Daily Murli for Thursday 7 March 2024

07-03-2024 praatahmurli om shanti "baapdaada"' madhuban

“meethe bachche - baap ka kartavya hai, kaanton ke jangal ko khalaas kar phoolon ka bageecha banaana, isse hi number one family planning ho jaati hai''

prashn:- family planning ka first class shaastra kaun-sa hai aur kaise?

uttar:- geeta hai family planning ka first class shaastra kyonki geeta dvaara hi baap ne anek adharma vinaash kar ek dharma sthaapan kiya। geeta mein hi bhagwan ke mahaavaakya hain - kaam mahaashatru hai। jab kaam shatru par jeet pa lete ho to family planning svatah ho jaati hai। yeh ek baap ka hi kaam hai। kisi manushya ka nahin।

om shanti। shiv bhagvaanuvaach। baap baith roohaani bachchon ko samjhaate hain, is duniya ko to aasuri duniya zaroor kahenge। nai duniya ko daivi duniya kahenge। daivi duniya mein manushya bahut thode rehte hain। ab yeh raaz bhi kisko samjhaana chaahiye। jo family planning ke minister hote hain, unhon ko samjhaana chaahiye। bolo, family planning ki duty to geeta ke kathan anusaar ek baap ki hi hai। geeta ko to sab maante hi hain। geeta hai hi family planning ka shaastra। geeta se hi baap nai duniya ki sthaapna karte hain। yeh to automatically drama mein unka part noondha hua hai। baap hi aakarke aadi sanaatan devi-devta dharma ki sthaapna karte hain athva pure nationality ki sthaapna karte hain। apne ko devi-devta dharma ka hi kahenge। geeta mein bhagwan saaph batlaate hain ki main aata hi hoon ek dharma ki sthaapna karne, baaki anek sab dharmon ka vinaash karne। to isse family planning number one ho jaayegi। saare srishti par jay-jaykaar ho jaayegi aur ek aadi sanaatan dharma ki sthaapna ho jaayegi। ab to bahut manushya hone kaaran bahut kichda ho pada hai। vahaan ke jaanvar panchhi aadi sab first class honge, jo dekhne se hi dil khush ho jaae, darne ki baat nahin। baap baith samjhaate hain tumne mujhe bulaaya hi isliye hai ki aakar family planning karo arthaat patit families ko vaapis le jaao, paavan family ki sthaapna karo। tum sab kehte the - baba, aakar patit duniya khalaas kar nai paavan duniya banaao। yeh baap ki hi planning hai। dekhne se hi dil khush ho jaae। lakshmi-naaraayan ko dekhne se tumhaari dil khush hoti hai na। vahaan to yatha raaja raani tatha praja sab first class hote hain। to yeh family planning ki yukti drama mein noondhi hui hai। tum bachchon ko samjhaana hai - paarlaukik baap to satayugi planning first class karte hain, kaanton ke jangal ko hi khalaas kar dete hain। is saare bhambhor ko aag lag jaati hai। yeh dhandha to baap ka hi hai। tum kuchh bhi nahin kar sakte ho। kitni bhi mehnat karo, successful koi ho na sake। baap kehte hain - jis kaam vikaar ko tum apna mitra samajhte ho woh bada bhaari dushman hai। bahut hain jo unke mitra ban jaate hain। baap ordinance nikaalte hain - tum is par vijay pahno। tum samjhaao - baap kehte hain kaam mahaashatru hai। bichaaron ko pata hi nahin ki family planning kaise ho raha hai। yeh to kalpa-kalpa baap karte hain drama anusaar। phir yeh hona hi hai। satayug mein bahut thode manushya hote hain, ismen phikra ki koi baat nahin। baap practical mein yeh kaam kar rahe hain। vo log kitna maatha maarte hain। education minister ko bhi samjhaao। abhi ke characters kitne kharaab hain। devtaaon ke characters kitne achhe the। tum beparvaah hokar vaani chalaao। bolo, yeh koi tum minister ka kaam nahin hai। yeh to oonch te oonch baap ka kaam hai। in devtaaon ke raajya mein ek dharma, ek raajya, ek bhaasha thi। kitne thode manushya the। parantu aisi yukti se bolna bahut thodon ko aata hai। woh roohaab nahin rehta hai। unhon ko yeh lakshmi-naaraayan ka chitra dikhaana chaahiye। yeh family planning baap ne hi ki thi। ab phir kar rahe hain। inke raajya ki sthaapna ho rahi hai।

baba ne kaha hai - yeh lakshmi-naaraayan ka chitra hamesha front mein rakho aur battiyaan aadi khoob lagaao। prabhaatpheri mein yeh trance-light ka chitra ho, jo ekdam clear koi bhi dekh sake। bolo, ham yeh family planning kar rahe hain। yatha raaja raani tatha praja। deity dynasty ki sthaapna ho rahi hai। baaki sab vinaash ho jaayenge। tum kehte bhi ho ki he patit-paavan aao, hamko paavan banaao। so to baap hi bana sakte hain। ek devi-devta dharma hi paavan hota hai। baaki sab khatma ho jaate hain। bolo, shivbaaba ke haath mein hi yeh planning hai। satayug mein yeh planning ho jaati hai। vahaan hai hi devta vansh, shoodra hote nahin। yeh to badi first class planning hai। baaki sab dharma khalaas ho jaayenge। is baap ki planning ko aakar samjho। tumhaari yeh baat sunkar tum par bahut kurbaan jaayenge। yeh minister aadi nirvikaari planning bana kaise sakenge। baap jo oonch te oonch bhagwan hai, woh aate hi hain yeh planning karne। baaki sab anek dharmon ko khalaas kar dete hain। yeh baat hai hi behad ke baap ke haath mein। puraani cheez ko naya bana dete hain। baap nai duniya ki sthaapna kar puraani ka vinaash kar dete hain। yeh drama mein noondh hai। samjhaana chaahiye - bahnon aur bhaaiyon, is srishti chakra ke aadi-madhya-ant ko tum nahin jaante ho, baap batlaate hain। satayug aadi mein na itne manushya hote hain, na family planning aadi ki baat hi karte hain। pahle tum srishti ke aadi-madhya-ant ko aakar samjho। sadgati daata baap hi hai। sadgati arthaat satayugi manushya। pahle-pahle yeh devi-devta bahut thode the। first class dharma tha। baba phoolon ki first class planning banaate hain। kaam to mahaashatru hai। aajkal to inke pichhaadi praan bhi de dete hain। koi ki kiske saath dil hoti hai, maa-baap shaadi nahin karaate hain to bas ghar mein hi hangaama macha dete hain। yeh hai hi gandi duniya। sab ek-do ko kaanta lagaate rehte hain। satayug mein to phoolon ki varsha hoti hai। to aise-aise vichaar saagar manthan karo। baba ishaara dete rehte hain। tum inko refine karo। chitra bhi bhinna-bhinna prakaar ke banaate hain। drama anusaar jo kuchh hota hai woh theek hai। kisko samjhaana bhi bahut sahaj hai। sabka dhyaan baap ki taraph khinchavaana hai। baap ka hi yeh kaam hai। ab baap oopar mein baitha hua, yeh kaam karega nahin। kehte bhi hain jab-jab dharma ki glaani hoti hai, aasuri raajya hota hai tab-tab aakar in sabko khalaas kar daivi raajya ki sthaapna karta hoon। manushya to agyaan ki neend mein soye pade hain। yeh sab vinaash ho jaayega। jo nirvikaari bante hain unki hi family aakar raajya karti hai। gaayan bhi hai - brahma dvaara sthaapna, kiski? is family ki। yeh planning ho rahi hai। brahmaakumaar-kumaariyaan pavitra bante hain to unhon ke liye zaroor pavitra nai duniya chaahiye। yeh purushottam sangamayug bahut chhota hai। itne thode samay mein kitni achhi planning kar dete hain। baap sabka hisaab-kitaab chuktu karaae apne ghar le jaate hain, itna saara kichda vahaan nahin le jaayenge। chhi-chhi aatmaayen ja na saken, isliye baap aakar gul-gul banaakar le jaate hain। aisi-aisi baaton par vichaar saagar manthan karo। tum realise karte rehte ho। baap kehte hain main ek dharma ki sthaapna karaane, tumko rehearsal kara raha hoon। yeh family planning kisne ki? baap kehte hain main kalpa pahle misal apna kaarya kar raha hoon। pukaarte hi hain patit family se badal kar paavan family sthaapan karo। is samay sab hain patit। shaadiyon par laakhon kharcha karte hain। kitna shaadmaana karte hain aur hi paavan se badal patit ban jaate hain।

tum bachchon ko ab yahi eeshvareey dhandha karna chaahiye। sabko samjhaana chaahiye। sab aasuri neend mein soye pade hain, unko jagaana chaahiye। gora bankar auron ko bhi banaayen। to baap ka pyaar bhi jaaye। service hi nahin karenge to milega kya? koi baadshaah bante hain to zaroor koi achhe karma kiye hain। yeh to koi bhi samajh sakte hain। yeh raaja-raani hain, ham daas-daasiyaan hain to zaroor aage janma mein karma aise kiye hain। bure karma karne se bura janma milta hai। karmon ki gati to chalti rehti hai। ab baap tumko achhe karma karna sikhlaate hain। vahaan bhi aise zaroor samjhenge ki agle janma ke karmon ke anusaar aise bane hain। baaki kya karma kiye hain woh nahin jaanenge। karma gaaye jaate hain। jitna jo achha karma karte hain woh oonch pad paate hain। oonch karmon se hi oonch bante hain। achhe karma nahin karte hain to jhaadu lagaate hain। bhari dhote hain। karmon ka phal to kahenge na। karmon ki theory chalti hai। shreemat se achhe karma hote hain। kahaan baadshaah, kahaan daas-daasiyaan। baap kehte hain ab follow father। meri shreemat par chalenge to oonch pad paayenge। baap saakshaatkaar bhi karaate hain। yeh mama, baba, bachche itne oonch bante hain, yeh bhi karma hai na। bahut bachchiyaan karmon ko samajhti nahin hain। pichhaadi mein saakshaatkaar sabko hoga। achhi tarah padhenge, likhenge to navaab banenge, roolenge pilenge to honge kharaab। yeh to us padhaai mein bhi hota hai। bhagvaanuvaach, is samay saari duniya kaam chita par jal mari hai। kehte hain stri ko dekhne se avastha bigadti hai। vahaan to aise avastha nahin bigdegi। baap kehte hain naam roop dekho hi nahin। tum bhaai-bhaai ko dekho। badi manzil hai। vishwa ka maalik banna hai। kabhi kiski buddhi mein nahin hoga - yeh lakshmi-naaraayan vishwa ke maalik kaise banen? baap kehte hain main tumko svarga ka maalik banaata hoon। yeh lakshmi-naaraayan sarvagun sampanna the। aajkal jinka tum naya blood samajhte ho woh kya karte rehte hain! kya gaandhi ji yeh sikhaakar gaye? raam raajya banaane ki bhi yukti chaahiye। yeh to baap ka hi kaam hai। baap to ever paavan hai। tum phir 21 janma paavan rah phir 63 janma patit ban jaate ho। samjhaane mein itna masta banna chaahiye। baap bachchon ko samjhaate rehte hain - bachche, paavan bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni avastha sada ekras adol banaane ke liye kisi ke bhi naam-roop ko nahin dekhna hain। bhaai-bhaai ko dekho। drishti ko paavan banaao। samjhaane mein roohaab dhaaran karo।

2) baap ka pyaar paane ke liye baap samaan dhandha karna hai, jo aasuri neend mein soye hue hain unhein jagaana hai। gora bankar doosron ko banaana hai।

vardaan:- apne saral svabhaav aur shubh bhaav dvaara bholaanaath baap ke pyaar ka anubhav karne vaale aakarshanmoorta bhav

bholnaath baap ko sabse priy bhole bachche hain। bhole arthaat jo sada saral svabhaav, shubh bhaav aur svachchhata sampanna man aur karma donon mein sachchaai aur saphaai vaale hain, aise bachche aakarshanmoorta ban baap ko bhi apne oopar aakarshit karte hain। bholaanaath baap aise saral svabhaav bhole bachchon ke gunon ki maala simran karte hain। bhagwan ko bholaapan pyaara hai। aap bachchon ne apne bholepan se hi bhagwan ko moh liya, unhein apna bana liya।

slogan:- apne chehre aur chalan se gun va shaktiyon ki gift baantana hi shubh bhaavna, shubh kaamna hai।