Daily Murli for Monday 1 April 2024

01-04-2024 praatahmurli om shanti "baapdaada"' madhuban

“meethe bachche - tumhaara yeh jeevan devtaaon se bhi uttam hai, kyonki tum abhi rachayita aur rachna ko yathaartha jaankar aastik bane ho''

prashn:- sangamayugi eeshvareey parivaar ki visheshta kya hai, jo saare kalpa mein nahin hogi?

uttar:- isi samay svayan eeshvar baap bankar tum bachchon ko sambhaalte hain, teacher bankar padhaate hain aur satguru bankar tumhein gul-gul (phool) banaakar saath le jaate hain। satayug mein daivi parivaar hoga lekin aisa eeshvareey parivaar nahin ho sakta। tum bachche abhi behad ke sannyaasi bhi ho, raajayogi bhi ho। raajaai ke liye padh rahe ho।

om shanti। yeh school va paathshaala hai। kiski paathshaala hai? aatmaon ki paathshaala। yeh to zaroor hai aatma shareer bigar kuchh sun nahin sakti। jab kaha jaata hai aatmaon ki paathshaala to samajhna chaahiye - aatma shareer bigar to samajh nahin sakti। phir kehna padta hai jeev aatma। abhi jeev aatmaon ki paathshaala to sabhi hain isliye kaha jaata hai yeh hai aatmaon ki paathshaala aur parampita paramatma aakar padhaate hain। woh hai jismaani padhaai, yeh hai roohaani padhaai, jo behad ka baap padhaate hain। to yeh ho gai god father ki university। bhagvaanuvaach hai na। yeh bhakti maarga nahin hai, yeh padhaai hai। school mein padhaai hoti hai। bhakti mandir tikaanon aadi mein hoti hai। ismen kaun padhaate hain? bhagvaanuvaach। aur koi bhi paathshaala mein bhagvaanuvaach hota hi nahin hai। sirf yeh ek hi jagah hai jahaan bhagvaanuvaach hai। oonche te oonche bhagwan ko hi gyaan saagar kaha jaata hai, vahi gyaan de sakte hain। baaki sab hai bhakti। bhakti ke liye baap ne samjhaaya hai ki usse koi sadgati nahin hoti। sarva ka sadgati daata ek paramatma hai, woh aakar raajayog sikhlaate hain। aatma sunti hai shareer dvaara। aur koi knowledge aadi mein bhagvaanuvaach hai hi nahin। bhaarat hi hai jahaan shiv jayanti bhi manaai jaati hai। bhagwan to niraakaar hai phir shiv jayanti kaise manaate hain। jayanti to tab hoti hai jab shareer mein pravesh karte hain। baap kehte hain main to kabhi garbha mein pravesh nahin karta hoon। tum sab garbha mein pravesh karte ho। 84 janma lete ho। sabse jaasti janma yeh lakshmi-naaraayan lete hain। 84 janma lekar phir saanvara, gaanvade ka chhora bante hain। lakshmi-naaraayan kaho ya raadhe-krishna kaho। raadhe-krishna hain bachpan ke। woh jab janma lete hain to svarga mein lete hain, jisko baikuntha bhi kaha jaata hai। pahla number janma inka hai, to 84 janma bhi yeh lete hain। shyaam aur sundar, sundar so phir shyaam। shreekrishna sabko pyaara lagta hai। shreekrishna ka janma to hota hi hai nai duniya mein। phir punarjanma lete-lete aakar puraani duniya mein pahunchte hain to shyaam ban jaate hain। yeh khel hi aisa hai। bhaarat pahle satopradhaan sundar tha, ab kaala ho gaya hai। baap kehte hain itni sab aatmaayen mere bachche hain। abhi sab kaam chita par baithkar jalkar kaale ho gaye hain। main aakar sabko vaapis le jaata hoon। yeh srishti ka chakra hi aisa hai। phoolon ka bageecha woh phir kaanton ka jangal ban jaata hai। baap samjhaate hain tum bachche kitne sundar vishwa ke maalik the, ab phir ban rahe ho। yeh lakshmi-naaraayan vishwa ke maalik the। yeh 84 janma bhog phir aise ban rahe hain arthaat unhon ki aatma ab padh rahi hai।

tum jaante ho satayug mein apaar sukh hain, jo kabhi baap ko yaad karne ki darkaar bhi nahin rehti hai। gaayan hai - duhkh mein simran sab karen… kiska simran? baap ka। itne sabka simran nahin karna hai। bhakti mein kitna simran karte hain। jaante kuchh bhi nahin। shreekrishna kab aaya, woh kaun hai - kuchh bhi jaante nahin। shreekrishna aur shreenaaraayan ke bhed ko bhi nahin jaante hain। shivbaaba hai oonch te oonch। phir unke neeche brahma, vishnu, shankar… unko phir devta kaha jaata hai। log to sabhi ko bhagwan kehte rehte hain। sarvavyaapi kah dete hain। baap kehte hain - sarvavyaapi to maaya 5 vikaar hain jo ek-ek ke andar hain। satayug mein koi vikaar hota nahin। muktidhaam mein bhi aatmaayen pavitra rehti hain। apvitrata ki koi baat nahin। to yeh rachayita baap hi aakar apna parichay dete hain, aadi-madhya-ant ka raaz samjhaate hain, jisse tum aastik bante ho। tum ek hi baar aastik bante ho। tumhaara yeh jeevan devtaaon se bhi uttam hai। gaaya bhi jaata hai manushya jeevan durlabh hai। aur jab purooshottam sangamayug hota hai to heere jaisa jeevan banta hai। lakshmi-naaraayan ko heere jaisa nahin kahenge। tumhaara heere jaisa janma hai। tum ho eeshvareey santaan, yeh hain daivi santaan। yahaan tum kehte ho ham eeshvareey santaan hain, eeshvar hamaara baap hai, woh hamko padhaate hain kyonki gyaan ka saagar hai na, raajayog sikhlaate hain। yeh gyaan ek hi baar purooshottam sangamayug par milta hai। yeh hai uttam te uttam puroosh banne ka yug, jisko duniya nahin jaanti। sab kumbhakran ki agyaan neend mein soye pade hain। sabka vinaash saamne khada hai isliye ab koi se bhi bachchon ko sambandh nahin rakhna hai। kehte hain antakaal jo stri simre… ant samay mein shivbaaba ko simrenge to naaraayan yoni mein aayenge। yeh seedhi bahut achhi hai। likha hua hai - ham so devta phir so kshatriy, aadi। is samay hai raavan raajya, jabki apne aadi sanaatan devi-devta dharma ko bhool aur dharmon mein phans pade hain। yeh saari duniya lanka hai। baaki sone ki lanka koi thi nahin। baap kehte hain tumne apne se bhi jaasti meri glaani ki hai, apne liye 84 laakh aur mujhe kan-kan mein kah diya hai। aise apkaari par main upkaar karta hoon। baap kehte hain tumhaara dosh nahin, yeh drama ka khel hai। satayug aadi se lekar kaliyug ant tak yeh khel hai, jo phirna hi hai। isko sivaae baap ke koi samjha na sake। tum sab brahmaakumaar-kumaariyaan ho। tum brahman ho eeshvareey santaan। tum eeshvareey parivaar mein baithe ho। satayug mein hoga daivi parivaar। is eeshvareey parivaar mein baap tumko sambhaalte bhi hain, padhaate bhi hain phir gul-gul banaakar saath bhi le jaayenge। tum padhte ho manushya se devta banne ke liye। granth mein bhi hai manushya se devta kiye… isliye paramatma ko jaadoogar kaha jaata hai। narka ko svarga banaana, jaadu ka khel hai na। svarga se narka banne mein 84 janma phir narka se svarga chapti mein (second mein) banta hai। ek second mein jeevanmukti। main aatma hoon, aatma ko jaan liya, baap ko bhi jaan liya। aur koi manushya yeh nahin jaante ki aatma kya hai? guru anek hain, satguru ek hai। kehte hain satguru akaal। parampita paramatma ek hi satguru hai। parantu guru to dher hain। nirvikaari koi hai nahin। sab vikaar se hi janma lete hain।

abhi raajdhaani sthaapan ho rahi hai। tum sab yahaan raajaai ke liye padhte ho। raajayogi ho, behad ke sannyaasi ho। woh hathayogi hain had ke sannyaasi। baap aakar sabhi ki sadgati kar sukhi banaate hain। mujhe hi kehte hain satguru akaal moorta। vahaan ham ghadi-ghadi shareer chhodte aur lete nahin। kaal nahin khaata। tumhaari bhi aatma avinaashi hai, parantu patit aur paavan banti hai। nirlep nahin hai। drama ka raaz bhi baap hi samjhaate hain। rachayita hi rachna ke aadi-madhya-ant ka raaz samjhaayenge na। gyaan ka saagar vahi ek baap hai। vahi tumko manushya se devta double sirtaaj banaate hain। tumhaara janma kaudi jaisa tha। ab tum heere jaisa ban rahe ho। baap ne ham so, so ham ka mantra bhi samjhaaya hai। woh kah dete aatma so paramatma, paramatma so aatma, ham so, so ham। baap kehte hain aatma so paramatma kaise ban sakti hai! baap tumko samjhaate hain - ham aatma is samay to brahman hain phir ham aatma brahman so devta banenge, phir so kshatriy banenge, phir shoodra so brahman। sabse ooncha janma tumhaara hai। yeh hai eeshvareey ghar। tum kiske paas baithe ho? maat-pita ke paas। sab bhaai-behen hain। baap aatmaon ko shiksha dete hain। tum sab hamaare bachche ho, varse ke hakdaar ho, isliye paramatma baap se har ek varsa le sakte hain। budhe, chhote, bade, sabko hak hai baap se varsa lene ka। to bachchon ko bhi yahi samjhaao - apne ko aatma samjho aur baap ko yaad karo to paap kat jaayenge। bhakti maarga vaale in baaton ko kuchh bhi samjhenge nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class

bachche baap ko pahchaante bhi hain, samajhte bhi hain ki baap padha rahe hain, unse behad ka varsa milna hai। parantu mushkilaat yeh hai jo maaya bhula deti hai। koi na koi vighna daal deti hai jisse bachche dar jaayen। usmein bhi pahle number mein vikaar mein girte hain। aankhen dhokha deti hain। aankhen koi nikaalne ki baat nahin। baap gyaan ka netra dete hain, gyaan aur agyaan ki ladaai chalti hai। gyaan hai baap, agyaan hai maaya। inki ladaai bahut teekhi hai। girte hain to samajh mein nahin aata। phir samajhte hain main gira hua hoon, mainne apna bahut akalyaan kiya hai। maaya ne ek baar haraaya to phir chadhna mushkil ho jaata hai। bahut bachche kehte hain ham dhyaan mein jaate, parantu usmein bhi maaya pravesh ho jaati hai। pata bhi nahin padta hai। maaya chori karaayegi, jhooth bulvaayegi। maaya kya nahin karaati hai! baat mat poochho। ganda bana deti hai। gul-gul bante-bante phir chhi-chhi ban jaate hain। maaya aisi jabardasta hai jo ghadi-ghadi gira deti hai।

bachche kehte hain baba ham ghadi-ghadi bhool jaate hain। tadbeer karaane vaala to ek hi baap hai, parantu kiski takdeer mein nahin hai to tadbeer bhi kar nahin sakte। ismen koi ki paas-khaatiri bhi nahin ho sakti। na extra padhaate hain। us padhaai mein to extra padhne liye teacher ko bulaate hain। yeh to takdeer banaane liye sabhi ko ekras padhaate hain। ek-ek ko alag kahaan tak padhaayenge? kitne dher bachche hain! us padhaai mein koi bade aadmi ke bachche hote hain, adhik kharcha kar sakte hain to unko extra bhi padhaate hain। teacher jaante hain ki yeh dull hai isliye padhaakar unko scholarship laayak banaate hain। yeh baap aise nahin karte hain। yeh to sabhi ko ekras padhaate hain। woh hua teacher ka extra purooshaartha karaana। yeh to extra purooshaartha kisko alag karaate nahin hain। extra purooshaartha maana hi teacher kuchh kripa karte hain। bhal aise paise lete hain। khaas time de padhaate hain jisse woh jaasti padhkar hoshiyaar hote hain। yahaan to jaasti kuchh padhne ki baat hi nahin। inki to baat hi ek hai। ek hi mahaamantra dete hain - manmanaabhav ka। yaad se kya hota hai, yeh to tum bachche samajhte ho। baap hi patit-paavan hai jaante ho unko yaad karne se hi ham paavan banenge। achha - goodnight।

dhaarna ke liye mukhya saar:-

1) saari duniya ab kabradaakhil honi hai, vinaash saamne hai, isliye koi se bhi sambandh nahin rakhna hai। ant-kaal mein ek baap hi yaad rahe।

2) shyaam se sundar, patit se paavan banne ka yeh purooshottam sangamayug hai, yahi samay hai uttam puroosh banne ka, sada isi smriti mein rah svayan ko kaudi se heere jaisa banaana hai।

vardaan:- gyaan dhan dvaara prakriti ke sab saadhan praapta karne vaale padma-padmapti bhav

gyaan dhan sthool dhan ki praapti svatah karaata hai। jahaan gyaan dhan hai vahaan prakriti svatah daasi ban jaati hai। gyaan dhan se prakriti ke sab saadhan svatah praapta ho jaate hain isliye gyaan dhan sab dhan ka raaja hai। jahaan raaja hai vahaan sarva padaartha svatah praapta hote hain। yeh gyaan dhan hi padma-padmapti banaane vaala hai, parmaartha aur vyavhaar ko svatah siddha karta hai। gyaan dhan mein itni shakti hai jo anek janmon ke liye raajaaon ka raaja bana deti hai।

slogan:- “kalpa-kalpa ka vijayi hoon'' - yeh roohaani nasha emerge ho to maayaajeet ban jaayenge।