Daily Murli for Tuesday 19 September 2023

19-09-2023 praatahmurli om shanti "baapdaada"' madhuban

“meethe bachche - yaad ke purushaartha se hi karmaateet banenge isliye kabhi apne ko miya mitthu nahin samajhna, yaad ke bal se andar mein jo kamiyaan hain, unhein nikaalte rehna''

prashn:- sabhi bachchon ki avastha ko majboot banaane ke liye baap kaun si challenge karte hain?

uttar:- bachche, bhojan banaate hue poora samay yaad mein rahkar dikhaao - yeh baap bachchon ko challenge karte hain। shivbaaba ki yaad mein bhojan banaayenge to taakat bhar jaayegi, avastha bahut achhi ho jaayegi। parantu bachche bhool jaate hain। iske liye ek-do ko yaad dilaane ka purushaartha karo। double service karni hai। karmana ke saath-saath nar se naaraayan banaane ki bhi seva karo।

geet:- dheeraj dhar manuva…

om shanti। yeh kisne kaha aur kisko kaha? baap baith bachchon ko samjhaate hain। bhakti maarga mein yeh gaaya jaata hai। jab parampita paramatma aate hain, vahi aakar dheeraj dete hain, aur koi manushya dheeraj de nahin sakta। tum jaante ho ab sukh ke din aayenge। baap aaye hain sukhdhaam le chalne। yeh hai duhkhadhaam। yeh sab bhakti maarga ke geet hain। yahaan to baap sammukh baithe hain। bachchon ko kuchh kahne ki darkaar nahin padti। bachche jaante hain hamaare sukh ke din aa rahe hain। ham sukh ki raajdhaani svayan shreemat par sthaapan kar rahe hain, divine mat par chal rahe hain। ek hoti hai divine mat, doosri hoti hai undivine mat। divine mat ek hi hoti hai jise shreemat kaha jaata hai। undivine mat maana aasuri patit mat, divine mat maana daivi paavan mat। shreemat aur aasuri mat ko tum samajhte ho। divine kaha jaata hai paavan ko। undivine kaha jaata hai patit ko। yeh hai hi patit duniya। koi bhi paavan manushya hai nahin। paavan mat dene vaala ek hi patit-paavan baap hai। unko sab yaad karte hain। paavan srishti satayug ko, patit srishti kaliyug ko kaha jaata hai। yahaan sab hain hi undivine। divine father ek hota hai। patit duniya mein koi divine father hota nahin। yeh sangam ka yug hai। yeh yug tumhaare liye hai, duniya ke liye nahin hai। duniya to samajhti hai sangamayug aane mein bahut varsha pade hain। baap aate hi hain patit kaliyug ko paavan satayug banaane। aise to ve kumaar aur kumaariyaan bhi divine paavan hain parantu phir patit zaroor banna hai। vikaar se janma lete hain isliye is vikaari duniya mein koi divine nahin hote। divine nirvikaari ko kaha jaata hai। nirvikaari hote hain nirvikaari duniya mein। woh hai hi viceless, sampoorn nirvikaari duniya। jabki sampoorn nirvikaari duniya hai to sampoorn vikaari duniya bhi hogi। yeh hai sampoorn undivine duniya। sampoorn divine duniya satayug ko kaha jaata hai।

ab tum bachchon ko divine father ne dhairyavat banaaya hai। divine jeev aatma kaha jaata hai, sirf aatma ko divine nahin kah sakte। aatmaayen to niraakaari duniya mein rehti hain। divine manushya hote hain pavitra duniya mein। yeh hai hi apvitra duniya। apvitra duniya ko pavitra duniya banaana - yeh niraakaar divine father ka hi kaam hai। tum bachchon ko ab dheeraj milta hai - bachche, ab satayug aa raha hai। sukhdhaam sthaapan karne mein samay to lagta hai। phat se to duhkhadhaam vinaash ho sukhdhaam sthaapan nahin ho jaayega। tumko bhi dekho, kitna time laga hai! patit srishti kitni badi hai! tum bhi jab laayak bano na। tum khud hi kahenge ham abhi svarga mein jaane ke liye poore laayak nahin bane hain। poore laayak ban jaayen phir to karmaateet avastha ho jaae। parantu deh-abhimaan bahuton mein hone ke kaaran samajhte hain ham to sampoorn ban gaye hain। hamko shreemat ki darkaar hi nahin isliye yaad nahin karte। baap ki yaad se hi to shreshtha banenge। koi kah na sake ki ham nirantar baap ko yaad karte hain। andar mein koi yeh na samjhe ki ham to nirantar yaad mein rehte hain। yaad mein rehte rahe to baaki kya chaahiye। saara din bhi koi yaad mein rahe to karmaateet avastha ho jaae। bada mushkil hai baba ki yaad mein rehna। tum purushaartha kar rahe ho - sukhdhaam mein raajya-bhaagya lene liye। apne ko dekhna hai agar hamaare mein bahut vikaar hain, kamiyaan hain to ham itna oonch pad pa nahin sakenge। nirantar yaad ki daudi laga nahin sakenge। apne ko miyaan mitthu nahin samajhna hai ki main to sampoorn hoon। sampoorn hote hi hain shivaalay satayug mein। saara bhaarat shivaalay ban jaata hai। lakshmi-naaraayan ka raajya chalta hai। mandir mein raajya to nahin karte hain na। shivaalay satayug mein sab devi-devtaayen raajya karte hain phir pooja ke liye mukhya lakshmi-naaraayan ka chitra banaae unka mandir banaate hain। pahle number vaale ki hi pooja hoti hai। abhi unhon ke jad mandir hain। chaitanya mein jab raajya karte hain to vishwa ke maalik hain। bhal hain bhaarat mein hi parantu hain to vishwa ke maalik na। aur koi raajaai hi nahin। ham abhi phir se apna divine raajya sthaapan kar rahe hain।

paavan duniya mein jaane liye pahle zaroor paavan banna pade। mehnat lagti hai। jahaan tak jeena hai, yaad mein rehna hai aur gyaan ki varsha to hoti hi rehti hai। bhinna-bhinna prakaar se samjhaaya jaata hai। vaastav mein lakshmi-naaraayan ke sivaae divine athva pavitra kisko kah nahin sakte। baap svarga sthaapan karte hain phir bhi narka ban hi jaata hai। drama hi sukh aur duhkh ka bana hua hai। shankaraachaarya aakar apne dharma ki sthaapna karte hain phir bhi daal-daaliyaan puraani to hongi na। sannyaasiyon ki mahima hai। raamteertha, vivekaanand aadi gaaye jaate hain kyonki shankaraachaarya ke pichhaadi vaale hain। naye-naye aate hain to woh apna show karte hain। parantu inko shivaalay to nahin kahenge। shiv ka sthaapan kiya hua satayug ek hi hai। manushya in baaton ko bilkul nahin jaante। aise hi sirf sunne se koi samajh na saken। pahle to 7 roz aakar em object ko samajhna hai। aur koi padhaai ke liye aise nahin kaha jaata ki pahle 7 roz samjho। yeh ek hi paathshaala hai jahaan lakshya diya jaata hai। pahle-pahle to father ko samjho।

baap kehte hain main bachchon ki seva karne aaya hoon। jo kalpa pahle vaale hain, vahi aayenge। jab tak nishchaybuddhi nahin bane hain, tab tak buddhi mein aayega nahin isliye baba poochhte hain kahaan tak nishchay hua hai? yeh koi gaanvade ka satsang nahin hai। aur satsangon mein to kahenge phalaana mahaatma geeta sunaate hain, phalaana ved sunaate hain। yahaan koi mahaatma aadi nahin hai। yahaan to baap baith samjhaate hain। pahle jab tak nishchay nahin tab tak kya samjhen। vahaan satsangon aadi mein samjhenge yeh to phalaana ved sunaate hain, raaj-vidya padhaate hain। yahaan to vedon-shaastron athva raaj-vidya ki koi baat nahin। tum jaante ho baba in dvaara padha rahe hain। jab tak yeh nahin samjha hai to kya karenge? aur hi vaayumandal ko kharaab kar denge। yahaan tumhaare mein bhi aise nahin hai ki sab shivbaaba ki yaad mein sunte hain aur samajhte hain shivbaaba brahma dvaara padhaate hain। nahin, shivbaaba ki padhaai hai… yeh kuchh bhi samajhte nahin। bada mushkil koi yathaartha reeti samajhte hain। padhaane vaala shivbaaba hai - yeh yaad ho aur saara din buddhi mein rahe ki ham student hain to number one chale jaayen। parantu tumhaare mein bhi nambarvaar hain। baba kehte hain mujh padhaane vaale ko yaad karo। main hi baap, teacher, guru hoon। teenon ko ikattha yaad karna hai। laukik sambandh mein to baap alag, teacher alag, guru alag hote hain। yahaan ek ko hi yaad karna hai aur hai bahut sahaj। parantu maaya yaad rahne nahin deti। ghadi-ghadi buddhiyog tod deti hai। tum bachche aapas mein baithte honge। samjho, koi masheen chalaate hain athva makkhan nikaalte hain to shivbaaba ko yaad kar masheen chalaate hain? shivbaaba ki yaad mein baba ke yagya ke liye makkhan nikaal raha hoon। kitni khushi ki baat hai। yagya ke liye bhojan banaata hoon। khushi hoti hai na। parantu phir ghadi-ghadi bhool jaate hain phir purushaartha karna pade khud ka। ek-do ko yaad karaane ka purushaartha karaane vaala chaahiye। phir bhi shivbaaba ko yaad kar bhojan banaayenge to taakat bhar jaayegi। tumhaari avastha bahut achhi ho jaae parantu aise hota nahin hai। brahma bhojan ki to bahut mahima hai, parantu jab aatma shivbaaba ki yaad mein rah banaaye। shaktiyon ka aisa bhandaara ho। yaad mein rah bhojan banaayen tab to shakti mile। woh bhi shaktiyon ki buddhi mein nahin aata hai। nahin to purushaartha karen। baba ko to dil hoti hai apne haath se shivbaaba ko yaad karte bhojan banaaoon। practice karni hai। dekhen, yaad thahar sakti hai? baba challenge dete hain jo bhi bhandaare mein hain, koshish karo। baba jaante hain ki ek ghanta bhi yaad nahin kar sakte। yaad vaale gyaanvaan hon to double service mein lag jaaen। jab tak kaante ko phool na banaayen to kuchh kaam ke nahin hain। raajaai ke laayak woh bante jo nar ko naaraayan banaane ki service karte। jitna takdeer mein hai woh apne purushaartha se takdeer ko paate rehte hain। baap to sabko kehte hain jitna karenge, jo karenge, so paayenge।

apne most beloved baap ko yaad karna hai। yaad ki hi mehnat hai। baba bhi batlaate hain main bahut upaay karta hoon parantu ho nahin sakta। bahut mehnat hai। mehnat karte-karte ant mein karmaateet avastha hogi। phir saakshaatkaar karte rahenge। maaya nahin aayegi। yahaan baithe-baithe sab divya drishti mein dekhte rahenge। abhi to television mein dekhte hain। television koi divya drishti nahin hai। vinaash ka saakshaatkaar, vaikuntha ka saakshaatkaar television mein nahin dekh sakenge। jitna jo gyaani aur yogi hai unko to vaikuntha ki raajdhaani dekhne mein aati rahegi। bigar television rakhe tum jarmani, london aadi dekhte rahenge। television se yeh divya chakshu ka saakshaatkaar wonderful hai। sachchi dil se baap ki service mein lagna hai tab maza hai। buddhi bhi kehti hai baba ant mein bahut khaatiri karenge। ghumaana, phiraana, bahlaana yeh khaatiri hai na। aisa banne ke liye laayak bhi banna chaahiye na। laayak banaane vaale ko yaad karne se hi laayak bante jaate hain। jitna yaad karenge aur svadarshan chakra phirta rahega to faayda hai। beej ko yaad karne se jhaad bhi yaad aayega। yeh baaten sivaae tumhaare koi bhi samajh na sake। is yaad aur gyaan se ham itna jama karte hain। vahaan yeh pata nahin hoga ki yeh kahaan se varsa mila hai। yeh thode hi samajhte hain ki yeh hamaare sangam ki kamaai hai। baadshaahi mil jaati hai। tum sada sukhi rehte ho। badi bhaari manzil hai। abhi tum divine bante ho। saari duniya undivine hai। tum manushya se devta divine ban rahe ho। manushya ko devta banaane vaala ek hi god father hai। father akshar kehna bada sahaj hai। koi bhi boodha bujurga dekhenge to unko baba va pita ji kahenge। boodha, boodhe ko dekhenge to bhaai samjhenge। chhote, bade ko dekhenge to baap samjhenge। niraakaar baap ka to koi ko pata nahin hai। sirf kah dete hain god father। yeh nahin samajhte hain ki ham aatma hain, hamaara baap woh hai। baap zaroor varsa deta hoga। abhi tum jaante ho hamaara baap hamko varsa de rahe hain। is varse ke liye hi ham baar-baar pukaarte the, praarthana karte the। ab vahi padha rahe hain। abhi ham praarthana athva bhakti karne se chhoote। bade maje ki knowledge hai। kehte hain aap hamaare behad ke baap ho phir hamko chhod laukik baap ke paas buddhi kyon jaati hai? parantu kiski takdeer mein nahin hai to buddhi mein baithta nahin। khud hi kehte hain hamaari takdeer mein raajayog ki baadshaahi nahin hai, to baba kya kare? kyon nahin takdeer banaate ho? takdeer banaane mein to koi ko mana nahin hai। takdeer mein nahin hai to baba ko chhod dete। phir maaya billi buddhi mein ghotaala daal deti hai। baap bhi kya kare? maaya billi par jeet paani hai। kaam-kaaj karte shivbaaba ki yaad rahe to bahut faayda ho jaae। ek minute bhi yaad karne se bada faayda ho sakta hai। ek-do ko saavdhaan karo। phir koi maane ya na maane। baba yuktiyaan bahut batlaate hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek-do ko baap ki yaad dilaane ka purushaartha karna hai। baap, teacher, satguru teenon ko saath-saath yaad karna hai। bhojan banaate va khaate samay yaad mein zaroor rehna hai।

2) sachche dil se baap ki service mein lagna hai। kaanton ko phool, manushya ko devta banaane ki seva karni hai।

vardaan:- vyakta bhaav se oopar rah pharishta ban udne vaale sarva bandhanon se mukta bhav

deh ki dharni vyakta bhaav hai, jab pharishte ban gaye phir deh ki dharni mein kaise aa sakte। pharishta dharti par paanv nahin rakhte। pharishta arthaat udne vaale। unhein neeche ki aakarshan kheench nahin sakti। neeche rahenge to shikaari shikaar kar denge, oopar udte rahenge to koi kuchh nahin kar sakta। isliye kitna bhi koi sundar sone ka pinjada ho, usmein bhi phansana nahin। sada svatantra, bandhanmukta hi udti kala mein ja sakte hain।

slogan:- asambhav ko sambhav kar saphalta ki anubhooti karne vaale hi saphalta ke sitaare hain।