Daily Murli for Saturday 24 February 2024

24-02-2024 praatahmurli om shanti "baapdaada"' madhuban

“meethe bachche - tum abhi hans banne ka purooshaartha kar rahe ho, tumhein in lakshmi-naaraayan jaisa hans arthaat sampoorn nirvikaari banna hai''

prashn:- is gyaan maarga mein teevra jaane ki sahaj vidhi kya hai?

uttar:- is gyaan mein teevra (teekha) jaana hai to aur sab vichaar chhod baap ki yaad mein lag jaao jisse vikarma vinaash ho jaayen aur poora kachra nikal jaaye। yaad ki yaatra hi oonch pad ka aadhaar hai, isi se tum kaudi se heera ban sakte ho। baap ki duty hai tumhein kaudi se heera, patit se paavan banaane ki। iske bigar baap bhi rah nahin sakte।

om shanti। baap baith bachchon ko samjhaate hain ki is duniya mein koi hans bhi hain to bagule bhi hain। yeh lakshmi-naaraayan hans hain, in jaisa tumko banna hai। tum kahenge ham daivi sampradaay ban rahe hain। baap kahenge tum daivi sampradaay ban rahe ho, main tumko hans banaata hoon, abhi poore bane nahin ho, banna hai। hans moti chugte hain, bagula gand khaate hain। ab ham hans ban rahe hain isliye devtaaon ko phool kaha jaata hai aur unko kaanta kaha jaata hai। hans the phir neeche utarte bagule bane ho। aadha kalpa hans, aadha kalpa bagule। hans banne mein bhi maaya ke bahut vighna padte hain। kuchh na kuchh giraavat aa jaati hai। mukhya giraavat aati hai deh-abhimaan ki। is sangam par hi tum bachchon ko change hona hai। jab tum hans ban jaate ho to phir hans hi hans ho। hans arthaat devi-devta hote hain nai duniya mein। puraani duniya mein ek bhi hans ho na sake। bhal sannyaasi hain parantu woh had ke sannyaasi hain। tum ho behad ke sannyaasi। baba ne behad ka sannyaas sikhaaya hai। in devtaaon jaisa sarvagun sampanna aur koi dharma vaala banta hi nahin hai। ab baap bhi aaye hain - aadi sanaatan devi-devta dharma ki sthaapna karne। tum hi nai duniya mein pahle-pahle sukh mein aate ho aur koi nai duniya mein thode hi aate hain। ab in devtaaon ka dharma hi praayah lop hai। yeh baaten bhi tum abhi hi sun rahe ho aur samajhte ho। aur koi samajh na sake। woh sab hai manushya mat, vikaar se to sab paida hue hain na। satayug mein vikaar ki koi baat nahin। devtaayen pavitra the। vahaan yogbal se hi sab-kuchh hota hai। yahaan patit manushyon ko kya pata vahaan bachche kaise paida hote hain? uska naam hi hai viceless world। vikaar ki baat hi nahin। kahenge jaanvar aadi kaise paida hote hain? bolo vahaan hai hi yogbal, vikaar ki baat hi nahin। 100 percent viceless hain। ham to shubh bolte hain। tum ashubh kyon bolte ho? iska naam hi hai veshyaalay aur uska naam hi hai shivaalay। us shivaalay ki sthaapna shivbaaba kar rahe hain। shivbaaba oonche se ooncha tower hai na। shivaalay bhi aise lambe banaate hain। shivbaaba tumko sukh ka tower banaate hain, sukh ke tower mein le jaate hain isliye baba mein bahut love rehta hai। bhakti maarga mein bhi shivbaaba ke saath love rehta hai। shivbaaba ke mandir mein bahut pyaar se jaate hain parantu kuchh bhi samajhte nahin hain। ab tum bachche sarvagun sampanna ban rahe ho। abhi sampoorn bane nahin ho। tumhaara imtihaan tab hoga jab tumhaari raajdhaani poori sthaapan ho jaayegi। phir aur sab khatma ho jaayenge phir nambarvaar thode-thode aate jaayenge। tumhaari to pahle hi raajaai shuru hoti hai। aur dharmon mein pahle raajaai nahin shuru hoti hai। tumhaari to hai hi kingdom। in baaton ko tum bachche hi jaante ho। banaaras mein bachche service par gaye, unko samjhaane ka nasha hai। parantu vo log itna samajh na saken। gaayan bhi hai koton mein koi। hans koi virla bante hain। nahin bante to phir bahut sajaayen khaate hain। koi to 95 percent saja khaate sirf 5 percent change hote hain। highest aur lowest number to hote hain na। abhi koi bhi apne ko hans kah na saken। purooshaartha kar rahe hain। jab gyaan poora ho jaayega tab ladaai bhi lagegi। gyaan to poora lena hai na। woh ladaai hi final hogi। abhi to koi 100 percent bane nahin hain। abhi to ghar-ghar mein paigaam pahunchaana hai। bada bhaari revolution ho jaayega। jinhon ke bade-bade adde bane hue hain, sab hilne lagenge। bhakti ka takhta hilne lagega। abhi bhakton ka raajya hai na। us par tum vijay paate ho। abhi hai praja ka praja par raajya, phir badli hoga। in lakshmi-naaraayan ka raajya ho jaayega। tum saakshaatkaar karte rahenge। shuru mein tumko bahut saakshaatkaar karaaye hue hain। kaise raajdhaani chalti hai। parantu saakshaatkaar karne vaale aaj hain nahin। yeh bhi drama mein jinka jo part hai woh chalta hi rehta hai। ismen ham kisi ki mahima thode hi karenge। baap bhi kehte hain tum meri kya mahima karenge? meri to duty hai patit se paavan banaane ki। teacher ki duty hai padhaane ki। apni duty bajaane vaale ki mahima kya karenge? baba kehte main bhi drama ke vash hoon, ismen taakat phir kaahe ki। yeh to meri duty hai। kalpa-kalpa sangam par aakar patit se paavan banaane ka raasta bataata hoon। main paavan banaane bigar rah nahin sakta hoon। mera part accurate hai। ek second bhi deri se va aage nahin aa sakta। bilkul accurate time par service ka part bajaata hoon। second by second jo paas hota drama mere se karaata hai। main parvash hoon, ismen mahima ki baat nahin। main kalpa-kalpa aata hoon, mujhe bulaate hi hain patit se paavan banaane vaale aao। kitne patit ban pade hain। ek ek avgun chhudaane mein kitni mehnat lagti hai। bahut samay pavitra rahkar bhi phir chalte-chalte maaya ka thappad lagne se kaala munh kar lete hain।

yeh hai hi tamopradhaan duniya। maaya dushman bahut saamna karti hai। sannyaasi bhi janma to vikaar se hi lete hain। koi bhi jyoti jyot mein samaate nahin, vaapis ja nahin sakte। aatma to avinaashi hai aur uska part bhi avinaashi hai phir jyoti jyot mein sama kaise sakti। jitne dher manushya hain utni dher baaten hain। woh sab hai manushya mat। eeshvareey mat hai hi ek। devta mat to yahaan hoti nahin। devta hote hain satayug mein। to yeh badi samajhne ki baaten hain। manushya to kuchh bhi nahin jaante tab to eeshvar ko pukaarte hain ki raham karo। baap kehte hain main tumko aisa laayak banaata hoon jo tum poojne laayak bante ho। abhi thode hi poojne laayak ho, ban rahe ho। tum jaante ho ham yeh banenge phir bhakti maarga mein hamaari hi mahima hogi, hamaare hi mandir banenge। tumko maaloom hai ki chandika devi ka bhi mela lagta hai। chandi, jo baap ki shreemat par nahin chalti। phir bhi vishwa ko pavitra banaane mein kuchh na kuchh madad to karti hai na। sena hai na। sajaayen aadi khaakar phir bhi vishwa ka maalik to bante hain na। yahaan koi bheel hoga woh bhi kahega ham bhaarat ke maalik hain। aajkal dekho ek taraph to gaate hain bhaarat hamaara sabse ooncha desh hai aur doosre taraph phir gaate hain ki bhaarat ki kya haalat ho gai hai। rakta, khoon ki nadiyaan bahti rehti hain। ek record mein mahima to ek record mein ninda। kuchh samajhte nahin hain। tumko to yathaartha reeti ab baap samjhaate hain। manushyon ko thode hi pata hai ki inhon ko bhagwan padhaate hain। kahenge vaah, inhonne bhagwan ko teacher bana rakha hai! are, bhagvaanuvaach hai na ki main tumko raajaaon ka raaja banaata hoon। sirf geeta mein manushya ka naam daal geeta ko khandan kar diya hai। shreeshna bhagvaanuvaach yeh to manushya mat ho gai na। shreekrishna kaise yahaan aayega? woh to satayug ka prince tha। unko kya padi hai jo is patit duniya mein aaye।

baap ko to tum bachche hi jaante ho parantu tumhaare mein bhi virla koi yathaartha reeti jaante hain। tum bachchon ke mukh se sadaiv ratna nikalna chaahiye, patthar nahin। apne se poochhna hai ki ham aise bane hain? bhal chaahte bhi hain ham kichde se jaldi baahar niklen parantu jaldi ho na sake। time lagta hai tumko bahut mehnat karni padti hai। samjhaane vaalon mein bhi nambarvaar hain, yukti-yukta samjhaani pichhaadi ki hogi, tab tumhaare baan chalenge। tum jaante ho hamaari padhaai ab chal rahi hai। padhaane vaala to ek hi hai। sab unse padhne vaale hain। aage chal tum ladaai aisi dekhenge jo baat mat poochho। ladaai mein to bahut marenge phir itni sab aatmaayen kahaan jaayengi। kya ikatthi hi jaakar janma lengi? jhaad bada hota hai, bahut taal-taaliyaan, patte ho jaate hain। roz kitne janmate hain, marte bhi kitne hain। vaapis to koi ja nahin sakte। manushyon ki vriddhi hoti jaati hai। in rezgaari baaton mein jaane se pahle baap ko to yaad karen jisse vikarma vinaash hon aur kichda nikal jaaye। phir hai doosri baat। tum iska koi vichaar na karo। pahle apna purooshaartha karo jo aisa ban sako। mukhya hai yaad ki yaatra aur sabko paigaam dena hai। paigambar ek hi hai। dharma sthaapak ko bhi paigambar va preceptors nahin kah sakte। sadgati daata ek hi satguru hai। baaki to bhakti maarga mein manushya kuchh na kuchh sudharte hain। koi na koi daan bhi karte hain। teerthon par jaate hain to kuchh na kuchh daan de aate hain। to yeh to tum jaante ho ki is antim janma mein baap hamko heere jaisa banaate hain। isko hi amoolya jeevan kaha jaata hai, parantu itna purooshaartha karna pade। tum kahenge hamaara koi dosh nahin hai। are, main aaya hoon gul-gul (phool) banaane to tum kyon nahin bante ho? meri to duty hai paavan banaane ki। to tum kyon nahin purooshaartha karte ho? purooshaartha karaane vaala baap to mila hai। in lakshmi-naaraayan ko aisa kisne banaaya? duniya thode hi jaanti hai। baap aate hi hain sangam par। abhi tumhaari baaton ko koi samajhte nahin hain, aage chalkar jab tumhaare paas bahut aayenge to unhon ki graahki toot padegi। baap kehte hain in ved-shaastron ka saar main sunaata hoon। dher ke dher guru hain, sab bhakti maarga ke। satayug mein sab paavan the phir patit banen। ab baap phir aakar tumhein behad ka sannyaas karaate hain kyonki yeh puraani duniya khatma hone vaali hai isliye baap kehte hain - kabristaan se buddhi nikaal mujh baap ko yaad karo to vikarma vinaash honge। ab kayaamat ka samay hai। sabka hisaab-kitaab chuktu hone vaala hai। saari duniya ki jo aatmaayen hain unmein saara part bhara hua hai। aatma shareer dhaaran kar part bajaati hai। to aatma bhi avinaashi hai, part bhi avinaashi hai। ismen koi farka pad nahin sakta। hoobhu repeat hota hi rehta hai। yeh bahut bada behad ka drama hai। nambarvaar to hote hi hain। koi roohaani service karne vaale, koi sthool service karne vaale। koi kehte hain baba ham aapka driver banen, to vahaan bhi vimaan ka maalik ban jaayenge। aaj ke bade log samajhte hain abhi to hamaare liye svarga hai। bade-bade mahal hain, vimaan hain। baap kehte hain yeh sab hai artificial, inko maaya ka pomp kaha jaata hai। kya-kya seekhte rehte hain। jahaaj aadi banaate hain। ab yeh jahaaj aadi vahaan kaam mein thode hi aayenge। bombs banaate hain, yeh thode hi vahaan kaam mein aayenge। sukh vaali cheejen to kaam mein aayengi। vinaash hone mein science madad karti hai। phir vo hi science tumko nai duniya banaane mein bhi madad degi। yeh drama bada wonderful bana hua hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is kayaamat ke samay puraani duniya se behad ka sannyaas karna hai। is kabristaan se buddhi nikaal deni hai। yaad mein rahkar sab puraane hisaab-kitaab chuktu karne hain।

2) mukh se sadaiv gyaan ratna nikaalne hain, patthar nahin। poora-poora hans banna hai। kaanton ko phool banaane ki seva karni hai।

vardaan:- seva ke saath-saath behad ke vairaagya vritti ki saadhna ko emerge karne vaale saphalta moorta bhav

seva se khushi va shakti milti hai lekin seva mein hi vairaagya vritti bhi khatma ho jaati hai isliye apne andar vairaagya vritti ko jagaao। jaise seva ke plan ko practical mein emerge karte ho tab saphalta milti hai। aise abhi behad ke vairaagya vritti ko emerge karo। chaahe kitne bhi saadhan praapta hon lekin behad ke vairaagya vritti ki saadhna merge nahin ho। saadhan aur saadhna ka balance ho tab saphalta moorta banenge।

slogan:- asambhav ko sambhav banaana hi parmaatma pyaar ki nishaani hai।