Daily Murli for Saturday 2 December 2023

02-12-2023 praatahmurli om shanti "baapdaada"' madhuban

“meethe bachche - samay prati samay gyaan saagar ke paas aao, gyaan ratnon ka vakhar (saamaan) bharkar phir baahar jaakar delivery karo, vichaar saagar manthan kar seva mein lag jaao''

prashn:- sabse achha purooshaartha kaun-sa hai? baap ko kaun-se bachche pyaare lagte hain?

uttar:- kisi ka bhi jeevan banaana, yeh bahut achha purooshaartha hai। bachchon ko isi purooshaartha mein lag jaana chaahiye। kabhi agar koi bhool ho jaati hai to uske badle mein khoob service karo। nahin to woh bhool dil ko khaati rahegi। baap ko gyaani aur yogi bachche hi bahut pyaare lagte hain।

geet:- jo piya ke saath hai…

om shanti। bachche samajh sakte hain ki sammukh murli sunna va tape mein sunna va kaagaj par padhne mein farka zaroor hai। geet mein bhi kehte hain jo piya ke saath hai… barsaat to sabke liye hai parantu saath mein rahne se baap ke expression ko samajhne, bhinna-bhinna direction ko jaanne ka bahut phaayda hota hai। parantu aise bhi nahin kisko baith jaana hai। vakhar (saamaan) bhara aur jaakar service ki। phir aaya vakhar bharne। manushya saamaan khareed karne jaate hain, bechne ke liye। bech kar phir saamaan lene aate hain। yeh bhi gyaan ratnon ka vakhar hai। vakhar lene vaale to aayenge na। koi delivery nahin karte hain, puraane vakhar par hi rehte hain, naya lene nahin chaahte hain। aise bhi besmajh hain। manushya teerthon par jaate hain, teertha to nahin aayenge na kyonki woh to jad chitra hain। in baaton ko bachche hi jaante hain। manushya to kuchh bhi nahin jaante। bahut bade-bade guru log shri shri mahaamandaleshvar aadi jigyaasuon ko teerthon par le jaate hain, triveni par kitne jaate hain। nadi par jaakar daan karne ko punya samajhte hain। yahaan bhakti ki to baat hi nahin। yahaan to baap ke paas aana hai to bachchon ko samajhkar phir samjhaana hai। pradarshani mein bhi manushyon ko samjhaana hai। yeh jo 84 janmon ka chakra lagaate hain yeh to bachche jaante hain, sab nahin lagaate hain। ismen samjhaane ki badi yukti chaahiye। is chakra mein hi manushya moonjhate hain। jhaad ka to kisko pata hi nahin hai। shaastron mein bhi chakra dikhaate hain। kalpa ki aayu chakra se nikaalte hain। chakra mein hi rola hai। ham to poora chakra lagaate hain। 84 janma lete hain, baaki islaami, bauddhi aadi woh to baad mein aate hain। ham kaise us chakra se sato, rajo, tamo mein paas karte hain - woh gole mein dikhaaya hua hai। baaki aur jo aate hain islaami, bauddhi aadi unka kaise dikhaaven? woh bhi to sato, rajo, tamo mein aate hain। ham apna viraat roop bhi dikhaate hain - satayug se lekar kaliyug tak poora round le aate hain। choti hai braahmanon ki phir mukh ko satayug mein, baahon ko treta mein, pet ko dvaapar mein phir taangon ko last mein khada karen। apna to viraat roop dikhaayen। baaki anya dharma vaalon ka kaise dikhaayen? use bhi shuru karen to pahle satopradhaan, phir sato-rajo-tamo। to isse siddha ho jaayega ki kabhi bhi koi nirvaan mein nahin gaya hai। unko to is chakra mein aana hi hai। harek ko sato-rajo-tamo mein aana hi hai। ibraaham, buddha, Christ aadi bhi to manushya the। raat mein baba ko bahut khyaal chalta hai। khyaalaat mein phir neend ka nasha ud jaata hai, neend fit jaati hai। samjhaane ki badi achhi yukti chaahiye। unka bhi viraat roop banaana pade। unka bhi pair pichhaadi mein le jaayen phir likhat mein samjhaayen। bachchon ko samjhaana hai Christ jab aate hain unko bhi sato-rajo-tamo se paas karna padta hai। satayug mein to woh aate nahin। aana to baad mein hai। kahenge Christ heaven mein nahin aayega! yeh to bana-banaaya khel hai। tum jaante ho Christ ke aage bhi dharma the phir vo hi repeat karna hai। drama ka raaz samjhaana hota hai। pahle-pahle to baap ka parichay dena hai। baap se kaise second mein varsa milta hai? gaaya bhi hua hai second mein jeevanmukti। dekho, baba ke kitne khyaalaat chalte hain। baba ka part hai vichaar saagar manthan ka। god fatherly birth right, “now aar never'' akshar likha hua hai। jeevanmukti akshar likhna hai। likhat clear hogi to samjhaane mein sahaj hoga। jeevanmukti ka varsa mila। jeevanmukti mein raaja, raani, praja sab hain। to likhat ko bhi theek karna pade। bigar chitra bhi samjhaaya ja sakta hai। sirf ishaare par bhi samjhaaya ja sakta hai। yeh baba hai, yeh varsa hai। jo yogayukta honge woh achhi reeti samjha sakenge। saara madaar yog par hai। yog se buddhi pavitra hoti hai tab hi dhaarna ho sakti hai। ismen dehi-abhimaani avastha chaahiye। sab kuchh bhoolna pade। shareer ko bhi bhoolna hai। bas, ab hamko vaapis jaana hai, yeh duniya to khatma ho jaane vaali hai। is (baba) ke liye to sahaj hai kyonki inka dhandha hi yeh hai। saara din buddhi isi mein lagi hui hai। achha, jo grihastha vyavhaar mein rehte hain unko to karma karna hai। sthool karma karne se woh baaten bhool jaati hain, baba ki yaad bhool jaati hai। baba khud apna anubhav sunaate hain। baba ko yaad karta hoon, baba is rath ko khila rahe hain phir bhool jaata hoon to baba vichaar karte hain jabki main bhi bhool jaata hoon to in bichaaron ko kitni takleeph hoti hogi! is chart ko badha kaise sakte honge? pravritti maarga vaalon ke liye mushkil hai। unhon ko phir mehnat karni pade। baba samjhaate to sabko hain। jo purooshaartha karte honge woh result likh bhej sakte hain। baba jaante hain barobar difficult hai। baba kehte hain raat ko mehnat karo। tumhaara thak saara utar jaayega, agar tum yogayukta ho vichaar saagar manthan karte rahenge to। baba apna anubhav bataate hain - kab aur baaton taraph buddhi chali jaati hai to maatha garam ho jaata hai। phir un toofaanon se buddhi ko nikaal is vichaar saagar manthan mein lag jaata hoon to maatha halka ho jaata hai। maaya ke toofaan to anek prakaar ke aate hain। is taraph buddhi lagaane se woh thakaavat saari utar jaati hai, buddhi refresh ho jaati hai। baba ki service mein lag jaate hain to yog aur gyaan ka makkhan mil jaata hai। yeh baba anubhav bata rahe hain। baap to bachchon ko bataayenge na - aise-aise hoga, maaya ke vikalpa aayenge। buddhi ko phir us taraph laga dena chaahiye। chitra uthaakar usi par khyaalaat karna chaahiye to maaya ka toofaan ud jaaye। baba jaante hain ki maaya aisi hai jo yaad mein rahne nahin deti। thode hain jo poora yaad mein rehte hain। badi-badi baaten to bahut karte hain। agar baba ki yaad mein rahen to buddhi clear rahe। yaad karne jaisa maakhan aur koi hai nahin। parantu sthool bojh bahut hone se yaad kam ho jaati hai।

bambai mein dekho pope aaya, kitni unki mahima thi jaise ki sabka bhagwan aaya tha। taakat vaale hain na। bhaaratvaasiyon ko apne dharma ka pata nahin hai। apna dharma hindu kehte rehte hain। hindu to koi dharma hi nahin hai। kahaan se aaya, kab sthaapan hua, kisko pata nahin hai। tumhaare mein gyaan ki uchhal aani chaahiye। shiv shaktiyon ko gyaan mein uchhal maarni chaahiye। unhonne to shaktiyon ko sher par dikhaaya hai। hai saari gyaan ki baat। pichhaadi mein jab tumhaare mein taakat aayegi to saadhu santa aadi ko bhi samjhaayenge। itna gyaan jab buddhi mein ho tab uchhal aa sakti hai। jaise paata gaanv mein kheti karne vaalon ko teacher padhaate hain to woh padhte nahin। unko kheti-baadi hi achhi lagti hai। aise aaj ke manushyon ko yeh gyaan do to kahenge yeh achha nahin lagta, hamko to shaastra padhne hain। parantu bhagwan saaph kehte hain jap, tap, daan, punya aadi se athva shaastra padhne se mere ko kisi ne nahin paaya hai। drama ko nahin jaante। woh thode hi samajhte hain naatak mein actors hain, part bajaane yeh chola liya hai। yeh hai hi kaanton ka jangal। ek-doosre ko kaanta lagaate, lootte maarte rehte hain। soorat bhal manushya ki hai parantu seerat bandar jaisi hai। baap baith bachchon ko samjhaate hain। koi naya sune to garam ho jaaye। bachche thode hi garam honge। baap kehte hain main bachchon ko hi samjhaata hoon। bachchon ko to maata-pita kuchh bhi kah sakte hain। bachchon ko baap chamaat bhi maare to doosra thode hi kuchh kar sakta। maat-pita ka to pharja hai bachchon ko sudhaarna। parantu yahaan law nahin hai। jaisa karma main karoonga mujhe dekh aur bhi karenge। to baba ne jo vichaar saagar manthan kiya woh bhi batlaaya। yeh pahla number mein hai, inko 84 janma lene padte hain। to aur bhi jo heads (dharma sthaapak) hain ve phir nirvaan mein kaise jaayenge। unko sato, rajo, tamo mein zaroor aana hai। pahla number mein lakshmi-naaraayan hain jo vishwa ke maalik hain। unhon ko bhi 84 janma lene padte hain। manushya srishti mein jo highest new man hai unke saath new women bhi chaahiye। nahin to women bigar paidaais kaise hogi? satayug mein new man hain yeh lakshmi-naaraayan। old se hi new hote hain। yeh to all-round part vaale hain। baaki bhi sab sato se tamo mein aate hain, old bante hain phir old se new ho jaate hain। jaise Christ pahle new aaya phir old bankar gaya phir new hokar aayega apne time par। yeh baat badi samajhne ki hai। ismen yog achha chaahiye। poora surrender bhi chaahiye tab hi varse ka hakdaar ban sake। surrender hoga to phir baba direction bhi de sakenge ki aise-aise karo। koi surrender hai phir kehta hoon ki vyavhaar mein bhi raho to buddhi ka maaloom pade। vyavhaar mein rehte hue gyaan uthaao, paas hokar dikhaao। grihastha mein nahin jaana। brahmachaari hokar rehna to achha hai। baba harek ka hisaab bhi poochhte hain। mama-baba ki paalna li hai to phir karz bhi utaarna hai to bal milega। nahin to baap bhi kahega ki hamne itni mehnat kar paalna ki aur hamko chhod diya। harek ki rag dekhni padti hai phir direction diye jaate hain। samjho inse bhool ho jaati hai to baap usko abhul karaae theek kar dete hain। yeh bhi qadam-qadam shreemat par chalte rehte hain। kab nuksaan ho jaata hai to samajhte hain drama mein tha। aage phir aisi baat honi nahin chaahiye। bhool to apne dil ko khaati hai। bhool ki hai to uski evaj mein phir bahut service mein lagna chaahiye, purooshaartha bahut karna chaahiye। koi ka jeevan banaana - yeh hai purooshaartha।

baba kehte hain mujhe yogi aur gyaani sabse pyaara hai। yog mein rahkar bhojan banaaye, khilaaye to bahut unnati ho sakti hai। yeh shivbaaba ka bhandaara hai। to shivbaaba ke bachche zaroor aise yogayukta honge। dheere-dheere avastha oonch hoti hai। time zaroor lagta hai। harek ka karmabandhan apna-apna hai। kanyaaon par koi bojh nahin। haan, bachchon par hai। bade bachche ho gaye hain to maat-pita ko bojh padta hai। baap ne itna samjhaaya, itna samay paalna ki hai to unhon ki paalna karni pade। hisaab chuktu karna hai to unki bhi dil khush hogi। sapoot bachche jo hote hain to woh musaaphiri se lautne par sab kuchh baap ke aage rakhte hain। karja utaarna hai na। bahut samajhne ki baaten hain। oonch pad paane vaale hi sher muaaphik uchhalte rahenge। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yog mein rahkar bhojan banaana hai। yog mein hi rahkar bhojan khaana aur khilaana hai।

2) baba ne jo samjhaaya hai us par achhi reeti vichaar saagar manthan kar yogayukta ho auron ko bhi samjhaana hai।

vardaan:- sva parivartan aur vishwa parivartan ki jimmevaari ke taajdhaari so vishwa raajya ke taajdhaari bhav

jaise baap ke oopar, praapti ke oopar har ek apna adhikaar samajhte ho, aise sva-parivartan aur vishwa parivartan donon ke jimmevaari ke taajdhaari bano tab vishwa raajya ke taaj adhikaari banenge। vartamaan hi bhavishya ka aadhaar hai। check karo aur knowledge ke darpan mein dekho ki brahman jeevan mein pavitrata ka, padhaai aur seva ka double taaj hai? yadi yahaan koi bhi taaj adhoora hai to vahaan bhi chhote se taaj ke adhikaari banenge।

slogan:- sada baapdaada ki chhatrachhaaya ke andar raho to vighna-vinaashak ban jaayenge।