Daily Murli for Friday 26 January 2024

26-01-2024 praatahmurli om shanti "baapdaada"' madhuban

“meethe bachche - tumhein ab shantidham aur sukhdhaam jaane ka sahaara mila hai, tum baap ko yaad karte-karte paavan ban, karmaateet ho apne shantidham chale jaayenge।''

prashn:- baap ki puchkaar kin bachchon ko milti hai? baap ka show kaise karenge?

uttar:- jo bachche vaphaadaar, serviceable aur bahut meethe hain, kabhi kisi ko duhkh nahin dete aise bachchon ko baap ki puchkaar milti hai। jab tum bachchon ka aapas mein bahut-bahut love rahe, kabhi bhi bhoolen na hon, mukh se duhkh dene vaale bol na niklen, sada bhaai-bhaai ka roohaani pyaar rahe tab baap ka show kar sakenge।

geet:- mujhko sahaara dene vaale…

om shanti। geet to bachchon ne bahut baari suna hai। bachche samajhte hain ki aavaagman mein ham kitne bhatke hain। drama ke plan anu-saar ek shareer chhod doosra liya। sukhdhaam mein aapehi ek shareer chhodte the, doosra lete the - khushi se। ab baap khushi se shareer chhodne liye samjha rahe hain। bachche samajhte hain ham aatma paramdham se aai hain, ham aatma yahaan part bajaati hain। pahle-pahle aatma ka nishchay chaahiye ki ham aatma avinaashi hain। bachchon ko samjhaaya hai sahaara dene vaala ek hi baap hai। baap ko yaad karne se bahut khushi hoti hai। yeh bahut samajhne ki baaten hain। pahle sab shantidham mein rehte hain phir pahle sukhdhaam mein aate hain। baap tumko sahaara dete hain। bachche tumhaara shantidham, sukhdhaam aaya ki aaya। yeh to nishchay hai ki ham aatma ek shareer chhod doosra lete hain। pahle se hi avinaashi part mila hua hai। tumko yeh 84 janmon ka part bajaana hai। baap bachchon se hi baat karte hain kyonki in baaton ko sivaae tumhaare aur koi jaante hi nahin। is purooshottam sangamayug par hi purooshottam banaane ke liye baap raasta bataate hain। aatma ko koi dar nahin hona chaahiye। ham to bahut oonch pad paate hain। tum sabhi janmon ko jaan gaye ho। yeh hai antim janma। aatma samajhti hai hamko sahaara mila hai shantidham-sukhdhaam mein jaane ke liye, to khushi se jaana chaahiye। parantu abhi yeh gyaan mila hai ki aatma patit hai, aatma ke pankh toot gaye hain। maaya pankh tod deti hai isliye vaapas ja nahin sakti। paavan zaroor banna hai। vahaan se neeche to aa gae parantu ab aapehi vaapas ja nahin sakte, sabko part bajaana hi hai। tumko bhi aise samajhna hai, ham bahut oonch kul ke hain। abhi hamko phir se oonch dynasty ka raajya bhaagya milta hai। phir ham is shareer ko kya karenge। hamko naya shareer to vahaan milna hai। aise apne se baaten karo। baap ne apna bhi parichay diya hai, rachna ke aadi-madhya-ant ka bhi raaz samjhaate hain ki aatma hi satopradhaan sato rajo tamo mein aati hai। ab phir aatma-abhimaani banna pade। aatma ko hi pavitra banna hai। baap ne kaha hai bas mujh ek ko hi yaad karo aur koi ko bhi yaad na karo। dhan-daulat, makaan, bachchon aadi mein buddhi gai to karmaateet avastha ko pa nahin sakenge। phir pad kam ho jaayega aur phir sajaayen bhi khaani pade। abhi ham aatma lautne vaali hain। paavan ban lautna hai। baap aaye hain paavan banaane to ham khushi se baap ko kyon nahin yaad karenge jo hamaare vikarma vinaash ho jaayen। khud yaad karte honge to doosron ko bhi kahne se teer lagega। isko vichaar saagar manthan kaha jaata hai। subah ko vichaar saagar manthan achha hota hai kyonki buddhi achhi hoti hai, refresh hote hain। bhakti bhi us samay hoti hai। geet hai raam sumir prabhaat more man… bhakti maarga mein to sirf gaate the। abhi baap ka direction hai ki savere-savere uth mujhe yaad karo। satayug mein to raam ko simarte nahin। yeh sab drama bana hua hai। baap aakar gyaan aur bhakti ka raaz samjhaate hain। pahle tum nahin jaante the isliye pattharbuddhi kaha jaata hai। satayug mein aise nahin kahenge। is samay hi kehte hain eeshvar tumhaari buddhi ko achha kare। yahaan ka gaayan bhakti maarga mein chalta hai। to baap bachchon ko bahut pyaar se samjhaate hain ki bachche tum mujh behad ke baap ko bhool gaye ho। tumko aadhaakalpa ke liye mainne hi behad ka varsa diya tha। tumko behad ka sannyaas mainne hi karaaya tha, mainne hi kaha tha ki yeh saari puraani duniya kabradaakhil honi hai। jo khatma hone vaali hai tum unko yaad kyon karte ho। mujhe tum bulaate hi ho ki baba hamko patit duniya se chhudaae paavan duniya mein le chalo। patit duniya mein karodon manushya hain। paavan duniya mein bahut thode hote hain। to kaalon ke kaal mahaakaal ko bulaate hain na। bhakton ne bhagwan ko bulaaya ki aakar bhakti ka phal do। hamne bahut dhakka khaaya hai। aadhaakalpa ki aadat padi hui hai to unko chhodne mein mehnat lagti hai। yeh bhi drama mein noondh hai। bachche nambarvaar purooshaartha anusaar apni karmaateet avastha ko paate hain - kalpa pahle muaaphik, phir vinaash ho jaayega। abhi to rahne ki hi jagah nahin hai। anaaj nahin, khaayen kahaan se। America mein bhi kehte hain karodon manushya bhookh mein marenge। yeh natural calamities to honi hi hai। ladaai lag jaae to anaaj kahaan se aayega। ladaai bhi bahut bhayaanak hoti hai। jo bhi saamaan unke paas taiyaar hai woh sab nikaalenge। natural calamities bhi madad karegi। unke pahle karmaateet avastha ko paana hai। saanvare se gora banna hai। kaam chita par baith saanvare ban gaye ho। ab baap khoobsoorat banaate hain। aatmaon ke rahne ka thikaana to ek hi hai na। yahaan aakar part bajaate ho। raam raajya aur raavan raajya ko cross karte ho।

ab baap ne bataaya hai puraani duniya ka ant hai, main aata hi hoon ant mein। jab bachche bulaate hain। puraani duniya ka vinaash zaroor hona hai। gaayan bhi hai mirooa maut... lekin baap ki shreemat par nahin chalenge to woh khushi ho nahin sakti। ab tum bachche jaante ho hamko yeh shareer chhod amarpuri mein jaana hai। tumhaara naam hi hai shakti dal, shiv shaktiyaan। phir tum prajaapita brahmaakumaar aur kumaariyaan ho। shiv ke to bachche ho, phir bhaai behen bante ho। prajaapita brahma dvaara hi rachna rachi jaati hai। brahma ko great-great grand father kehte hain। to baap aatmaon ko baith samjhaate hain। aatma hi shareer dvaara sab kuchh karti hai। aatma ke shareer ko maarte hain। to aatma kahegi hamne is shareer se phalaani aatma ke shareer ko maara। bachche patron mein likhte hain - ham aatma ne shareer dvaara yeh bhool ki। mehnat hai na। ismen vichaar saagar manthan karna hai। males ke liye bahut sahaj hai। bambai mein subah ko kitne ghoomne phirne jaate hain, tumko to ekaanta mein vichaar saagar manthan karna pade। baba ki mahima karte raho। baba kamaal hai aapki। dehdhaari ki mahima nahin gaai jaati hai। videhi oonche te ooncha bhagwan hai, woh kabhi apni deh nahin lete। khud ne bataaya hai ki main saadhaaran tan mein pravesh karta hoon। yeh apne janmon ko nahin jaante hain। tum bhi nahin jaante the। ab isne mere dvaara jaana hai to tum bhi jaan gaye ho। to yeh bhi practice hai। baap ko yaad karne se tumko bahut khushi hogi। jab apne ko aatma nishchay karenge to aatma ko hi dekhte rahenge। phir vikaar ki koi baat uth nahin sakti। baap kehte hain ashareeri bhav। phir criminal khyaalaat uthte hi kyon hain। shareer ko dekhne se gir padte hain। dekhna hai aatma ko। ham aatma hain, hamne yeh part bajaaya hai। ab baap ne kaha hai ashareeri bhav। mujhe yaad karo to paap kat jaayenge aur yaad ki yaatra par rahne se kamaai jama hogi। savere ka samay bahut achha hai। sirf baba ke sivaae aur kisko dekho bhi nahin। baaki yeh lakshmi-naaraayan hain em object। manamnaabhav, madhyaaji bhav - iska arth koi nahin jaante।

tum samjha sakte ho - bhakti hai hi pravriti maarga vaalon ke liye। woh nivriti maarga vaale jangal mein kya bhakti karenge। aage to yeh bhi satopradhaan the, us samay unhon ko sab kuchh jangal mein pahunchta tha। abhi to dekho kutiyaayen khaali padi hain kyonki tamopradhaan banne ke kaaran unhon ke paas kuchh pahunchta nahin hai। bhakton ki shraddha nahin rahi hai। isi kaaran ab dhandhe mein lag gaye hain। karodapti, padmapti hain। ab yeh to sab khatma hone vaala hai। aise nahin ki is sone se koi makaan aadi banenge। vahaan to sab kuchh naya hoga। anaaj bhi naya, nai duniya mein first class cheejen hoti hain। abhi to zameen sad gai hai jo anaaj bhi poora nahin nikalta hai। vahaan to saari zameen bhi tumhaari, saagar bhi tumhaara rehta hai। vahaan kitna shuddh bhojan khaate hain। yahaan to dekho jaanavron ko bhi pakaakar kha lete hain। vahaan to aisi baat hi nahin। to tum bachchon ko baba ka bahut shukriya maanna chaahiye। tum baap ko jaante ho aur phir auron ko bhi bataate ho ki baap ne kaha hai ki main saadhaaran boodhe tan mein, inki bhi vaanaprastha avastha mein pravesh karta hoon। vaanaprastha avastha mein hi vaapis jaana hai, yeh bhi kaayda hai, bhakti mein bhi yahi rasam chalti hai। yeh sab hai dhaaran karne ki baaten। koi to achhi reeti note kar dhaaran kar auron ko bhi sunaate hain। sunne se bahut maja aata hai kyonki ab sahaara mila hai।

tum jaante ho har ek aatma bhrakuti ke takhta par viraajmaan hai। aatma ke liye hi kehte hain bhrakuti ke beech chamakta hai ajab sitaara। aise to nahin kehte parampita paramatma shiv chamakta hai। parantu aatma chamakti hai। aatma bhaai-bhaai hai tab kehte hain hindustaani, paakistaani, bauddhi sab bhaai-bhaai hain। parantu bhaai ka arth samajhte nahin hain। tumhaara aapas mein kitna love hona chaahiye। satayug mein jaanavron ka bhi aapas mein love hai। tum bhaai-bhaai ho to kitna love hona chaahiye। parantu deh-abhimaan mein aane se ek do se bahut tang ho jaate hain। phir ek do ki glaani karte hain। is samay to tum bachchon ko aapas mein bahut ksheerkhanda hokar chalna hai। is samay jo tum yeh purooshaartha karte ho - 21 janma ksheerkhanda hokar chalte ho। agar koi ulta akshar mukh se nikal jaae to phauran kehna chaahiye aai em sorry kyonki hamko baba ka pharmaan hai ki bahut meetha hokar rehna hai। jo pharmaan nahin maanenge unko kaha jaayega eeshvar ka naapharmaanbardaar। kabhi bhi kisko duhkh nahin dena hai। baaki baba jaante hain sipaahi ki service hai to sachchi karaane ke liye kisko maarna bhi padta hai। military vaalon ko ladaai bhi karni padti hai। sirf apne ko aatma samajh maamekam yaad karo to beda paar ho jaayega। is puraani duniya ko kya dekhna। hamko to nai duniya ko dekhna hai। ab to shreemat se nai duniya sthaapan ho rahi hai, ismen aasheervaad ki koi baat nahin। teacher kabhi aasheervaad nahin karte। teacher to padhaate hain। jitna jo padhte hain, manners dhaaran karte hain, aisa pad paate hain। ismen bhi aisa hai। apna register aapehi dekhna hai ki ham kaise chalte hain। koi to bahut meetha hokar chalte hain। har baat mein raazi rehte hain। baba ne kaha hai tum aapas mein kachahri karo ki koi bhool to nahin hoti hai? parantu kachahri karne vaalon ko samajhna chaahiye - ham aatma hain, ham apne bhaai se poochhte hain is shareer dvaara koi bhool to nahin hui? kisko duhkh to nahin diya? baap kabhi duhkh nahin dete। baap to sukhdhaam ka maalik banaate hain। baap hai hi duhkh harta sukh karta। to tumko bhi sabko sukh dena hai। ulta sulta kabhi bhi bolna nahin hai। kabhi bhi law apne haath mein nahin uthaana hai। tumhaara kaam hai report karna। bahut meetha banna hai। jitna meetha banenge utna baap ka show karenge। baba pyaar ka saagar hai, tum bhi pyaar se samjhaayenge to tumhaari vijay hogi। baap kehte hain mere laadle bachche kabhi kisko duhkh nahin dena। aise bahut hain jo ulti sulti bhoolen karte hain, chugli karna, rees karna, hasad karna.. yeh bhi vikarma hai na।

baba kehte hain jo achha vaphaadaar, serviceable bachcha hoga woh hamko zaroor meetha lagega, unko puchkaar bhi denge। doosre ko nahin denge। phir kehte hain inki paas khaatiri hoti hai। yeh bada aadmi hai। aise bahut nuksaan karte hain। ulta sulta kaam karke dosh dharte hain। samaachaar aata hai phalaana beedi nahin chhodta.. baba kehte hain unko bhi samjhaana padta hai ki tum yogbal se vishwa ko paavan bana sakte ho to kya yeh nahin chhod sakte? baap ko yaad karo। baba avinaashi surgeon hai। aisi davaai denge jo sab duhkh door ho jaayenge। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan mein aakar ek do ko tang nahin karna hai, har baat mein raazi rehna hai। kabhi bhi chugli nahin lagaani hai, hasad, rees nahin karni hai। kisko duhkh nahin dena hai। aapas mein bahut meetha, kheerkhanda hokar rehna hai।

2) savere-savere uth pyaar se baap ko yaad karna hai। apne aapse baaten karni hai, vichaar saagar manthan karte baba ka shukriya maanna hai।

vardaan:- apni powerful sthiti mein sthit rah mansa dvaara seva karne vaale number one sevaadhaari bhav

yadi kisi ko vaani ki seva ka chance nahin milta to bhi mansa seva ka chance har samay hai hi। powerful aur sabse bade se badi seva mansa seva hai। vaani ki seva sahaj hai lekin mansa seva ke liye pahle apne ko power-full banaana padta hai। vaani ki seva to sthiti neeche oopar hote bhi kar lenge lekin mansa seva aise nahin ho sakti। jo apni shreshtha sthiti dvaara seva karte hain vahi number one sevaadhaari full marks le sakte hain।

slogan:- laukik kaarya karte alaukikta ka anubhav karna hi surrender hona hai।

avyakti silence dvaara double light pharishta sthiti ka anubhav karo

ab double light ban divya buddhi roopi vimaan dvaara sabse oonchi choti ki sthiti mein sthit ho vishwa ki sarva aatmaon ke prati light aur might ki shubh bhaavna aur shreshtha kaamna ke sahayog ki lahar phailaao। is vimaan mein baapdaada ki refine shreshtha mat ka saadhan (petrol) ho। usmein jara bhi man-mat, parmat ka kichda na ho।