Daily Murli for Saturday 23 March 2024

23-03-2024 praatahmurli om shanti "baapdaada"' madhuban

“meethe bachche - jaise baap aur daada donon hi nirhankaari hain, nishkaam seva karte, apne liye koi lobh nahin hai - aise tum bachche bhi baap samaan bano''

prashn:- gareeb nivaaz baap gareeb bachchon ki takdeer kis aadhaar par oonch banaate hain?

uttar:- baba kehte - bachche, ghar mein rehte sab-kuchh sambhaalte sada buddhi se yahi samjho ki yeh sab-kuchh baba ka hai। trustee hokar raho to takdeer oonchi ban jaayegi। ismen bahut sachchaai chaahiye। poora nishchay ho to jaise yagya se paalna hoti rahegi। ghar mein trustee ho shivbaaba ke bhandaare se khaate hain। baba ko sab sach batlaana pade।

om shanti। bhakti maarga ke satsangon se yeh gyaan maarga ka satsang vichitra hai। tumko bhakti ka anubhav to hai। jaante ho anekaanek saadhu-santa bhakti maarga ke shaastra aadi sunaate hain। yahaan to bilkul hi unse alag hai। yahaan tum kiske saamne baithe ho? double baap aur maa। vahaan to aise nahin hai। tum jaante ho yahaan behad ka baap bhi hai, mama bhi hai, chhoti mama bhi hai। itne sab sambandh ho jaate hain। vahaan to aisa koi sambandh nahin। na koi woh followers hi hain। vo to hai nivriti maarga। unka dharma hi alag hai। tumhaara dharma hi alag hai। raat-din ka farka hai। yeh bhi tum jaante ho - laukik baap se alpakaal kshanbhangur sukh ek janma ke liye milega। phir naya baap nai baat। yahaan to laukik bhi hai, paarlaukik bhi hai aur phir alaukik bhi hai। laukik se bhi varsa milta hai aur paarlaukik se bhi varsa milta hai। baaki yeh alaukik baap hai wonderful, inse koi varsa nahin milta hai। haan inke dvaara shivbaaba varsa dete hain isliye us paarlaukik baap ko bahut yaad karte hain। laukik ko bhi yaad karte hain। baaki is alaukik brahma baap ko koi yaad nahin karte। tum jaante ho yeh hai prajaapita, yeh koi ek ka pita nahin। prajaapita great-great grand father hai। shivbaaba ko great-great grand father nahin kehte। laukik sambandh mein laukik father aur grand father hota hai। yeh hai great-great grand father। aise na laukik ko, na paarlaukik ko kahenge। ab aise great-great grand father se phir varsa milta nahin। yeh sab baaten baap baith samjhaate hain। bhakti maarga ki to baat hi nyaari hai। drama mein woh bhi part hai jo phir chalta rahega। baap batlaate hain tumne kaise 84 janma liye hain, 84 laakh nahin। baap aakar abhi saari duniya aur hamko righteous banaate hain। is samay dharmaatma koi banta nahin। punya aatmaon ki duniya hi doosri hai। jahaan paap aatmaayen rehti hain vahaan punya aatmaayen nahin rehti। yahaan paap aatmaayen, paap aatmaon ko hi daan-punya karti hain। punya aatmaon ki duniya mein daan-punya aadi karne ki darkaar hi nahin rehti। vahaan yeh gyaan rehta nahin ki hamne sangam par 21 janmon ka varsa liya hai। nahin, yeh gyaan yahaan behad ke baap se tumko hi milta hai, jisse 21 janmon ke liye sada sukh, health, wealth sab mil jaata hai। vahaan tumhaari aayu badi hoti hai। naam hi hai amarpuri। kehte hain shankar ne paarvati ko katha sunaai। sookshm vatan mein to yeh baaten hoti nahin। so bhi amraktha ek ko thode hi sunaai jaati hai। yeh hain bhaktimaarga ki baaten, jis par abhi tak khade hain। sabse bada gapoda hai eeshvar ko sarvavyaapi kehna। yeh defame karte hain। behad ka baap jo tumko vishwa ka maalik banaate hain unke liye kehte hain sarvavyaapi hai, thikkar-bhittar mein, kan-kan mein hai। apne se bhi jaasti glaani kar di। main tumhaari kitni nishkaam seva karta hoon। mujhe kuchh bhi lobh nahin hai ki pahla number banoon। nahin। auron ko banaane ka rehta hai। isko kaha jaata hai nishkaam seva।

tum bachchon ko namaste karte hain। baba kitna niraakaar, niranhakaari hai, koi anhakaar nahin। kapde aadi bhi vahi hain। kuchh bhi badla nahin hai। nahin to woh log saari dress badli karte hain। inki dress vahi saadhaaran hai। officers ki dress bhi badlaate hain, inki to vahi saadhaaran paharvaais hai। koi farka nahin। baap bhi kehte hain main saadhaaran tan leta hoon। woh bhi kaun-sa? jo khud hi apne janmon ko nahin jaanta ki ham kitne punarjanma lete hain। woh to 84 laakh kah dete hain। suni-sunaai baaten hain। isse phaayda kuchh nahin। daraate hain - aisa kaam kiya to gadha kutta aadi banenge, gaay ka poonchh pakadne se tar jaayenge। ab gaay kahaan se aai? svarga ki gaayen hi alag hoti hain। vahaan ki gaayen bahut first class hoti hain। jaise tum 100 percent sampoorn, to gaayen bhi aisi first class hoti hain। shreekrishna koi gau nahin charaate hain। unko kya padi hai। yeh vahaan ki beauty dikhaate hain। baaki aise nahin ki shreekrishna ne koi gaooyen paali hain। shreekrishna ko gvaala bana diya hai। kahaan sarvagun sampanna satayug ka first prince aur kahaan gvaala! kuchh bhi samajhte nahin hain kyonki devta dharma to ab hai nahin। yeh ek hi dharma hai jo praayahlop ho jaata hai। yeh baaten koi shaastron mein nahin hain। baap kehte hain yeh gyaan mai tum bachchon ko deta hoon - vishwa ka maalik banaane ke liye। maalik ban gaye phir gyaan ki darkaar nahin। gyaan hamesha agyaaniyon ko diya jaata hai। gaayan hai gyaan soorya pragta, agyaan andher vinaash… abhi bachche jaante hain saari duniya andhiyaare mein hai। kitne dher satsang hain। yeh koi bhakti maarga nahin hai। yeh hai sadgati maarga। ek baap hi sadgati karta hai। tumne bhakti maarga mein pukaara hai ki aap aayenge to ham aapke hi banenge। aap bigar doosra na koi kyonki aap hi gyaan ka saagar, sukh ka saagar, pavitrata ka saagar, sampatti ka saagar ho। sampatti bhi dete hain na। kitna maalaamaal kar dete hain। tum jaante ho ham shivbaaba se 21 janmon ke liye jholi bharne aaye hain arthaat nar se naaraayan bante hain। bhakti maarga mein kathaayen to bahut suni, seedhi neeche utarte hi aaye। chadhti kala koi ki ho na sake। kalpa ki aayu bhi kitni lambi-chaudi kar dete hain। drama ke duration ko laakhon varsha kah dete hain। ab tumko pata pada hai kalpa hai hi 5000 varsha ka। maximum hain 84 janma aur minimum hai ek janma। peechhe aate rehte hain। niraakaari jhaad hai na। phir nambarvaar aate hain part bajaane। asul mein to ham niraakaari jhaad ke hain। phir vahaan se yahaan aate hain part bajaane। vahaan sab pavitra rehte hain। parantu part sabka alag-alag hai। yeh buddhi mein rakho। jhaad bhi buddhi mein rakho। satayug se kaliyug ant tak yeh baap hi bataate hain। yeh koi manushya nahin bataate, daada nahin bataate hain। ek hi satguru hai jo sarva ki sadgati karte hain। baaki to sab guru hain bhakti maarga ke। kitne karmakaanda karte hain। bhakti maarga ka show kitna hai। yeh runya ka paani (mrigtrishna) hai। ismen aise phanse hain jo koi nikaalne jaate hain to khud hi phans jaate hain। yeh bhi drama ki noondh hai। koi nai baat nahin। tumhaara second-second jo paas hota hai, saara drama bana hua hai। tum jaante ho ab ham behad ke baap se raajayog seekh nar se naaraayan, vishwa ka maalik bante hain। tum bachchon ko yeh nasha rehna chaahiye। behad ka baap paanch-paanch hazaar varsha ke baad bhaarat mein hi aate hain। woh shanti ka saagar, sukh ka saagar hai। yeh mahima paarlaukik baap ki hi hai। tum jaante ho yeh mahima bilkul theek hai। sab-kuchh ek se milta hai। vahi duhkh harta, sukh karta hai, jiske saamne tum baithe ho।

tum apne centre par baithe honge to kahaan yog lagaayenge। buddhi mein aayega shivbaaba madhuban mein hai। unko hi yaad karte ho। shivbaaba khud kehte hain mainne saadhaaran boodhe tan mein pravesh kiya hai, phir se bhaarat ko svarga banaane। main drama ke bandhan mein baandha hua hoon। tum meri kitni glaani karte ho। main tumko poojyaneey banaata hoon। kal ki baat hai। tum kitni pooja karte the। tumko apna raajya-bhaagya diya। sab ganva diya। ab phir tumko vishwa ka maalik banaata hoon। kab kiski buddhi mein nahin baithega। yeh hain daiveegun vaale devtaayen। hain to manushya, koi 80-100 foot lambe to nahin hain। aise to nahin ki unhon ki aayu badi hai isliye chhat jitne bade honge। kaliyug mein tumhaari aayu kam ho jaati hai। baap aakar tumhaari aayu badi kar dete hain isliye baap kehte hain health minister ko bhi samjhaao। bolo, ham aapko aisi yukti bataayen jo kabhi beemaar nahin hona pade। bhagvaanuvaach - apne ko aatma samajh maamekam yaad karo to tum patit se paavan ever healthy ban jaayenge। ham guarantee karte hain। yogi pavitra hote hain to aayu bhi badi hoti hai। abhi tum raajayogi, raajarishi ho। woh sannyaasi to kabhi raajayog sikhla na saken। vo kehte hain ganga patit-paavni hai, vahaan daan karo। ab ganga mein thode hi daan kiya jaata hai। manushya paise daalte hain, pandit log le jaate hain। ab tum baap dvaara paavan ban rahe ho। baap ko dete kya ho? kuchh nahin, baap to daata hai। tum bhakti maarga mein eeshvar arth gareebon ko dete the। goya patiton ko dete the। tum bhi patit, lene vaale bhi patit। ab tum paavan bante ho। vo patit, patit ko daan karte hain। kumaari jo pahle pavitra hai use bhi daan dete hain, maatha tekte hain, khilaate hain, dakshina bhi dete hain। shaadi ke baad barbaadi ho jaati hai। drama mein noondh hai phir bhi aisa repeat hoga। bhakti maarga ka bhi part hua। satayug ka bhi samaachaar baap bataate hain। ab tum bachchon ko samajh mili hai। pahle besmajh the। shaastron mein to hain bhakti maarga ki baaten, unse mere ko koi paate nahin। main jab aata hoon, tab hi aakar sadgati karta hoon sabhi ki। aur main ek hi baar aakar puraane ko naya banaata hoon। main gareeb nivaaj hoon। gareebon ko saahookaar banaata hoon। gareeb to jhat baba ka ban jaate hain। kehte hain baba ham bhi aapke hain। yeh sab-kuchh aapka hai। baap kehte hain trustee hokar raho। buddhi se samjho yeh hamaara nahin hai, baap ka hai। ismen bade sayaane bachche chaahiye। phir tum ghar mein bhojan banaakar khaate ho goya yagya se khaate ho kyonki tum bhi yagya ke hue। sab-kuchh yagya ka ho gaya। ghar mein bhi trustee hokar rehte ho to shivbaaba ke bhandaare se khaate ho। parantu poora nishchay chaahiye। nishchay mein gadbad hui to… harishchandra ka misaal dete hain। baba ko to sab kuchh bataana hai। main gareeb nivaaz hoon।

geet - aakhir woh din aaya aaj....

aadhaakalpa bhakti mein yaad kiya ab aakhir mila। abhi gyaan jindaabaad hona hai। satayug zaroor aana hai। beech mein hai sangam, jismen tum uttam te uttam purush bante ho। tum pavitra pravritti maarga vaale the। phir 84 janma ke baad apvitra bante ho, phir pavitra banna hai। kalpa pahle bhi tum aise hi bane the। kalpa pahle jisne jitna purushaartha kiya hai woh karenge। apna varsa lenge। saakshi ho dekhte hain। baap kehte hain tum messenger ho aur to koi messenger, paigambar hote nahin। satguru sadgati karne vaala ek hai। anya dharmanetaayen aate hain dharma ki sthaapna karne। to guru kaise thahre। main to sabko sadgati deta hoon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada isi nashe mein rehna hai ki shanti, sukh, sampatti ka saagar baap humein mila hai, humein sab-kuchh ek se milta hai। aise baap ke ham sammukh baithe hain। woh humein padha rahe hain।

2) apna ahankaar chhod baap samaan nishkaam seva karni hai। nirhankaari hokar rehna hai। messenger-paigambar ban sabko paigaam dena hai।

vardaan:- sarva padaartho ki aasaktiyon se nyaare anaasakta, prakritijeet bhav

agar koi bhi padaartha karmendriyon ko vichlit karta hai arthaat aasakti ka bhaav utpanna hota hai to bhi nyaare nahin ban sakenge। ichchhaayen hi aasaktiyon ka roop hain। kai kehte hain ichchha nahin hai lekin achha lagta hai। to yeh bhi sookshm aasakti hai - iski maheen roop se checking karo ki yeh padaartha arthaat alpakaal sukh ke saadhan aakarshit to nahin karte hain? yeh padaartha prakriti ke saadhan hain, jab inse anaasakta arthaat nyaare banenge tab prakritijeet banenge।

slogan:- mere-mere ke jhamelon ko chhod behad mein raho tab kahenge vishwa kalyaankaari।