti li hogi - yeh to sab maante hain। oonch te oonch bhagwan hai। unko hi sat shri akaal kehte hain। akaali jo hote hain woh niraakaar ko maanne vaale hote hain। sikkha granthi gurunaanak ko maante hain। kehte hain gurunaanak dev hain। unki jo peedhi hoti hai unke 10 baadshaahon ke naam bhi bhinna-bhinna hain। koi ka sinh, koi ka daas, koi ka chanda bhi naam hoga। sabke naam bhinna-bhinna hain aur akaali jo hain woh akaalmoorta ko maante hain। sat shri akaal - yeh kiski mahima ki? parampita paramatma ki। to siddha karte hain sat sirf ek shri shri akaalmoorta paramatma hi hai। tum kah sakte ho sat shri akaal। tum unko jaante ho। woh sirf akshar kah dete, arth kuchh bhi nahin jaante। tum to jaante ho sat shri akaal ko। unki biography ko bhi tum jaante ho। vichaar saagar manthan bhi tum bachchon ko karna hai। baap to gyaan ka saagar hai। usne kalash maataaon ko diya hai। yeh hai badi mama aur phir tum anek maataayen ho। jagat amba ki anek bachchiyaan aur bachche hain। yeh jagat amba hai phir pita bhi zaroor hai। tum jaante ho yeh jagat amba kaun hai, kiski bachchi hai? hain to manushya, 8-10 bhujaayen to nahin hain। itni bhujaayen kyon di hain - yeh kisko pata nahin। to oonch te oonch woh sat paramatma hai। tum bachchon ko samjhaaya gaya hai - parampita paramatma jisko ham roop-basanta kehte hain, roop bhi hai aur phir basanta, gyaan saagar hai। itna chhota-sa star, woh gyaan saagar hai। wonder hai na। bachchon ko samjhaaya hai - baap hai bindi roop, usmein barobar saara part hai। bhakti maarga mein bhakton ki bhaavna poori karte hain। yeh saari drama mein noondh hai। jis samay jiski jo bhaavna hai woh drama mein pahle se hi noondhi hui hai। tumhaari yeh padhaai bhi drama mein noondh hai, jo part repeat ho raha hai। samajhne ki baat hai na। tum achhi reeti samjha sakte ho - oonch te oonch bhagwan sab kehte hain। woh hai niraakaar, nirbhay, nirvair… unka koi ke saath vair nahin hai। tumhaara bhi koi ke saath vair nahin hai। tum sabke kalyaankaari ho। agar kiska vair hai to unko half caste kahenge। aadha shoodra, aadha brahman। yeh vikaaron ki khaad complete nikal jaayegi tab sachcha brahman kahenge। abhi to aadha-aadha hai। kaliyugi tamopradhaan sanskaar bhare hue hain, woh nikalne hain। abhi tumko na devta, na shoodra, beech ka brahman kahenge। woh bhi sampoorn nahin bane ho। jagat amba ko devta nahin kahenge। jagat amba jab sampoorn ban jaati hai, uske baad devta banti hai। abhi brahman hai। brahma ki beti sarasvati hai। parantu yeh koi nahin jaante। brahma kab aaya jo mukh-vanshaavli rachna rachi? usko hi shivshakti sena kaha jaata hai। to tum jaante ho woh oonch te oonch baap parampita, paramdham mein rahne vaale hain। phir sookshm vatan mein hain brahma, vishnu, shankar। pravritti maarga hone kaaran woh bhi yugal dikhaate hain। vishnu ko poora yugal dikhaate hain। yeh sab buddhi mein rehna chaahiye। manushya kahenge ham actor hain। to manushyon ko drama ke aadi, madhya, ant ka maaloom hona chaahiye na। oonch te oonch bhagwan kaun hai? brahma, vishnu, shankar kaun hain? kya aur bhi 8-10-100 bhuja vaala koi hai? nahin, yeh sab chitra phaaltu hain। brahma ki 100 bhuja dikhaate hain। ab yeh to prajaapita hai, 100 bhuja ki to baat hi nahin। yeh sab wrong hai। right vaastav mein kya hai, woh bhi samajhna chaahiye। oonch te oonch bhagwan jo paramdham mein rehte hain, hai star। vishnu ko bhi 4 bhuja dikhaai hain - do bhuja lakshmi ki, do bhuja naaraayan ki। jaise raavan ke 10 sheesh dikhaate hain, 5 stri ke vikaar aur 5 purush ke। pahle-pahle mukhya vikaar hai deh-abhimaan। phir aur vikaar nambarvaar aate hain। sookshmavtanvaasi brahma to hai avyakt। prajaapita brahma to yahaan chaahiye na। yeh jab sampoorn ban jaate hain to sookshm vatan mein pharishte ban jaate hain। tum bhi pharishte ban jaate ho। vahaan tumhaara shareer haddi-maas ka nahin hota hai। unko pharishta kaha jaata hai। brahma to prajaapita yahaan hai। phir vishnu do roop se paalna karenge। shankar to hai sookshm vatan mein। yeh badi samajhne ki baaten hain। itni dooraandeshi buddhi koi ki hai nahin। tumhaari buddhi ekdam mool vatan, sookshm vatan tak chali gai hai। sookshm vatan ab racha hua hai। brahma, vishnu, shankar ki bhi rachna hui hai, jahaan tak aa-ja sakte ho। to oonch te oonch bhagwan phir brahma, vishnu, shankar phir yeh manushya srishti mein devi-devtaayen। baaki 8-10 bhuja vaale va chandika devi aadi to hain nahin। itne sab chitra kahaan se aaye? tumhaare paas koi hathiyaar thode hi hain। yeh sab hinsak hathiyaar baith banaaye hain। devta to hote hain double ahinsak। sookshm vatan mein koi hathiyaar aadi hote nahin। chitron mein kitne hathiyaar diye hain। isko kaha jaata hai gudiyon ki pooja। occupation ko koi jaante nahin। baba aakar brahma dvaara nai rachna rachte hain। to khud bada ho gaya na। tum ho unki santaan potre aur potriyaan। samajhne vaale samajhte bhi hain parantu phir yeh nahin samajhte ki sabki maut honi hai। abhi bhi kitne marte rehte hain। akhbaaron aadi mein koi dikhlaate thode hi hai, nahin to naam badnaam ho jaaye। bhookh bahut marte hain। ek samay mushkil se do roti milti hai। tum bachche jaan gaye ho satayug mein lakshmi-naaraayan ka raajya chalta hai। do bhuja vaale hi manushya hain। baaki satayug mein koi 8-10 bhuja vaali deviyaan nahin hoti hain। second number mein hain raam-seeta। woh bhi yahaan raajayog se pad pa rahe hain। kitni sahaj baat hai samajhne ki। baap kehte hain tumne bahut ved-shaastra padhe hain, ab tum mere se suno aur judge karo - main tumhein satya sunaata hoon ya woh satya sunaate hain? agar woh satya sunaate hain to tum satya naaraayan ki katha se satya naaraayan kyon nahin bane ho?

abhi tum practical mein satya baba se satya katha sun rahe ho - naari se lakshmi, nar se naaraayan banne ki yeh katha hai। zaroor praja bhi banegi ki sirf lakshmi-naaraayan jaakar takhta par baithenge? yeh devi-devtaaon ki raajdhaani sthaapan ho rahi hai। phir satayug mein aakar raajya karenge। vahaan raajaaon ko lashkar aadi koi hote nahin। lashkar vikaari unholy raajaaon ko hote hain। woh to hain holi raajaayen। satayug ko holi land kaha jaata hai, isko unholy-land kehte hain। bahut puraane patit ho gaye hain। naye ko puraana banna hi hai। shareer bhi pahle naya phir puraana hota hai। yeh to buddhi mein baithna chaahiye na। manushya hote hue bhi drama ke aadi-madhya-ant ko nahin jaante। tum jaante ho oonch te oonch shivbaaba mool vatan mein rehte hain। usko niraakaari duniya kaha jaata hai। aatmaayen bindiyaan bhi vahaan rehti hain। parantu bindi roop hi den to koi samajh kaise sake? bindi ki pooja kaise karenge? shivbaaba ke bindi roop ki pooja kaise karen? tilak kaise lagaayen? baba amarnaath par bhi gaye hue hain। baba saara dekhkar aaye the ki kaise shivling banaate hain। kehte hain vahaan paarvati ko shankar ne katha sunaai। ab paarvati ne kis durgati ko paaya tha jo unko baith katha sunaai? vaastav mein tum sab paarvatiyaan hon। tum janma-maran mein aate ho aur sadgati ko paane ke liye katha sun rahe ho। to vahaan poochha shivling kahaan hai? to bola shivling to aapehi nikal aata hai। are, yeh kaise hoga! vahaan kabootar bhi dikhaate hain। kabootar (pigeon) baat karna kabhi seekhte nahin। tote ko baat karna sikhlaate hain to woh bolte hain। kanthi pad jaati hai। tum gyaan ki kanthi pahante ho। to baba ne samjhaaya hai oonch te oonch to hai shivbaaba phir brahma, vishnu, shankar। pravritti maarga dikhaane liye vishnu ko 4 bhujaayen dikhaate hain। yahaan manushya srishti mein oonch te oonch lakshmi-naaraayan aur unki raajdhaani phir raam-seeta ki dynasty। yeh holi dynasty poori hoti hai। phir raavan raajya shuru hota hai। phir sabko patit banna hi hai। baaki haan, pichhaadi mein jo nai aatmaayen aati hain unka kuchh prabhaav nikalta hai। kiska satopradhaanta ka, kiska rajo-tamo ka part hai। yeh behad ka drama hai। manushya to manushya hi hain। baaki sab hai gudiyon ki pooja। tum actors ho na। abhi tum manushya se devta ban rahe ho। padhaai se manushya kitna oonch pad paate hain। yeh bhi padhaai hai, jisse tum raajya pad paate ho। aisi padhaai koi hoti nahin। woh prince-princess to praalabdha le aate hain। tum yahaan praalabdha bana rahe ho। bhavishya satayug ke liye kitni oonch aur phir sahaj knowledge hai - second mein jeevanmukti। ham behad baap ke bachche hain, eeshvareey god mein baithe hain। eeshvareey god kaun chhodenge?

to is drama ke aadi-madhya-ant ko samajhna hai। baap to yathaartha reeti baith samjhaate hain। jo manushya srishti ka beej-roop gaaya jaata hai। sat-chit-aananda swaroop kaha jaata hai। zaroor jab aayenge tab to varsa denge na। tum sachkhanda ke maalik devi-devta bante ho। koi dar ki baat nahin hai। yahaan to kitna dar rehta hai - koi chadhaai na kare। tumko to bilkul nirbhay rehna hai। shareer ko koi maarta hai, aatma ko thode hi maar sakte hain jo darna chaahiye। nirbhay hone ki badi samajh chaahiye। baap bhi nirbhay to bachche bhi nirbhay। goli shareer ko lagti hai, main aatma to ja raha hoon baba ke paas, hamko kya dar hai। ham baithe hain, chhat gir jaati hai, ham baba ke paas chale jaayenge। nirbhay hone mein time lagta hai। tum ho jagat amba ke bachche shiv shakti sena। ek ki to mahima nahin hai। tum bhi saath ho। yeh commander hai। tumko roohaani drill sikhlaate hain। tum unke bachche ho। tum ho lucky sitaare। yeh sarasvati bhi lucky sitaara hai। brahma ki beti hai na। us gyaan soorya ka chandrama to yeh (brahma) hai na। parantu yeh mel hone kaaran maata par kalash rakha jaata hai। achha!

meethe-meethe sikeeldhe brahma mukh vanshaavli brahman kul bhooshan svadarshan chakradhaari bachchon prati maat-pita baapdaada ka dil va jaan, sik va prem se nambarvaar purushaartha anusaar yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kaliyugi tamopradhaan sanskaaron ko nikaal sachcha brahman banna hai। kisi se bhi vair nahin rakhna hai।

2) nirbhay banne ke liye aatma-abhimaani rahne ka abhyaas karna hai। ham shiv shakti sena hain, humein to sachkhanda ka maalik banna hai - isi nashe mein rehna hai।

vardaan:- kaliyugi vaayumandal mein rehte hue uske vibration se safe rahne vaale svaraajya adhikaari bhav

svaraajya adhikaari use kaha jaata jise koi bhi karmendriy apni taraph aakarshit na kare, sada ek baap ki taraph aakarshit rahe। kisi bhi vyakti va vastu ki taraph aakarshan na jaae। aise raajya adhikaari hi tapasvi hain, vahi hans, bagulon ke kaliyugi vaayumandal mein rehte hue sada safe rehte hain। jara bhi duniya ke vibration, unhein aakarshit nahin karte। sab complain samaapta ho jaati hain।

slogan:- bure ko achhe mein badal dena hi oonch braahmanon ki shreshtha shakti hai।