Daily Murli for Wednesday 27 September 2023

27-09-2023 praatahmurli om shanti "baapdaada"' madhuban

“meethe bachche - kaalon ka kaal aaya hai tum sabko vaapis le jaane, isliye yaad se vikarmon ka bojha khatma karo, apni deh se moh nikaal do''

prashn:- bhakton ki kaun-si pukaar jab baap sun lete hain to bhakta khush hone ke bajaae duhkhi hone lagte hain?

uttar:- bhakton par jab duhkh aata hai tab kehte hain - he bhagwan, mujhe is duhkh ki duniya se le chalo, meri is patit duniya mein darkaar nahin lekin jab baap pukaar sunkar le jaane ke liye aate hain, tab rote hain। doctor ko kehte hain aisi davaai do jo ham tandaroosta ho jaaen।

geet:- doordesh ka rahne vaala…

om shanti। doordesh mein baap bhi rehte hain aur tum bachche bhi rehte ho। ab yeh baap yahaan kyon aaya hai? baap ko kyon yaad karte hain - he bhagwan aao, aakarke hamko vaapis le jaao? yeh aatma kehti hai apne ghar mukti-dhaam le jaao। yeh to jaise kaalon ke kaal ko pukaarte hain। bhakti maarga mein samajh nahin hai ham kisko pukaarte hain ki hamko is patit duniya ke sambandh se chhudaakar saath le chalo, hamko yahaan rahne ki darkaar nahin hai aur phir koi ki aatma jab shareer chhodti hai to kitne duhkhi hote hain, rote peette hain। ek taraph to bulaate hain - baba, aakarke hamko yahaan se le jaao, is shareer se mukta karo। parantu jab mukta karte hain to rote-chillaate hain। bhakti maarga mein pukaarte hain parantu samajhte nahin hain। saavitri satyavaan ki kahaani hai। woh to ek ki aatma ko le ja rahe the, parantu saavitri le jaane nahin de rahi thi। manushya jab shareer chhodte hain to shareer mein moh hone ke kaaran aatma chhodna nahin chaahti। doctor ko kehte hain aisi davaai do jo ham tandarusta ho jaaen। shareer ko ham chhodna nahin chaahte। saath mein phir kehte - bhagwan aao, aakar hamko saath le jaao। wonderful baat hai na। abhi tum khushi se chalte ho। manushyon ka to duniya mein mitra-sambandhiyon aadi mein moh hai। ab poochhte hain - kya tumko mitra-sambandhiyon aadi se chhudaaoon? le to jaaoon phir tum in sambandhiyon ki yaad chhodo। antakaal agar bachchon aadi ko simrenge to phir aisa janma mil jaayega। baba kehte hain tum aatmaon ko is shareer se alag kar main le jaaoonga phir tumko mitra-sambandhiyon aadi ki yaad to nahin padegi? pichhaadi mein ek baap ko hi yaad karna hai। punarjanma mein to phir yahaan aana nahin hai isliye deh sahit sabko bhoolte jaao। mujh ek baap ko yaad karo। jab tak tum pavitra nahin banenge tab tak tumko le nahin ja sakta hoon। ab main tum aatmaon ko lene aaya hoon parantu tumhaare oopar vikarmon ka bahut bojha hai। yeh aatmaon se baat kar rahe hain। baap paramdham se aaye hain, paraaye desh mein। apna desh svarga jo sthaapan karte hain, usmein to unko aana nahin hai। yahaan tum duhkhi hokar bulaate ho mujhe to ek hi samay aakar sabhi aatmaon ko vaapis le jaana hai। chaahe khushi se chalo, chaahe naaraajgi se chalo। chalna hai zaroor। behad ka baap kaalon ka kaal aatmaon ko vaapis le jaate hain। goya sabhi manushyon ka vinaash karne aate hain। pati-patni hote hain, patni ka pati mar jaae to kitna roti hai। abhi kehte hain hamko le chalo, humein kuchh nahin chaahiye। parantu tum patiton ko le nahin ja sakte isliye paavan banaane aaya hoon। paavan tab banenge jab apne ko ashareeri samjhenge। deh sahit deh ke sab sambandh bhoolenge। mujh ek baap ko yaad karenge, to tumhaare vikarma vinaash honge। yukti to bahut achhi batlaata hoon - kalpa-kalpa। tum jaante ho yeh sab shareer khaak ho jaayenge। holika hoti hai to usmein dhaaga jalta nahin hai to aatma bhi jalti nahin। baaki is bhambhor ko aag lagni hai। sabhi shareer jalkar khaak ho jaayenge aur aatma shuddh ho jaayegi।

aatmaon ko shuddh banne ke liye nirantar dehi-abhimaani banne ka purushaartha karna hai। deh hote bhi apne ko aatma samajh baap ke saath yog lagaana hai। jaise sannyaasi log brahm athva tatva se yog lagaate hain, kehte hain ham tatva mein leen ho jaayenge। tatva se buddhiyog lag jaata hai। aise nahin ki shareer chhod dete hain। samajhte hain tatva se athva brahm se ham yog lagaate-lagaate brahm mein leen ho jaayenge isliye ham unko brahm gyaani, tatva gyaani kehte hain। tatva ka gyaan hai। tumko gyaan hai ham aatmaayen tatva mein rehti hain। woh samajhte hain ham us tatva mein leen ho jaayenge। agar kahen ham jaakar vahaan rahenge, to bhi theek hai। aatma leen to hoti nahin hai। budbude ka misaal dete hain lekin woh to wrong hai। jyoti mein leen hone ki baat hi nahin। avinaashi aatma mein saara part bhara hua hai jo kabhi vinaash ho nahin sakta। sannyaasi vikaaron ka sannyaas karte hain, baaki vaapis to koi jaate nahin, yahaan hi punarjanma lete rehte hain। vriddhi hoti jaati hai। sabko sato, rajo, tamo se paas hona hi hai। drama mein yeh sab noondh hai। abhi to dekho beemaariyaan bhi kitni anek prakaar ki nikli hain, pahle itni nahin thi। drama mein yeh saari noondh hai। tum bachche jaante ho - baba aaya hi hai sab aatmaon ko vaapis le jaane। kehte hain - baba, hamko vaapis le chalo। mukti-jeevanmukti to sabko milni hai। parantu sab satayug mein to nahin aa sakte। jo-jo jis samay aate hain, usi samay us dharma mein hi phir aana padega। tum jaante ho phalaane-phalaane dharma, phalaane time par aate hain। baba bhi kalpa pahle muaaphik aaya hua hai, itni sab aatmaon ko vaapis le jaayenge। is dharni ko kitni khaad milni hai। nai duniya ko bhi khaad chaahiye na। to sab manushya, jaanvar aadi khatma ho khaad ban jaayenge phir satayug mein kitna achha phal dete hain, jo tum bachchon ne saakshaatkaar bhi kiya hai।

tum bachche jaante ho - baba kaalon ka kaal hai। sab kehte hain - baba, ham khushi se aapke saath chalte hain, hamko le chalo। hamko yahaan bahut duhkh hai। yeh hai hi duhkh dene vaali duniya। duhkhadhaam mein ek-do ko duhkh dete rehte hain। apaar duhkh hain, ab tumko sukh mein le jaane aaya hoon। ab ek ko yaad karenge to varsa pa sakenge। nahin to raajaai ka varsa poora pa nahin sakenge, phir praja mein chale jaayenge। baap aakar raajaai ka sukh dete hain, aur koi bhi dharma sthaapak raajdhaani sthaapan nahin karte hain। yeh to raajdhaani sthaapan kar rahe hain gupta vesh mein। koi ko pata nahin hai ki satayug mein lakshmi-naaraayan ki raajdhaani kaise sthaapan hui? shareerdhaari devtaayen kahaan se aaye? jabki kaliyug mein asur the। asuron aur devtaaon ki ladaai to chali nahin hai। na ladaai ki baat hai, na vikaar ki kataari chalti hai। phir kyon dikhaate hain ladaai lagi? moonjh gaye hain। srishti to vahi hai sirf samay badalta hai। yeh hai behad ka din, behad ki raat। satayug-treta ko din kaha jaata hai, vahaan to ladaai hoti nahin। parantu woh raajdhaani unhon ko kaise mili? kaliyug mein to raajdhaani hai nahin। kehte hain - baba, wonderful hai aapki sthaapna ka kartavya! itne bachchon ko sukhi banaate ho। baaki haan, apne-apne purushaartha anusaar oonch pad pa sakte hain। tum jaante ho 5 hajaar varsha baad parampita paramatma aate hain। bhal karke koi prabhu, koi god kehte hain, pita to hai na। pita kehna kitna achha hai। eeshvar hamaara pita hai। sirf prabhu kahne se itna maja nahin aayega। god kahne se sarvavyaapi samajh lete hain। father kaha jaae to sarvavyaapi kah na saken। ab tum aatmaayen sun rahi ho। samajhti ho hamaara baba aaya hua hai, hamko yog se pavitra bana rahe hain। to baap, teacher, satguru ko yaad karna pade। yahaan bachchon ko bhaasna aati hai sammukh rahne se। ham to aatma hain, is shareer se part bajaate hain। baba hamko lene aaye hain। ham purushaartha karte hain baba se yog lagaayen। baba ko yaad karte-karte baba ke paas chale jaayenge। koi sannyaasi jo bahut uttam hote hain to woh bhi aise baithe-baithe shareer chhod dete hain। samajhte hain ham aatma jaakar brahm mein leen ho jaayengi। sabhi moksha athva mukti ke liye hi purushaartha karte hain kyonki sansaar mein bahut duhkh hai, isliye moksha athva mukti chaahte hain। unhon ko yeh maaloom nahin rehta ki duniya ka chakra phirna hai। hamaara part zaroor avinaashi hona chaahiye।

tumhaari buddhi jinna misal honi chaahiye। jinna ki kahaani kehte hain na, bola - hamko kaam do, nahin to kha jaayenge। phir usko kaam diya - seedhi chadho aur utro। tumko bhi baap kehte hain mere saath buddhiyog lagaao, nahin to maaya jinna kha jaayegi। maaya hai jinna, yog lagaane nahin deti hai। achhe-achhe pahalvaan bahaadur ko bhi maaya kachcha kha jaati hai। tum jaante ho - baba sikhlaane aaya hua hai। kehte hain - bachche, ab sammukh aaya hoon, mujhe ab yaad karo, nahin to maaya jinna kha jaayegi। yeh kaam diya jaata hai tumhaare hi kalyaan ke liye। tum vishwa ke maalik ban jaayenge। apne ko aatma samajh shareer ka bhaan chhod dena hai। sannyaasi maana deh sahit sab sannyaas। baaki apne ko aatma samajhna hai। tum jaante ho gyaan aur yogbal se baba hamko so devi-devta banaate hain। raajaai sthaapan ho rahi hai। yeh raajayog hai। yeh baaten shaastron mein nahin hain। paandav itna raajayog seekhe phir kya hua? bas, jaakar pahaad par gal mare? phir kaise pata pade ki raajaai kaise sthaapan hui? ab in baaton ko tum samajh sakte ho। baba kehte hain ab mujhe yaad karo aur trustee bankar shreemat par chalo। har baat mein raay lete raho। bachchon aadi ki shaadi karaani hai, mana thode hi karte hain। har ek ka hisaab-kitaab alag hai। jaise-jaise jo bachche hain unka hisaab dekh raay di jaati hai। kahenge bachchon ko shaadi karaani hai bhal karo। paisa tumhaare paas hai to makaan bhal banaao। mana nahin hai। makaan aadi banaae bachchon ki shaadi aadi karaakar hisaab chuktu karo।

abhi samajhte hain kaun achha pad pa sakte hain। kitna difficult hai। ismen badi dooraandesh buddhi chaahiye। raajaai paani hai - kam baat thode hi hai! jab tak kaam khalaas ho jaae, bachchon aadi ka hisaab chuktu kar chhutti karo। koi se hisaab hai, karja hai woh to pahle utaaro। yeh bhi samajhne ki baat hai। kanyaaon ko koi bojha nahin hota hai। creator ko sab kaam khalaas karna hai। phir baba vaaris bana sake। maaya bhi achhi reeti khatkaayegi। parantu tum yeh bhi samajhte ho baba to bahut meetha hai। sabko pavitra banaae vaapis le jaane aaye hain। aise baap mein to bahut love hona chaahiye। meethi cheez hai na। satayug mein apaar sukh hain isliye svarga ko sab yaad karte hain। koi marta hai to kehte hain svarga padhaara। kitna meetha naam hai! jo past ho jaata hai uska phir bhakti maarga mein naam baala rehta hai। satayug-treta mein to yeh baaten nahin hoti। to baba ne jinna ka kaam de diya hai - apne ko aatma samajh mujhe yaad karo, nahin to maaya roopi jinna tumko kha jaayega। yaad karna pade। aatma nishchay kar baap ko yaad karna hai। haan, shareer nirvaah arth karma to karna hi hai। 8 ghanta to shareer nirvaah ke liye chaahiye kyonki tum karmayogi ho। phir tum purushaartha karo। 8 ghanta apne purushaartha ke liye bhi nikaalo। apne ko aise samjho - bas, ham baba ke ban gaye। yeh shareer to puraana hai, isse mamatva mit jaana hai। mitte-mitte, yaad karte-karte agar kiska mamatva rah gaya to raajya bhaagya pa nahin sakenge। vishwa ka maalik banne mein mehnat chaahiye।

baba aaya hai duhkhadhaam se liberate kar le jaane isliye unko liberator aur guide, patit-paavan kehte hain। panda bhi hai। samjhaana hai raavan raajya ka vinaash aur raamraajya ki sthaapna karne baap ko aana padta hai। vahi shanti ki sthaapna karte hain, unke jo madadgaar bante hain unko pees prize milti hai। pees sthaapan karne vaala hi pees-full raajya dete hain। vahi most beloved baba hai jo hamko kalpa-kalpa varsa dete hain, jitna shreemat par chalenge to shreshtha banenge। tum jaante ho shri shri se ham shri lakshmi, shri naaraayan bante hain। 21 janmon ke liye sooryavanshi-chandravanshi raajdhaani sthaapan ho rahi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dooraandeshi ban karmabandhan ko samaapta karna hai। koi bhi hisaab-kitaab va karja hai to use utaar halka ban vaaris ban jaana hai।

2) karmayogi ban karma bhi karna hai, saath-saath 8 ghanta sva ke purushaartha mein dena hai। sabhi se mamatva zaroor mitaana hai।

vardaan:- pravritti mein rehte bhi samarpit ho seva ki dhun mein rahne vaale baapdaada ke diltakhtansheen bhav

jo bachche pravritti mein rehte bhi samarpit hain unke sahayog se seva ka vriksha phaleebhoot ho jaata hai। unka sahayog hi vriksha ka paani ban jaata hai। jaise vriksha ko paani milne se achha phal nikalta hai aise shreshtha sahayogi aatmaon ke sahayog se vriksha phaleebhoot hota hai। aise seva ki dhun mein sada rahne vaale, pravritti mein rehte samarpit ho chalne vaale bachche baapdaada ke diltakhta nasheen bante hain।

slogan:- kam se kam samay mein sankalpon ko modne aur brake lagaane ki yukti seekh lo to buddhi ki shakti vyartha nahin ja sakti।